Tuma 28 - Tampulma

Chenani Mɔltɔ Tima Fun Suŋi Pɔɔl Awa O Dɔŋtima

¹ Ba naa funɛ nyɛn doon ka ni ti go ba chen, fun ŋɔ ya di doon sɔn ya Mɔltɔ.

² Ba funɛ ya nibin werewa ya wati a la ya a du. Doon funɛ mi ka wa nyɛn. Chendaha ba fun biksi din di ya weeri.

³ Pɔɔl funɛ lagmi daasa a du din ti ni chene, dum fun li dooni a gasi o nin. Din ti nunum funɛ nyɛ dum ti li.

⁴ Ba naa funɛ nyɛn pulum ti ni fun na dum ti ka o gasi Pɔɔl nin ti. Ba fun ŋɔ dɔŋ ni, “Baal nɔ funɛ kpu nandigirɛ. Hali ni ti vɛ di un chen, amaa lalaknɔwa o na o nyɔɔra a zi sou.”

⁵ Pɔɔl fun misi dum ti o chel din ti ni, ka o vɛ ya un wu digi.

⁶ Ba funɛ nyini un a la pɔ di o fɔɔsi a chel tɛɛnɛ ni a sou. Ba fun nyini a vusi a na di wu digi wa ya un. Ba fun chɛrgi ba bambe a li chenani ba fun te ŋɔ di o kpu nandigirɛ chen a ŋɔ di Koosa funɛ kok un.

⁷ Ya wa pulum ti koor bar nyɛni wa fun bol dɔŋ ni. O sɔn funɛ ya Publius. O fun la ya a du ya nyɛn o wati wuzu butora.

⁸ Kabilima funɛ kpak Publius nyana ka o chaari a chɔ o kichɔɔli ni. Pɔɔl fun nu o wichɔɔrti ti wɛ a fun la zu o dɛ chɔɔli ti a sumi Koosa a nyɛ un a kpa o nisa a sak un ni a tiibi un.

⁹ Chenani o fun tum chen laaboora mɔɔli pulum naa ni go chen maga. Ba naa maga funɛ wi a nyɛn dooni fun wa Pɔɔl wati o tiibi ba.

¹⁰ Ba fun kpa papaha damata a nyɛ ya. Ya funɛ saksi di ya li pulum ti ni pɛnsa tora gantɛl ni, ba fun kpa ya papaha a gbaari kin nawara ya daŋni ya kpa li ya val ti ni.

Pɔɔl Fun La Tel Room

¹¹ Alɛzandria tima arŋa funɛ nyɛn doone fufuk saha ti. Ba funɛ yir un, ‘vursa a naa ya leusisa’. Ya fun la zu un a kaali.

¹² Ya fun la tel tɔhɔn naa ba yir Sirakus a nyɛn dooni wuzu butora.

¹³ Wuzu butora ta gantɛl nɛɛ, ya fun li dooni a kaali tɔhɔn naa ba yir Rɛjium a li Itali pulum ni. Chɔɔsa funɛ wa pisi, peha fun ya a li pul mun ni ka ya li dooni. Wuzu bilɛ gantɛl ni ya fun la tel tɔhɔn naa ba yir Puteoli, a li arŋ ti ni dooni.

¹⁴ Yesu nitiŋɛ ba naa nyɛn dooni, fun nyɛ ya wa nyɛn ba wati. Wuzu bunɔpɛ gantɛl ni, ya fun li dooni a kaali Room.

¹⁵ Yesu nitiŋɛ ba naa nyɛn dooni, fun val nyinbaan ziŋi a wa chem ya. Bɔnɛ fun chem ya a li yawa naa ba yir Apius. Ba wa ya fun val tama ka ba naa tiŋ ba gantɛl a wa chen, fun chem ya a li hɔɔra bar chɔɔli damsi butora. Pɔɔl funɛ na ba chen, o kpami un o zaami Koosa chen daha.

Chenani Pɔɔl Fun Na Room Ni

¹⁶ Ya funɛ la tel Room, ba fun nyɛ Pɔɔl nyɛn o duŋduŋ ka lanjima il un.

¹⁷ Wuzu butora gantɛl, o fun yir Ju tima ba naa nyɛn dooni, nihɛɛta ba lagmi a wa o wati. O fun ŋɔ ba, “Mu niinbisa, mu wa fun tum tum tagin a du ya walɛ ni. Mu ka wa fun vɛɛn biksi nara di ba ta bu tiŋ ya nawaalsi ta nyinbaan. Hali nan daha, ba fun kpak min a tɔ dɛ a li Jɛrusalɛm ni a kpa min a du Roman tim nisa ni.

