Tuma 11 - Tampulma

Pita Fun Bur Kaali Jɛrusalɛm

¹ Nitumɛ ta awa Yesu nitiŋɛ ba naa maga nyɛn Judia pulum ni, fun nu di ba naa vɛ ya Ju tim chen, bɔnɛ nyɛ ba se su Koosa laaboor weri ti.

² Pita fun li Jɔpa ni a kaali Jɛrusalɛm. Yesu nitiŋɛ ba naa funɛ ya Ju tima a nyɛn dooni, bɔnɛ funɛ daŋni ba teŋsi Yesu nitiŋɛ ba naa vɛ ya Ju tim chen. Pita funɛ la tel dooni, ba fun wa zulimi un a pɛɛsi,

³ “Baŋnɛ i la nyɛn ba naa vɛ teŋsi ni wati? Hali ba ŋɔ yau di i gbaari ba ni a di diwe.”

⁴ Doone Pita fun ŋɔ ba chenani maga funɛ ya a li o piili ni. Nannɛ o fun ŋɔ ba,

⁵ “Mu funɛ nyɛn tɔhɔn naa ba yir Jɔpa nɛɛ a sumi Koosa a fun na kundɔŋ a chi mu deesi. O fun nyini a na gar zen ka o li Koosa tɔhɔn ti a tu wa tɛɛnɛ a chi nara kpaksi o nɔɔsa a wa dugli min.

⁶ Mu fun nyini o tuhu ni a na naŋgere naasi tima awa zimebisa awa a nawara la nyɛ hala.

⁷ Mu fun nu ta ka o ŋɔ min, ‘Pita, si a kpu a se.’

⁸ Amaa mu funɛ ŋɔ, ‘Mu kunyana, mu wa kiya chen. N ha wa di diwe naa ba ŋɔ di mu chi.’

⁹ Ta ti fun bu sɛm min a li buudaha ni, ‘Ta chi diwe naa Koosa ŋɔ di o wa ya kichiili.’

¹⁰ Ta ti funɛ sɛm un chene butora tiina, ka gar ti fun bu zini kaali Koosa tɔhɔn ti.

¹¹ Gar ti funɛ zini a la, nara batora fun wa chiŋi dam naa mu nyɛn chen bulzɔɔnɔ ni. Ba kunyana naa nyɛn Siizaria ni, funɛ tum ba mu wati. O sɔn funɛ ya Kɔnilius.

¹² Koosa siim weri ti fun ŋɔ min di mu si tu la ba wati a ta ɔmi di mu tiŋ ba. Yesu nitiŋɛ nara banɔra ba naa nyɛn Jɔpa ni, fun wa gbaari ya ni. Ya maga fun kaali Siizaria a la zu Kɔnilius dama.

¹³ Waa funɛ ŋɔ ya di o na Koosa malaikasi ta digiu o dam ti ni. Malaika ti fun ŋɔ un, ‘Tum i walɛ ta bɔnɛ ba la yir baal naa ba yir Pita chen a li Jɔpa ni. O sɔn digi ya Simɔn.

¹⁴ Waa la zi ŋɔ ma chenani i wa i walɛ zi ya, chen ni Koosa zi wa yisi mau a li ma tum tagna ni ma bur a tiŋ un.’

¹⁵ Mu funɛ la tel dooni a sɛm ba chene, Koosa siim weri ti fun wa zu ba naa maga la nu chen, bambe ni a chi chenani o fun te zu ya.

¹⁶ Doone mu fun lisi chenani ya kunyan ti fun biksi ya a ŋɔ, ‘Jɔn funɛ kpa nire a chaksi nara, amaa Koosa ka kaa kpa o siim weri tire a chaksi ma bambe.’

¹⁷ Ya se funɛ su ya kunyana Yesu Kristo, Koosa fun kpa o siim weri ti a du ya ni. Lalaknɔwa o ya chen a nyɛ ba naa vɛ ya Ju tim ni. Min ya anti a la zi nyɛ Koosa gil chenani o daŋni o tum?”

