JɔnN Deesi 22 - Tampulma

¹ Malaika ti fun biksi min Koosa mi fali pul naa la chaani a chi diga. O funɛ li Koosa awa piisi be ti jirima bar kani nɛɛ,

² a pal tu la tɔhɔn ti nyinbaan zen bambaan ni. Koosa mi fali bugila funɛ nyu a chiŋi pul ti nɔsi ni, a ya fun nɔn nɔni fidalɛwa bun bɛgim. A kpachaga nyɛ tɛɛnɛ nɔ tim maga na alaafɛ.

³ Kin nawara Koosa fun ŋɔ nɔ a nyɛ wa zi nyɛn tɔhɔn ti ni. Koosa awa piisi be jirima bar kani nyɛn dooni. Chendaha ba tumtumsa duŋduŋ nyɛn dooni a la jɛɛmi ba.

⁴ Ba na Koosa seu ka o fun sɔbi o sɛn a marigi ba tilsa,

⁵ a nyɛ ba ya koorsa hali saha naa vɛ kpak bɔ. Dusum wa fun to dooni, domi ba kunyan Koosa la nyɛ ba chaani. Ba wara daŋni nha akoo fitinsa nyɛ ba chaani dooni.

Yesu Fun Ŋɔ Di O Zi Bur Wau Lalaga

⁶ Doone malaika ti fun ŋɔ min, “Chenani mu kaa ŋɔ hin deŋlu a ya wuti. Ya kunyana Koosa naa funɛ kpa o siim weri ti a du o witinsi ta ni, funɛ tum o malaika di o biksi o tumtumsa chenani la zi wa ya lalaga.”

⁷ Yesu ŋɔ ma, “Ma nu mu sɛm na. O wa zi vusi ka mu bur wa. Ba naa maga se su chenani mu sɔbi a li tɔn nɔ ni, ba tusa zi sɔɔni.”

⁸ Min, Jɔn, funɛ nau a nu kin nama maga. Mu funɛ na a nu kin nama peti, mu fun gbiri malaika naa funɛ biksi min, suwachak ni di mu jɛɛmi un.

⁹ Amaa o funɛ ŋɔ minu, “Ta ya chen, domi mu wa hin awa i niinbisa ba naa ya Koosa witinsa ka ba tiŋ tɔn nɔ sɛma nɔ, ya Koosa tumtumsiwa. Kijɛɛmi o duŋduŋ.”

¹⁰ O fun bu ŋɔ min, “Ta kpa sɛm naa nyɛn tɔn nɔ ni a sogli, domi o wa zi vusi ka a zi ya wuti.

¹¹ Chen saha ti wa tel, ba naa la tum tum tagna awa tum doŋa, ba zi tum au a gbaari. Ba naa ka la tum tum were, ba zi tum au a gbaari. Ba naa ya tu chaan tima gbanko tusa zi chaaniu a gbaari.”

¹² Yesu ŋɔ, “Ma nu mu wati. O wa zi vusi ka mu wa bɔ ma chim a li chenani ma tum.

¹³ Mu vɛ kpak piili a nyɛn a vɛ kpak peti.

¹⁴ “Ba naa chaksi ba kilaarɛ di a ta kpak doŋa a kpak nyinbaan di ba zu tɔhɔn ti bulzɔɔnɔ a di Koosa mi fali bugili nɔna, ba tusa zi sɔɔniu.

¹⁵ Amaa ba naa la tum tum doŋa a la tum tu bilim tuma a la tum chɔkumsi tuma a la kpu nara a la jɛɛmi vursa ka ba tusa sɔɔni awa nusun ni, ba maga zi wa kpalimi tɔhɔn ti dentil niu.

¹⁶ “Min, Yesu, funɛ tum mu malaika di o mɔɔli kin nama maga a nyɛ ba naa maga la tiŋ min ni. Min ya koor Devid be luli. Mu chaani kinkan chi chau wul.”

¹⁷ Koosa siim weri ti awa piisi be haan ti la ŋɔ, “Ma wa.” Ba naa maga nu ba sɛma zi gbaari a ŋɔ, “Ma wa.” Ma naa maga nyɔksa kpak, ma wa nyɔ Koosa mi fali ni yɔri.

Jɔn Mak Tɔn Nɔ Banɔwa

¹⁸ Min, Jɔn, la te ba naa maga nu tɔn nɔ sɛma, nin kinkan. Nandigi wa kpa kundɔŋ a gbaari mu sɛm nama ni, Koosa zi kpa wichɔɔrtisa a naa malaikasa nɔpɛ ta kpaku a gbaari chenani o kaa lɛrgi o diŋnau.

¹⁹ Nandigi lisi kundɔŋ a li tɔn nɔ ni, Koosa wa zi nyɛ o zu o tɔhɔn ti a di o mi fali bugili nɔn a naa wɛ mu ŋɔ ma a li tɔn ti ni.

²⁰ Naa chiŋɛ mu sɛm na gantɛl ni ŋɔɛɛ di, “Wuti o wa zi vusi ka mu bur wa.” Nyɛ o ya a chi chenani i ŋɔ chen. Ya kunyana, bur kuwa.

²¹ Ya kunyan Yesu kisuŋi ma maga.