Tuma 22 - Tampulma

¹ O fun ŋɔ ba, “Nihɛɛta awa mu dɔŋtima, ma nu mu wati. Chenani mu kaa sɛm nan la zi biksi di mu nin wa toli.”

² Zɛmɛ ta funɛ nu ka o sɛm ba a li ba titi sɛm ni, ba fun bukoo moori a gbaari.

³ Pɔɔl fun bukoo ŋɔ ba, “Ju tima lul min tɔhɔn naa ba yir Taasus a li Sailisia pulum ni, amaa mu funɛ biu a burgi nihɛɛ a li Jɛrusalɛm nɔ ni. Ya nibiksi zen naa ba yir Gameliel funɛ biksi min di mu tiŋ ya nawaalsi ta chiksɛ ta nɛnɛ. Chenani mu se fun sɛri di mu tiŋ Koosa chen saha ti awa chenani ma kina sɛri zinan ya kibɛgimnɛ.

⁴ Nara funɛ ŋɔ min chenani nara bɔnɛ funɛ tiŋ Yesu nyinbaan, mu fun namsi ba kinkan a fun kpaksi ba nidamata a tɔ ba dɛ a kpaŋi mu titi a kpu bɔnɛ.

⁵ Koosa dam kɔkɔɔrsi ta nihɛɛ ti awa tɔhɔn ti nihɛɛti maga zimu di mu ŋɔ ma wutirɛ. Ba fun sɔbi tɔna a nyɛ min di mu kpa la nyɛ Ju tima ba naa nyɛn Damaskus ni, chen ni ba zi suŋi minu. Mu fun la tel doon a kpaksi Yesu nitiŋɛ ta nidamata a kpa zɔglɛ a vɔti ba a kpa ba bur wa bar nɔ di mu lɛrgi ba diŋsa.”

Pɔɔl Fun Ŋɔ Zɛmɛ Ta Chenani O Si Su Yesu

⁶ “Nha funɛ wa tel sal baan nyuha, mu funɛ nyɛn nyinbaan ni a wa dugli Damaskus. Kundɔŋ fun vaan nyiksi a li buudaha ni a chaani du min ni.

⁷ Mu fun chel tɛɛnɛ ni a nu ta ka o ŋɔ min, ‘Sɔɔl, baŋnɛ ii namsi min chen ni?’

⁸ Mu fun ŋɔ, ‘Mu kunyana, anti ya hin?’ Ta ti fun ŋɔ, ‘Min ya Yesu Nazarɛt nar naa i namsi chen.’

⁹ Ba naa wa min funɛ gba chen fun na chaani ti, amaa ba wa fun nu ta ti.

¹⁰ Mu fun bukoo ŋɔ, ‘Mu kunyana, baŋnɛ ii daŋni mu ya?’ Ta ti fun ŋɔ min, ‘Si a la zu Damaskus. Nandigi zi wa ŋɔ hinu chenani Koosa daŋni i yau dooni.’

¹¹ Kundɔŋ naa funɛ chaani a du min ni chen nyɛ mu burgi nyulumnɛ. Adaha mu dɔŋtim ta nidigi fun kpak mu nin a te mu suwachak a la zu tɔhɔn ti tuha.

¹² “Baal digi funɛ nyɛn doon ba yir un Ananias. Waa yaa funɛ jɛɛmi Koosa wa wuti ni aa tiŋ ya chiksɛ ta nɛnɛ. Ju tim ba naa maga nyɛn Damaskus ni, funɛ nyɛ un jirima kinkan.

¹³ O fun wa pu min a wa chiŋi mu suwachak ni a ŋɔ, ‘Mu niinbe Sɔɔl, mu wa i se ta bar lɛlirɛ.’ Mu se ta fun vaan lɛli ka mu na un ka o chiŋi mu suwachak ni.

¹⁴ O fun bukoo ŋɔ min, ‘I funɛ nyɛn nyinbaan ti ni a wa chene, Koosa naa ya nawaalsi ta funɛ jɛɛmi, nyɛ i na Yesu ka i wa un sɛm sɛma. Waa ya o tumtumna naa yaa tiŋ o tutɔ. Koosa funɛ lisi hin di i tum chenani o daŋni,

¹⁵ a ŋɔ nidamata ni naa i na ka i wa un sɛm sɛma wɛ.

