Tuma 12 - Tampulma

Koor Hɛrɔd Fun Muksi Yesu Nitiŋɛ Kinkan

¹ Chen saha ti koor Hɛrɔd funɛ namsi Yesu nitiŋɛ ta bɔnɛ.

² O fun kpak Jems naa ya Jɔn maana, a ŋɔ o lanjimasi ta digi ni o kpa o chise zen a kpu un.

³ Hɛrɔd funɛ na di chenani o fun ya Jems chen funɛ sɔɔni Ju tim ta tusau. Nan daha o fun la kpak Pita gbanko. Saha tirɛ Ju tim ta fun nyɛn ba wuzu zene a naa ba yir val la gali ti bambaan ni a se boroboro naa ba yaa vɛ du luri chen.

⁴ Ba fun kpa Pita a la tɔ dɛ a lisi lanjimasa pukpuk bu naasi di ba il un. Ba wuzu zene ta funɛ wa gali, Hɛrɔd funɛ lisi di o zi kpa Pitau a li nara tima suwachak a di un sɛria.

⁵ Ba funɛ tɔ un dɛ chene, Yesu nitiŋɛ ta funɛ sumi Koosa awa tu bɛgim ni a nyɛ un.

Koosa Malaika Fun Yisi Pita Nara Bar Tɔɔli Ni

⁶ Ba fun kpa zɔgli a vɔu Pita a kpa bar digi a vɔu lanjimasi ta digi o nindil wati, a fun bu kpa digi a vɔu un a kpa bar digi a vɔu lanjimasi ta digi a li o ningal ni. Lanjimasi ta bɔnɛ ka funɛ il dɛ ti zɔɔnɔ. Dusum digi Pita fun nyɛn lanjimasa lɛ ta bambaan ni a chɔ do. A wuzu ti chɔɔsa funɛ kaa pisi, Hɛrɔd kaa yisi un a di un sɛria nara tima suwachak ni.

⁷ Koosa malaikasi ta digi fun vaan wa chiŋi dɛ ti ni ka o vaan chaani kinkan. Malaika ti fun la ziigi Pita hampɛɛm o yɛrsi dooni o ŋɔ un, “Si lalaga.” Zɔglɛ ta fun vaan turgi o nisa ni.

⁸ Pita fun si chiŋi. Malaika ti fun bu ŋɔ un, “Vɔu i takta we a mari i titi a laari i takta zen a sak a du i natausa a tiŋ min a wa.” Pita fun tum chenani malaika ti ŋɔ un,

⁹ a tiŋ un di ba li dɛ naa ba tɔ nara chen ni. Pita wa fun zim di o ya wutiu. O funɛ baa di o ya deesire.

¹⁰ Ba fun val lanjimasi ta bambaan a wa li dɛ ti zɔɔnɔ ti ni a bu la li lanjimasi ta bɔnɛ bambaan ni a zi la tel bulzɔɔnɔ naa nyinbaan chɔɛɛ a la li tɔha. Ba funɛ kpa lugɛ a kɔɔri bulzɔɔnɔ ti. O fun puk o titi ka ba val dooni a tiŋ nyinbaan ti a kaali. Ba funɛ nyɛn nyinbaan ti ni a la chene, malaika ti fun vaan nyuksi a ka Pita.

¹¹ Doone Pita fun zim chenani yɛɛ a ŋɔ o titi ni, “O ya wutirɛ ya kunyan Koosa fun tum o malaikasi ta digi di o wa yisi min a li Hɛrɔd nin ni. O gbanko funɛ yisi minu a li chenani Ju tim ta kaa namsi min niu.”

¹² O funɛ vaan zim chenani yɛɛ, o fun kaali Mɛri, Jɔn Maak niina, dama. Yesu nitiŋɛ ta nidamata funɛ lagmi dooni a sumi Koosa aa nyɛ un.

