Tuma 14 - Tampulma

Barnabas Awa Pɔɔl Fun Nyɛn Ikonium

¹ Pɔɔl awa Barnabas fun la tel Ikonium a la zu Ju tim ta bar lagmi dɛ a sɛm ba a chi chenani ba fun sɛm a li Antiɔk ni. Ju tim ta awa ba naa vɛ ya Ju tima nidamata fun nyɛ ba se su Koosa laaboor weri ti ba sɛm ta daha.

² Ju tima ba naa se funɛ vɛ suuli funɛ nyɛ ba naa vɛ ya Ju tim ta, bɔnɛ paan fun si a du nara balɛ ta ni.

³ Pɔɔl awa Barnabas fun nyɛn dooni a vusi a kpak bambe kpok di ba la biksi nara ya kunyan ti wɛ. Waa funɛ nyɛ ba o kpok ti di ba tum tum zene awa alaazibu tuma a nyɛ un, chen ni nara zi zimu di chenani ba biksi ba di Koosa daŋni o suŋi bau funɛ ya wuti.

⁴ Tɔhɔn ti tima ba naa funɛ lagmi dooni, a purigi a li chenani ba lisi ni. Bɔnɛ fun nyɛn Ju tim ta wati. Bɔnɛ ka fun nyɛn Pɔɔl awa Barnabas wati.

⁵ Doone Ju tim ta, ba nihɛɛta awa ba naa vɛ ya Ju tima ka ba se vɛ suuli, fun si a la chem ba wa yo ni a pini buŋkula a yaksi ba.

⁶ Pɔɔl awa Barnabas funɛ na ba ka ba wa, ba fun si lalaga a li dooni a kaali tɔsa a naa ba yir Listira awa Dɛɛbɛ awa tɔsa naa go a a li Laikonia pulum ni.

⁷ Doonee ba fun biksi Koosa laaboor weri ti a nyɛ ba nara ni.

Barnabas Awa Pɔɔl Fun Nyɛn Listira Awa Dɛɛbɛ

⁸ Pɔɔl awa Barnabas funɛ la tel Listira, ba fun la pu baal naa ba lul wa gbarigisa ka o kani dooni. O ha wa piin maksi vali.

⁹ O fun nu chenani Pɔɔl biksi tɔhɔn tima Koosa laaboor weri ti wɛ. Doone Pɔɔl fun wa zaami un a zim di o si su di o zi kotiu a tiibi un. O fun nyini o se ni,

¹⁰ a sɛm wa ta zaŋa ni, “Si a chiŋi.” Gbarigi ti fun vaan si za a chiksi a val a go.

¹¹ Zɛmɛ ta funɛ na chenani Pɔɔl fun tiibi un, ba funɛ tɛsi a la ŋɔ dɔŋ ni a li ba titi sɛm ni, “A naa ya yaa jɛɛmi chen funɛ burgiu a chi nibinsa a li buudaha ni a tu wa.”

¹² Ba fun du Barnabas sɔn digi Zuus. Pɔɔl ka funɛ di sɔn digi Hɛmis, domi waa yaa funɛ sɛm sɛm ta.

¹³ Zuus bar jɛɛmi dama funɛ dugli tɔhɔn tirɛ. O dam kɔkɔɔrsa funɛ nu chenani nara tima sɛm, o fun la kpaksi nuwala awa bugilfita a wa tɔhɔn ti bulzɔɔnɔ di o wa zɛmɛ ta kɔɔri kɔɔra a nyɛ Pɔɔl awa Barnabas ni.

