Tuma 16 - Tampulma

Timoti Fun Gbaari Pɔɔl Awa Sailas Ni Ba Kaali

¹ Pɔɔl awa Sailas fun bur kaali Dɛɛbɛ awa Listira. Yesu nitiŋɛ ta digi funɛ nyɛn doon ba yir un Timoti. O niina gbanko funɛ ya Yesu nitiŋirɛ. O niin ti funɛ ya Ju timwa ka o nyana ka ya Girik tima.

² Ya niinbisa ba naa maga nyɛn Listira awa Ikonium ni, funɛ sɛm di Timoti ya narrɛ.

³ Ju tima ba naa maga funɛ nyɛn dooni, fun zim di ba wa teŋ Timoti, domi o nyan ti wa fun ya Ju tima. Chendaha Pɔɔl fun te nyɛ ba teŋ un ka o kpa un gbaari ba ni.

⁴ Ba funɛ li tɔsi ni, ba yaa fun ŋɔ Yesu nitiŋɛ ta ni chenani nitumɛ ta awa nihɛɛta ba naa funɛ nyɛn Jɛrusalɛm ni, fun sɔbi a li ba tɔn ti ni. Ba gbanko fun ŋɔ ba di o lawa ba tiŋ chenani ba sɛmu.

⁵ Saha tirɛ Yesu nitiŋɛ ta fun kpak Yesu nɛnɛ a gbaari ka nidamata nyɛ ba se su un a gbaari ba ni wuzu kama.

Pɔɔl Fun Kaali Troas

⁶ Pɔɔl awa o kpɛgsa fun gba a la li Frijia awa pulum naa ba yir Galesia. Ba funɛ la tel pulum naa ba yir Azia, Koosa siim weri ti wa fun nyɛ ba nyinbaan di ba zu a biksi Koosa laaboor weri ti dooni.

⁷ Ba fun wa tel doonani ba yir Misia a daŋni ba zu pulum naa ba yir Baitinia. Ya kunyan Yesu siim weri ti ha wa fun vɛɛn la nɔɔni di ba zu.

⁸ Ba fun la gali Misia a la tel tɔhɔn naa ba yir Troas naa nyɛn teku nɔ ni.

⁹ A wuzu ti dusum Pɔɔl funɛ na baal digirɛ a chi o deesi ka o li pulum naa ba yir Masɛdonia. O fun chiŋi Pɔɔl suwachak ni a sumi un, “Ji a wa suŋi ya.”

¹⁰ Baal ti funɛ kaali, ya wa Pɔɔl fun saksi di ya la Masɛdonia, domi Koosa funɛ biksi ya di ya ŋɔ ba naa nyɛn dooni o laaboor weri ti wɛ.

Lidia Si Funɛ Su Yesu Filipai Ni

¹¹ Ya fun zu arŋa a li Troas ni a kpa ya se a chem doonani ba yir Samotres ka ni go un. Chɔɔsa funɛ wa pisi, ya fun la tel tɔhɔn naa ba yir Niapɔlis.

¹² Ya fun kpa teku ti a ta ya gantɛl ni a la tel tɔhɔn naa ba yir Filipai. O funɛ ya tɔ birigirɛ a li Masɛdonia pulum ti ni. Roman tima funɛ sa un. Ya fun nyɛn doon wuzu damata.

¹³ Ju tim ta wuzu hiisi funɛ wa tel, ya fun li tɔhɔn ti ni a la val pul nɔ ni, a dɛu doonani Ju tim ta yaa lagmi a sumi Koosa. Ya funɛ na un, ya fun la lagmi nihaani ni a kani dooni a sɛm.

¹⁴ Nihaani tima digi sɔn funɛ ya Lidia ka o nu ya sɛm ta. O yaa funɛ yogli gar naa ya ti bɛgim a laksi kibilima awa kisɛma ka a malɛ kpok kinkan. O funɛ li tɔhɔn naa ba yir Tiataya a li Azia pulum ni. O yaa funɛ jɛɛmi Koosau ka ya kunyan ti puk o bambi di o nu Pɔɔl sɛm ta.

¹⁵ Ya funɛ zim di o nu au, ya fun chaksi o wa o walɛ wa ni ni. Doone o fun ŋɔ ya, “Ma zimu di mu si su ya kunyan ti wuti, adaha wa nyɛn mu wati wuzu bilɛ.” O fun nyɛ ya bambe chɛrgi a la o wati.

Ba Fun Tɔ Pɔɔl Awa Sailas Dɛ Filipai Ni

¹⁶ Wuzu digi ya funɛ la doonani Ju tim ta yaa sumi Koosa a la chem nihabichɛl naa ya yoma. Alizin tagin funɛ nyɛn o nyuhu ni a nyɛ o yaa ŋɔ nara ni chenani kaa wa ya. O tima fun na nyɔɔra kinkan a li chenani o ya a nyɛ nara ni chen.

¹⁷ O fun tiŋ ya wa Pɔɔl gantɛl a tɛsi a la ŋɔ, “Nara nama ya Koosa zen tumtumsiwa. Ba waa funɛ mɔɔli ma a li chenani Koosa zi wa yisi ma a li ma tum tagna ni ma tiŋ un.”

¹⁸ Nihabichɛl ti fun tiŋ ya a gba wuzu bilɛ. O fun wa tel o bɔ, Pɔɔl fun burgi a ŋɔ alizin tagin ti ni, “N kpa Yesu Kristo sɔnnɛ a ŋɔ hin di i li un ni.” Alizin tagin ti fun vaan li un ni.

