Tuma 10 - Tampulma

Kɔnilius Fun Yir Pita O Wa O Dama

¹ Lanjima nihɛɛ digi funɛ nyɛn Siizaria ni. Ba funɛ yir un Kɔnilius. O funɛ ya lanjimasa kɔkwa nyuhu tiinnɛ. Ba maga funɛ li pulum naa ba yir Itali chene.

² O wa o walɛ yaa funɛ sumi Koosa a la jɛɛmi un. O gbanko yaa funɛ suŋi Ju tim fara tim tau.

³ Wuzu digi zaazɔn saha naa niparɛ yaa si ba par ni chen, o fun na Koosa malaikasi ta digi a chi o deesi. Malaika ti fun wa ŋɔ un, “Kɔnilius.”

⁴ Kɔnilius fun kpa o se a zɔŋ un ni. Hansura kpak un a li o nyini ti ni. O fun ŋɔ un, “Mu kunyana, baŋnɛ i daŋni mu suŋi hin?” Malaika ti fun bu ŋɔ un, “Chenani ii sumi Koosa a la suŋi fara tim ta chen sɔɔnɛ o tuha. Chendaha o fun tum min i wati.

⁵ Tum i walɛ ta bɔnɛ ba la yir baal naa ba yir Pita chen a li Jɔpa ni. O sɔn digi ya Simɔn.

⁶ O nyɛn Simɔn naa la tum sela tɔna tuma chen dam nɛɛ a dugli teku nɔ.”

⁷ Malaika ti funɛ kaali, Kɔnilius fun yir o dam bisa lɛ awa o lanjimasa nibɛgim ba wa o wati. Lanjima ti yaa funɛ jɛɛmi Koosau ka o si su un kinkan.

⁸ O fun ŋɔ ba chenani yɛɛ a tum ba Jɔpa ni.

⁹ Chɔɔsa funɛ wa pisi di ba nyɛn nyinbaan nɛɛ a wa dugli Jɔpa. Nha sal baan nyuha, Pita fun zini dɛ naa nyuha mak dɔŋa a li Simɔn dam ti ni di o sumi Koosa.

¹⁰ Lɔsa fun kpak un kinkan o daŋni diwe o di. Ba funɛ ya diwe, o fun na kin bɔnɛ a chi o deesi.

¹¹ O fun nyini a na gar zen ka o li Koosa tɔhɔn ti a tu wa tɛɛnɛ a chi nara kpaksi nɔɔsa.

¹² Sela awa zimebisa awa a nawara la nyɛ hala maga kikurgɛ funɛ nyɛn gar zen ti tuha ni.

¹³ O fun nu ta ka o ŋɔ un, “Pita, si a kpu a se.”

¹⁴ Pita fun ŋɔ, “Mu kunyana, mu wa kiya chen. N ha wa di diwe naa ba ŋɔ di mu chi.”

¹⁵ Ta ti fun bukoo ŋɔ un, “Ta chi diwe naa Koosa ŋɔ di o wa ya kichiili.”

¹⁶ Ta ti funɛ sɛm un chene butora tiina, ka gar ti fun bu zini kaali Koosa tɔhɔn ti.

¹⁷ Pita fun lisi chenani o fun na a chi deesi chen mun. O funɛ lisi chene, ba naa Kɔnilius fun tum chen fun na doonani Simɔn dam ti nyɛn a chiŋi o bulzɔɔnɔ ni.

¹⁸ Ba fun pɛɛsi, “Simɔn Pita nyɛn bar nɔuu?”

¹⁹ Pita ha funɛ vɛɛna lisi chenani o fun na chen mun ka Koosa siim weri ti fun ŋɔ un, “Kinu mu wati. Nara batora chiŋɛ bulzɔɔnɔ ti ni a daŋni ba na hin.

²⁰ Si tu la ba wati a ta ɔmi di i tiŋ ba, domi min tum ba i wati.”

²¹ Pita fun si tu a la ŋɔ ba, “Min ya naa ma dɛu chen. Baŋnɛ maa daŋni mu suŋi ma?”

²² Ba fun ŋɔ un, “Ya kunyana Kɔnilius naa ya lanjimasa nihɛɛ, tum ya i wati. O ya nibin werire a yaa jɛɛmi Koosa ka Ju tim ta maga nyɛ un jirima kinkan. Koosa malaikasi ta digi funɛ wa ŋɔ un di o yir hin i wa o dama, chen ni o zi nu chenani i daŋni i ŋɔ unu.”

²³ Pita funɛ nu ba sɛm ta, o fun yir ba di ba wa chɔ. Chɔɔsa funɛ wa pisi, ba maga fun si a tiŋ dɔŋa a kaali. Yesu nitiŋɛ ba naa funɛ nyɛn Jɔpa ni, bɔnɛ fun gbaari ba ni a kaali.

²⁴ Chɔɔsa fun bu wa pisi, ba funɛ tel Siizaria. Kɔnilius, o walɛ ta awa o pɛgsa ba naa o fun yir chen funɛ pɔ ba di ba zaami ba.

²⁵ Pita funɛ daŋni o zu dam ti, Kɔnilius fun wa chem un di o zaami. O fun gbiri a kpa o tila a baŋ tɛɛnɛ ni.

²⁶ Pita fun ŋɔ un, “Si chiŋi. Mu ya nibine a chi hin.”

