Tuma 4 - Tampulma

Pita Awa Jɔn Fun Kok Ba Titi Ju Tim Suwachak Ni

¹ Pita awa Jɔn ha funɛ vɛɛna sɛm zɛmɛ ta ni chene, Koosa dam kɔkɔɔrsi ta, ba naa la il Koosa bar jɛɛmi dam ti nihɛɛ, awa ba naa ba yir Sajusi tima fun wa ba wati.

² Ba fun na paan a du nitumɛ nara balɛ ta ni, domi ba waa ŋɔ zɛmɛ ta ni di Koosa lɛlɛ Yesu a li o sou ni. Nan funɛ biksi ba di Koosa zi wa lɛli narau wuzu digi a li ba sou ni.

³ Ba fun kpak ba a tɔ ba dɛ zaazɔn saha hali chɔɔsa wa pisi.

⁴ Zɛmɛ ta nidamata fun la nɔɔni di Pita sɛm ta ya wutiu a nyɛ ba se su Yesu. Nibaala duŋduŋ funɛ dugli nara tusugsa nyuunu.

⁵ Chɔɔsa funɛ wa pisi, Koosa dam kɔkɔɔrsi ta, Ju tim ta nihɛɛti ta, Koosa chiksɛ nibiksɛ ta,

⁶ Anas, Kaifas naa ha funɛ ya Koosa dam kɔkɔɔrsi ta nihɛɛ, Jɔn, Alɛzanda, awa ba naa wa Koosa dam kɔkɔɔrsi ta nihɛɛ ti ya lul bɛgim, ba maga funɛ lagmi dɔŋ ni a li Jɛrusalɛm ni.

⁷ Ba fun nyɛ Pita awa Jɔn wa chiŋi ba suwachak ni a pɛɛsi ba, “Anti nyɛ ma kpok nɔ ma tiibi gbarigi ti o val nan? Anti nyɛ ma nyinbaan ma tum chen ni?”

⁸ Koosa siim weri ti fun si Pita ni o ŋɔ ba, “Ma koorsi na awa ma nihɛɛta,

⁹ ma daŋni ya ŋɔ mau chenani ya dɛ suŋi baal ti di o na alaafɛ.

¹⁰ Ya daŋni ma awa Ju tim ta maga zim chenani mu kaa ŋɔ mau nɛnɛ. Yesu Kristo Nazarɛt nar kpokre ya kpa a tiibi un. Ma fun kpaasi Yesu a mari daakakli ti ni o sou, amaa Koosa fun lɛlɛ unu a li o sou ni. Yesu daharɛ baal nɔ na alaafɛ a wa chiŋi bar nɔ zinan nan.

¹¹ Ba funɛ sɔbi Yesu wɛu a li Koosa sɛm tɔn ti ni a ŋɔ, ‘Buŋkul naa tɛsaalsa fun vɛ chen, waa ya buŋkul kpok aa ya kibirigi.’

¹² “O duŋduŋ koti a yisi nara a li ba tum tagna ni di ba tiŋ Koosa. Nandigi wa to tɛɛnɛ nɔ maga ni a la zi koti a chiŋi o bar chiŋi ni a tum chen.”

¹³ Ba naa funɛ lagmi dɔŋ ni chen fun nu Pita sɛma, alaazibu fun kpak ba kinkan. Ba fun na di Pita awa Jɔn ya nyu bilim timwa, amaa hansura tama wa fun kpak ba. Kin nama funɛ nyɛ ba lisi di ba wa Yesu funɛ ya kpɛgsiwa.

¹⁴ Baal naa Pita awa Jɔn fun tiibi chen fun chiŋi ba naa funɛ lagmi dɔŋ ni, suwachak ni di ba na un. Chendaha ba fun moori a vɛ koti a sɛm wu digi.

¹⁵ Ba fun ŋɔ ba kpa Pita awa Jɔn a li sal ka ba sɛm chenani ba zi ya ba.

¹⁶ Ba fun ŋɔ dɔŋ ni, “Yɛrɛ ya kaa ya nara nama? Jɛrusalɛm tim ta maga zimu di Pita awa Jɔn tum tum zenu kinkan. Ya wa kikoti a tɔ chenani ba fun tum.

¹⁷ Ma nyɛ ya tɛ ba nin di ba ta bu kpa Yesu sɔn a biksi nara, chen ni o wa zi mɔɔli a li tɔhɔn ti ni.”

¹⁸ Ba funɛ sɛm dɔŋ ni peti, ba fun ŋɔ ba kpa Pita awa Jɔn a bu zu wa. Ba fun tɛ ba nin di ba ta bu kpa Yesu sɔn a sɛm koo a biksi nara tima.

