Tuma 25 - Tampulma

Pɔɔl Fun Sumi Fɛstus Di O Nyɛ Siiza Di O Sɛria

¹ Wuzu butora gantɛl ni, Fɛstus fun li Siizaria a kaali Jɛrusalɛm.

² Koosa dam kɔkɔɔrsi ta awa tɔhɔn ti nihɛɛti ta funɛ nu di o wau, ba fun la fiksi Pɔɔl o suwachak ni,

³ a sumi un di ba kpa Pɔɔl kuwa Jɛrusalɛm o di o sɛria. Ba funɛ daŋni ba kpu un nyinbaan nɛɛ. Chendaha ba fun sɛm chen.

⁴ Fɛstus fun ŋɔ ba, “Mu wa la nɔɔni di mu kpa un wa bar nɔ. O wa zi vusi ka mu bur kaali Siizaria.

⁵ Baal nɔ fu tum tum tagin ka ma daŋni ma fiksi un mu suwachak ni, ma lisi nara a li ma tuhu ni a gbaari min ni ya la nu chenani sɛm ta kaa du.”

⁶ Fɛstus funɛ kpalimi Jɛrusalɛm ni wuzu mɛnasa koo wuzu fi a li dooni a bur kaali Siizaria. Chɔɔsa funɛ wa pisi, o fun la kani sɛria bar diili dɛ ni a ŋɔ ba kpa Pɔɔl a wa.

⁷ Pɔɔl funɛ zu dɛ ti, Ju tima ba naa funɛ li Jɛrusalɛm a wa, fun vaan go un a fiksi un a ŋɔ di o tum tum tagna damatiwa, amaa ba wa fun koti a biksi di chenani ba sɛm chen ya wutirɛ.

⁸ Pɔɔl fun la chiŋi Fɛstus suwachak ni a ŋɔ un, “Mu wa fun chɔk Ju tim ta chiksɛ koo a sɛm sɛm tagin a du Koosa bar jɛɛmi dam ti ni koo a chɔk koorsi ta nyuhu tiina Siiza sɔn.”

⁹ Festus funɛ daŋni o sɔɔni Ju tim ta tusa a pɛɛsi un, “Mu nyɛ ba kpa hin a la Jɛrusalɛm di mu di i sɛria dooni, yɛrɛ o zi du hin ni?”

¹⁰ Pɔɔl fun ŋɔ un, “Yɛrɛ ma vɛ kaa di min sɛria ti bar nɔ a kaa kpa min la bar digi? Hin ya gɔbnati nyuhu tiin zen a chiŋi koorsi ta nyuhu tiina Siiza bar chiŋi ni. I zimu nɛnɛ di mu wa tum tum tagin digi a du Ju tim ta ni.

¹¹ Mu fu chɔk chiksɛ ta koo a tum tum tagin naa i zi di mu sou sɛria, mu saksɛu di mu namsi. Chenani ba fu fiksi min chen vɛ ya wuti, i wa kpak nyinbaan naa i zi kpa min a du ba nisa ni. Mu sumi hinu di i nyɛ i lanjimasi ta kpa min a la koor Siiza wati o di mu sɛria.”

¹² Fɛstus fun burgi o wa ba naa la suŋi un o di sɛria chen sɛm sɛma dɔŋ wati. Ba funɛ sɛm peti, o fun burgi Pɔɔl wati a ŋɔ un, “I sumi minu di mu nyɛ ba kpa hin a la koor Siiza wati o di i sɛria. Mu zi nyɛ ba kpa hin a la o watiu.”

Fɛstus Fun Ŋɔ Agripa Awa O Haan Ni Pɔɔl Wɛ

¹³ Wuzu bilɛ gantɛl ni, koor naa ba yir Agripa awa o haan naa ba yir Bɛrnisi, fun wa Siizaria di ba zaami Fɛstus.

¹⁴ Ba funɛ nyɛn doon tama, Fɛstus fun ŋɔ koor ti Pɔɔl wɛ. O fun ŋɔ, “Saha naa Filiks fun ya gɔbnati nyuhu tiin zen bar nɔ chen, o fun kpak baal naa ba yir Pɔɔl chen a tɔ un dɛ.

