Tuma 18 - Tampulma

Pɔɔl Fun Kaali Kɔrint

¹ Wuzu bilɛ wuzu, Pɔɔl fun li Atɛns ni a kaali tɔhɔn naa ba yir Kɔrint.

² O fun la tel dooni a pu Ju tim baal naa ba yir Akwila. Ba funɛ lul un Pɔntus pulum nɛɛ ka o wa o haan naa ba yir Prisila, fun nyɛn Room ni a li Itali pulum ni. Koorsi ta nyuhu tiina Siiza Klɔdius fun ŋɔ Ju tim ta maga ni di ba li Room ni. Chendaha Akwila awa o haan ti fun nyɛn Kɔrint ni.

³ Pɔɔl fun la nyɛn ba dam ni, domi o wa Akwila funɛ ya sela tɔna nikɔɔrɛwa.

⁴ Pɔɔl yaa funɛ zu Ju tim ta bar lagmi dɛu ba wuzu hiise wuzu o wa ba awa ba naa vɛ ya Ju tima di amɔrɛ di o nyɛ ba se su o sɛma.

⁵ Sailas awa Timoti funɛ la tel Kɔrint a la Masɛdonia pulum ni, Pɔɔl fun gil o sela tɔn ta kɔɔri a kpa o saha maga a biksi nara Koosa laaboor weri ti wɛ. O fun kpak o titi a biksi Ju tim ta a li gbampulim ni di Yesu ya Kristo naa Koosa fun vɔu di o zi wa tumu wuzu digi chen.

⁶ Ju tim ta wa fun la nɔɔni a nu chenani o biksi ba chen a sɛm sɛm tagna a du un ni. Pɔɔl fun burgi o gantɛl a chak ba a ŋɔ ba, “Koosa na ma galimsa a ta ma yɔri a li ma nɛɛ. O wa li min ni. Saha nɔ kpa la n wa zi bu biksi ma. Mu ka zi la biksi ba naa vɛ ya Ju tim tau.”

⁷ Pɔɔl fun gil ba a la nyɛn baal naa ba yir Titius Jastus dam ni. O funɛ ya ba naa vɛ ya Ju tim ta nidigirɛ a la jɛɛmi Koosa. O dam ti funɛ sak Ju tim ta bar lagmi dɛ ti nɛɛ.

⁸ Ba bar lagmi dɛ ti nihɛɛta digi sɔn funɛ ya Krispus. O wa o walɛ fun nyɛ ba se su ya kunyan ti. Ba naa funɛ nyɛn Kɔrint ni, nidamata fun nu Koosa laaboor weri ti a nyɛ ba se su un. Doone Yesu nitiŋɛ ta fun chaksi ba wa ni ni.

⁹ Dusum digi Pɔɔl fun na ya kunyan ti a chi o deesi ka o ŋɔ un, “Ta ɔmi. Ta bur gantɛl a li laaboor weri ti biksi ti ni,

¹⁰ domi mu nyɛn i wati. Min dɔ ba naa nyɛn tɔhɔn nɔ nidamata. Chendaha nandigi wa zi koti a tum hin tum tagin.”

¹¹ Ya kunyan ti funɛ kaali, Pɔɔl fun si a nyɛn doon a biksi nara bun birigi awa pɛnsa nɔra.

¹² Doone Roman tima fun lisi baal naa ba yir Galio a vɔu un gɔbnati nyuhu tiina a li Girik tim pulum ni. Chen saha tirɛ Ju tim ta fun lagmi a kpak Pɔɔl a kpa un la Galio suwachak di ba fiksi un.

¹³ Ba fun ŋɔ Galio ni, “Baal nɔ yaa biksi ya nara di ba jɛɛmi Koosa aa chɔk ya chi.”

¹⁴ Pɔɔl funɛ daŋni o sɛmu amaa Galio wa fun nyɛ o na nɔ a sɛm a ŋɔ Ju tim ta ni, “Baal nɔ fu tum tum naa vɛ deŋli, mu fu zi sɔɔni mu barau a nu chenani ma zi sɛm.

¹⁵ Ma la sɛm di o biksi ti chɔk ma chire. Ma waa la zi lisi chenani ma zi ya. Mu wa zi di chen sɛria.”