¹⁹ Amaa Pita awa Jɔn funɛ ŋɔ bau, “Ma ŋɔ ya chenani ya zi ya a deŋli Koosa suwachak ni. Ya tiŋ o nɔ koo ya tiŋ ma nɔɔ?

²⁰ Ya wa kigil di ya ŋɔ nara ni chenani ya fun na a nu.”

²¹ Ba fun bukoo tɛ ba nin kpok ni a gbaari a nyɛ ba kaali. Ba wa fun koti a lɛrgi ba diŋsa, domi nara tima maga funɛ pɛgi Koosa a li chenani ya daha.

²² Baal naa na alaafɛ a li tum zen nɔ ni funɛ kaali bun fumnaasiu.

Yesu Nitiŋɛ Fun Sumi Koosa O Nyɛ Ba Kpak Ba Bambe

²³ Pita awa Jɔn fun vaan bur kaali di ba la lagmi Yesu gantɛl tiŋsi ta ni a ŋɔ ba chenani Koosa dam kɔkɔɔrsi ta awa Ju tim nihɛɛti ta fun ŋɔ ba.

²⁴ Ba funɛ nu chen, ba maga funɛ sumi Koosa a ŋɔ, “Ya kunyana, i funɛ naami buudaha awa tɛɛnɛ nɔ maga wa teku awa kin naa maga kpak miisa a nyɛn.

²⁵ I funɛ nyɛ i siim weri ti ŋɔ ya nawaal Devid naa ya i tumtumna, chenani o zi sɔbi a li i sɛm tɔn ti ni a ŋɔ, ‘Baŋnɛ ba naa vɛ ya Ju tima fun na paan kinkan a tum tum yɔrisa a du hin ni?

²⁶ Tɛɛnɛ nɔ maga koorsa funɛ saksiu awa ba nihɛɛta funɛ lagmi dɔŋ ni di ba chem ya kunyana Koosa awa naa o fun vɔu di o zi wa tumu wuzu digi chen a li laal ni.’

²⁷ Chen vɛɛna, Hɛrɔd awa Pontius Pailɔt wa Ju tim ta wa ba naa vɛ ya Ju tima fun lagmi dɔŋ ni a go i be Yesu ni. I funɛ lisi un di o ya i tumtumna awa naa i fun ŋɔ di i zi wa tumu wuzu digi.

²⁸ I funɛ piin lisi chenani ba zi ya unu. I funɛ lisi chenu i kpok awa i tutɔ ti daha.

²⁹ Lalaknɔ wara, ya kunyana, i zim chenani ba sɛm hansura sɛma a du ya niu. Ya naa ya i tumtumsa, ya sumi hinu di i nyɛ ya bambi kpoka ya ŋɔ nara ni i laaboor weri ti wɛ.

³⁰ Nyɛ wichɔɔrsa na alaafɛ, chen ni nara zi zim di i kpak kpoku. Nyɛ ya kpa i be Yesu naa i fun lisi, sɔn a tum tum zene awa alaazibu tuma.”

³¹ Ba funɛ sumi Koosa a peti, dɛ naa ba fun lagmi chen, zigsi ka o siim weri ti si ba bambe ni. Ba fun li a ŋɔ nara ni Koosa laaboor weri ti wɛ awa bambi kpoka ni.

Yesu Nitiŋɛ Fun Bɔni Kina Maga A Nyɛ Dɔŋ Ni

³² Ba naa maga se su Yesu funɛ ya nibɛgimnɛ. Nandigi wa fun ŋɔ di o titi kina ha vɛɛn ya o kinawa. Ba fun kpa a maga a bɔni dɔŋa.

³³ Nitumɛ ta fun ŋɔ nara tima ni chenani ba fun na ka Koosa lɛli ba kunyana Yesu a li o sou ni wa ba se ni. Koosa funɛ suŋi ba kinkan di ba sɛm ta zu nara tima bambe nɛnɛ.

³⁴ Kundɔŋ wa fun pɔɔgi Yesu nitiŋɛ ta nidigi. Ba naa maga dɔ tɛɛnɛ koo damsa funɛ yogli au a kpa malɛ ta,

³⁵ a du nitumɛ ta nisa ni. Ba ka kpa a du ba naa la daŋni a nisa ni.

³⁶ Ba nidigi sɔn funɛ ya Josɛf. Nitumɛ ta gbanko funɛ yir un Barnabas. Barnabas ti mun ya, ‘naa la kpami nara’. O funɛ li lul naa ba yir Livai nɛɛ a li pulum ni gore. Ba yir dooni Saiprus.

³⁷ O funɛ ya ba nidigirɛ a yogli o tɛɛnɛ a kpa malɛ ta a du nitumɛ ta nisa ni.