Room 3 - Tampulma

¹ O ya chen ni, yɛrɛ Ju tim ta kpak nyusum a kaali ba naa vɛ ya Ju tima? Baŋ nyɔɔrrɛ ba na a li ba teŋsi ti ni?

² Ju tim ta kpak nyusumu a kaali ba a li wu damata ni. Wu birigi naa Koosa fun biksi o sɛma a du Ju tim ta nin ni.

³ Koosa zi vɛ o vɔwiu domi ba bɔnɛ wa ya wuti timaa?

⁴ Aai. Nara maga ya nusun tima, Koosa sɛm ta ka zi ya wutiu saha maga. Ba fun a sɔbi a li o sɛm tɔn ti ni a ŋɔ, “Ba zi ŋɔ di i sɛm ta ya wutiu. Ba wa di i sɛria, i zi na nyusumu a li bar diili dɛ ti ni.”

⁵ Ya tum tagna nyɛ Koosa tum deŋli a li a gbaari, yɛrɛ ya zi sɛm? Ma nyɛ mu kpa nibinsa sɛma a pɛɛsi ma, “O ya chen ni, o lɛrgi ya diŋsa ya tum tagna daha, o tum wu taginuu?”

⁶ Aai. Koosa tum wu tagin, yɛrɛ o ka ya a di tɛɛnɛ nɔ tim maga sɛria?

⁷ Ya nusuna nyɛ Koosa wuti li a gbaari, chen ni nibinsa zi pɛgi unu, yɛrɛ o ŋɔ di o zi na ya galimsau a ta ya yɔri ya tum tagna daha?

⁸ O ya chen, ya zi kotiu a ŋɔ ma nyɛ ya tum tum tagna, chen ni tum were zi li a niu. Nara bɔnɛ fun a chɔk mu sɔn a ŋɔ di mu sɛmu, amaa ba sɛma wa fun ya wuti. O deŋlu di Koosa zi na ba galimsau a ta ba yɔri.

Nandigi Wa To A Ya Tum Weri Nitumi

⁹ Adaha ya naa ya Ju tima ya ya nibin werewa a kaali ba naa vɛ ya Ju timaa? Aai. N piin biksi mau di ba naa ya Ju tim ta awa ba naa vɛ ya Ju tima, ba maga ya tum tagna timwa.

¹⁰ Ba fun a sɔbi a li Koosa sɛm tɔn ti ni a ŋɔ, “Nandigi wa toli a ya tum were nitumi, hali nibɛgim wa to.

¹¹ Nandigi wa toli a nɛɛgi. Nandigi wara daŋni o dɛu Koosa.

¹² Ba maga fun a nyuksi ba nyinbaan a ya yɔri. Nandigi wa toli a tum jirima tuma, hali nibɛgim wa to.

¹³ Ba nɔɔna chi hugilsi naa ba vɛ tɔɔlirɛ. Ba pɛgi nara wa ba nyina nɛɛ a la mur ba. Ba sɛma chi duma sambosiwa.

¹⁴ Ba ŋɔ nɔrɛ a nyɛ nara ni wa tuha sa ni.

¹⁵ Ba kpa ba naŋgerewa a val lalaga a la doonani ba kpu.

¹⁶ Chɔki awa muksi pisi ba nyinbaan maga.

¹⁷ Ba wa zim bara sɔɔna nyinbaan.

¹⁸ Ba wara nyɛ Koosa jirima.”

¹⁹ Ya zimu di ba naa la biksi Koosa chiksɛ ta, ba waa la biksi ba naa la tiŋ a, di ba na galimsa. Chendaha nara maga zi wa la nɔɔniu di ba tum galimsau Koosa suwachak ni. Ba wa zi wa koti a sɛm wu digi.

²⁰ O chiksɛ ta biksi ya di ya maga ya tum tagna nitumɛwa. Koosa ha zi vɛɛn na ya galimsau o chiksɛ ta tiŋi daha.

Chenani Koosa Zi Bu Vɛ Na Nibinsa Galimsa

²¹ Lalaknɔ Koosa fun a biksi ya o nyinbaan chenani o zi bu vɛ na nibinsa galimsa o wati. Chenani o tum chen wa kpak wu digi wa o chiksɛ ta tiŋi ni. O chiksɛ naa ba fun sɔbi a li o sɛm tɔn ti ni awa o witinsa ba naa nyɛn saha digi, funɛ biksi nara o wɛ.

²² Koosa wa bu a na ba naa maga se su Yesu Kristo galimsa.

²³ Nara maga yaa tum tum tagnau a pɔɔgi chenani Koosa daŋni ba du.

²⁴ Koosa fun a kpak ya siki a nyɛ Yesu Kristo la ya nyuuna a nyɛ ya. Koosa fun ya chen a nyɛ ya yɔri. Chendaha o bu vɛ na ya galimsa o wati.

²⁵ Koosa funɛ kpa Yesu Kristo a chiŋsi gbampulim ni a nyɛ o sou o daakakli ti ni, chen ni Koosa wa zi bu na paan a du ba naa maga se su Yesu sou chɛl ni. O funɛ ya chene di o biksi nara di o ya wuti tiinnɛ. Hali chen saha ti o funɛ kpak ba kanyitau a li nara tum tagna ni a ta lɛrgi ba diŋsa.

²⁶ Lalaknɔ o kpak nyinbaan naa o zi bu vɛ na nibinsa galimsau o wati. Nan biksi ya di o ya tum weri tiin naa la zi vɛ na ba naa maga se su Yesu galimsa.

²⁷ Ya zi kotiu a pɛgi ya titi domi ya funɛ tiŋ Koosa chiksɛ dahaa? Ya wa kikoti. Ya zi koti a pɛgi ya titi kundɔŋ wɛuu? Aai. Koosa wa zi bu na ya galimsa a li ya se suuli ni. Chendaha ya vɛ koti a pɛgi ya titi.

²⁸ Ya kpak bambiu di nibine se su Kristo, Koosa wa na o galimsa. Chen tiina tiŋ o chiksɛ ta duŋduŋ, Koosa wa zi koti a ya chen.

²⁹ Ju tim ta duŋduŋ koti aa tiŋ Koosaa? Ba naa vɛ ya Ju tima, ba wa koti aa tiŋ unn? Ba gbanko kotiu.

³⁰ Koosa bɛgim duŋduŋ nyɛnɛɛ. Ju tim ta nyɛ ba se su Yesu Kristo, o wa zi bu na ba galimsa. Ba naa vɛ ya Ju tima nyɛ ba se su un, Koosa gbanko wa zi na ba galimsa.

³¹ Tɔ. Ya se suuli nyɛ Koosa chiksɛ ta ya yɔrii? Aai. Ya chiŋi a gantɛl nɛɛ.