Tuma 20 - Tampulma

Pɔɔl Fun Kaali Masɛdonia Awa Girik Tim Pulum

¹ Wuzu bilɛ gantɛl ni, Pɔɔl fun yir Yesu nitiŋɛ ta a lagmi dɔŋ ni a ŋɔ ba di o daŋni o la Masɛdonia pulumnɛ. O fun kpami ba a chausi ba a kaali.

² O fun gba a go Masɛdonia pulum a kpami Yesu nitiŋɛ ba naa nyɛn dooni. O fun li dooni a kaali Girik tim pulum,

³ a la nyɛn dooni pɛnsa tora. O funɛ nyɛn doon a saksi di o bur la Siiriya pulum, o fun nu di Ju tim ta dɛu nyinbaannɛ di ba kpu un. Chendaha o fun chɛrgi o bambi a lisi di o bur la tiŋ Masɛdonia pulum a la.

^4-5 Nara banɔpɛ awa Pɔɔl funɛ te ya suwachak a la pɔ ya Troas ni. Ba sɔna funɛ ya Sopata, Pirus be a li Bɛrɛa ni, Aristakus awa Sɛkundus a li Tɛsalɔnika ni, Gaiyus a li Dɛɛbɛ ni, Taikikus awa Trofimus a li Azia pulum ni, awa Timoti.

⁶ Ju tim ta wuzu zen naa ba yaa se boroboro ka luri vɛ nyɛni chen, petiu, ya fun li Girik tim pulum a kaali Filipai a la zu arŋa a kaali Troas. Wuzu bunyuu gantɛl ni ya fun tel doon a nyɛn wuzu bunɔpɛ.

Chenani Funɛ Ya Yutikus Troas Ni

⁷ Asibri wuzu zaazɔn ya wa Yesu nitiŋɛ ba naa funɛ nyɛn Troas ni, fun lagmi a di diwe. Ya funɛ di peti, Pɔɔl fun si a ŋɔ ya ni. O funɛ sɛm chene hali tɔhɛɛsa. Chɔɔsa zi wa pisi, o funɛ daŋni ya li dooni. Chendaha o fun sɛm a vusi.

⁸ Ba funɛ sa dɛ naa tuhu ni ya lagmi chen a zɔŋ dɛ naa lɛ nyuhu nɛɛ. Fitin damata funɛ chiŋi dooni.

⁹ Bunɔɔn digi fun nyɛn dooni ba yir un Yutikus. O fun kani tokoro mun ni. Pɔɔl funɛ sɛm chene, ka o chuk do hali a wa chɔ peti a tu wa chel tɛɛnɛ ni. Yesu nitiŋɛ ta fun taŋsi a tu wa suŋi un, amaa o funɛ sou.

¹⁰ Pɔɔl ka fun tiŋ ba gantɛl a tu wa a zer un a kur a ŋɔ ba, “Ma ta nyɛ o muksi ma. O bu kpak miisau.”

¹¹ Ya maga fun bu zini kaali ya bar lagmi ti. Pɔɔl fun zer boroboro a chɔksi a sumi Koosa a du a kpa a bɔni ya a chi chenani ya kunyan ti biksi ya, a bu ŋɔ ya. Nha wa yɛli chɔsa, o fun sɛm peti ka ya li kaali.

¹² Ya funɛ kaali chene, Yesu nitiŋɛ ta wa zer bunɔɔn naa funɛ sou a bu si chen a kaali dama. Chenani o fun bu na miisa chen sɔɔni ba tusa kinkan.

Pɔɔl Fun Kaali Mailitus

¹³ Pɔɔl fun waligi ya ni a kaali tɔhɔn naa ba yir Asɔs o duŋduŋ. Ya ka fun zu arŋa a la pu un dooni a chi chenani o fun ŋɔ ya chen.

¹⁴ Ya funɛ la tel Asɔs, o fun wa gbaari ya ni a li arŋ ti tuhu ni. Ya fun li dooni a kaali tɔhɔn naa ba yir Mitilini.

¹⁵ Chɔɔsa funɛ wa pisi, ya fun li dooni a kaali pulum naa ba yir Kiɔs ka teku ni go un. Chɔɔsa funɛ bu wa pisi, ya fun li dooni a kaali pulum naa ba yir Samɔs ka teku ni vɛɛn go un. Chɔɔsa funɛ wa pisi butora tiina, ya fun li dooni a kaali tɔhɔn naa ba yir Mailitus a li Azia pulum ni.

¹⁶ Pɔɔl wa funɛ daŋni o nyɛn Azia pulum ti ni. O ka funɛ daŋni o gali Ɛfɛsus nɛɛ a la tel Jɛrusalɛm lalaga. Ju tim ta wuzu zen naa ba yir val la gali ti chen funɛ dugli. O daŋni o te la dooni ka o zi tel.

