Tuma 23 - Tampulma

¹ Pɔɔl fun nyini ba se ni a ŋɔ, “Mu niinbisa, chenani mu nyɛn hali wa zinan, mu kpak tuha kibɛgimu awa Koosa ni.”

² Koosa dam kɔkɔɔrsi ta nihɛɛ naa ba yir Ananias funɛ nu o sɛm ta, o fun ŋɔ naa chiŋi a dugli un digi o chɛɛgi o lɛha.

³ Pɔɔl fun ŋɔ Koosa dam kɔkɔɔrsi ta nihɛɛ ti ni, “I chi zɛgbɛra naa yɛlɛɛ ba pɛɛrirɛ. Koosa zi wa bɔ hinu a li chenani i ya min chen. I kani bar nɔwa aa di mu sɛria a li ya chiksɛ ta nyinbaan ni ka i titi chɔk a a ŋɔ baal nɔ di o chɛɛgi mu lɛha.”

⁴ Ba naa funɛ chiŋi a dugli Pɔɔl chen nidigi fun ŋɔ un, “Yɛrɛ i nyuha kpok i pini Koosa dam kɔkɔɔrsi ta nihɛɛ ti zoma?”

⁵ Pɔɔl fun ŋɔ ba maga ni, “Mu niinbisa, chenani ba fun sɔbi a li Koosa sɛm tɔn ti ni chen ya wutirɛ. Ba funɛ ŋɔ, ‘Ma fiɛŋ ma wa pini koor naa dɔ ma zoma.’ Amaa chenani o fun ya min chen, mu wa fun zim di waa ya ya koor ti.”

⁶ Pɔɔl fun na di tɔhɔn ti nihɛɛti ta wa ya nibɛgim. Bɔnɛ funɛ ya Farisi timwa. Bɔnɛ ka ya Sajusi tima. O fun sɛm ta zaŋa a ŋɔ ba, “Mu niinbisa, Farisi tima funɛ lul min. Mu kpak bambi bɛgimu di wuzu digi Koosa zi wa lɛli nisitɛu a li ba sou ni. Chendaha ma lagmi bar nɔ zinan di ma di mu sɛria.”

⁷ O funɛ sɛm nan, Farisi tim ta awa Sajusi tima fun vaan purigi a di amɔrɛ wa dɔŋ ni.

⁸ Sajusi tim ta fun biksi nara di Koosa wa zi lɛli nisitɛ a li ba sou ni ka o malaikasa awa siimsa vɛ nyɛni. Farisi tim ta ka funɛ biksi nara di wuzu digi Koosa zi wa lɛli nisitɛu a li ba sou ni ka o malaikasi ta awa siimsi ta nyɛn.

⁹ Doone Koosa chiksɛ nibiksɛ ba naa funɛ ya Farisi tim chen bɔnɛ fun chɛɛmi a tɔ chɛɛm ti a ŋɔ, “Ya se su di Koosa funɛ tum a malaikasi ta digi koo o siimsi ta digi a wa sɛm nyɛ un. Chendaha o nin wa toli.”

¹⁰ Chenani Farisi tim ta awa Sajusi tima funɛ di amɔrɛ chen wa burgi yo. Hansura funɛ kpak lanjimasi ta nihɛɛ nyuhu tiin ti di ba zi huusi Pɔɔlu. O fun ŋɔ o lanjimasi ta ni ba zu kpak un yo ti bambaan ni a li a bur la zu ba dam kpok ti.

¹¹ Dusum funɛ wa biri, Pɔɔl fun bu na ya kunyan ti a chi o deesi. Ya kunyan ti fun ŋɔ un, “Kpak bambi. Mu zi nyɛ i la Roomu a la ŋɔ ba naa nyɛn dooni, mu wɛ a chi chenani i ya bar nɔ nan.”

Ju Tima Fun Vɔti Nɔɔna Di Ba Kpu Pɔɔl

¹² Chɔɔsa funɛ wa pisi, Ju tim ta bɔnɛ fun lagmi dɔŋ ni a vɔti nɔɔna a ŋɔ di ba vɛ kpu Pɔɔl, ba wa zi di diwe koo a nyɔ ni.

¹³ Ba naa funɛ vɔti nɔɔni chen funɛ kaali nara fumnaasiu.

¹⁴ Ba fun la ŋɔ Koosa dam kɔkɔɔrsi ta awa nihɛɛti ta ni, “Ya fun lagmi dɔŋ ni a vɔti nɔɔna a ŋɔ di ya vɛ kpu Pɔɔl, ya wa zi di diwe koo a nyɔ ni.

¹⁵ Ya sumi mau di ma tum nandigi o la ŋɔ Roman tim nihɛɛ nyuhu tiin ti ni di o kpa Pɔɔl a wa, domi ma daŋni Pɔɔllɛ ŋɔ ma a gbaari. Ya zi chem un nyinbaan niu a kpa un.”

¹⁶ Pɔɔl towe be fun nu chenani ba daŋni ba ya a la zini a zu lanjimasi ta dam kpok ti a ŋɔ Pɔɔl ni.

¹⁷ Pɔɔl funɛ nu o sɛm ta, o fun yir lanjimasi ta nihɛɛti ta digi o wa. O fun ŋɔ un, “Kpa bunɔɔn ti kila i nihɛɛ nyuhu tiin ti wati. O kpak wu digirɛ a kaa ŋɔ un.”

