Tuma 13 - Tampulma

Yesu Nitiŋɛ Fun Tum Barnabas Awa Sɔɔl Bar Bole Ni

¹ Yesu nitiŋɛ ba naa funɛ nyɛn Antiɔk ni, bɔnɛ yaa mɔɔli Koosa laaboor weri ti. Bɔnɛ ka yaa biksi ba o mun. Ba funɛ yir ba sɔna, Barnabas, Simiɔn naa funɛ ya nibin bilim, Lusius naa funɛ li Sairini pulum, Manayɛn naa wa koor Hɛrɔd funɛ lagmi a bi, awa Sɔɔl.

² Wuzu digi Yesu nitiŋɛ ta funɛ jɛɛmi ya kunyan ti a la vɔu nɔ, Koosa siim weri ti fun ŋɔ ba, “Min funɛ lisi Barnabas awa Sɔɔl di ba tum tum digi a nyɛ min. Ma waligi ba a nyɛ min.”

³ Yesu nitiŋɛ ta fun sumi Koosa chen daha a kpa ba nisa a saksi ba ni a nyɛ ba kaali.

Barnabas Awa Sɔɔl Fun Kaali Saiprus Pulum

⁴ Koosa siim weri ti fun ŋɔ Barnabas awa Sɔɔl ni di ba la tɔhɔn naa ba yir Selusia a la zu arŋa a la Saiprus pulum naa ni go chen.

⁵ Ba fun tum chenani o sɛm ba a kpa Jɔn Maak a gbaari ba titi ni. Ba funɛ la tel tɔhɔn naa ba yir Salamis a li Saiprus pulum ni, ba fun gba a zu Ju tim ta bar lagmi dɛɛna aa biksi ba Koosa laaboor weri ti.

⁶ Doone ba fun gba hali a bu la li ni ti nɔ digi a la tel tɔhɔn naa ba yir Pafɔs. Dooni ba fun pu tu bilim tiina naa ba yir Bayesu. O funɛ ya Ju tim baallɛ a ŋɔ di o ya Koosa witinsi ta digirɛ.

⁷ Baal naa ba funɛ yir Sɛjius Pɔlɔs funɛ ya Saiprus pulum ti gɔbnati nyuhu tiina. O funɛ ya nibin nɛɛgirɛ ka o wa Bayesu funɛ ya chɛnsa. Gɔbnati nyuhu tiin ti funɛ nu di Barnabas awa Sɔɔl wau, o fun yir ba ba wa biksi un Koosa laaboor weri ti wɛ.

⁸ Bayesu sɔn digi funɛ ya Ɛlimas a li Girik tima sɛm ni. O funɛ nu nara balɛ ta ka ba biksi Koosa laaboor weri ti a nyɛ gɔbnati nyuhu tiin ti ni, o fun kpaŋi o titi di o lisi un a li o se suuli ti ni.

⁹ Sɔɔl sɔn digi funɛ ya Pɔɔl. O funɛ na chenani Ɛlimas ya, Koosa siim weri ti fun si un ni o nyini o se ni,

¹⁰ a ŋɔ, “I waa naa chi sintana, yaa mur narawa a duŋni tum were aa ta. Saha maga i yaa chɛrgi ya kunyan ti sɛm wutɛu di a burgi nusuna.

¹¹ Nan daha, Koosa zi lɛrgi i diŋnau lalaknɔ. Nyulumsa zi kpak hinu hali wuzu naa Koosa fun lisi di o wa lɛli i se ta chen wa tel.” Pɔɔl funɛ sɛm chene, birsa fun vaan wa tɔ Ɛlimas se o daŋni nandigi o kpak o nin a te o suwachak.

¹² Gɔbnati nyuhu tiin ti funɛ na chenani yɛɛ, o se fun su Koosa laaboor weri ti. Alaazibu fun kpak un kinkan a li chenani Barnabas awa Sɔɔl fun biksi un ya kunyan ti wɛ.

