Tuma 27 - Tampulma

Pɔɔl Fun La Zu Arŋa A Kaali Room

¹ Saha fun wa tel di ba kpa Pɔɔl kila Itali pulum doonani koorsi ta nyuhu tiina Siiza nyɛn. Lanjimasa nihɛɛ digi funɛ nyɛn doon ba yir un Julius. Koor Siiza fun kpa o titi sɔn a du Julius lanjimasa puk ti. Ba fun kpa Pɔɔl awa ba naa ba tɔ ba dɛ bɔnɛ a du Julius nin ni.

² Ya fun la zu arŋa naa la daŋni o si a la Azia pulum ni nɔ a kaali. O funɛ li tɔhɔn naa ba yir Adramitiumnɛ. Baal naa ba funɛ yir Aristakus funɛ gbaari ya ni. O funɛ li Tɛsalɔnika naa nyɛn Masɛdonia pulum nɛɛ.

³ Chɔɔsa funɛ wa pisi, ya fun la tel Saidɔn. Julius funɛ ya nibin werire Pɔɔl wati a nyɛ un nyinbaan di o gil arŋ ti a la zaami o chɛna, chen ni ba zi nyɛ un kin nawara o daŋniu.

⁴ Pɔɔl fun bur wa zu arŋ ti ka ya burgi a kaali. Peha funɛ mo ya suwachak ni, ya fun val Saiprus pulum ni nɔ a la doonani pehe ti vɛ vali.

⁵ Ya fun val la li ni naa chɔ gbampulim ni a la tel Sailisia pulum awa Pamfilia pulum ni nɔ a la li tɔhɔn naa ba yir Maira a li Lisia pulum ni.

⁶ Doonee lanjimasa nihɛɛ ti fun na arŋa a li Alɛzandria ni ka o saksi di o la Itali pulum. O fun bur la zu arŋa naa kpa ya li Siizaria a wa lisi ya a bur du arŋ digi ni.

⁷ Ya fun li dooni a val tama wuzu bilɛ, domi pehe ti wa funɛ suŋi ya. Chendaha o funɛ bɔm ya niu di ya la dugli tɔhɔn naa ba yir Sinidus. Ya wa fun bu koti a la suwachak tama a burgi a la gali Krit pulum zuuli bar digi doonani ba yir Salmone.

⁸ Ya fun val a la dugli ni nɔ ka o fun bɔm ya ni di ya tel doonani ba yir, bar hiisi weri. O wa tɔhɔn naa ba yir Lasɛa chen, wa bol dɔŋ ni.

⁹ Ya fun nyɛn dooni a vusi. Ju tim ta wuzu zen funɛ wa tel di Koosa dam kɔkɔɔrsi ta yaa fun kɔɔri kɔɔra a nyɛ Koosa ni, chen ni o zi gil ba tum tagnau a nyɛ ba, chen fun wa tagin ni di nibinsa kival ni ti ni. Pɔɔl fun tɛ niduse nin a ŋɔ ba,

¹⁰ “Mu nivalɛ dɔŋtima, mu zimu di ya chiŋɛ bar nɔ aa la, o zi tagini ya niu. Bun nawara arŋ ti chuŋi chen zi wa chɔku ka ya bɔnɛ siti.”

¹¹ Lanjimasa nihɛɛ ti wa la nɔɔni chenani o sɛm chen ni. O ka fun la nɔɔni chenani niduse ta nihɛɛ awa arŋ ti tiina sɛm. Ba funɛ daŋni ba li dooni a la.

¹² Fufuk saha funɛ dugliu. Doonani arŋ ti fun chiŋi chen wa fun wer di fufuk saha wa pu un dooni. Niduse ta nidamata funɛ daŋni ba li doon a kpaŋi a tel tɔhɔn naa ba yir Finiks chen. O funɛ chem nha bar chelire. Doon funɛ ya bar weri di arŋsa chem fufuk saha.

Chenani Peha Fun Teŋ Ni Kinkan A Du Pɔɔl Ni

¹³ Wuzu digi peha naa vɛ kpoki fun ya a li pul mun. Niduse ta fun lisi di ba si awa arŋ ti ni a la a lisi lugɛ yuga naa kpak arŋ ti o vɛ laali a li ni ti ni. Ya fun si dooni a val a dugli Krit pulum ni nɔ.