¹⁸ Nihɛɛ ti fun kpa un kaali o ŋɔ nihɛɛ nyuhu tiin ti ni, “Pɔɔl naa i tɔ dɛ chen yir min, a ŋɔ min di mu kpa bunɔɔn nɔ a wa i wati. O kpak wu digirɛ a kaa ŋɔ hin.”

¹⁹ Nihɛɛ nyuhu tiin ti fun kpa bunɔɔn ti nin a kpa un a la ba digi a la pɛɛsi un, “Yɛrɛ i kpak a kaa ŋɔ min chen?”

²⁰ O fun ŋɔ, “Ju tim ta nihɛɛti ta la nɔɔniu di ba chɛ lagmi chɛ a ŋɔ hin i bu kpa Pɔɔl a wa, amaa ba funɛ zigu a la daŋni o ŋɔ ba a gbaari.

²¹ Ta tiŋ chenani ba ŋɔ hin. Ju tim ta bɔnɛ funɛ lagmi dɔŋ ni a vɔti nɔɔna a ŋɔ di ba vɛ kpu Pɔɔl, ba wa zi di diwe koo a nyɔ ni. Nɔɔna nivɔtɛ ta funɛ kaali nara fumnaasiu. Ba zi chem ma nyinbaan niu a kpu un. Hali ba saksɛu a pɔ di ba na baŋa kaa ya.”

²² Nihɛɛ nyuhu tiin ti fun ŋɔ un, “Ta bu ŋɔ nandigi ni chenani i ŋɔ min nan,” a nyɛ o kaali.

Ba Fun Tum Pɔɔl Filiks Wati

²³ Doone nihɛɛ nyuhu tiin ti fun yir o nihɛɛta nara balɛ ba wa o ŋɔ ba, “Ma lagmi lanjimasa kɔksa lɛ, lanjimasa ba naa la zini zaagna fumnɔpɛ awa lanjimasa ba naa la chem laal wa tima ni, kɔksa lɛ a nyɛ ba saksi Siizaria laali. Ma nyɛ ba wa la dusum diwe diili peti saha.

²⁴ Ma dɛu zaagna a nyɛ Pɔɔl ni o zini a kok un a la tel gɔbnati nyuhu tiin nihɛɛ dama dooni. O sɔn ya Filiks.”

²⁵ Doone lanjimasi ta nihɛɛ nyuhu tiin ti fun sɔbi tɔn a nyɛ o nihɛɛti ta ni di ba kpa la nyɛ Filiks ni. Nannɛ o fun sɔbi tɔn ti ni.

²⁶ “Min, Klɔdius Lisias, la sɔbi tɔn nɔ a nyɛ gɔbnati nyuhu tiina nihɛɛ naa ba yir Filiks ni a zaami hin.

²⁷ Min la tum baal nɔ awa tɔn nɔ ma wati. Ju tim ta fun kpak un a daŋni ba kpu un, ka mu wa mu lanjimasi ta fun la lisi un ba bambaan ni. Ba funɛ ŋɔ min di o ya Roman tim baallɛ. Chendaha mu fun ya chen.

²⁸ Mu fun ŋɔ Koosa dam kɔkɔɔrsi ta awa tɔhɔn ti nihɛɛti ta di ba lagmi dɔŋ ni a kpa un kaali ba suwachak di mu zim chenani o ya Ju tim ta fiksi un.

²⁹ Mu fun wa dɛu a na di o wa tum tum tagin naa la zi nyɛ mu di o sou sɛria koo a tɔ un dɛ. Ba ka fun ŋɔ di o chɔk ba titi chire.

³⁰ Mu funɛ nu di Ju tim ta bura daŋni ba kpu unu, mu fun lisi di mu nyɛ mu lanjimasi ta kpa un wa i wati. Mu fun ŋɔ ba naa la fiksi un chen di ba tiŋ o gantɛl a wa fiksi un i suwachak ni. Zaami i walɛ maga a nyɛ min.”

³¹ Lanjimasi ta fun tiŋ ba nihɛɛ nyuhu tiin ti nɔ a kpa Pɔɔl a kaali. Chɔɔsa funɛ wa pisi di ba tel tɔhɔn naa ba yir Antipatris.

³² Lanjimasa ba naa funɛ val naŋgere awa ba naa la chem laal wa tima ni, fun purigi ba titi a bur kaali Jɛrusalɛm. Lanjimasa ba naa la zini zaagna fumnɔpɛ fun kpa Pɔɔl ba wa un kaali.

³³ Ba fun la tel Siizaria a zer ba nihɛɛ nyuhu tiin ti tɔn a nyɛ Filiks ni a kpa Pɔɔl a du o nin ni.

³⁴ Filiks fun karimi tɔn ti a pɛɛsi Pɔɔl pulum naa o li. O funɛ zim di o li Sailisia pulum nɛ,

³⁵ o fun ŋɔ un, “O wa zi vusi ka ba naa la fiksi hin chen wa. Ba wa wa, mu zi di i sɛriau.” O fun ŋɔ o lanjimasi ni di ba kpa Pɔɔl a la tɔ un dɛ a li dam zen naa koor Hɛrɔd fun sa chen ni a la il un.