¹⁶ Ta bu nyɛ ya chiŋi aa pɔɔli. Si a nyɛ mu kpa Yesu sɔn a chaksi hin wa ni ni, chen ni Koosa zi chaksi i bambiu a gil i tum tagna a nyɛ hin.’ ”

Zɛmɛ Ta Fun La Muksi Pɔɔl Di Ba Kpu Un

¹⁷ “Mu fun bur kaali Jɛrusalɛm a la zu Koosa bar jɛɛmi dam ti di mu sumi un. Mu sumi ti bambaan ni,

¹⁸ mu fun na mu kunyan ti a chi mu deesi. O fun ŋɔ min, ‘Si lalaga a li Jɛrusalɛm ni, domi i ŋɔ ba naa nyɛn bar nɔ nan, chenani i chem min nyinbaan ni ka mu wa hin sɛm sɛma dɔŋ wati, ba wa zi nu i wati.’

¹⁹ Mu fun ŋɔ un, ‘Ju tim ta zimu nɛnɛ di mu gba a go ba bar lagmi dɛɛna a kpaksi ba naa se su hin a tuksi.

²⁰ Saha naa ba fun kpak Stivin anti funɛ biksi ba i wɛ, a kpu un, mu titi funɛ nyɛn dooniu a na. Mu funɛ nyini ba naa la yaksi un chen taktasa a la nɔɔni chenani ba funɛ ya chen ni.’

²¹ Mu kunyan ti fun bukoo ŋɔ min, ‘Mu kaa tum hin i la ba naa vɛ ya Ju tim watɛɛ a li tɔ bar bole ni. Adaha kila.’ ”

²² Zɛmɛ ta fun nu Pɔɔl sɛma hali o wa tel sɛm ta mun di ya kunyan ti funɛ tum un di o la ba naa vɛ ya Ju tim wati. Ba fun vaan tɛsi ta zaŋa a ŋɔ, “Ma kpa un kila a la kpu. O wa lawa o nyɛn.”

²³ Ba fun tɛsi kinkan a chɛsi ba kilaarɛ a zɔk hɛɛra a yo buudaha ni di ba biksi nara di chenani Pɔɔl sɛm chen pini Koosa zomwa.

²⁴ Roman lanjimasa nihɛɛ nyuhu tiin ti fun ŋɔ o lanjimasi ta ba kpa Pɔɔl a la zu ba dam kpok naa nara vɛ zu yɔri, a tuk un wa vurmsi ni. O funɛ ŋɔ ba di ba ya chene, chen ni Pɔɔl zi ŋɔ unu kin naa ya zɛmɛ ta chɛɛmiu.

²⁵ Lanjimasi ta fun kpa ganɛsa a vɔu Pɔɔl a saksi di ba tuk un. O fun burgi a ŋɔ ba nihɛɛ naa chiŋi dooni, “Mu ya Ju tim baallɛ a vɛɛn ya Roman tim gbanko. Ma wa kpak nyinbaan naa ma zi tuk min wa vurmsi ni, domi ma ha wa kpa min la sɛria bar diili dɛ a na mu galimsa.”

²⁶ Lanjimasi ta nihɛɛ ti funɛ nu o sɛm ta, o fun kaali ba nihɛɛ nyuhu tiin ti wati a la ŋɔ un, “Mu sumi hinu doso baal ti ni. O ŋɔ min di o ya Roman tim baallɛ.”

²⁷ Lanjimasi ta nihɛɛ nyuhu tiin ti fun la pɛɛsi Pɔɔl, “O ya wutirɛ i ŋɔ di i ya Roman tim baallɛ nann?” Pɔɔl fun ŋɔ, “O ya wutirɛ.”

²⁸ Nihɛɛ nyuhu tiin ti fun ŋɔ un, “Mu funɛ bɔ malɛ damatiwa ka ba nyɛ mu burgi Roman tim baal.” Pɔɔl fun ŋɔ un, “Roman tima funɛ lul min.”

²⁹ Lanjimasa ba naa funɛ daŋni ba tuk Pɔɔl chen, fun vaan bur gantɛl. Nihɛɛ nyuhu tiin ti funɛ zim di Pɔɔl funɛ sɛm wutirɛ, hansura fun kpak un, domi o wa fun kpak nyinbaan di o kpak un a kpa zɔglɛ ta a vɔu un.

Ju Tima Nihɛɛta Fun Lagmi Di Ba Di Pɔɔl Sɛria

³⁰ Nihɛɛ nyuhu tiin ti funɛ daŋni o zim chenani Pɔɔl ya Ju tim ta fiksi un. Chɔɔsa funɛ wa pisi, o fun ŋɔ o lanjimasi ta ni ba pur zɔglɛ ta Pɔɔl ni a fun ŋɔ Koosa dam kɔkɔɔrsi ta awa tɔhɔn ti nihɛɛti ta ni ba lagmi. Doone o fun kpa un a chiŋsi ba suwachak ni.