Tuma 19 - Tampulma

¹ Apɔlɔs funɛ nyɛn Kɔrint ni, Pɔɔl fun gba a la li Ɛfɛsus. O fun la pu Yesu nitiŋɛ ta bɔnɛ dooni,

² a pɛɛsi ba, “Ma funɛ nyɛ ma se su Koosa laaboor weri ti chen, ma la Koosa siim weri tiuu?” Ba fun ŋɔ un, “Ya ha wa nu un di Koosa siim weri ti nyɛnu.”

³ Pɔɔl fun bu pɛɛsi ba, “Anti sɔnnɛ ba kpa a chaksi ma?” Ba fun ŋɔ, “Nirɛ ba fun kpa chaksi ya a chi chenani Jɔn funɛ chaksi nara chen.”

⁴ Pɔɔl fun ŋɔ ba, “Jɔn funɛ chaksi ba naa gil ba tum tagna a bur tiŋ Koosa chene. O gbanko funɛ biksi Ju tim ta di ba nyɛ ba se wa su naa tiŋ o gantɛl a wa chen. Chen tiina ya Yesu.”

⁵ Yesu nitiŋɛ ba naa funɛ nyɛn Ɛfɛsus ni, funɛ nu Pɔɔl sɛm ta, ba fun nyɛ o kpa ya kunyan Yesu sɔn a chaksi ba wa ni ni.

⁶ Pɔɔl fun kpa o nisa a saksi ba ni di Koosa siim weri ti wa zu ba bambe ni. Ba fun piili a sɛm sɛm kurgɛ a la sɛm nara ni Koosa laaboor weri ti wɛ.

⁷ Ba funɛ ya nara fidalɛwa.

⁸ Pɛnsa tora Pɔɔl yaa fun la zu Ju tim ta bar lagmi dɛ a kpak o bambi a biksi nara. O wa ba di amɔrɛ di o nyɛ ba se su di saha naa Koosa dɔ nara chen telu.

⁹ Ba bɔnɛ bambe funɛ kpoku ka ba se vɛ su o sɛm ta. Ba fun sɛm wu tagna a du ya kunyan ti nyinbaan tiŋi ti ni a li nara tima maga suwachak ni. Pɔɔl funɛ nu chenani ba sɛm, o wa Yesu nitiŋɛ ta fun gil ba a la zu dɛ zen digi. Nibiksi naa ba yir Tiranus gbanko yaa funɛ biksi narau dooni. Wuzu kam Pɔɔl yaa funɛ biksi Yesu nitiŋɛ ta dooni ka ba lɛusi un.

¹⁰ O funɛ biksi dooni bunsa lɛwa hali Ju tim ta maga awa ba naa vɛ ya Ju tima aa nyɛn Azia pulum ni fun nu ya kunyan ti laaboor weri ti wɛ.

Chenani Funɛ Ya Skiiva Bisa

¹¹ Chen saha ti Koosa fun suŋi Pɔɔl o tum tum zene naa nara ha vɛ naali.

¹² Yesu nitiŋɛ ta fun kpa Pɔɔl tum kilaarɛ a la gbaŋsi wichɔɔrsa ba na alaafɛ. Ba fun vɛɛn kpa a a gbaŋsi ba naa alizin tagna nyɛn ba nyuuni ni a li ba ni.

¹³ Ju tim ta bɔnɛ yaa funɛ gbau a go a duŋni alizin tagna a li nara ni. Ba funɛ nu chenani Pɔɔl funɛ ya, wuzu digi ba fun ŋɔ alizin tagin ni, “Ya kpa Yesu naa Pɔɔl sɛm o wɛ chen, sɔnnɛ a ŋɔ hin di i li.”

¹⁴ Koosa dam kɔkɔɔrsa nihɛɛ naa ba yir Skiiva digi fun lul nibaala nara banɔpɛ. Ba waa funɛ ya ba naa la tum chen.

¹⁵ Alizin tagin ti fun ŋɔ ba, “Mu zim Yesu awa Pɔɔl, amaa anti ya ma?”

¹⁶ Alizin tagin ti fun si baal ti ni a la muksi ba wa kpok ni a huusi ba a puuni ba kilaarɛ a nyɛ ba chɔ kaali.

¹⁷ Ju tim ta maga awa ba naa vɛ ya Ju tima aa nyɛn Ɛfɛsus ni fun nu chenani yɛɛ. Hansura fun kpak ba kinkan, chen ni ba fun nyɛ ya kunyana Yesu awa jirima kinkan a gbaari.

¹⁸ Yesu nitiŋɛ ta nidamata fun lagmi dɔŋ ni a sɛm chenani ba tum tuma a vɛ sɔɔni Koosa tuha.

¹⁹ Ba naa funɛ ya tu bilim tima nidamata fun kpa ba tɔna a wa dau nara maga suwachak ni a fu a. Tɔn ta malɛ funɛ tel sidi tusugsa fumnyuunu.

²⁰ Chenani maga funɛ ya nyɛ nidamata se su ya kunyan ti laaboor weri ti a gbaari.

Ɛfɛsus Tɔhɔn Tima Fun Dam

²¹ A gantɛl nɛɛ Pɔɔl fun lisi di o zi gbau a la Masɛdonia pulum awa Girik tima pulum a bur wa Jɛrusalɛm. O gbanko fun lisi di chen gantɛl ni o zi li dooniu a la Room.

²² O fun tum o nisuŋi nara balɛ, Timoti awa naa ba yir Ɛrastus chen, ba te o suwachak a kaali Masɛdonia pulum. O fun kpalimi Ɛfɛsus naa nyɛn Azia pulum ni.

²³ Chen saha ti nidamata funɛ tiŋ ya kunyan ti nyinbaan. Chendaha ba naa funɛ nyɛn Ɛfɛsus ni nyɛ o dam.

