Room 1 - Tampulma

¹ Mu waa, Pɔɔl, naa ya Yesu Kristo tumtumna, min la sɔbi tɔn nɔ. Koosa fun a yir min a lisi min di mu ya o nitumi a la ŋɔ nara ni o laaboor weri ti wɛ.

² Laaboor weri nɔ ya kin nawara o fun vɔu saha digi chen a fun nyɛ o witinsi ta sɔbi a li o sɛm tɔn ti ni.

³ O ya o be wɛwa. Waa ya ya kunyana Yesu Kristo. O ya koor hɛɛ Devid be lulirɛ,

⁴ amaa Koosa funɛ kpa o kpok zen ti a lɛli un a li o sou ni di o biksi ya di o gbanko ya o bere.

⁵ Yesu Kristo fun a suŋi min di mu ya o nitumi aa la sɛm tɛɛnɛ nɔ tim maga ni a nyɛ un, chen ni ba se zi su unu ka baa tiŋ o nɔ.

⁶ Ma gbanko funɛ gbaari ba niu. Koosa fun a yir ma di Yesu Kristo dɔ ma.

⁷ Mu zaami ma naa maga Koosa daŋni a fun lisi a nyɛ o titi niu a li Room ni. Ya kunyana Koosa awa ya kunyana Yesu Kristo suŋi ma a kinyɛ ma bara sɔɔna.

Pɔɔl Fun Zaami Koosa Ba Daha

⁸ Mu daŋni n te ŋɔ di Yesu Kristo kpa chenani mu kunyana Koosa ma maga daha a nyɛ un. Nara sɛmu bawu maga ni chenani ma se su Yesu Kristo.

⁹ Koosa naa muu tum a nyɛ awa mu bambi maga ni a la biksi o laaboor weri ti o be wɛ a nyɛ nara ni, waa ya mu sɛhɛra tiina di mu yaa sumi unu ma daha,

¹⁰ di o ya o tutɔ, o zi nyɛ min nyinbaanu wa ma wati.

¹¹ Mu daŋni mu na mau kinkan, chen ni mu wa ma zi kotiu a bɔni Koosa siim weri ti papaha bɛgim di ma kpak nɛnɛ.

¹² Chen yaali ni, ya maga zi kotiu a suŋi dɔŋa. Chenani mu se su Koosa zi kpami mau. Chenani ma gbanko se su un zi kpami minu.

¹³ Mu niinbisa, mu daŋni ma zimu di mu funɛ daŋniu mu wa ma wati bu damata, amaa mu wa fun koti a wa. Mu daŋni mu lisi narawa ma wati a nyɛ Koosa ni a chi mu funɛ lisi ba a li ba naa vɛ ya Ju tim wati bawu maga ni.

¹⁴ Girik tima awa ba naa vɛ nɛɛgi, nɛha tima awa nyu bilim tima, o lawa mu biksi Koosa laaboor weri tiu a nyɛ ba maga ni.

¹⁵ Chendaha mu kpak un mu bambi ni di mu biksi un a nyɛ ma naa nyɛn Room gbanko ni.

Koosa Fun Kpa O Kpok Ti A Du O Laaboor Weri Ni

¹⁶ Koosa laaboor weri ti ya mu jirima kin. Koosa funɛ kpa o kpokre a du un ni, chen ni Koosa zi kotiu a yisi ba naa maga se su o laaboor weri ti a li ba tum tagna ni. O te ya chene a nyɛ ba naa ya Ju tim ni a ka zi ya a nyɛ ba naa vɛ ya Ju tim ni.

¹⁷ Koosa biksi yau gbampulim ni a li o laaboor weri ti ni chenani o zi bu vɛ na nibinsa galimsa o wati. Chenani nibinsa se duŋduŋ su un nyɛ o tum chen. Ba fun sɔbi chen wɛ a li o sɛm tɔn ti ni saha digi a ŋɔ, “Nara se su Koosa, o wa zi bu na ba galimsa o wati a kpa o mi fali a nyɛ ba.”

Koosa Na Tɛɛnɛ Nɔ Tim Maga Galimsa

¹⁸ O waa na paan a du ba naa vɛ o nɔ a la tum tum tagna a zi lɛrgi ba diŋsa. Ba tum tagna daha, ba kpa o wuti ti a ta.

¹⁹ Kin nawara nyɛ nibinsa zim Koosa nyɛn gbampulim ni. Koosa titi funɛ kpa a a li chen.

²⁰ Saha naa Koosa fun naami tɛɛnɛ nɔ maga hali wa zinan, ba kotiu a na chenani o bambi du a li kin nawara o naami ni. Ba waa funɛ zim o kpok naa vɛ kpak bɔ awa chenani o ya Koosa. O fun kpa kin nama a li gbampulim, chen ni ba wa zi koti a sɛm sɛma.

²¹ Ba fun koti a zim Koosa, amaa ba wa la nɔɔni di ba zaami un a nyɛ un jirima. Ba fun burgi womna a la lisi lisi yɔrisa. Ba se wa fun lɛli.

²² Ba fun a yir ba titi ninɛɛgɛ, amaa ba funɛ burgi womniwa.

²³ Ba fun a nyɛ kin nawara chi nibinsa awa zimebisa awa sela awa kipalɛ jirima a kpa a chiŋsi Koosa bar jɛɛmi bar chiŋsi ni. Waa nyɛnɛɛ hali saha naa vɛ kpak bɔ.

²⁴ Chendaha Koosa fun kpa ba a ta di ba tiŋ ba titi daŋnɛ a tum tum tagna a tum dɔŋa aa du dɔŋ ni.

²⁵ Ba fun a piŋi Koosa wuti a la nusuna a la nyɛ kin nawara o fun naami jirima a kaali o titi naa naami a. Ma nyɛ ya pɛgi un hali saha naa vɛ kpak bɔ. Ami.

²⁶ Koosa fun kpa ba a ta di ba tiŋ ba titi daŋnɛ naa nyɛ ba na hiisa. Hali ba nihaana fun vɛ di ba wa nibaala wa zi chɔ aa la chɔ dɔŋa.

²⁷ Nibaala gbanko ka fun vɛ di ba wa nihaana wa zi chɔ a la chɔ dɔŋa. Chenani ba funɛ tum nyɛ ba na hiisa kinkan. Ba tum tagna zi buru a di ba.

²⁸ Ba wa fun lisi di o deŋlu di ba zim Koosa. Chendaha o fun kpa ba a ta a nyɛ ba burgi nara a lisi wu tagna a la tum tum tagna a naa vɛ deŋli,

²⁹ a la tum tum tagna damata a ya se tima, a kpak handɔta wa dɔŋa a la kpu nara a la yo dɔŋa la mur ba dɔŋtima a ha dɔŋa kinkan, a la lɔ nara gantɛl,

³⁰ a la chɔk nara sɔna a la pini nara zoma aa ha Koosa. Baa daŋni sɔniwa a la zer ba titi a la nyini tum tagna falɛ di ba tum saha maga. Ba wa tiŋ ba nyama awa ba numa nɔɔna,

³¹ a wa kpak nɛha aa vɛ kpak se suuli. Hali ba wara daŋni ba dam walɛ a vɛ kpak nara siki.

³² Ba zimu di Koosa funɛ ŋɔ di o deŋlu wa ba naa la tum nan sitiu, amaa ba ha vɛɛn a tum au a ŋɔ di ba naa la tum chen tum tum werewa.