¹⁴ Ba funɛ nu chenani tɔhɔn ti tima daŋni ba ya nyɛ ba, ba fun chɛɛsi ba kilaarɛ di zɛmɛ ta zim di ba wa la nɔɔni a chɔ zu ba bambaan a tɛsi a ŋɔ,

¹⁵ “Ma ta kɔɔri kɔɔra a nyɛ ya a kijɛɛmi ya. Ya ya nibinsiwa a chi ma. Ya wa bar nɔu di ya wa biksi ma Koosa laaboor weri ti wɛ. Koosa naa nyɛnɛɛ funɛ naami buudaha awa tɛɛnɛ wa teku wa kin naa maga nyɛn a ni. Waa la daŋni ma gil kin nawara ma jɛɛmi a ya yɔri a bur tiŋ un.

¹⁶ Hali wa zinan waa nyɛ nara maga jɛɛmi a li chenani baa daŋni ni.

¹⁷ Tum were naa o yaa tum a nyɛ ya chen biksi ya chenani o du. Waa nyɛ doon mi ya kiparɛ bi, chen ni ya zi na diwe a di wa tu sɔɔni.”

¹⁸ Hali ba funɛ sɛm ba chen maga, o funɛ bɔmu a li Pɔɔl awa Barnabas wati di ba nyɛ zɛmɛ ta gil chenani ba daŋni ba tum amaa ba funɛ koti a gil.

¹⁹ O wa fun vusi ka Ju tim ta bɔnɛ li Antiɔk a li Paisidia pulum awa Ikonium a la tel Listira. Ba fun nyaŋi zɛmɛ ta awa ba sɛm ni ka ba wa ba fun kpak Pɔɔl a yaksi un wa buŋkula ni. Ba fun baa di o sowu a lɛrgi un a li tɔhɔn ti ni a ta.

²⁰ Yesu nitiŋɛ ta fun go un wa kaali di ba na ba kisuŋi unu, amaa o funɛ kotiu a si chiŋi. O wa ba bur kaali tɔhɔn ti tuha. Chɔɔsa fun bu wa pisi o wa Barnabas fun li dooni a kaali Dɛɛbɛ.

Barnabas Awa Pɔɔl Fun Bur Kaali Antiɔk A Li Siiriya Ni

²¹ Ba fun la biksi Koosa laaboor weri ti a nyɛ nara ni dooni ka nidamata fun nyɛ ba se su un. Doone ba fun vɛɛn bur a chi chenani ba wa chen a la gali Listira awa Ikonium a la tel Antiɔk a li Paisidia pulum.

²² Ba funɛ nyɛn nyinbaan ni a la chene, ba fun nyɛ Yesu nitiŋɛ ta se suuli gbaari a kpami ba di ba kpak Yesu nɛnɛ. Ba fun ŋɔ ba, “O deŋlu wa ya te namsiu kinkan ka Koosa zi wa dɔ ya a peti.”

²³ Doone ba fun lisi nihɛɛta a li Yesu nitiŋɛ ta tuhu ni di ba nyini ba a li tɔsi ta ni. Pɔɔl awa Barnabas funɛ vɔti ba nɔɔna a sumi Koosa peti, ba fun kpa Yesu nitiŋɛ ta a du ya kunyan ti nin ni a kaali.

²⁴ Ba fun la gali Paisidia pulum ni a la zu Pamfilia pulum.

²⁵ Ba fun bu la tel Pɛɛga a biksi Koosa laaboor weri ti doon a li a kaali tɔhɔn naa ba yir Atalia,

²⁶ a la zu arŋa dooni a bur kaali Antiɔk naa nyɛn Siiriya pulum ni chen. Antiɔk ti nɛɛ Yesu nitiŋɛ ta fun te kpa Pɔɔl awa Barnabas a du Koosa nin ni di o suŋi ba ba la tum o tuma a li tɔsi naa bole ni a peti.

²⁷ Ba fun la tel Antiɔk a yir Yesu nitiŋɛ ta maga a lagmi dɔŋ ni a ŋɔ ba chenani maga Koosa suŋi ba ba tum awa chenani Koosa nyɛ ba naa vɛ ya Ju tima nyinbaan di ba se su Koosa laaboor weri ti.

²⁸ Ba fun nyɛn Yesu nitiŋɛ ta wati dooni a vusi.