¹⁵ Saha naa mu fun te la Jɛrusalɛm, Koosa dam kɔkɔɔrsi ta awa tɔhɔn ti nihɛɛti ta fun fiksi un mu suwachak ni a sumi min di mu na o galimsa.

¹⁶ Mu fun ŋɔ ba di Roman tima wara di nar sɛria hali o wa na nyinbaan a kok o titi a li ba naa la fiksi un chen suwachak ni.

¹⁷ Ba naa funɛ fiksi un fun gbaari min ni a wa bar nɔ, mu wa fun vusi chen yaali ni. Chɔɔsa funɛ wa pisi, mu fun la kani sɛria bar diili dɛ ti ni a ŋɔ ba kpa Pɔɔl a wa mu wati.

¹⁸ Ju tim ta fun vaan chiŋi di ba fiksi un. Tum tagna naa ba fun ŋɔ min di o tumu chen, wa ya chenani mu funɛ lisi.

¹⁹ Ba wa un yaa fun piinsa di amɔrɛ a li chenani Ju tim ta jɛɛmi Koosa awa baal naa funɛ sou wɛ. Ba fun ŋɔ di o sɔn ya Yesu. Pɔɔl ka fun ŋɔ di o wa bu sou, amaa Koosa funɛ lɛli unu a li o sou ni.

²⁰ Mu wa vaan zim chenani ba sɛm chen mun. Chendaha mu fun pɛɛsi Pɔɔl di yɛrɛ o lisi mu kpa un a la Jɛrusalɛm a la di o sɛria dooni.

²¹ Pɔɔl fun vaan sumi min di mu nyɛ ba kpa un a la koor Siiza nuha tiina wati o di o sɛria. Mu fun la nɔɔni a ŋɔ mu lanjimasa ta ni di ba il un hali saha naa mu kaa wa tum un.”

²² Fɛstus funɛ sɛm peti, Agripa fun ŋɔ un, “Mu daŋni n pu baal nɔ a nu chenani o zi sɛm.” Fɛstus fun ŋɔ un, “Mu chɛ zi nyɛ ba kpa un wau i nu o wati.”

²³ Chɔɔsa funɛ wa pisi, Agripa awa o haan, Bɛrnisi, lanjimasa nihɛɛ nyuhu tima, awa tɔhɔn ti nibin birige fun si lagmi a la zu bol zen. Zɛmɛ fun lagmi a lɔ boola a la gɔ di ba nyɛ Agripa awa o haan ti jirima. Ba maga funɛ wa gil chɛɛma, Festus fun ŋɔ ba kpa Pɔɔl a wa.

²⁴ Fɛstus fun ŋɔ, “Koor Agripa awa ba naa maga lagmi ya wati bar nɔ. Ma na baal nɔ chiŋɛ ya suwachak ni nan. Ju tima ba naa maga nyɛn bar nɔ awa Jɛrusalɛm ni daŋni mu na o galimsau a di o sou sɛria. Ba fɔuli di o ta bu nyɛn vusi.

²⁵ Mu zaamsɛ unu a na di o wa tum tum tagin digi. Chendaha mu wa koti a di o sou sɛria. O funɛ sumi minu di mu nyɛ ba kpa un a la koorsi ta nyuhu tiina Siiza wati o di o sɛria. Mu fun la nɔɔni a nyɛ o kaali.

²⁶ Mu zi sɔbi tɔnu a ŋɔ Siiza ni o wɛ, amaa mu si ha wa su chenani mu zi sɔbi. Chendaha mu kpa un wa ma maga wati zinan, chen ni i waa, koor Agripa, zi di o sɛriau a na wu digi a nyɛ min mu du mu tɔn ti ni.

²⁷ Mu wa lisi di o deŋliu wa mu tum Pɔɔl Room ni a vɛ sɔbi tɔn a biksi chenani o tumu a gbaari un.”