Barnabas Awa Pɔɔl Fun La Tel Antiɔk A Li Paisidia Ni

¹³ Pɔɔl awa o dɔŋtima fun la zu arŋa a li Pafɔs ni a la tel tɔhɔn naa ba yir Pɛɛga a li Pamfilia pulum ni. Doonee Jɔn Maak fun ta ba a bur kaali Jɛrusalɛm.

¹⁴ Pɔɔl awa Barnabas fun la gali Pɛɛga ni a kaali Antiɔk a li Paisidia pulum ni. Ju tim ta hiisi wuzu funɛ wa tel, ba fun la zu ba bar lagmi dɛ a kani.

¹⁵ Nandigi funɛ karimi a li chiksɛ naa Koosa fun kpa nyɛ Mosis ni awa tɔni naa Koosa witinsi ta fun sɔbi ni. Doone bar lagmi dɛ ti nihɛɛta fun tum nandigi di o la ŋɔ ba, “Ya niinbisa, ma zim chenani ma zi sɛm a kpami nara tima, ya nyɛ ma nyinbaanu di ma ya chen.”

¹⁶ Doone Pɔɔl fun si chiŋi a kpa o nin a viigi ba suwachak ni di ba moori a ŋɔ ba, “Mu niinbisa Ju tima awa ma naa vɛ ya Ju tima a la jɛɛmi Koosa, maa nu mu wati nɛnɛ.

¹⁷ Koosa naa ya Ju tim ta jɛɛmi, funɛ lisi ya nawaalsi ta a nyɛ o titi ni a nyɛ ba ya hɔɔra a li Ijipt pulum ni. Ba funɛ nyɛn doon chene, ba fun i a gbaari. Doone o fun kpa o kpok zen ti a lisi ba li dooni,

¹⁸ a suŋi ba bun fumnaasi a li nyabaan ni. Hali ba funɛ namsi unu kinkan, amaa o wa fun gil ba suŋi.

¹⁹ O fun suŋi ba ba chɔk buuri bunɔpɛ a li pulum naa ba funɛ yir Kenan ni a nyɛ ba dɔ un.

²⁰ Saha naa Koosa fun lisi Ju tim ta a nyɛ o titi ni chen awa saha naa o fun nyɛ ba wa dɔ Kenan pulum funɛ ya bun kɔksa naasi awa fumnyuunwa. O fun te yisi sɛria nidiile a vɔti ba ba nihɛɛta. “A gantɛl nɛɛ ba vɛ wa nyɛni ka o kpa o witiina naa ba yir Samuɛl a vɔu ba nihɛɛ o chiŋi ba bar chiŋi ni.

²¹ Wuzu digi ba fun wa ŋɔ Samuɛl ni di ba daŋni koorre o nyini ba ka Koosa fun lisi baal naa ba yir Sɔɔl, Kis be, a vɔu un ba koora. O funɛ li Bɛnjamin buuri nee a nyini ba bunsa fumnaasi.

²² Doone Koosa fun lisi un a li o koor ti ni a nyɛ Devid chiŋi o bar chiŋi ti ni. Ba funɛ sɔbiu a li Koosa sɛm tɔn ti ni di Koosa funɛ ŋɔ o wɛu, ‘Mu zimu di Devid, Jɛsɛ be, ya naa mu bambi daŋni, domi o zi tum chenani maga mu daŋni o tumu.’

²³ Koosa funɛ vɔu saha digi di o zi wa tum Devid bi lulɛ ta digiu o lisi Ju tim ta tum tagna a li ba ni. Yesu funɛ ya naa Koosa vɔu di o tum chen.

²⁴ Jɔn fun te biksi ba di o lawa ba gil ba tum tagnau a bur tiŋ Koosa a nyɛ o chaksi ba wa ni ni, ka Yesu zi wa.

²⁵ Jɔn tuma funɛ wa dugli peti, o fun ŋɔ nara tima ni, ‘Ma nu mu wati nɛnɛ. Mu laata ya naa maa lisi di mu yau. Nandigi tiŋ mu gantɛl a wa. Mu purɛu wa mu ur o natausa.’