²⁷ Ba funɛ zu la chene ba sɛm sɛma dɔŋ wati. Nidamata funɛ lagmi dam ti tuhu ni.

²⁸ Pita fun ŋɔ ba, “Ma zimu nɛnɛ di Ju tim ta chiksɛ biksɛɛ di ya wa ba naa vɛ ya Ju tima ta lagmi dɔŋ ni. Koosa ka funɛ biksi minu di mu zi kotiu a lagmi nara maga ni.

²⁹ Chendaha ma yir min, mu vɛ bur gantɛl. Ma ŋɔ min chenani mu zi suŋi ma.”

³⁰ Kɔnilius fun ŋɔ un, “Wuzu bunaasi gantɛl ni saha naa niparɛ yaa si ba par ni chen, mu funɛ nyɛn bar nɔwa a sumi Koosa. Chen saha ti awa lalaknɔ funɛ ya kibɛgimnɛ. Baal digi fun laari kichaani a vaan wa chiŋi mu suwachak ni,

³¹ a ŋɔ, ‘Kɔnilius, chenani ii sumi Koosa a la suŋi fara tim ta chen sɔɔnɛ o tuha.

³² Tum i walɛ ta bɔnɛ ba la yir baal naa ba yir Pita chen a li Jɔpa ni. O sɔn digi ya Simɔn. O nyɛn Simɔn naa la tum sela tɔna tuma chen dam nɛɛ a dugli teku nɔ.’

³³ Mu fun vaan tum ba di ba la yir hin. I ka ya nibin weri a wa. Lalaknɔ ya maga lagmi bar nɔwa Koosa suwachak ni a pɔ di i ŋɔ ya chenani o ŋɔ hin.”

Pita Fun Biksi Kɔnilius Koosa Laaboor Weri Wɛ

³⁴ Doone Pita fun ŋɔ ba, “Lalaknɔwa mu zim di o ya wutirɛ di Koosa wara daŋni digi a ka digi.

³⁵ Ba naa maga yaa tum tum were a la nyɛ un jirima a li pulumsi maga ni, o zi la ba duu.

³⁶ Ma zim chenani o fun tum Yesu Kristo, naa ya kina maga nyuhu tiina, di o biksi Koosa laaboor weri ti a nyɛ Ju tim ta ni a nyɛ ba nyinbaan ba wa Koosa bu ya nɔ bɛgim.

³⁷ Ma gbanko zim chenani Jɔn fun te chaksi Yesu wa ni ni ka chenani zi ya a li Galili pulum awa Judia tɔsa maga niu.

³⁸ Yesu Nazarɛt narrɛ, Koosa fun lisi un a kpa o siim weri ti a du un ni. Koosa gbanko fun kpa o kpok ti a nyɛ Yesu ni di o tum tum were a yisi ba naa maga sintana fun dɔ a li o nin ni. Koosa funɛ nyɛn o wati. Chendaha o fun koti a ya chen.

³⁹ Ya waa funɛ na chenani maga o tum a li Jɛrusalɛm awa Ju tim ta pulum naa go un chen awa ya se ni. Ba fun kpa un a kpaasi a mari daakakli ti ni o sou.

⁴⁰ Wuzu butora wuzu, Koosa fun lɛli un a li o sou ni a nyɛ ya bu na un.

⁴¹ Nandigi wa fun bu na un, amaa ya naa Koosa fun lisi di ya na un wa ya se ni duŋduŋ na un, chen ni ya zi ŋɔ nara niu o wɛ. A gantɛl nɛɛ Koosa fun lɛli un a li o sou ni, hali ya wa un lagmi a di diwe a nyɔ.

⁴² O fun ŋɔ ya di o lawa ya lau a la biksi nara Koosa laaboor weri ti wɛ awa chenani Koosa fun lisi un di wuzu digi o zi wa di nisitɛ awa ba naa vɛ siti sɛriau.

⁴³ Koosa witinsi ta maga funɛ sɛm o wɛu saha digi. Ba fun biksi di ba naa maga se su un, Koosa zi gil ba tum tagnau a nyɛ ba Yesu sɔn daha.”

Kɔnilius Awa O Walɛ Fun La Koosa Siim Weri

⁴⁴ Pita ha funɛ vɛɛna sɛm chene, Koosa siim weri ti fun wa zu ba naa maga la nu chen, bambe ni.

⁴⁵ Alaazibu kinkan fun kpak Ju tim ba naa ya Yesu nitiŋɛ ka ba wa Pita fun li Jɔpa a wa chen. Hali saha ti Koosa wa fun kpa o siim weri ti a du ba naa vɛ ya Ju tim ni. Chendaha alaazibu fun kpak ba chen.

⁴⁶ Hali ba fun nu ba naa vɛ ya Ju tim chen funɛ sɛm sɛm kurgɛ a la pɛgi Koosa o tum zene ta o tum a nyɛ ba chen daha. Doone Pita fun ŋɔ ba,

⁴⁷ “Koosa funɛ kpa o siim weri ti a du nara nama ni a gbaari ya ni. Ya kaa ya chaksi ba wa ni ni, nandigi wa to a la zi ŋɔ di ya ta chaksi ba.”

⁴⁸ Doone o fun ŋɔ ba di ba la kpa Yesu sɔn a chaksi ba wa ni ni. Doone ba fun sumi Pita o nyɛn ba wati wuzu bilɛ.