Room 11 - Tampulma

Koosa Zi Wa Kpak Ju Tima Sikiu

¹ Koosa funɛ vɛ o nara magauu? Aai. Mu gbanko ya Ju tim narrɛ awa Abraham lul bisa digi a li Bɛnjamin walɛ ni.

² Koosa wa koti a vɛ ba naa o fun lisi o piili ni a nyɛ o titi ni. Ma wa zim chenani ba fun sɔbi Koosa witiina Ɛlaija wɛ a li Koosa sɛm tɔn ti ni chenn? O funɛ sumi Koosau a fiksi Ju tim ta ba tum tagna daha.

³ O fun ŋɔ, “Mu kunyana, ba funɛ kpu i witinsau a chɔk i bar kɔɔrɛ. Mu duŋduŋ kaɛɛ ka ba daŋni ba kpu min gbanko.”

⁴ Amaa yɛrɛ Koosa fun ŋɔ un? O fun ŋɔ, “Nara tusugsa nɔpɛ, ba naa wa gbiri aa jɛɛmi vuk naa ba yir Baal, mu fun kpa pɔ mu titi.”

⁵ Chene o du lalaknɔ. Koosa fun a kpak siki a du Ju tim tama ni a lisi ba a nyɛ o titi ni.

⁶ O funɛ yisi ba o siki daharɛ. O wa fun yisi ba ba tum were daharɛ. O yisi nara ba tum were daha, o wa fun koti a kpak ba siki.

⁷ Yɛrɛ o du lalaknɔ? Kin naa Ju tim ta funɛ dɛu, ba wa fun na un. Ba nara tama naa Koosa fun yisi a nyɛ o titi ni, ba waa funɛ wa na un. Ba naa funɛ vɛ na un, o fun nyɛ ba se kpok.

⁸ Ba fun sɔbi a li Koosa sɛm tɔn ti ni a ŋɔ, “Koosa funɛ nyɛ ba bambe siti, chen ni ba se wa kikoti a na. Ba diŋsa gbanko wa kikoti a nu hali wa zinan.”

⁹ Ya nawaal Devid fun ŋɔ, “Koosa zi wa kpa kin naa ba nyini a se niu a mo ba lo a kpak ba a lɛrgi ba diŋsa a daha.

¹⁰ Ba se zi nyulumiu, chen ni ba wa zi koti a na ka ba muksi nyɛ ba ta kpak kpok hali saha naa vɛ kpak bɔ.”

¹¹ Mu zi bukoo pɛɛsi mau, ba funɛ vɛ Koosa, o gil bauu? Aai. Ba funɛ ya chen daha, o fun bur yisi ba naa vɛ ya Ju tima a li ba tum tagna ni. Ju tim ta kpak ba handɔta chen daha.

¹² Chenani Ju tim ta fun vɛ Koosa nyɛ ba naa vɛ ya Ju tima na nyɔɔra kinkan. Amaa Koosa zi wa yisi Ju tim ba naa o fun lisi chen a li ba tum tagna ni, chen zi wa gbaari ba naa vɛ ya Ju tima nyɔɔrau.

Ba Naa Vɛ Ya Ju Tima Nidamata Burgi A Tiŋ Koosa

¹³ Ma naa vɛ ya Ju tima, maa nu mu wati lalaknɔ. Chenani Koosa nyɛ mu ya o nitumi di muu biksi ma o wɛ ya mu jirima kin.

¹⁴ Nan daha, amii mu titi nara bɔnɛ kpak ma handɔtau, chen ni Koosa zi koti a yisi bau a li ba tum tagna ni.

¹⁵ Koosa funɛ vɛ Ju tim tau ba vɛ kpak se suuli daha, o fun burgi a daŋni o wa ba naa vɛ ya Ju tima ya nɔ bɛgim. O wa la Ju tim ta, chen la zi nyɛ ba naa vɛ ya Ju tima na nyɔɔra hali a la gali.

¹⁶ Ma lisi kikumɛ ta tama a nyɛ Koosa ni, o chi a magawa ma kpa nyɛ un. Bugil luta weree, o hulsa gbanko zi weru.

¹⁷ Ju tim ta chi bugil naa Koosa fun chɔɔsirɛ. Ba yir un ‘ɔlif’. Koosa fun a teŋsi o hulsi ta bɔnɛ a ta a kpa ma a chiŋsi a bar chiŋɛ ni. O funɛ ya chene, chen ni ma wa o hulsi ta zi lagmi dɔŋ niu a la weri naa la li luti ta ni.

