Tuma 3 - Tampulma

Pita Awa Jɔn Fun Tiibi Gbarigi

¹ Wuzu digi zaazɔn saha naa Ju tim ta yaa la sumi Koosa chen, Pita awa Jɔn fun la kaali Koosa bar jɛɛmi dam ti. Chen saha ti ya niparɛ yaa si a li ba par ni chen.

² Ba fun wa tel bulzɔɔnɔ naa ba yir kiweri chen ka baal digi kani dooni. Ba funɛ lul un gbarigirɛ. Wuzu kam o walɛ yaa fun zer unu a wa kansi bulzɔɔnɔ ti ni di o sumi kina a li ba naa wa zu Koosa bar jɛɛmi dam ti.

³ O funɛ na Pita awa Jɔn ka ba daŋni ba zu, o funɛ sumi kina ba wati.

⁴ Ba fun chiŋi a nyini o se ni ka Pita ŋɔ un, “Nyini ya.”

⁵ O fun zer o nyuha buudaha a nyini ba a lisi di ba kaa nyɛ un kundɔŋnɛ.

⁶ Pita fun bu ŋɔ un, “Ya wa kpak malɛ a la zi nyɛ hin, amaa ya zi nyɛ hin kundɔŋu. Kpa Yesu Kristo Nazarɛt nar kpok a si a val.”

⁷ Pita fun kpak o nindil a zer un chiŋsi. O naŋgere fun vaan kpok.

⁸ Kpok ti funɛ vaan wa zu un, o si za chiksi a val. Pita awa Jɔn funɛ la Koosa bar jɛɛmi dam ti, o tiŋ ba a za a chiksi a la pɛgi Koosa.

⁹ Ba naa maga funɛ nyɛn Koosa bar jɛɛmi dam ti ni chen, fun na un ka o za a chiksi a la pɛgi Koosa chen.

¹⁰ Ba fun zim di waa funɛ ya gbarigi a yaa kani bulzɔɔnɔ naa ba yir kiweri chen mun ni. Alaazibu fun kpak ba kinkan o si a val chen daha.

Pita Fun Biksi Nara Koosa Bar Jɛɛmi Dam ni

¹¹ Pita awa Jɔn funɛ wa tel zaŋ naa ba yir koor Solomon zaŋ, baal ti ha funɛ vɛɛn kpaksi ba nisawa. Nidamata fun chɔ a gor ba a du bambaan ni.

¹² Pita funɛ na ka zɛmɛ ta gbaari, o fun ŋɔ ba, “Ma Ju tima, yɛrɛ ma nyɛ alaazibu kpak ma chen? Yɛrɛ ma nyini ya se ni chen ni? O wa ya ya titi kpok nee koo chenani ya yaa jɛɛmi Koosa nɛnɛ nyɛ baal nɔ na alaafɛ.

¹³ Koosa naa ma nawaalsa Abraham, Aizik awa Jakɔb funɛ jɛɛmi, kpa o jirima awa o chaani kinkan a nyɛ o tumtumna Yesu ni. Ma funɛ kpak unu a du gɔbnati nyuhu tiina naa ba yir Pailɔt nin ni. Pailɔt funɛ kpa un wa li ma suwachak a daŋni o gil un o la, ma fun vɛ.

¹⁴ Ma ka fun sumi un di o kpa nara nikpuuli a nyɛ ma. Yesu nɔ funɛ ya tum were nitumirɛ ka Koosa fun lisi un di o tiŋ o tutɔ.

¹⁵ Ma waa funɛ kpu naa kpa Koosa mi fali a nyɛ nara ni, amaa ya funɛ nau wa ya se ni ka Koosa lɛli un a li o sou ni.

¹⁶ Yesu kpok ti funɛ nyɛ baal ti na alaafɛ. Chenani ma na aa zim kinkin naa ya zinan li chenani ya se su Yesu nee. Chendaha baal nɔ na alaafɛ bar nɔ ma suwachak ni.

¹⁷ “Mu dɔŋtima, mu zimu di ma wa ma nihɛɛta wa fun zim chenani ma ya Yesu chen.

¹⁸ Koosa funɛ nyɛ o witinsi ta mɔɔli saha digi di naa o vɔu di o zi wa tumu chen, zi wa namsiu. Koosa fun nyɛ ba sɛm ta ya wuti.

¹⁹ Adaha ma gil ma tum tagna a bur tiŋ ma kunyana Koosa, chen ni o wa zi bu na ma galimsa.

²⁰ Ma ya chen, o zi nyɛ ma bambe bukoo na kpoku a gbaari a tum o be Yesu naa o piin lisi di o kpa nyɛ ma. Waa ya naa o fun vɔu di o zi tumu wuzu digi.

²¹ Koosa funɛ nyɛ o witinsa ba naa o fun lisi a nyɛ o titi ni, mɔɔliu saha digi di wuzu digi o zi wa nyɛ kina maga burgi kifalɛu. O lawa Yesu kpalimi Koosa tɔhɔn ti niu hali saha ti wa tel.

²² Ma nawaal Mosis funɛ sɔbiu a li Koosa sɛm tɔn ti ni a ŋɔ, ‘Ma kunyana Koosa zi wa lisi o witinsi ta digiu a li ma tuhu ni a tum un ma wati a chi chenani o fun tum min ma wati nan. Maa tiŋ chenani maga o ŋɔ ma di ma tum.

²³ Ba naa maga vɛ tiŋ chen, Koosa zi waligi bau a li o nara ni a ta ba yɔri.’

²⁴ Koosa witiina naa ba yir Samuɛl awa ba naa maga tiŋ o gantɛl, ba fun mɔɔli Koosa laaboora a te ŋɔ di kin nama zi yau saha nɔ.

²⁵ Vɔwɛ naa Koosa fun vɔu a nyɛ o witinsi ta kpa a a mɔɔli, awa chenani o wa ma nawaalsi ta fun ya nɔ bɛgim, a ya ma gbanko kinawa zinan. Ba funɛ sɔbiu a li Koosa sɛm tɔn ti ni di o ŋɔ Abraham ni, ‘Mu zi nyɛ i bi lulɛ kpa nyusumu a nyɛ tɛɛnɛ nɔ tim maga ni.’

²⁶ Chendaha Koosa fun lisi o be Yesu di o ya o tumtumna a te tum un ma wati di o kpa o nyusum a nyɛ ma ma gil ma tum tagni ta a bur tiŋ Koosa.”