²⁶ “Mu niinbisa, ma naa ya Abraham bi lulɛ, awa ma naa vɛ ya Ju tima a la jɛɛmi Koosa. Laaboor weri naa la biksi chenani Koosa daŋni o lisi nara a li ba tum tagna ni ba tiŋ un ya ya kinnɛ.

²⁷ Jɛrusalɛm tim ta awa ba nihɛɛta wa fun zim di Yesu ya naa Koosa fun ŋɔ di o zi ya chenu a nyɛ ba. Ba gbanko wa fun zim chenani Koosa witinsi ta fun sɔbi o wɛ a li Koosa sɛm tɔn naa ya yaa karimi ya hiisi wuzuna, ni chen mun. Jɛrusalɛm tim ta awa ba nihɛɛti ta funɛ di Yesu sou sɛria, ba fun nyɛ Koosa witinsi ta sɛm ta ya wuti.

²⁸ Yesu nisa wa fun toli, amaa Jɛrusalɛm tim ta awa ba nihɛɛti ta fun sumi Pailɔt naa funɛ ya gɔbnati nyuhu tiina, di o nyɛ o lanjimasi ta kpa un a kpu.

²⁹ Ba funɛ ya chenani maga Koosa witinsi ta fun sɔbi a li o sɛm tɔn ti ni a du un ni peti, Yesu nitiŋɛ ta fun yisi un a tu daakakli ti ni a kpa un a zu sogli gbɛntɛl bɔ ni.

³⁰ Doone Koosa fun lɛli un a li o sou ni,

³¹ ka ba naa funɛ piin te tiŋ un a li Galili pulum ni a kaali Jɛrusalɛm, ba fun bu na un wa ba se ni bu damata. Laaboor weri nɔ ya ba tuma lalaknɔ ba kpa un a biksi Ju tim ta.

³² Chendaha ya wa bar nɔ zinan. Chenani Koosa fun vɔu a nyɛ ya nawaalsi ta ni chen,

³³ ya chenani o fun lɛli Yesu a li o sou ni a nyɛ ya naa ya ba bi lulɛ ni chen. Ba funɛ sɔbiu a li Koosa sɛm tɔn ti bar digi naa ba yir Saams chen ni di Koosa ŋɔ, ‘Zinan mu fa biksi narau gbampulim ni di mu ya i nyana.’

³⁴ Koosa gbanko biksi yau a li tɔn ti tuha ni chenani o zi wa lɛli Yesu a li o sou ni a ta nyɛ o pɔɔli. O fun ŋɔ, ‘Mu zi sir kpak ma sikiu a chi chenani mu kpak koor Devid siki chen.’

³⁵ Naa funɛ sɔbi tɔn ti gbanko funɛ sɛm Koosa wɛwa, ‘I wa zi nyɛ i tumtum naa i fun lisi, bara pɔ.’

³⁶ Devid funɛ kpak miisa, o funɛ tiŋ Koosa nɔu hali a wa sou. Ba fun kpa un a sogli a dugli o nawaalsi ta hugilsa ka o fun pɔ,

³⁷ amaa naa Koosa fun lɛli un a li o sou ni chen, o bara wa fun kpalimi hugil ti ni a pɔ.

³⁸ Mu niinbisa, mu daŋni ma zimu nɛnɛ di baal nɔ sɔnnɛ ya kpa a biksi ma di Koosa daŋni o gil ma tum tagnau a nyɛ ma.

³⁹ Ba naa la tiŋ chiksɛ naa Koosa fun kpa nyɛ Mosis ni duŋduŋ, Koosa ha fun vɛɛn na ba galimsa. Ba naa se ka funɛ su Yesu, Koosa wa fun na ba galimsa.

⁴⁰ Ma doso chenani Koosa witinsi ta fun sɔbi a li Koosa sɛm tɔn ti ni wa zi wa ya ma.

