Mat. 9 - Tampulma

Yesu Fun Tiibi Naa Naŋgere awa O Nisa Funɛ Sou

¹ Yesu fun zu arŋ ti a bur la ji jibaŋ ti a kaali Kapɛrnaum.

² Baal naa nisa awa o naŋgere funɛ sou chen, chɔ o kichɔɔli ni a li dooni. Nara bɔnɛ fun zer un a wa Yesu wati. O funɛ zim chenani ba se su un kinkan, o ŋɔ baal naa nisa awa o naŋgere funɛ sou chen, “Mu be, kpak i bambi. N waa nibine be gil i tum tagna a nyɛ hinu.”

³ Koosa chiksɛ nibiksɛ ta bɔnɛ funɛ nyɛn dooni a lisi ba tusa ni, “O sɛm sɛma nan ni, o kpa o titirɛ a chiŋsi Koosa bar chiŋi ni.”

⁴ Yesu funɛ piin zim o tuhu niu chenani ba lisi a pɛɛsi ba, “Baŋnɛ ma lisi lisi tagin na ma tusa ni?

⁵ Baal nɔ, n ŋɔ un di Koosa gil o tum tagna a nyɛ un koo n ŋɔ un di o si a val, o leema bɔm?

⁶ N daŋni ma zimu di n waa nibine be kpak kpok a li tɛɛnɛ nɔ maga ni, chen ni mu zi kotiu a gil nara tum tagna a nyɛ ba.” O fun ŋɔ wichɔɔr ti ni, “Si chiŋi a zer i kichɔɔli ti a la dama.”

⁷ Baal ti vaan si chiŋi a zer o kichɔɔli ti a kaali dama.

⁸ Ba naa funɛ chiŋi dooni na chenani o ya, hansura fun kpak ba kinkan. Ba fun a pɛgi Koosa o kpa o kpok a nyɛ Yesu ni o tum chen daha.

Yesu Fun Yir Matiu

⁹ Yesu fun bu si a li dooni. O funɛ la chene, o fun na baal naa ba yir Matiu chen. O funɛ kani lampo bar laali nɛɛ a la lampo ti. Yesu fun ŋɔ un, “Si a tiŋ min aa wa.” O fun gil o tuma a si tiŋ un a kaali.

¹⁰ Yesu awa o gantɛl tiŋsi ta fun kaali Matiu dama di ba la di diwe. Lampo nilalɛ awa wu tagna tima kinkan fun tiŋ Yesu ka ba bɔnɛ la gbaari un ni awa o gantɛl tiŋsi ta ni. Ba maga fun kani a di diwe ta.

¹¹ Ba naa funɛ ya Farisi tim ta bɔnɛ, funɛ na bau ka ba di diwe ta. Ba fun pɛɛsi o gantɛl tiŋsi ta, “Yɛrɛ ma kunyana wa wu tagna tima awa lampo nilalɛ ta lagmi a di diwe?”

¹² Yesu funɛ nu chenani ba pɛɛsi a ŋɔ ba, “Nibinsa ba naa kpak alaafɛ, ba wara la lure tiin wati, amaa ba naa vɛ kpak alaafɛ, ba waa le la lure tiin wati.

¹³ Ba funɛ sɔbiu a li Koosa sɛm tɔn ti ni saha digi di o ŋɔ, ‘Chenani ma kpak dɔŋa wa siki ya min lɛmlɛmu a kaali chenani ma kɔɔrigi kina a nyɛ min papaha nau.’ Maa la a la dɛu chenani Koosa ŋɔ ma chen mun. N wa wa di n wa yir ba naa nara yir ba nibin were. Ba naa nara yir nibin tagna daharɛ, mu wa.”

Chenani Yesu Gantɛl Tiŋsa Fun Vɛ Vɔu Nɔ

¹⁴ Wuzu digirɛ Jɔn naa funɛ chaksi nara wa ni ni chen, gantɛl tiŋsa fun wa pɛɛsi Yesu, “Yɛrɛ ya wa Farisi tim ta gantɛl tiŋsa yaa vɔu nɔ, ka i waa gantɛl tiŋsi ta vɛ vɔwi?”

¹⁵ Yesu fun burgi a pɛɛsi ba, “Nar kpa haan ka o chɛnsa tusa bu chɔkuu? Aai. Ba wa zi ya chen. Saha naa ba zi wa kpak baal ti a kaali, chen wuzu ba zi wa vɔu nɔnau.”

¹⁶ O fun bu ŋɔ ba, “Ba wa kpa gar fali a lik takta buni bɔ di o vusi. Ba ka kpa gar fali ti a lik takta buni ti, o zi bukoo chɛɛsi kibuni tiu a gbaari.