Pɔɔl Fun Chausi Ɛfɛsus Nihɛɛta

¹⁷ Pɔɔl funɛ nyɛn Mailitus nɛɛ a tum nara ba la ŋɔ Yesu nitiŋɛ ba naa nyɛn Ɛfɛsus ni, nihɛɛta di ba wa pu un.

¹⁸ Ba funɛ la tel dooni, Pɔɔl fun ŋɔ ba, “Saha naa mu wa ma fun nyɛn Azia pulum ni, ma zim chenani mu fun duu.

¹⁹ Mu yaa funɛ tum ya kunyan ti tuma awa jɛɛgisi nɛɛ. Hali Ju tim ta funɛ na nyinbaanasa di mu namsi kinkan chen ni mu zi wiu, nannɛ mu funɛ tum.

²⁰ Mu funɛ biksi Koosa laaboor weri ti a nyɛ ma nara suwachak ni a vɛɛn biksi ma a li ma damsi ni. Kinkin naa la zi suŋi ma wa ka mu vɛ ŋɔ ma.

²¹ Mu funɛ tɛ Ju tim ta awa ba naa vɛ ya Ju tima ninu di o lawa ba gil ba tum tagnau a burgi a tiŋ Koosa a nyɛ ba se su ya kunyana Yesu.

²² Lalaknɔ mu tiŋ Koosa siim weri ti nɔ a le la Jɛrusalɛm. Mu wa zim chenani maga kaa ya min dooni.

²³ Mu zimu di doonani maga mu funɛ gba, waa funɛ ŋɔ min di mu zi na namsiu ka nara tɔ min dɛ.

²⁴ Mu baga wa to kin naa ya min ni. Ya kunyana Yesu fun lisi min di mu biksi nara Koosa laaboor weri ti wɛ awa chenani Koosa daŋni o suŋi ba. Mu bambi maga nyɛn tum nɔ o kpa nyɛ min di mu tum a peti nannɛ.

²⁵ “Mu wa ma funɛ nyɛn, mu funɛ biksi ma di saha naa Koosa kaa wa dɔ nara telu. Mu zimu di saha nɔ kpa la, ma wa zi bu na min.

²⁶ Nan daha, mu sɛm ma wutirɛ, a wuzu naa Koosa wa na ma galimsa a ta ma yɔri, o wa ya mu wi.

²⁷ Kin naa maga Koosa daŋni o tum wa ka mu vɛ biksi ma.

²⁸ Waa funɛ nyɛ o be sou a nyɛ ya, chen ni ya zi kotiu a bur a tiŋ un a ya o nara. O siim weri ti funɛ lisi ma di ma ya Yesu nitiŋɛ ba naa funɛ nyɛn Ɛfɛsus ni, nihɛɛta. Ba waa chi piisisa ka ma ka chi ba nigbaŋɛ. Ma kpak Yesu nɛnɛ, chen ni ma zi kotiu a kok ba.

²⁹ Mu funɛ kaali chen gantɛl nɛɛ, mu zimu di nara zi wau a chi gbesa a chem ba naa ma nyini chen a muksi ma kinkan.

³⁰ Hali saha zi wa telu di ma Yesu nitiŋɛ ta bɔnɛ zi wa siu a suni wɛ, chen ni bɔnɛ zi purigiu a la tiŋ ba.

³¹ Ma doso a kilisi chenani mu fun kpak un mu bambi ni di mu biksi ma bunsa tora a ta hiisi tama.

³² “Lalaknɔ mu kpa ma a du Koosa nin ni. O laaboor weri ti chenani o suŋi nara wɛ zi nyɛ ma kpak unu nɛnɛ a gbaari. Wuzu digi o zi wa kpa kin nawara o fun kpa chiŋsiu a nyɛ ba naa maga o fun lisi a nyɛ o titi ni.

³³ Mu wa ma funɛ nyɛn, mu wa funɛ daŋni nandigi salma koo aniita koo gar.

³⁴ Mu yaa funɛ tum a li mu bara wilim nee a nyini mu wa mu pɛgsa.

³⁵ Mu funɛ tum nannɛ di mu biksi ma chenani ma gbanko zi wa tum a koti a suŋi fara tima. Ma lisi chenani ya kunyana Yesu fun biksi ya. O funɛ ŋɔ, ‘Nar lisi a li o kin ni a nyɛ nandigi ni, o tuha zi sɔɔniu a kaali nara nyɛ un kina.’ ”

³⁶ Pɔɔl funɛ sɛm peti, o wa ba fun gbiri tɛɛnɛ ni a sumi Koosa.

³⁷ Doone ba fun si a chausi un. Nidamata funɛ wi ka bɔnɛ kpa ba nisa a kur un a mɔksi.

³⁸ Chenani o fun te ŋɔ ba di o wa zi bu na ba fun chɔk ba tusa kinkan, ka ba gil un o zu arŋ ti.