⁴¹ Ba fun ŋɔ, ‘Ma naa la pini Koosa sɛma zoma chen, ma nu mu wati. Tum nawara mu tum ma se ni nan, hali nandigi wa ŋɔ ma a mun, ma se wa zi su a. Chendaha Koosa zi wa na ma galimsau a ta ma yɔri, alaazibu zi kpak mau chen daha.’ ”

⁴² Pɔɔl funɛ sɛm peti, nara ta maga fun si a li. Ba bɔnɛ fun wa ŋɔ Pɔɔl awa Barnabas ni di ba bur wa biksi ba a gbaari a li ba hiisi wuzu kinkin ti ni.

⁴³ Ba fun si a la damsa, ba naa ya Ju tim ta awa ba naa vɛ ya Ju tima a la jɛɛmi Koosa, ba nidamata fun tiŋ nara balɛ ta. Ba funɛ la chene, Pɔɔl awa Barnabas fun sɛm ba a kpami ba di ba kpak chenani Koosa suŋi ba chen nɛnɛ.

⁴⁴ Ba hiisi wuzu ti funɛ wa tel, o funɛ duuti ba tɔhɔn ti maga lagmi dooni di ba nu ya kunyan ti laaboor weri ti.

⁴⁵ Ju tim ta bɔnɛ funɛ na zɛmɛ ta, ba funɛ di handɔta kinkan. Ba funɛ pini Pɔɔl zoma a ŋɔ o sɛm ta wa ya wuti.

⁴⁶ Chenani ba funɛ sɛm nyɛ Pɔɔl awa Barnabas bambe kpok ka Pɔɔl ŋɔ ba, “O deŋlu wa ya te kpa Koosa laaboor weri ti a biksi ma Ju tima. Ya waa funɛ nyɛ ma nyinbaan di ma nu un a la Koosa mi fali naa vɛ kpak bɔ ka ma vɛ a. Chenani ma vɛ chen, ya wa zi bu biksi Koosa laaboor weri ti a nyɛ Ju tim ta ni. Ya ka zi biksi unu a nyɛ ba naa vɛ ya Ju tim ta duŋduŋ nɛɛ.

⁴⁷ Ya kunyan ti funɛ lisi sɛm na a li Koosa sɛm tɔn ti ni o biksi ya chenani ya zi tiŋ. Ba funɛ sɔbi a ŋɔ o wɛ, ‘I chi fitinne a chaani nyinbaan ni di ba naa vɛ ya Ju tima chen, na a tiŋ. I daha Koosa koti a yisi tɛɛnɛ nɔ tim maga a li ba tum tagna ni ba tiŋ un.’ ”

⁴⁸ Chenani Pɔɔl fun sɛm nyɛ ba sɔɔni ba naa vɛ ya Ju tima tusa kinkan ka ba pɛgi ya kunyan ti o laaboor weri ti daha. Doone ba naa Koosa fun lisi di o kpa o mi fali naa vɛ kpak bɔ a nyɛ ba, ba se fun su o laaboor weri ti.

⁴⁹ Koosa laaboor weri ti fun mɔɔli tɔsi naa maga go dooni.

⁵⁰ Amaa Ju tim ta funɛ nyɛ tɔhɔn ti nihɛɛta awa nihaana ba naa la jɛɛmi Koosa a ya malɛ tima, paan fun siu a du Pɔɔl awa Barnabas ni. Ba fun muksi ba kinkan a duŋni ba a li dooni.

⁵¹ Pɔɔl awa Barnabas funɛ nyɛn nyinbaan ni a la chene, ba fun pisi ba naŋgere hɛɛra a ta di Ju tim ta zim di o wa li ba ni, a kaali tɔhɔn naa ba yir Ikonium.

⁵² Yesu nitiŋɛ ba naa se su Koosa laaboor weri ti a li Antiɔk ni, ba tusa funɛ sɔɔniu kinkan ka Koosa siim weri ti te ba suwachak.