Tuma 15 - Tampulma

Yesu Nitiŋɛ Fun Lagmi Jɛrusalɛm Ni A Na Dɔŋa

¹ Wuzu digi nibin bɔnɛ fun li Judia pulum a kaali Antiɔk a la biksi Yesu nitiŋɛ ba naa ya ya nibinsa a nyɛn dooni, a ŋɔ ba, “Koosa wa kikoti a yisi ma a li ma tum tagna ni see ba teŋsi ma a chi chenani Ju tim ta chiksɛ ta biksi ya.”

² Pɔɔl awa Barnabas wa ba fun di amɔrɛ kpok a li ba biksi nɔ ni. Yesu nitiŋɛ ta fun lisi Pɔɔl, Barnabas awa ba bɔnɛ a li ba tuhu ni ba la Jɛrusalɛm ba wa nitumɛ ta awa nihɛɛti ta na dɔŋa chenani ba zi ya.

³ Yesu nitiŋɛ ta maga fun tiŋ ba a li ta nyinbaan ni. Ba funɛ nyɛn nyinbaan ni a la chene, ba fun ŋɔ Yesu nitiŋɛ ba naa nyɛn Fonisia pulum awa Samaria pulum chenani ba naa vɛ ya Ju tima nidamata funɛ gil ba tum tagna a bur tiŋ Koosa. Chenani Antiɔk tim ta fun ŋɔ ba nyɛ ba tusa sɔɔni kinkan.

⁴ Ba funɛ la tel Jɛrusalɛm, nitumɛ ta, nihɛɛti ta awa Yesu nitiŋɛ ta maga fun wa zaami ba. Doone ba fun ŋɔ ba naa nyɛn dooni, chenani maga Koosa yaa funɛ suŋi ba ba tum o tuma.

⁵ Saha ti Yesu nitiŋɛ ba naa ya Farisi tim ta bɔnɛ fun si chiŋi ba suwachak ni a ŋɔ, “O lawa Yesu nitiŋɛ ta tiŋ Ju tim chiksɛ tau a nyɛ ba teŋsi ba.”

⁶ Nitumɛ ta awa nihɛɛti ta fun li ba duŋduŋ a na dɔŋa chenani ba zi ya.

⁷ Ba funɛ sɛm chene a vusi, Pita fun si chiŋi ba bambaan ni a ŋɔ ba, “Mu niinbisa, ma zimu di Koosa funɛ lisi min a li ma ni saha digi di mu la biksi o laaboor weri ti a nyɛ ba naa vɛ ya Ju tim ni, chen ni ba zi nu unu a nyɛ ba se su un.

⁸ Koosa naa zim chenani nibinsa bambe du, fun kpa o siim weri ti a du ba ni a chi chenani o fun te kpa du ya ni chen. Nan funɛ biksi ya di ba naa funɛ vɛ ya Ju tima zi kotiu a wa zim un a chi ya.

⁹ Koosa funɛ gil ba tum tagna a nyɛ ba domi ba se su o laaboor weri ti daha. Nan biksi ya di ya naa ya Ju tima awa ba naa vɛ ya Ju tima ya nibɛgimnɛ.

¹⁰ Chenani ba fun teŋsi ya nawaalsi ta awa ya titi awa chenani ba wa ya fun kpaŋi di ya tiŋ Ju tim ta chiksɛ ta, chen wa fun suŋi ya. Chendaha Koosa vɛ daŋni ya ya kpa kin naa vɛ ya kibirigi a gbaari Yesu nitiŋɛ ba naa vɛ ya Ju tima.

¹¹ Chenani ya kunyana Yesu fun suŋi ya ya se su un, ka Koosa fun yisi ya a li ya tum tagna ni ya tiŋ un awa chenani o tum nyɛ ba ya kibɛgimnɛ. Kin nama ya kibirige.”

¹² Pita funɛ sɛm peti, ba maga fun moori di ba nu Barnabas awa Pɔɔl wati. Ba fun ŋɔ ba chenani Koosa fun suŋi ba ba tum tum zene awa alaazibu tuma a nyɛ ba naa vɛ ya Ju tim ni.

¹³ Ba sɛm ta gantɛl nɛɛ, Jems fun ŋɔ ba maga ni, “Mu niinbisa, ma nu mu wati.

¹⁴ Simɔn Pita fa ŋɔ ya di Koosa funɛ lisi ba naa vɛ ya Ju tim chen nidamata a nyɛ o titi ni. Nan biksɛɛ di Koosa daŋni bau.

¹⁵ Chenani Koosa witinsi ta fun sɔbi a li Koosa sɛm tɔn ti ni chen funɛ chiŋi o sɛm ta gantɛl ni. Ba fun sɔbi di Koosa ŋɔ,

¹⁶ ‘Koor Devid walɛ chi damnɛ mu fun sa ka o chel. Wuzu digi mu zi wa bur wa sa unu,

¹⁷ chen ni ba naa maga vɛ ya Ju tima mu fun lisi a nyɛ mu titi ni zi dɛu mu bar nyɛniu.

¹⁸ Kin namawa mu fun kpa biksi nara tima saha digi.’ ”

¹⁹ Jems fun bukoo ŋɔ ba, “Ba naa vɛ ya Ju tima nidamata bur aa tiŋ Koosa. O ya mu tutɔrɛ ya vɛ kpa kin nama a gbaari ba.