¹⁴ Ya funɛ la chene, pe kpok kinkan fun vaan si a ya ni ti nɔ chemchem ni. Niduse ta yir chen pehe ti, ‘nha bar yɛli ningal peha’.

¹⁵ O funɛ mo arŋ ti a teŋ ni ti kinkan. Niduse ta fun luk a ku chenani ba zi ya o deŋli. Pehe ti fun nyɛ arŋ ti la doonani ba vɛ daŋni o laali.

¹⁶ Ya fun la gali pulum we naa ni go chen ya nindil ni ka pehe ti fun baligi a bu si. Ba funɛ yir dooni Kɔdɔ. O funɛ bɔmu kinkan ya wati ka ya kpak arŋ we naa kizen ti lɛrgi chen.

¹⁷ Ya fun lisi un a nyɛ o zɔŋ arŋ zen ti buudaha ni a kpa ŋmɛnsa a vɔu a a go a mari arŋ zen ti, chen ni ni naa pehe ti teŋ wa zi chɔk un. Hansura fun kpak niduse ta di arŋ ti zi la fir hɛchɛ naa duglɛ Libia pulum ni nɔ niu. Ba fun pur gata naa yaa suŋi arŋ ti o val kinkan chen, chen ni arŋ ti wa zi val kinkan.

¹⁸ Pe kpok naa funɛ teŋ ni ti kinkan chen fun ya hali dusum maga. Chɔɔsa funɛ wa pisi, niduse ta fun luksi bun ta bɔnɛ a yo du ni ti ni.

¹⁹ Chɔɔsa fun bu wa pisi, ba fun pirigi kin nawara suŋi arŋ ti o la chen, bɔnɛ a du ni ti ni.

²⁰ Pe kpok ti funɛ ya chene wuzu damata. Dobaala fun tɔ buudaha ya vɛ na nha koo wula. Ya lɔk fun wa li peti, ya maga funɛ lisi di ya kaa ya sitiu.

²¹ Nandigi wa fun koti a ya diwe a di a vusi. Chen saha ti Pɔɔl fun si chiŋi ya maga suwachak ni a ŋɔ, “Mu dɔŋtima, ma fu nu mu wati a nyɛn Krit pulum ni, ma fu wa zi namsi nan a nyuksi ma kin ta maga.

²² Mu sumi mau di ma kpak ma bambe. Arŋ ti zi wa chɔku, amaa nandigi wa zi wa sou.

²³ Dusum ti Koosa naa dɔ min awa naa mu jɛɛmi, fun tum o malaikasi ta digi o wa ŋɔ min,

²⁴ ‘Pɔɔl, ta ɔmi. Koosa zi nyɛ i la koorsi ta nyuhu tiina Siiza watiu o di i sɛria. O ya niweri daha, o wa zi nyɛ hin koo ba naa wa hin lagmi nyɛn nan nidigi sou.’

²⁵ Mu dɔŋtima, chendaha mu ŋɔ ma di ma kpak ma bambe. Mu si su di Koosa zi tum chenani o ŋɔ minu.

²⁶ O wa zi vusi ka pehe ti kizak ya a la li pulum naa ni go chen nɔ.”

²⁷ Pe kpok naa funɛ teŋ ni naa ba yir Mɛditɛrɛnian, kinkan funɛ yau wuzu fidanaasi. Dusum ti tɔhɛɛsa, niduse ta fun lisi di arŋ ti wa dugli ni nɔu.

²⁸ Ba fun kpa ŋmɛn a vɔu kiyuk a kpa un du ni ti ni o tu kaali ni mun. Ba fun wa lisi un a zaamsi a na di ni ti luŋluŋ ya naŋgere kɔk di fumlɛwa. A fun ya tama, ba bukoo kpa kiyuk ti a du ni ti ni. Ba fun bu lisi un a zaamsi a na di ni ti luŋluŋ ti ya naŋgere fumdiktore.