¹⁸ Yesu nitiŋɛ ta fun nu o sɛm ta, ba fun gil Pita zulimi a la pɛgi Koosa a ŋɔ dɔŋ ni, “Lalaknɔwa ya zim di Koosa funɛ nyɛ ba naa vɛ ya Ju tima nyinbaanu di ba gil ba tum tagna a bur tiŋ un, chen ni ba zi wa na o mi fali tiu.”

Nidamata Fun Bur Tiŋ Yesu Antiɔk Ni

¹⁹ Ju tim ta funɛ kpu Stivin a nyɛ Yesu nitiŋɛ ba naa nyɛn Jɛrusalɛm ni, na namsi, ba nidamata fun pisi a kaali bar bole. Ba bɔnɛ fun kaali Fonisia pulum awa tɔhɔn naa ba yir Antiɔk. Bɔnɛ ka zu arŋa a kaali pulum naa ba yir Saiprus ka ni go un. Ba maga fun kpa Koosa laaboor weri ti a biksi Ju tim ta duŋduŋ.

²⁰ Yesu nitiŋɛ ba naa funɛ li Saiprus pulum awa Sairini pulum a wa nyɛn Jɛrusalɛm ni, ba gbanko fun pisi a la Antiɔk. Ba waa funɛ biksi Koosa laaboor weri ti ya kunyan Yesu wɛ a nyɛ Ju tim ta awa ba naa vɛ ya Ju tim ni.

²¹ Nidamata kinkan funɛ nyɛ ba se su ya kunyan ti ka ba bur a tiŋ un, domi Koosa kpok ti funɛ nyɛn ba biksi ti ni.

²² Yesu nitiŋɛ ba naa funɛ nyɛn Jɛrusalɛm ni, funɛ nu chenani ya Antiɔk ni a tum Barnabas dooni.

²³ O funɛ la tel a na chenani Koosa nyɛ ba nyusum, o tuha fun sɔɔni kinkan. O fun kpami ba di ba kpak ya kunyana nɛnɛ awa ba tuha bɛgim ni.

²⁴ Barnabas funɛ ya nibin werire. O si funɛ su Yesu nɛnɛ ka Koosa siim weri ti fun te o suwachak. Nidamata fun nyɛ ba se su ya kunyan ti o daha.

²⁵ O wa fun vusi ka Barnabas li dooni a kaali Taasus di o la dɛu Sɔɔl.

²⁶ O funɛ na un, Barnabas fun kpa un a bur kaali Antiɔk. Ba fun nyɛn doon bun bɛgim aa biksi Yesu nitiŋɛ ba naa i kinkan chen. Saha tirɛ ba naa funɛ nyɛn doon chen fun te chɛrgi chenani ba yir Yesu nitiŋɛ ta a du ba Yesu Kristo nitiŋɛ ta.

²⁷ Saha naa Barnabas awa Sɔɔl fun nyɛn Antiɔk ni, Koosa witinsi ta bɔnɛ fun li Jɛrusalɛm a kaali dooni.

²⁸ Ba nidigi sɔn funɛ ya Agabus. Wuzu digi Koosa siim weri ti fun nyɛ o si nara tima suwachak ni a fun te ŋɔ di lɔsa tagin zi wa chelu tɛɛnɛ nɔ maga ni. Bunsi naa Klɔdius fun di Koosi ta nyuhu tiina Siiza chen bambaan nɛɛ, lɔsa tagin ti fun wa chel.

²⁹ Yesu nitiŋɛ ba naa funɛ nyɛn Antiɔk ni, funɛ daŋni ba suŋi ba niinbisa ba naa nyɛn Judia pulum ni. Ba nibɛgim bɛgima fun lisi chenani ba nyaŋi a li ba malɛ ni,

³⁰ a kpa lagmi dɔŋ ni a du Barnabas awa Sɔɔl nin ni di ba kpa la nyɛ Yesu nitiŋɛ ta nihɛɛti ni dooni.