²⁰ Ma nyɛ ya sɔbi tɔn a ŋɔ ba di o wa lawa ba di vursi diwe domi a ya doŋwa a vɛɛn ŋɔ ba di ba ta tum chɔkumsi tuma a ta se nɛmɛ naa ba vɛ kɔrigi o li chɛl.

²¹ Ba naa vɛ ya Ju tima funɛ piin zimu di chenani mu sɛm chen ya wu birigirɛ, domi Ju tim ta yaa funɛ biksi chenani Mosis fun sɔbi a li Koosa sɛm tɔn ti ni saha digi a li ba bar lagmi dɛɛni ni tɔsi maga ni a vusi.”

Nitumɛ Fun Sɔbi Tɔn A Nyɛ Ba Naa Vɛ Ya Ju Tim Ni

²² Jems funɛ sɛm peti, nitumɛ ta, nihɛɛti ta awa Yesu nitiŋɛ ta maga fun lisi nara balɛ a li ba tuhu ni di ba la lagmi Pɔɔl awa Barnabas ni ba la Antiɔk. Ba sɔna funɛ ya Judas Barsabas awa Sailas. Yesu nitiŋɛ ta maga fun nyɛ ba jirima kinkan.

²³ Nannɛ ba fun sɔbi a li tɔn nɔ ni. “Nitumɛ ta awa Yesu nitiŋɛ nihɛɛta, ba naa ya ma niinbisa, sɔbi tɔn nɔ a zaami Yesu nitiŋɛ ba naa vɛ ya Ju tima a nyɛn Antiɔk, Siiriya pulum awa Salisia pulum ni.

²⁴ Ya funɛ nu di ba naa li ya tuhu ni bɔnɛ funɛ wa buti ma awa ba biksi ni. Ya wa fun nyɛ ba nyinbaan di ba ya chen.

²⁵ Zinannɛ ya maga lagmi di ya na dɔŋa a zim chenani ya zi ya a lisi nara balɛ di ba lagmi Pɔɔl awa Barnabas ni ba la ma wati. Ya daŋni Pɔɔl awa Barnabasrɛ kinkan,

²⁶ domi baa tum ya kunyan Yesu Kristo tumau a li bar tagni ni.

²⁷ Nara balɛ ta ya lisi a gbaari ba ni chen sɔna ya Judas awa Sailas. Chenani ba zi sɛm ma awa chenani ya sɔbi a li tɔn ti ni ya kibɛgimnɛ.

²⁸ Koosa siim weri ti te ya suwachak di ya ta bu kpa chiksɛ a gbaari ma, amaa ma doso aa tiŋ ya sɛm na.

²⁹ Ma ta di vursi diwe a ta se nɛmɛ naa ba vɛ kɔrigi o li chɛl a ta tum chɔkumsi tuma. Ma gil nan kin nama yaali, ma zi tiŋ Yesuu nɛnɛ. Ma zaami dɔŋa a nyɛ ya.”

³⁰ Nitumɛ ta awa nihɛɛti ta fun kpa tɔn ti a la nyɛ nara banaasi ta ni ba kpa kaali Antiɔk. Ba fun la tel doon a lagmi Yesu nitiŋɛ ta maga dɔŋ ni a kpa tɔn ti a nyɛ ba.

³¹ Chenani ba fun karimi tɔn ti ni, chen fun kpami ba a sɔɔni ba tusa kinkan.

³² Judas awa Sailas funɛ ya Koosa witinsi ta nara balɛwa. Ba gbanko fun kpami Yesu nitiŋɛ ba naa funɛ nyɛn dooni, di ba kpak Yesu nɛnɛ a vusi.

³³ Doone Yesu nitiŋɛ ta fun tiŋ ba a li ta nyinbaan ni a bur kaali Jɛrusalɛm. ((

³⁴ Amaa Sailas funɛ lisi di o kpalimi dooni.))

³⁵ Pɔɔl awa Barnabas fun kpalimi Antiɔk ni. Ba wa Yesu nitiŋɛ ta fun biksi nara Koosa laaboor weri ti wɛ.

Pɔɔl awa Barnabas Fun Waligi Dɔŋ Ni

³⁶ Wuzu digi Pɔɔl fun ŋɔ Barnabas ni, “Ya funɛ biksi narau a li tɔ damati ni. Ma nyɛ ya bur kila a la na chenani Yesu nitiŋɛ ba naa nyɛn dooni, se su.”

³⁷ Barnabas funɛ daŋni o yir Jɔn Maakrɛ a gbaari ba ni,

³⁸ amaa Pɔɔl wa fun la nɔɔni, domi Maak funɛ waligi o titiu a li ba ni a li Pamfilia pulum ni a vɛ peti tum ta.

³⁹ Pɔɔl awa Barnabas funɛ di amɔrɛ kpok o daha a waligi dɔŋ ni. Barnabas fun kpa Maak a la zu arŋa ba kaali Saiprus pulum.

⁴⁰ Yesu nitiŋɛ ta fun kpa Pɔɔl awa Sailas naa o fun lisi, a du Koosa nin ni di o suŋi ba. Ba fun li dooni,

⁴¹ a kaali Yesu nitiŋɛ ba naa funɛ nyɛn Siiriya pulum awa Sailisia pulum ni, a suŋi ba ba kpak Yesu nɛnɛ a gbaari.