²⁴ Ɛfɛsus tim ta yaa funɛ jɛɛmi vuk nihaan naa ba yir Atimis a kpa un a du dam zen ni. Ba naa funɛ nyɛn Ɛfɛsus ni chen bɔnɛ yaa fun kpa aniita a kɔɔri dam wisa a chi vuk ti dam zen ti a na nyɔɔra kinkan a li a ni. Ba nihɛɛ sɔn funɛ ya Dimitrius.

²⁵ Wuzu digi o fun yir o tumtumsi ta a lagmi dɔŋ ni a ŋɔ ba, “Mu tumtum dɔŋsa, ma zimu di yaa na nyɔɔra kinkannɛ a li ya dam wisi ta kɔɔri nɔ ni.

²⁶ Ma zimu chenani Pɔɔl nɔ biksi nara tima di ba bur a li vursi naa nibinsa kɔɔri jɛɛmi ni, domi a ya yɔrirɛ. Nidamata funɛ tiŋ o nɔ a li Ɛfɛsus nɔ awa Azia tim pulum maga ni.

²⁷ Chenani ya yaa kɔɔri dam wisi ta a chi vuk ti dam zen ti a na nyɔɔra kinkan chen, ya zi chelu a ta bu na nyɔɔra. Azia tim ta maga awa nidamata a li bawu maga ni yaa jɛɛmi ya nihaan vuk zen naa ba yir Atimis. Chenani Pɔɔl biksi chen mɔɔli aa gbaari, nandigi wa zi bu nyɛn a jɛɛmi vuk ti ka dam zen naa ya kpa un a du chen chesi.”

²⁸ Dimitrius tum dɔŋsi ta funɛ nu o sɛm ta, ba fun na paan kinkan a la tɛsi a ŋɔ, “Ma nyɛ yaa nyɛ Ɛfɛsus tim ta vuk naa ba yir Atimis jirima.”

²⁹ Ba fun li a tɛsi a go tɔhɔn tuha a chi chenani ba fa te tɛsi chen a nyɛ tɔhɔn ti dam. Yesu nitiŋɛ ba naa nyɛn Masɛdonia pulum ni chen, nara balɛ wa Pɔɔl funɛ wa Ɛfɛsus. Ba sɔna funɛ ya Gaiyus awa Aristakus. Zɛmɛ ta fun kpaksi nara balɛ ta a ka Pɔɔl a chɔ kaali doonani tɔhɔn ti tima yaa lagmi.

³⁰ Pɔɔl funɛ nu chenani yɛɛ, o funɛ daŋni o la sɛm zɛmɛ ta ni a la ba, amaa Yesu nitiŋɛ ta funɛ lisiu di chen wa kpak nyinbaan.

³¹ Azia tim koorsa ba naa funɛ nyɛn Ɛfɛsus ni, bɔnɛ funɛ ya Pɔɔl chɛnsiwa. Ba funɛ nu chenani Pɔɔl daŋni o ya, ba fun tum nara ba la ŋɔ un di o ta la dooni.

³² Zɛmɛ ba naa funɛ lagmi a dam chen funɛ tɛsi kinkan. Ba nidamata wa fun zim kinkin naa nyuhu ni ba ya chen. Chendaha ba maga fun tɛsi a kurgɛ.

³³ Ju tim ba naa funɛ nyɛn zɛmɛ ta ni, bɔnɛ fun kpak baal naa ba yir Alɛzanda a zak un li zɛmɛ ta suwachak di o ŋɔ ba chenani o kpak. O fun a viigi o nin di ba gil chɛɛma.

³⁴ Ba funɛ wa zim di o ya Ju narrɛ, ba chɛɛm ti fun wa lagmi kibɛgim ka ba chɛɛmi aa la ŋɔ, “Ma nyɛ yaa nyɛ Ɛfɛsus tim ta vuk naa ba yir Atimis jirima.” Hali karifisa lɛ ba funɛ chɛɛmi chene.

³⁵ A gantɛl ni tɔhɔn ti witiina fun wa chiŋi zɛmɛ ta suwachak ni a nyɛ ba gil chɛɛma. O fun ŋɔ ba, “Ma Ɛfɛsus tima, ba naa maga nyɛn tɛɛnɛ nɔ maga ni zimu di wuzu digirɛ buŋkul zen fun li buudaha a chel awa chenani ya fun sa dama a kpa un du a du un sɔn Atimis a la jɛɛmi un.

³⁶ Nara maga zimu di chenani ya chen ya wutirɛ. Chendaha o wa lawa ma lagmi a chɛɛmi kinkan a kitum tum naa vɛ kpak nyuha.

³⁷ Nara balɛ na ma kpa wa bar nɔ nan wa ŋmɛ kina a li vuk damsi ni koo a chɔk ya vuk nihaan ti sɔn.

³⁸ Dimitrius awa o tum dɔŋsi ta daŋni ba fiksi ba, ma nyɛ ba kpa ba a la a wuzu naa ba puk sɛria bar diili dɛ ti. Doonee nara koti a fiksi nara sɛria nidiili ti suwachak ni.

³⁹ Wu digi nyɛn Dimitrius awa o tum dɔŋsi ta bambe ni, ba pɔ a wuzu naa ya tɔhɔn ti tim maga yaa lagmi a na dɔŋa a nyɛ a deŋli.

⁴⁰ Roman tim ta nu chenani tɔhɔn ti dam zinan, ba zi wa pɛɛsi o munu. Ya wa zi koti a ŋɔ ba chenani o du ka ba muksi ya.”

⁴¹ O funɛ sɛm nan peti, o fun nyɛ ba pisi a li lagmi ti ni.