²⁹ Hansura fun kpak niduse ta di arŋ ti zi la mo gbɛntɛlau. Ba fun kpa lugɛ yuga a naa yaa nyɛ arŋ ti chiŋi, a banaasi a kaali arŋ ti gantɛl a la du ni ti ni a tu kaali ni mun a funɛ pɔ di chɔɔsa pisi.

³⁰ Doone ba fun kpa arŋ we ti a wa mari arŋ zen ti chakpal ni ti ni di ba zu a ŋɔ di ba kaa la zer lugɛ yuk kinkin tawa a la du ni ti ni arŋ ti suwachak ni.

³¹ Pɔɔl funɛ na ka niduse tima daŋni ba gil arŋ ti ta a ta bu bur laali, o fun ŋɔ lanjimasi ta awa ba nihɛɛ ti ni, “Ma ta nyɛ niduse tima kaali a ka ya. Ba kaalɛɛ, ya maga zi sitiu.”

³² Lanjimasa nihɛɛ ti fun ŋɔ o lanjimasi ta ni ba teŋsi ŋmɛnsa a naa vɔu arŋ we ti a mari arŋ zen ti chakpal ni a waligi dɔŋ ni.

³³ Chɔɔsa funɛ wa pisi a wa, Pɔɔl fun sumi ba maga di ba di diwe. O fun ŋɔ ba, “Ma namsi kinkanu a ha vɛ di kundɔŋ wuzu fidanaasi.

³⁴ Mu sumi mau di ma di diwe, chen di arŋ ti wa chɔk, ya zi kotiu a li awa ya miisi ni. Mu si su di ya nidigi wa zi huusi.”

³⁵ Pɔɔl funɛ sɛm peti, o fun zer boroboro a sumi Koosa a du a chɔk se.

³⁶ Nan funɛ kpami kinkin tima ba gbanko di diwe.

³⁷ Ya naa funɛ lagmi dɔŋ ni a nyɛn arŋ ti tuhu ni a gba chen, funɛ ya nara kɔksa lɛ di fumnɔpɛ danɔrawa.

³⁸ Ya maga funɛ di puŋ, niduse ta fun luksi bun nawara kaɛɛ a ya mɛ chen a du ni ti ni, ka arŋ ti fuŋsi a zɔŋ ni daha ni.

Pɔɔl Arŋ Zuuli Fun Mo Ni Nɔ A Chɔk

³⁹ Chɔɔsa funɛ wa pisi peti, ya maga fun koti a na jibaŋ, amaa niduse ta wa fun zim doonani ya nyɛn. Ba fun na ni ti nazaŋa ka hɛchɛ kinkan nyɛn dooni. Ba fun lisi di ba zi nyɛ arŋ ti val hɛchɛ ti dahau dooni.

⁴⁰ Lugɛ yuga a naa yaa nyɛ arŋ ti chiŋi, ha funɛ vɛɛn vɔti arŋ tiu. Niduse ta fun la teŋsi lugɛ yuga ŋmɛnsi ta a ta a pur kinkin naa yaa nyɛ arŋ ti deŋli aa val. Ba fun kpa gata naa la suŋi arŋ ti o val kinkan a tɛ buudaha pehe ti mo un a la dugli ni ti nɔ.

⁴¹ Ba funɛ nyɛn ni ti ni a la chene, arŋ ti fun vaan la zini hɛchɛ a li ni ti ni. Arŋ ti suwachak fun la kak ka ni naa pehe ti teŋ kinkan chen funɛ mo arŋ ti mun o kpɛligi.

⁴² Lanjimasi ta fun lisi di ba kpu ba naa maga ba il chen, chen ni ba wa zi la tu ni ti a di a chɔ kaali.

⁴³ Lanjimasi ta nihɛɛ ti wa fun nyɛ lanjimasi ta kpu ba, domi o wa funɛ daŋni Pɔɔl sou. O fun purigi ya maga chen bilɛ. O fun ŋɔ ba naa zim ni diili chen ba te tu ni ti a di a la zini jibaŋ,

⁴⁴ a ka fun ŋɔ ba naa vɛ zim ni diili chen ba tu ni ti a kpaksi arŋ kpɛligi ta a kpa ba a la tel jibaŋ ti. Ya maga fun ya chen a fosi ni ti ni.