¹⁶ O funɛ sɛm peti chen, o fun nyɛ o lanjimasa duŋni ba a ta.

¹⁷ Ba nidigi sɔn funɛ ya Sɔstenis. O wa funɛ ya ba bar lagmi dɛ ti nihɛɛti ta digi. Ba funɛ li sal ti, ba naa funɛ nyɛn doon chen, bɔnɛ fun kpak un a tuk dooni. Nandigi fun la ŋɔ Galio ni chenani ba ya un, amaa o baga wa fun to.

Pɔɔl Fun Bur Kaali Antiɔk A Li Siiriya Pulum Ni

¹⁸ A gantɛl nɛɛ Pɔɔl fun nyɛn Kɔrint ni a vusi. Doone Yesu nitiŋɛ ta fun tiŋ o wa Akwila awa Prisila a la ta nyinbaan ni ba la tɔhɔn naa ba yir Kɛnkrɛa. Doonee Pɔɔl fun vɔu vɔwi a nyɛ Koosa ni di o zi tiŋ unu a gbaari a nyɛ ba funi o nyuha di nara zim. Ba fun zu arŋ naa le la Siiriya pulum.

¹⁹ Ba fun la tel tɔhɔn naa ba yir Ɛfɛsus ka Pɔɔl fun la zu Ju tim ta bar lagmi dɛ di o wa ba di o biksi ti amɔrɛ.

²⁰ Ba bɔnɛ fun ŋɔ un di o nyɛn ba wati a vusi. O fun ŋɔ ba di o wa kikoti.

²¹ Pɔɔl fun chausi Akwila awa Prisila dooni a ŋɔ ba naa la daŋni o nyɛn ba wati chen, “Koosa nyɛ min nyinbaan, mu zi bur wa ma watiu.” Doone o fun bu a la zu arŋ ti a kaali.

²² O fun la tel Siizaria a li arŋ ti ni a la zaami Yesu nitiŋɛ ba naa nyɛn Jɛrusalɛm ni a gali kaali Antiɔk a li Siiriya pulum ni.

²³ O funɛ ya tama o fun li dooni a gba a go Frijia awa Galesia pulum a kpami Yesu nitiŋɛ ba naa nyɛn dooni di ba kpak Yesu nɛnɛ.

Apɔlɔs Fun Kaali Ɛfɛsus Awa Kɔrint

²⁴ Ju tim ta nidigi funɛ nyɛn doon ba yir un Apɔlɔs. Ba funɛ lul un a li tɔhɔn naa ba yir Alɛzandria a li Ijipt pulum ni. O funɛ zim Koosa sɛm tɔn ti munu kinkan a koti a kpa un a biksi nara nɛnɛ. Wuzu digi o fun wa Ɛfɛsus.

²⁵ O funɛ zim chenani nara tiŋ ya kunyan ti, amaa ba wa fun kpa Yesu sɔn a chaksi un. Ba ka funɛ kpa nire a chaksi un a chi chenani Jɔn fun chaksi nara wa ni ni chen. O funɛ biksi Ɛfɛsus tima wuti awa si sɛm nɛɛ Yesu wɛ.

²⁶ O fun la zu Ju tim ta bar lagmi dɛ a kpak o bambi a sɛm sɛma a nyɛ ba. Akwila awa Prisila funɛ nu o sɛm ta, ba fun kpa un kaali dama a la biksi un chenani nara zi tiŋ ya kunyan ti a kaali chenani o zim.

²⁷ O fun wa ya wuzu bilɛ Apɔlɔs fun lisi di o zi la Girik tim pulumu. Yesu nitiŋɛ ba naa funɛ nyɛn Ɛfɛsus ni, daŋni ba suŋi un a sɔbi tɔn a nyɛ ba niinbisa ba naa nyɛn dooni. Ba fun sɔbi a ŋɔ di o wa tel ba la un nɛnɛ a du. O fun la tel doon a suŋi ba naa Koosa fun suŋi a nyɛ ba, se su un chen kinkan.

²⁸ Apɔlɔs wa Ju tim ta fun di amɔrɛ kpok a nyaŋi ba a li nara tima suwachak ni. O fun lisi Koosa sɛm tɔn ti bar digi a biksi ba a li gbampulim ni di Yesu ya Kristo naa Koosa fun ŋɔ di o zi wa tumu wuzu digi chen.