¹³ O fun chiŋi dentil ni a mo bulzɔɔnɔ a yir. Dam ti nihabichɛl digi sɔn funɛ ya Roda. O fun wa bulzɔɔnɔ ti a wa pɛɛsi, “Antirɛ?”

¹⁴ O fun nu ta ti a zim di Pitarɛ. O tu sɔɔn fun nyɛ o sugli bulzɔɔnɔ ti pugi a chɔ bur kaali o dɔŋtim ta wati di o la ŋɔ ba di Pita wau.

¹⁵ Ba fun ŋɔ un, “I zu galɛŋwa. O wa kiya un.” O fun bukoo ŋɔ ba di o ya wutirɛ. Ba fun ŋɔ un, “O ya Koosa malaika naa dɛɛsɛ Pitarɛ.”

¹⁶ Ba funɛ kpak sɛm ta chene, ka Pita ha fun vɛɛn a mo bulzɔɔnɔ ti a la yir. Ba fun la puk bulzɔɔnɔ ti a na un ka o chiŋi. Alaazibu fun kpak ba kinkan.

¹⁷ O fun kpa o nin a ya ba ba gil chɛɛma a ŋɔ ba chenani ya kunyan ti yisi un a li dɛ naa ba tɔ nara chen ni. O fun ŋɔ ba, “Ma la ŋɔ Jems awa Yesu nitiŋɛ ta chenani yɛɛ.” Doone o fun gil ba a kaali bar digi.

¹⁸ Chɔɔsa funɛ wa pisi, lanjimasa ba naa funɛ il Pita dɛ ti ni chen, tusa fun buri kinkan. Ba fun ŋɔ dɔŋ ni, “Leene o zi kaali nan?”

¹⁹ Koor Hɛrɔd funɛ nu Pita wɛ, o fun ŋɔ ba di ba la dɛu un, amaa ba wa fun koti a na un. Doone o fun yir ba naa la il Pita chen di ba ŋɔ un chenani yɛɛ a ŋɔ di ba kpa ba a la kpu. A gantɛl nɛɛ, Hɛrɔd fun li Ju tim ta pulum a kaali Siizaria a la nyɛn doon wuzu bilɛ.

Chenani Koor Hɛrɔd Fun Sou

²⁰ Wuzu digi Hɛrɔd fun na paan kinkan a du Taaya tima awa Saidɔn tim ni. Ba funɛ nu o paan ti wɛ, ba fun lisi nara a li ba tɔsi ta tuhu ni ba la na un. Ba funɛ daŋni ba wa un ya nɔ bɛgim, domi o pulum ti la nyɛ ba diwe kinkan. Baal naa Hɛrɔd fun kpa o dama a du o nin ni sɔn funɛ ya Blastus. Taaya tima awa Saidɔn tim ta funɛ te nyɛ o ya ba chɛnnɛ ka ba zi chem Hɛrɔd.

²¹ A wuzu naa Hɛrɔd fun lisi di o di ba sɛria, o fun laari o takta were a la kani o kor ni a sɛm sɛma a nyɛ nara ni.

²² Chenani o fun sɛm ba chen nyɛ ba chɛɛmi a ŋɔ dɔŋ ni, “O wa bura sɛm a chi nibine. O chi Koosarɛ.”

²³ Koosa malaikasi ta digi fun vaan nyɛ wichɔɔrta kpak Hɛrɔd dau, domi o funɛ la nɔɔniu chenani ba yir un chen a kpa o titi a maksi Koosa. O wa fun vusi ka katamsa se o tuha nawura o sou.

²⁴ Nidamata fun nyɛ ba se su Koosa laaboor weri ti aa gbaari.

²⁵ Barnabas awa Sɔɔl funɛ kpa Yesu nitiŋɛ ba naa funɛ nyɛn Antiɔk ni, malɛ a du Yesu nitiŋɛ ba naa nyɛn Jɛrusalɛm ni, nihɛɛti ta nin ni. Doone Barnabas awa Sɔɔl fun kpa Jɔn Maak a gbaari ba ni a kaali Antiɔk.