Tuma 2 - Tampulma

Koosa Siim Weri Ti Waali

¹ Ju tim ta wuzu zen naa ba funɛ yir Pɛntɛkɔst chen wa tel, Yesu gantɛl tiŋsi ta maga fun wa lagmi dɔŋ ni.

² Ba funɛ nyɛn doonee, chɛɛma fun vaan wa pirigi ba ni a li buudaha ni a chi do peha, a su doonani maga ba kani chen.

³ Doone ba fun nyini a na ka o chi din ful purige a kani ba nyuuni ni,

⁴ ka Koosa siim weri ti fun wa si ba bambe ni, a nyɛ ba fun piili a sɛm sɛm naa vɛ ya ba titi sɛma.

⁵ Ju tim nidamata funɛ gba a la Jɛrusalɛm wuzu zen wuzu ti daha. Ba funɛ li pulum damatiwa a la sumi Koosa saha maga.

⁶ Laaboora funɛ mɔɔli chenani maga yɛɛ, zɛmɛ kinkan fun lagmi dentil ni. Yesu gantɛl tiŋsi ta funɛ wa li a sɛm ba, zɛmɛ ta se wa fun su di ba zi nu ba sɛm ta a li ba titi sɛm niu.

⁷ Alaazibu fun kpak ba kinkan. Ba fun ŋɔ dɔŋ ni, “Nara nama la sɛm sɛma ya wati nan ya Galili timwa.

⁸ Yɛrɛ o du ya maga koti a nu sɛm nama a li ya titi sɛma ni?

⁹ Ya ya Partia tima, Miid tima, Ilam tima, Mɛsɔpɔtemia tima, Judia tima, Kapadosia tima, Pɔntus tima, Azia tima,

¹⁰ Frijia tima, Pamfilia tima, Ijipt tima, Libia tima ba naa nyɛnɛɛ a dugli Sairini, awa Room tima. Ba funɛ lul ya bɔnɛ Ju timwa. Bɔnɛ ka si a tiŋ Ju tim ta jɛɛmi nyinbaan.

¹¹ Ya bɔnɛ ka ya Krit tima awa Arab tima. Ya sɛm sɛm kurgɛwa, amaa ya nuu ka ba ŋɔ ya a li ya titi sɛma ni chenani Koosa fun tum alaazibu tuma.”

¹² Ba tusa maga funɛ buriu. Domi alaazibu funɛ kpak ba chen daha, ba bɔnɛ funɛ ŋɔ dɔŋ ni, “Kin nama mun ya baŋa?”

¹³ Bɔnɛ ka fun mɔmsi Yesu gantɛl tiŋsi ta a ŋɔ dɔŋ ni, “Nara nama nyɔ sinnɛ a dɛɛsi.”

Pita Fun Biksi Jɛrusalɛm Tima Koosa Laaboor Weri Wɛ

¹⁴ Koosa nitumɛ nara fidalɛ ta funɛ nu chenani zɛmɛ ta sɛm, Pita fun si a chiŋi a sɛm ta zaŋa a ŋɔ ba, “Ma Ju tima awa ma naa maga nyɛn Jɛrusalɛm ni, ma cheŋe ma diŋsa nɛnɛ a nu chenani mu kaa sɛm ma.

¹⁵ Ma bɔnɛ ŋɔ dɔŋ ni di ya nyɔ sinnɛ a dɛɛsi, amaa o wa ya wuti. O ha ya chɔɔsau di nara ha vɛ di kundɔŋ a nyɔ sinu.

¹⁶ Chenani mu kaa ŋɔ ma nan ya o wuti. Koosa witinsi ta digi sɔn funɛ ya Joel. Waa funɛ sɔbi a li Koosa sɛm tɔn ti ni saha digi di Koosa ŋɔ,

¹⁷ ‘Tɛɛnɛ nɔ maga siili saha wa dugli, mu zi kpa mu siim weri tiu a du nara maga ni. Ma bisa awa ma nihabichɛsa zi mɔɔli mu laaboorau a biksi nara. Ma bunɔɔna awa nihɛɛta zi la mu wutiu a chi ba deesi.

¹⁸ Hali mu zi kpa mu siim weri tiu a du mu nibaala awa nihaana tumtumsi ni di ba mɔɔli mu laaboor ti a biksi nara.

¹⁹ Mu zi kpa chɛl awa din wa nyɔsau a chɛrgi buudaha awa tɛɛnɛ nɔ magau.

²⁰ Nha wa zi bu chaani ka pɛna sɛri a chi chɛl. Kin nama maga zi wa te yau ka mu wuzu zen zi wa tel.

²¹ Chen saha ti ba naa maga sumi min di mu yisi ba a li ba tum tagna ni, n zi ya chenu.’

²² “Ma Ju tima, maa nu chenani mu kaa ŋɔ ma nan nɛnɛ. Tum zene awa alaazibu tuma a naa Koosa nyɛ Yesu Nazarɛt nar fun tum, biksi ma di Koosa funɛ lisi un. Ma titi zim kin nama wɛu domi a ya ma bambaan nɛɛ.

²³ Waa funɛ ya naa ma kpak a du tum tagna nitumɛ nisi ni chen di ba la kpaasi un a mari daakakli ti ni o sou chen. Koosa funɛ te zimu di ma zi ya chenu. O funɛ ya o tutɔrɛ di o sou chen ni.

²⁴ O fun lɛli Yesu a li o sou ni a nyɛ o namsi ti peti. O wa fun deŋli di o kpalimi o sou ni.

²⁵ Ba funɛ sɔbiu a li Koosa sɛm tɔn ti ni di koor Devid ŋɔ o wɛ, ‘Mu yaa na mu kunyana mu suwachak ni. Waa yaa suŋi min, chen ni nara wa zi muksi min.

