Tuma 24 - Tampulma

Ju Tima Fu Fiksi Pɔɔl Filiks Suwachak Ni

¹ Wuzu bunyuu gantɛl ni, Koosa dam kɔkɔɔrsi ta nihɛɛ, Ananias, tɔhɔn nihɛɛta, ba naa funɛ li Jɛrusalɛm, awa naa la chiksi ba sɛria ka ba yir un Tatolos, fun wa tel Siizaria. Filiks funɛ nu di ba wau, o fun ŋɔ a lanjimasi ta ni ba la kpa Pɔɔl a wa chiŋsi o suwachak ni.

² Doone o fun ŋɔ di Tatolos gbanko wa chiŋi o suwachak ni a fiksi Pɔɔl. Tatolos fun ŋɔ, “I waa naa ya ya gɔbnati nyuhu tiina nihɛɛ, ya zaami hinu. I waa naa kpak ya wa nɛha ni a nyɛ ya bara sɔɔni, hin vɛɛn tum tum were a nyɛ ya pulum tim ni.

³ Ya tusa sɔɔnɛu kinkan i koti a suŋi ya chen.

⁴ Ya wara daŋni ya kpak hin a vusi. Ya sumi di i nu ya sɛm tam nɔ.

⁵ Pɔɔl nɔ chiŋɛ i suwachak ni nan, yaa muksi ya narau a huusi ma Roman tima ma naa dɔ ya. Doonani maga o la, ka Ju tim ta nyɛn, o yaa nyɛ tɔhɔn ti damu. O gbanko ya ba naa la tiŋ Nazarɛt nar, nidigi nyuhu tiinnɛ.

⁶ Wuzu bilɛ gantɛl ni, o fun la zu Koosa bar jɛɛmi dam ti a li Jɛrusalɛm ni a chɔk ya chi ti. ((Chendaha ya fun kpak un.

⁷ Amaa lanjimasi ta nyuhu tiina naa ba funɔ yir Lisias fun wa awa kpok ni a wa fuksi un ya nisani, a ŋɔ ya di ya wa bar nɔ a wa na o galimsa i suwachak ni.))

⁸ I wa pɛɛsi un, i zi zim kin naa nyɛ ya fiksi unu.”

⁹ Ju tim ba naa Tatolos fun chiŋi ba gantɛl ni a sɛm a nyɛ chen, fun ŋɔ di o sɛm ta ya wutirɛ.

Pɔɔl Fun Kok O Titi Filiks Suwachak Ni

¹⁰ Doone Filiks fun ŋɔ Pɔɔl ni di o saha telu wa o sɛm. Pɔɔl fun ŋɔ, “Mu zimu di i di ya nara sɛriau bun damata. Chendaha mu tuha sɔɔni di mu kok mu titi i suwachak ni zinan.

¹¹ Nyɛ mu ŋɔ hin chenani mu na. O funɛ dugli wuzu fidalɛ gantɛl nɛɛ, mu fun la Jɛrusalɛm a la zu Koosa bar jɛɛmi dam ti di mu jɛɛmi un.

¹² Mu funɛ nyɛn dooni mu wa nandigi wa fun di amɔrɛ. Hali a wa li a gba tɔhɔn ti a zu ba bar lagmi dɛɛna, mu wa fun nyɛ tɔhɔn tima dam.

¹³ Mu zimu di ba wa koti a biksi hin di chenani ba fiksi min chen ya wutirɛ,

¹⁴ amaa chenani mu kaa ŋɔ hin chen ya wutirɛ. Mu yaa tiŋ Koosa jɛɛmi nyinbaan naa Ju tim ta ŋɔ di o wa ya wuti. Waa funɛ ya naa ya nawaalsi ta jɛɛmi a kpa a chiksɛ ta a nyɛ Mosis ni a nyɛ o witinsi ta sɔbi o sɛm ta a du o sɛm tɔn ti ni. O chiksɛ ta awa chenani maga ba sɔbi a du o sɛm tɔn ti ni ha vɛɛn ya mu kinawa.