¹⁸ Ba fun di mu sɛria a na di mu wa ya wi naa la zi nyɛ mu sou a la daŋni ba lisi min.

¹⁹ Ya walɛ ta wa funɛ daŋni ba lisi min a fun namsi min di mu la sumi gɔbnati nyuhu tiin nihɛɛ naa nyɛn dooni, di o kpa min la nyɛ koorsi ta nyuhu tiina Siiza ni o di mu sɛria. Mu wa wa bar nɔ di mu wa fiksi bau. Ba funɛ muksi minu. Chendaha mu wa.

²⁰ Ya Ju tima kpak bambi bɛgimu di Koosa zi tum naa o fun vɔu di o tumu ba wati wuzu digi. Roman tim ta funɛ kpa zɔgliu a vɔu mu nisa a nyɛ lanjima nɔ il min domi naa ya nara kpak bambi bɛgim a nyɛ chen daha. Chendaha mu yir ma di ma wa min na dɔŋa.”

²¹ Ju tima ba naa funɛ nyɛn Room ni, fun ŋɔ un, “Ya niinbisa ba naa nyɛn Judia pulum ni, digi wa to a sɔbi i wɛ a du tɔn ni a nyɛ ya. Nandigi wa gba a li dooni a wa ŋɔ ya i laaboora koo a chɔk i sɔn ya wati.

²² Ya zimu di ba naa nyɛn bawu maga ni ka ba sɛm sɛm tagna a du ba naa wa hin la tum tum ni. Chendaha ya daŋni ya nu chenani i lisi.”

²³ Ba fun la nɔɔni di ba wa Pɔɔl zi bu lagmiu. A wuzu ti fun wa tel, ba fun i a gbaari a wa doonani o nyɛn chen. A piili chɔɔsa hali nha wa chel, o fun biksi ba di saha naa Koosa zi wa dɔ nara telu mun. O fun karimi Koosa sɛm tɔn ti bar digi a li chiksɛ naa o fun lisi a nyɛ Mosis ni chen awa sɛm naa Koosa witinsi ta fun sɔbi di o biksi ba chenani o fun ŋɔ Yesu wɛ chen ya wutirɛ.

²⁴ Ba bɔnɛ fun nyɛ ba se su o biksi ti. Ba bɔnɛ ka wa fun nyɛ ba se su un.

²⁵ Pɔɔl sɛm ta fun nyɛ Ju tim ta di dɔŋa wa amɔrɛ ka ba funɛ daŋni ba la, amaa Pɔɔl funɛ nyɛ ba chiŋiu o sɛm ba sɛm tama a gbaari. O funɛ ŋɔ bau, “Koosa siim weri ti fun nyɛ Koosa witiina Azaaya sɛm wuti sɛma a nyɛ ma nawaalsi ta ni saha digi.

²⁶ O fun sɛm di Koosa ŋɔ un, ‘La ŋɔ Ju tim ta ni, ba kpak seu a vɛ naali. Mu ŋɔ bau, ba ka wa zim mu sɛm ta mun.

²⁷ Nara nama bambe situ. Ba tɔ ba diŋsiwa awa ba se gbanko. O vɛ ya chen, ba bambe fu zi lisiu ka ba nu mu sɛm ta a koti a na. Ba bambe zi chɛrgiu, chen ni mu gil ba tum tagna a nyɛ ba.’ ”

²⁸ Pɔɔl fun bukoo ŋɔ ba, “Mu daŋni ma zimu di ba naa vɛ ya Ju tima na nyinbaanu di ba nu Koosa laaboor weri ti di o daŋni o yisi bau a li ba tum tagna ni ba tiŋ un. Ba nidamata zi nu unu.” ((

²⁹ Pɔɔl funɛ sɛm chen Ju tim ta funɛ di dɔŋa wa amɔrɛ a ta.))

³⁰ Pɔɔl fun la nyɛn nandigi dam ni a la bɔ un dam ti nyuhu ni bunsa lɛ. O fun la ba naa maga wa di ba zaami un a du.

³¹ O fun kpak bambi a biksi ba di saha naa Koosa kaa wa dɔ nara chen telu awa ya kunyana Yesu Kristo wɛ. Nandigi wa fun to a tɔ un nyinbaan di o ta sɛmi.