¹⁷ Ba wa kpa sin fali a du sin tɔk buni ni di o vusi. Ba ya chen ni, ka a wa bi a pursi, o zi chɔk tɔk tiu ka sin ti pisi. Sin fali daŋni tɔk falirɛ.” (O funɛ biksi ba chene ba zim di o biksi ti ya biksi falirɛ.)

Yesu Fun Tiibi Ju Tim Nihɛɛ Nihabichɛla

¹⁸ Yesu funɛ sɛm peti, Ju tim nihɛɛ digi fun wa gbiri o suwachak ni a ŋɔ un, “Mu nihabichɛla ha vaan sou nan. Mu sumi hinu di i wa kpa i nisa a sak un ni, chen ni o zi si o sou niu.”

¹⁹ Yesu wa o gantɛl tiŋsi ta fun si tiŋ un a kaali.

^20-21 Haan digi funɛ nyɛn dooni a kpak wichɔɔr digi bun fidalɛ. O fun ya nin ka o vɛ peti. O funɛ lisi o tuha ni di, “N fu koti a la gbaŋsi o kilaarɛ nɔ, n fu zi na alaafɛu.” O fun li Yesu gantɛl a wa gbaŋsi o kilaari ti.

²² Yesu fun burgi a gantɛl a na un a ŋɔ, “Mu nihabichɛla, kpak bambi. I si suuli nyɛ i na alaafɛu.” O funɛ sɛm sɛm nama, o fun vaan na alaafɛ.

²³ Yesu funɛ la tel Ju tim nihɛɛ ti dama, o fun na nizɔɔlɛ ka ba lagmi kani a nu nara chɛɛma.

²⁴ O fun ŋɔ ba, “Ma maga si la ma damsa. Be ti wa sou. O chɔ dore.” Ba fun a mɔmsi un.

²⁵ Nara tima maga funɛ kaali, o la zu be ti dɛ chɔɔli ti a kpak o nin. O funɛ ya chene, be ti vaan si o sou ni.

²⁶ Chenani Yesu fun tum chen mɔɔli a su tɔsi naa maga go dooni.

Yesu Fun Tiibi Nyulum Nara Balɛ

²⁷ Yesu fun li dooni. O funɛ val nyinbaan ni chene, nyuluma nara balɛ fun na un a tiŋ un. Ba fun tɛsi a ŋɔ un, “Koor Devid be luli, ya sumi hinu di i kpak ya siki.”

²⁸ Yesu fun la zu dama, nyuluma nara balɛ ta fun tiŋ un a la zu. Yesu fun pɛɛsi ba, “Ma se su minu di n zi suŋi mauu?” Ba la nɔɔni.

²⁹ Doone Yesu fun kpa o nisa a sak ba se ni a ŋɔ ba, “Nyɛ o ya a chi chenani ma se suuli du.”

³⁰ Ba se fun vaan lɛli ka ba na. Yesu fun tɛ ba nin a ŋɔ ba, “Ma fiɛŋ ma ŋɔ nandigi ni kinkin naa yɛɛ.”

³¹ Amaa nara balɛ ta funɛ kaaliu a la mɔɔli laaboor ti chenani Yesu fun tiibi ba a li tɔsa naa nyɛn dooni chen.

Yesu Fun Tiibi Diŋgbiti Tiina

³² Nara tima funɛ la chen, nara bɔnɛ fun kpa baal digi a wa Yesu wati. Alizin tagin funɛ kani o nyuhu ni, ka o vɛ koti a sɛm sɛma.

³³ Yesu funɛ duŋni alizin tagin ti a li baal ti ni, o fun piili a sɛm sɛma. Alaazibu fun kpak ba naa funɛ chiŋi dooni kinkan. Ba funɛ ŋɔ dɔŋ niu, “Ya ha wa na kundɔŋ a chi nan a li Ju tim pulum ni.”

³⁴ Amaa Farisi tima funɛ ŋɔ dɔŋ niu, “Alizin tagna tiina funɛ nyɛ baal ti kpok di o duŋni a a li nara ni.”

Yesu Fun Kpak Nara Tima Siki

³⁵ A saha tirɛ Yesu funɛ gba aa go tɔsa awa tɔ wisa. O fun a biksi nara tima Koosa koor laaboor weri ti wɛ a li ba bar lagmi dɛɛni ta ni. O gbanko funɛ tiibi wichɔɔrsa magau.

³⁶ O fun nyini zɛmɛ ta, ba wɛ fun kpak un siki, domi muksi funɛ kpak ba kinkan ba daŋni suŋi. Ba funɛ chi piisisi naa vɛ kpak nigbaŋirɛ aa nyuksi.

³⁷ Doone o fun ŋɔ o gantɛl tiŋsi ta ni, “Kumi kinkan nyɛnu, amaa nikumɛ ka wa i.

³⁸ Ma sumi Koosa naa ya kumi tiina, di o nyɛ nikumɛ kinkan wa kum a du o napaga ni.”