¹⁵ Chenani Ju tim ba naa nyɛn bar nɔ nan kpak bambi bɛgim di wuzu digi Koosa zi wa lɛli ba naa la tum tum were awa ba naa la tum tum tagnau a li ba sou ni, awa chenani min du ya kibɛgimnɛ.

¹⁶ Mu yaa fun kpak unu mu bambi ni di mu tum mu tuma wa tu bɛgim ni Koosa awa nara suwachak ni.

¹⁷ “Saha naa mu fun nyɛn Jɛrusalɛm ni, o funɛ vusiu ka mu la dooni. Ju tim ta bɔnɛ fun lagmi malɛ a du mu nin ni di mu kpa la Jɛrusalɛm. Mu gbanko fun la dooni di mu jɛɛmi Koosa.

¹⁸ Wuzu digi mu fun la zu Koosa bar jɛɛmi dam ti a ŋɔ Koosa dam kɔkɔɔrsi ta ni di wuzu bunɔpɛ wuzu ba zi wa kɔɔri kɔɔrau a nyɛ Koosa ni a biksi nara di chenani o funɛ chaani mu bambi ni chen mak o bɔu. Zɛmɛ wa fun go min. Chɛɛm gbanko wa fun toli.

¹⁹ Ju tima ba naa funɛ li Azia pulum a wa chen, bɔnɛ funɛ nyɛn dooni a kpak min. Ba kpak wu digi a du min ni, ba waa fu la zi nyɛn i suwachak ni bar nɔ ni a fiksi min.

²⁰ Ba vɛ waali nan, nyɛ ba naa lagmi dɔŋ ni a li Jɛrusalɛm ni chen ŋɔ hin chenani ba fun di mu sɛria a na mu galimsa.

²¹ Mu fun ŋɔ ba di mu kpak bambi bɛgimu di wuzu digi Koosa zi wa lɛli nisitɛu a li ba sou ni. Ba na mu galimsa nan dahauu?”

²² Filiks funɛ zim chenani nara tiŋ Yesu nyinbaanu kinkan. O fun ŋɔ ba di lagmi ti petiu a vɛɛn ŋɔ, “Nihɛɛ nyuhu tiin ti, Lisias, wa wa, mu zi lisi chenani mu kaa yau.”

²³ O fun ŋɔ o lanjimasa ba naa funɛ il Pɔɔl chen, nihɛɛ di ba ta bu tɔ un dɛ a nyɛ o chɛnsa wa nyinbaan ba kpa kin naa o daŋni a wa nyɛ un.

Pɔɔl, Filiks Awa Drusila Fun Na Dɔŋa Ba Duŋduŋ

²⁴ Wuzu bilɛ gantɛl ni Filiks wa o haan naa ba yir Drusila, fun ŋɔ ba kpa Pɔɔl a wa ba wati. O haan ti funɛ ya Ju tim nihaannɛ. Ba funɛ daŋni ba wa un sɛm chenani nara se su Yesu Kristo.

²⁵ Pɔɔl fun ŋɔ ba chenani ba naa se su Yesu fun kpaŋi ba titi di ba tum tum were a nyɛ un a ya bambe tima. O gbanko funɛ ŋɔ bau chenani Koosa zi wa di tɛɛnɛ nɔ tim maga sɛriau wuzu digi. Pɔɔl sɛm ta fun nyɛ hansura kpak Filiks ka o ŋɔ un, “O magu. Kila. Mu wa na nyinbaan, mu zi yir hinu i wa sɛm ya gbaari.”

²⁶ Filiks fun kpak bambi bɛgim di Pɔɔl zi kpa malɛu a nyɛ un a nyɛ o la. Chendaha o wa un fun lagmi a sɛm sɛma bu damata.

²⁷ Filiks funɛ daŋni o sɔɔni Ju tim ta tusau. Chendaha o nyɛ o lanjimasi ta il Pɔɔl a vɛ nyɛ o laali. Bunsa lɛ gantɛl ni, baal naa ba funɛ yir Pɔsius Festus fun burgi gɔbnati nyuhu tiina nihɛɛ a chiŋi Filiks bar chiŋi ni.