Room 5 - Tampulma

Koosa Wa Na Ya Galimsa Ya Se Suuli Daha

¹ Lalaknɔ Koosa wa piin na ya galimsa ya se suuli daha. Ya wa un kpak nɔ bɛgimnɛ ya kunyan Yesu Kristo daha.

² Waa funɛ kpa ya a kansi bar zen nɔ ni ya se suuli daha. Waa nyɛ ya kpak bambi bɛgim di wuzu digi Koosa wa ya zi wa bɔni o jirimau. Chendaha ya tusa sɔɔni kinkan.

³ Hali nara namsi ya, ya tusa gbanko zi sɔɔniu. Ya zimu di namsi ti nyɛ ya na kanyita.

⁴ Ya kanyita ti la zi biksi nara di Koosa dɔ ya. Chen nyɛ ya bambi bɛgim kpok un ni a gbaari.

⁵ Koosa funɛ daŋni ya kinkan a kpa o siim weri ti a du ya ni kinkan. Waa ya o papaha ya wati. Chendaha ya bambi bɛgim naa ya kpak un ni wa zi nyɛ ya buri.

⁶ Saha digi ya wa fun koti a suŋi ya titi. Koosa saha wa tel, Kristo fun wa chiŋi tum tagna nitumɛ bar chiŋi ni a sou a nyɛ ya.

⁷ Nar ya nibin weri, amii nandigi zi la nɔɔniu a chiŋi o bar chiŋi ni a sou a nyɛ un.

⁸ Amaa Koosa funɛ biksi ya chenani o daŋni ya kinkan. Ya ha funɛ vɛɛn a tum tum tagnau, chen saha ti Kristo funɛ chiŋi ya bar chiŋi ni a sou a nyɛ ya.

⁹ O sou daha, o funɛ nyɛ Koosa wa nyinbaanu di o ta bu na ya galimsa. Chendaha ya koti a kpak bambi kinkan di Kristo zi yisi yau a li Koosa paan ni awa chenani o zi lɛrgi ya diŋsau.

¹⁰ Ya funɛ ya Koosa dɔmawa, amaa lalaknɔ o be ti nyɛ ya wa Koosa kpak nɔ bɛgim o sou daha. Koosa funɛ lɛli un a li o sou ni. Chendaha ya gbanko kpak bambi di o zi wa yisi yau a li ya tum tagna ni hali o wa peti.

¹¹ Chen maga laatanɛ. Lalaknɔ Koosa ya ya jirima tiina ya kunyana Yesu Kristo naa nyɛ ya wa un ya nibɛgim daha.

Chenani Yesu Suŋi Ya Kaali Adam Tum Tagna Kinkan

¹² Tɔ. Nibin bɛgim funɛ te nyɛn tɛɛnɛ nɔ maga ni saha digi a tum tum tagna. O fun sou a daha. Chendaha ba naa maga funɛ tiŋ o gantɛl gbanko fun siti ba tum tagna daha.

¹³ Nibinsa funɛ te tum tum tagna ka Koosa zi kpa o chiksɛ ta a nyɛ ba. Hali o chiksɛ ta funɛ wa, o wa fun fiksi ba di ba chɔk a,

¹⁴ amaa saha naa Adam fun nyɛn hali a wa pu Mosis saha ti, nara maga funɛ sitiu. Hali ba naa ha funɛ vɛ tum tum tagin a chi Adam gbanko funɛ sou. Chenani Adam fun tum bu nara maga. Chenani Kristo fun tum bu nara maga gbanko.

¹⁵ Chenani Koosa fun suŋi ya yɔri, awa chenani Adam tum tum tagna wa ya kibɛgim. Nibin bɛgim tum tagna daha, nidamata fun siti. Nibin bɛgim Yesu Kristo daha, Koosa ka fun koti a suŋi nidamata kinkan yɔri.

¹⁶ Chenani Adam fun tum tum tagin awa chenani Koosa fun suŋi ya yɔri wa ya kibɛgim. Adam funɛ tum tum tagin, Koosa fun di o sɛria a na o galimsa. Amaa lalaknɔ ya naa funɛ tum tum tagna kinkan, o zi wa di ya sɛriau a bu vɛ na ya galimsa.

¹⁷ Nibin bɛgim tum tagna daha, nidamata fun siti. Lalaknɔ Koosa koti a suŋi ya kinkan a bu vɛ na ya galimsa a nyɛ ya o mi fali ti Yesu Kristo daha. Chenani Koosa tum kaali nibin bɛgim ti tuma kinkan.

¹⁸ Adam funɛ tum tum tagin saha digi, Koosa fun na nara maga galimsa a la zi wa ta ba yɔri. Yesu funɛ sou o daakakli ti ni, chen nyɛ Koosa bu vɛ koti a na nara maga galimsa a kpa o mi fali ti a nyɛ ba.

¹⁹ Adam funɛ vɛ di o wa zi tiŋ Koosa nɔ, chen funɛ nyɛ nidamata ya tum tagna nitumɛ o wati. Yesu ka funɛ tiŋ Koosa nɔrɛ, chen funɛ nyɛ o bu vɛ koti a na nidamata galimsa.

²⁰ Koosa funɛ kpa o chiksɛ ta a nyɛ Ju tim ta ni, a waa funɛ nyɛ nara tum tum tagna a gbaari kinkan. Ba funɛ tum au a gbaari, chenani Koosa suŋi ba gbanko gbaari a kaali chen.

²¹ Nibinsa tum tagna funɛ nyɛ nara maga siti, amaa lalaknɔ Koosa suŋi yau a bu vɛ na ya galimsa a nyɛ ya o mi fali naa vɛ kpak bɔ ya kunyana Yesu Kristo daha.