¹⁹ Baa naa dɔ nihabichɛl ti chen funɛ na chenani Pɔɔl ya, ba fun zim di ba wa zi bu na nyɔɔra a li un ni. Ba fun kpak Pɔɔl awa Sailas a zaksi ba a la yawa doonani ba di sɛriasa chen.

²⁰ Ba fun kpa Pɔɔl awa Sailas a kaali sɛria nidiile suwachak a ŋɔ ba, “Ju tim na muksi ya tɔhɔn narau kinkan.

²¹ Ya waa ya Roman tima. Ya chiksɛ ka wa nyɛ ya nyinbaan di ya tiŋ ba biksi.”

²² Ba funɛ sɛm chene, zɛmɛ fun go ba a wa kaali a tuksi Pɔɔl awa Sailas. Doone sɛria nidiile ta fun ŋɔ lanjimasa ba naa nyɛn dooni, di ba ur ba kilaarɛ bɔnɛ a chɛɛsi a la tuk ba wa vurmsi ni.

²³ Lanjimasi ta fun tuk Pɔɔl awa Sailas kinkan, a kpa ba a la tɔ dɛ a ŋɔ niili ni di o nyini ba nɛnɛ.

²⁴ Niili ti funɛ nu ba sɛm ta, o fun kpa Pɔɔl awa Sailas a zu la far dɛ digi tuhu ni a furgi bɔɔsa a li dagumsi ni a kpa ba naŋgere a du a ni.

²⁵ O fun wa dugli tɔhɛɛsa, Pɔɔl awa Sailas funɛ sumi Koosa a lɔ boola a pɛgi un. Ba naa ba fun kpa gbaari ba ni dɛ ti ni fun kani a nu ba wati.

²⁶ Tɛɛnɛ fun vaan zigsi kinkan. Hali dɛɛna gbanko zɛchigsa funɛ zigsi. Zɔɔnɔsa maga puk a titi ka kin nawara funɛ vɔti ba kasi.

²⁷ Niili ti fun yɛrsi a na di zɔɔnɔsi ta maga puku. O fun foŋ o chise zen a daŋni o kpu o titi, domi o funɛ lisi di ba naa maga o il chen liu.

²⁸ Doone Pɔɔl fun tɛsi kinkan a ŋɔ un, “Ta kpu i titi. Ya maga nyɛnu.”

²⁹ Niili ti fun ŋɔ di ba kpa fitin kuwa a chɔ a la gbiri Pɔɔl awa Sailas suwachak ni. Hansura fun kpak un kinkan o bara jigiri.

³⁰ O bara ta funɛ gil jigiri, o fun te ba suwachak a li a pɛɛsi ba, “Mu kunyana, yɛrɛ mu kaa ya ka Koosa yisi min a li mu tum tagna ni?”

³¹ Ba fun ŋɔ un, “Nyɛ i si su ya kunyana Yesu ka Koosa zi yisi i wa i walɛ a li ma tum tagna ni.”

³² Doone Pɔɔl awa Sailas fun biksi Koosa laaboor weri ti a nyɛ un awa ba naa maga nyɛn o dam ni.

³³ Tɔhɛɛsa funɛ wa gali tama, niili ti fun kpa ni a wa chaksi ba bar huusɛ. O funɛ ya chen peti, ba fun kpa Yesu sɔn a chaksi o wa o walɛ ta wa ni ni.

³⁴ Doone niili ti fun kpa Pɔɔl awa Sailas a kaali o dam ti a la ya diwe ba di. O wa o walɛ ta tusa fun sɔɔni kinkan, domi ba se su Koosa.

³⁵ Chɔɔsa funɛ wa pisi, sɛria nidiile ta fun tum lanjimasi ta di ba la ŋɔ niili ti ni o lisi Pɔɔl awa Sailas a nyɛ ba la.

³⁶ Niili ti fun wa ŋɔ Pɔɔl ni, “Sɛria nidiile ta funɛ tum ba wa ŋɔ min di mu lisi i wa Sailas a nyɛ ma la. Maa la a ta chɛɛmi.”

³⁷ Pɔɔl fun la ŋɔ lanjimasi ta ni, “Ma sɛria nidiile ta wa dɛ na ya galimsa, amaa ba nyɛ ma tuksi ya wa vurmsi ni nara tima suwachak ni a kpa ya tɔ dɛ. Ya ya Ju narawa a vɛɛn ya Roman tima, adaha ba wa kpak nyinbaan wa ba nyɛ ma ya ya chen. Lalaknɔ ba daŋni ba sogli a lisi ya a ta. Ya wa la nɔɔni chenani ba daŋni ba ya chen. Ma bur la ŋɔ ba di ba titi kuwa a wa lisi ya.”

³⁸ Lanjimasi ta fun bur kaali sɛria nidiile ta wati a la ŋɔ ba chenani Pɔɔl sɛm ba. Sɛria nidiile ta funɛ nu di Pɔɔl awa Sailas ya Roman timwa, hansura fun kpak ba.

³⁹ Ba fun si a la ŋɔ Pɔɔl awa Sailas ni di ba gil ba tum tagna a nyɛ ba. Doone sɛria nidiile ta fun te ba suwachak a li dɛ ti ni a sumi ba di ba li ba tɔhɔn ni.

⁴⁰ Pɔɔl awa Sailas fun kaali Lidia dama di ba la na ba niinbisa ba naa lagmi dooni. Ba fun sɛm sɛma a kpami ba a li tɔhɔn ti ni.