¹⁸ Ma ta lisi di ma wa bɔ hulsi a naa Koosa fun teŋsi a ta chen. Ma waa ya hulsi ta bɔnɛ duŋduŋ. Ma nyini luti ta se nɛɛ di ma wer. Chendaha ma wa kikoti zer ma titi.

¹⁹ Ma zi ŋɔ minu, Koosa funɛ teŋsi bugil ti hulsi bɔnɛ a ta, chen ni o zi kpa ya a chiŋsi a bar chiŋɛ niu.

²⁰ Chenani ma sɛm ya wuti. Ju tim ta wa fun a nyɛ ba se su Koosa. Chendaha o fun teŋ a a ta. Ma se su un. Chendaha ma ka chiŋi a bar chiŋi ni. Ma ta daŋni sɔn a li chenani Koosa tum ni. Ma doso a ta wa cheli a chi Ju tim ta.

²¹ Koosa wa fun te kpak siki a li bugil ti hulsi ta ni a teŋsi a a ta. Ma doso ka o zi wa teŋsi mau a ta.

²² Maa lisi chenani Koosa kpok awa bɔnɛ ni a kpak siki wa bɔnɛ ni. O funɛ kpoku wa ba naa chel chen ni, amaa o kpak ma sikiu. Ma nyɛ o kpak ma siki aa la. Ma ta nyɛ o wa teŋ ma a taali.

²³ Ju tim ta burɛɛ a nyɛ ba se su Koosa, o zi bu kpa bau a zɔŋ bugil ti ni. Koosa kpak kpoku a la zi tum chen.

²⁴ O funɛ kotiu a kpa ma naa ya hul kurgɛ a du bugil ti ni, o wa zi bɔm o wati di o bu kpa bugil ti titi hulsi ta a du un ni.

Koosa Zi Kotiu A Kpak Nara Maga Siki

²⁵ Mu niinbisa, mu daŋni mu zimu wuti naa Koosa fun biksi ya gbampulim ni, chen ni ma wa zi daŋni sɔn o funɛ lisi ma daha. Wuzu digi ba naa maga vɛ ya Ju tima Koosa fun lisi chen, zi wa o watiu. Hali chen saha ti o zi nyɛ Ju tim nidamata se kpoku.

²⁶ Nannɛ Koosa zi wa yisi bau a li ba tum tagna ni. Ba fun sɔbi a li o sɛm tɔn ti ni di o ŋɔ, “Naa la zi wa yisi Jakɔb lul bisa a li ba tum tagna ni, zi wa li Jɛrusalɛm niu wuzu digi.

²⁷ Mu zi wa yisi bau a li ba tum tagna ni, ba wa min ya nɔ bɛgim.”

²⁸ Lalaknɔ Ju tim ta vɛu di ba wa zi nu Koosa laaboor weri ti a ya o dɔma. Nan nyɛ ma nyinbaan di ma tiŋ Koosa. Amaa saha digi o funɛ lisi bau a nyɛ o titi ni. Chendaha o zi wa kpak ba siki ba naa dɔ ba zɔɔnɔ daha.

²⁹ O wara chɛrgi o bambi a li chenani o fun lisi ba a nyɛ ba o papaha yɔri.

³⁰ Ma wa fun te tiŋ Koosa nɔ, amaa lalaknɔ o funɛ kpak ma sikiu, domi Ju tim ta wa fun tiŋ o nɔ.

³¹ Chen vɛɛna Ju tim ta funɛ vɛ tiŋ Koosa nɔ, o fun bur a kpak ma siki. Chendaha wuzu digi Koosa gbanko zi wa kpak ba sikiu.

³² O fun nyɛ tɛɛnɛ nɔ tim maga na galimsa domi ba wa tiŋ o nɔ, chen ni o zi kotiu a kpak ba maga siki.

Chenani Koosa Du Kaali Kina Maga

³³ Ei. Koosa siki awa nɛha wa zima zenu kinkan. A wa kpak bɔ. Nandigi wa kikoti a zim chenani o lisi a la tum.

³⁴ Ba fun sɔbi a li o sɛm tɔn ti ni a ŋɔ, “Nibine kikoti a zim Koosa bambi lisiuu? Nibine wa un koti lagmi a sɛm un wu digiuu?

³⁵ Anti nyɛn Koosa la kina o wati chen ni Koosa zi kpa a bur nyɛ unuu? Nandigi wa toli.”

³⁶ Waa funɛ naami kina maga. O kpok ti daha, a nama maga ha vɛɛn nyɛnu hali wa zinan a nyɛ un jirima. O jirima zi nyɛnu hali saha naa vɛ kpak bɔ. Ami.