Room 10 - Tampulma

¹ Mu niinbisa, mu daŋniu kinkan di Koosa yisi Ju tim ta a li ba tum tagna ni. Muu sumi unu saha maga di o ya chen.

² Mu ya ba sɛhɛra tiina di ba se sɛrɛu di ba tiŋ un nɛnɛ. Amaa ba wa zim chenani ba zi tiŋ un wa wuti ni.

³ Ba ha wa fun zim Koosa nyinbaan naa nyɛ o vɛ na nibinsa galimsa a kpaŋi aa kɔɔri ba titi nyinbaan di o du chen. Chendaha ba fun vɛ la chenani o koti a tum a nyɛ ba.

⁴ Kristo funɛ kpa Koosa chiksɛ ta tiŋi a nyɛ a peti, chen ni Koosa wa zi bu koti a na ba naa maga se su un galimsa.

Koosa Daŋni O Lisi Nara Magwa A Li Ba Tum Tagna Ni

⁵ Mosis fun sɔbi a li Koosa sɛm tɔn ti ni ba naa la daŋni ba tiŋ chiksɛ ta wɛ, chen ni Koosa wa zi bu na ba galimsa, a ŋɔ, “Nibine tiŋ chiksɛ ta hali a wa peti, o zi na miisau a li o tiŋi ti ni.”

⁶ Amaa ba gbanko funɛ sɔbiu ba naa nyɛ ba se su Koosa wɛ, chen ni o wa zi bu na ba galimsa, a ŋɔ, “Ma ta pɛɛsi ma titi, anti la zi zini a la zu Koosa tɔhɔn ti, chen ni Kristo zi tu wa ma watiu?”

⁷ Ma ta bu pɛɛsi, “Anti la zi zu tɛɛnɛ di o zu a dɛu Kristo awa nisitɛ ta, chen ni o zi li wa ma watiu?”

⁸ Maa nu chenani ba fun sɔbi. “Koosa sɛma wa ma duglɛu kinkan. A nyɛn ma nɔɔni niu awa ma bambe ni.” A wa o laaboora weri naa ba fun biksi ma chenani ma se su un, ya kibɛgimnɛ.

⁹ Ma ŋɔɛɛ di Kristo ya ma kunyana ka ma se su di Koosa funɛ lɛli unu a li o sou ni, Koosa zi yisi mau a li ma tum tagna ni.

¹⁰ Chenani ya se su Koosa, chen nyɛ o bu vɛ na ya galimsa awa chenani ya nɔ sɛma biksi nara ya se suuli wɛ, chen nyɛ o yisi ya a li ya tum tagna ni.

¹¹ Koosa sɛm tɔn ti bukoo a biksi ya di o wa zi buti ba naa maga se su un.

¹² Koosa wara daŋni bɔnɛ a ka bɔnɛ. Ba naa ya Ju tima awa ba naa vɛ ya Ju tima, ba maga ya kibɛgimnɛ o wati. Ba maga kunyana yaa nu a la suŋi ba naa la yir o sɔn kinkan.

¹³ Ba fun sɔbi a li Koosa sɛm tɔn ti ni a ŋɔ, “Ba naa maga yir ya kunyana sɔn di o yisi ba a li ba tum tagna ni, o zi ya chenu.”

¹⁴ Ba se vɛ un, yɛrɛ ba kaa yir o sɔn di o yisi ba a li ba tum tagna ni? Ba fu vɛ nu o wɛ, yɛrɛ ba se fu zi koti a su unn? Nara fu vɛ biksi ba o wɛ, yɛrɛ ba fu kaa ya a nu o wɛ?

¹⁵ Koosa fu vɛ tum nandigi, anti fu zi koti a biksi nara tima o wɛ? Ma zim chenani ba fun sɔbi a li Koosa sɛm tɔn ti ni a ŋɔ, “Ba naa la gba a la mɔɔli Koosa laaboor weri ti, ba waali weru kinkan.”

¹⁶ Amaa nara maga ha wa la nɔɔni Koosa laaboor weri ti ni. O witiina Azaaya funɛ sɔbiu, “Mu kunyana, Ju tim tama la nɔɔni sɛm naa i fun kpa a du ya nisi ni.”

¹⁷ Nara funɛ wa biksi ya Koosa laaboor weri ti wɛ. Waa ya Kristo wɛ. Ya funɛ nu un, chen nyɛ ya se su un.

¹⁸ Amaa ma nyɛ mu pɛɛsi ma, Ju tim ta nu Koosa wɛuu? Ba funɛ nuu. Ba funɛ sɔbi a li Koosa sɛm tɔn ti ni a ŋɔ, “Laaboor ti funɛ pisi tɛɛnɛ nɔ maga ni. Nara funɛ nu o wɛu bawu maga ni.”

¹⁹ Ma nyɛ mu bu pɛɛsi ma, Ju tim ta wa zim laaboor ti munn? Ba zimu. Mosis titi funɛ sɔbi di Koosa ŋɔ, “Mu zi nyɛ ma kpak handɔtau a du ba naa mu vɛ lisi a chi ma. Mu zi nyɛ ma na paanu a du ba naa ma yir womna ni.”

²⁰ Azaaya funɛ kpak bambi kpok a sɔbi di Koosa ŋɔ, “Ba naa funɛ vɛ dɛu min, ba waa na min. Ba naa funɛ vɛ pɛɛsi mu wɛ, mu fun ŋɔ ba mu titi wɛ.”

²¹ Amaa o funɛ sɔbi Ju tim ta wɛu di Koosa ŋɔ, “Mu funɛ bɛrigi mu nisau chɔɔsa hali zaazɔn wa tel di ba zi wa mu watiu. Ba se funɛ kpok. Chendaha ba fun vɛ.”