²⁶ Domi o yaa suŋi min nan daha, mu sɛma biksi di mu tuha sɔɔnɛu. Mu ya nibinere a chi nara maga, amaa chenani mu kpak bambi bɛgim un ni nan zi nyɛ mu hiisiu.

²⁷ Mu zimu di o wa zi nyɛ mu kpalimi mu sou ni. O wa zi nyɛ o tumtum naa o fun lisi bara pɔ.

²⁸ Waa funɛ biksi min nyinbaan naa mu zi nyɛn wuti nyɛni. Domi waa nyɛn mu wati, mu tuha sɔɔni hali a la gali.’

²⁹ “Mu dɔŋ tima, n daŋni ma zim ya nawaal Devid wɛu nɛnɛ. O funɛ sou, ba fun kpa un a sogli. O hugil wa bol wa bar nɔ ni.

³⁰ O ha funɛ kpak miisa, o funɛ ya Koosa witiinne. Koosa funɛ vɔu a chiŋsi un di o zi nyɛ o bi lulɛ ta digi di o koorau.

³¹ Waa ya naa Koosa fun ŋɔ di o zi wa tumu wuzu digi chen. Devid funɛ te zimu di Koosa zi lɛli unu a li o sou ni a fun sɔbi a li Koosa sɛm tɔn ti ni a ŋɔ, ‘Koosa wa fun gil un o kpalimi o sou ni di o bara pɔ.’

³² Naa wɛ Devid fun sɔbi chen awa Yesu ya nibɛgimnɛ. Ya funɛ nau awa ya se ni ka Koosa lɛli un a li o sou ni,

³³ a kpa un a zini kaali Koosa nihɛɛti bar kani a li o tɔhɔn ti ni. O nyana funɛ kpa o siim weri tiu a nyɛ un a chi chenani o fun vɔu chen. Waa funɛ kpa chen siim weri ti a du ya bambe ni. Chenani ma nu a na zinan ya o waali ti mun.

³⁴ Koosa wa fun zer Devid a zini kaali o tɔhɔn ti, amaa ba funɛ sɔbiu a li Koosa sɛm tɔn ti ni di Devid ŋɔ, ‘Mu kunyana Koosa funɛ ŋɔ mu kunyan ni, kani mu nihɛɛti bar kani ni,

³⁵ ka mu nyɛ i dɔma burgi i yosa.’

³⁶ “Ma Ju tima, mu daŋni ma zimu nɛnɛ di Yesure ma fun kpu a li daakakli ti ni chen, waa ya nara maga nyuhu tiina. O gbanko ya naa Koosa fun vɔu di o zi tumu chen.”

³⁷ Pita sɛm ta funɛ zu zɛmɛ ta bambe niu kinkan. Ba fun ŋɔ un awa nitumɛ ba naa funɛ nyɛn dooni chen, “Ya dɔŋtima, yɛrɛ ya kaa ya?”

³⁸ Pita fun ŋɔ ba, “Ma te gil ma tum tagna a bur tiŋ Koosa, a nyɛ ya chaksi ma wa ni ni a li Yesu Kristo sɔn ni. Ma ya chen, Koosa zi gil ma tum tagnau a ta a kpa o siim weri ti a du ma ni.

³⁹ Chenani Koosa fun vɔu di o kpa a siim weri ti a du ya ni, o funɛ vɔu di o kpa nyɛ ma awa ma bisa wa ba naa nyɛn bar bole ni. Ba naa maga ya kunyan Koosa fun lisi a nyɛ o titi ni, o zi kpa unu a du ba bambe ni.”

⁴⁰ Sɛm ta maga laata Pita fun sɛm zɛmɛ ta. O funɛ kpaŋi o titirɛ di o sɛm ta zu ba bambe a ŋɔ, “Ma yisi ma titi a li tum tagna nitumɛ na wati, chen ni Koosa wa zi wa lɛrgi ma diŋsa a chi chenani o kaa wa lɛrgi ba kina.”

⁴¹ Doone ba nidamata fun la nɔɔni di o sɛm ta ya wutiu. Ba fun gil ba tum tagna a bur tiŋ Koosa a nyɛ nitumɛ ta chaksi ba wa ni ni. Chen saha ti ba naa funɛ gbaari Yesu gantɛl tiŋsi ta ni, funɛ dugli nara tusugsa torau.

⁴² Ba se funɛ sɛriu di nitumɛ ta biksi ba chenani ba zi tiŋ Yesu. Ba fun kpa ba kina a wa bɔni dɔŋa a yaa sumi Koosa a lagmi a di diwe.

Chenani Yesu Nitiŋɛ Ta Lagmi Nyɛn

⁴³ Koosa funɛ nyɛ o nitumɛ ta tum tum zene awa alaazibu tumwa kinkan. Tum na daha, Yesu gantɛl tiŋsi ta maga funɛ nyɛ ba jirima kinkan.

⁴⁴ Yesu nitiŋɛ ta maga fun kpalimi dɔŋ wati a kpa ba kina a bɔni dɔŋa.

⁴⁵ Ba fun yogli ba kina maga a nyɛ ba naa la daŋni a ni.

⁴⁶ Wuzu kam ba yaa fun la lagmi Koosa bar jɛɛmi dam ti niu a sumi Koosa aa go ba damsa a lagmi a di diwe awa tu sɔɔni. Ba nisa wa fun zuk wa ba lagmi a tum tuma.

⁴⁷ Ba yaa funɛ pɛgi Koosau ka Jɛrusalɛm tima lisi di ba ya nibin werewa. Wuzu kam Koosa fun kpa ba naa o yisi a li ba tum tagna ni, a gbaari ba ni.