Mat. 8 - Tampulma

Yesu Fun Tiibi Zagum

¹ Yesu funɛ li kuŋkule nyuhu ni, zɛmɛ kinkan fun tiŋ un.

² Zagum digi fun si a wa gbiri o suwachak ni a sumi un, “I fu la nɔɔni, i fu tiibi mu wichɔɔr nɔu.”

³ Yesu fun kpa o nin a gbaŋsi un a ŋɔ di, “Mu daŋni i na alaafɛu. N tiibi hinu.” O funɛ ŋɔ chen ni, zagumti ti vaan gil un, ka o na alaafɛ.

⁴ Yesu fun ŋɔ un, “I fiɛŋ i sɛm nandigi ni, amaa kila Koosa dam kɔkɔɔrsi ta digi wati, chen ni o zi koti a na hinu. O na hin, i nyɛ o kɔɔri kɔɔri ti a nyɛ hin a chi Mosis funɛ biksi ya saha digi chen. Chen la zi biksi nara di i zagumti ti petiu.”

Yesu Fun Tiibi Lanjima Nihɛɛ Tumtumna

⁵ Saha naa Yesu fun wa tel Kapɛrnaum chen, lanjima nihɛɛ digi fun wa chem un a sumi di o suŋi un.

⁶ O fun ŋɔ Yesu ni, “Mu kunyana, mu tumtumna nyɛn mu dam ni. O nisa awa o naŋgere sou ka o wi kinkan.”

⁷ Yesu fun ŋɔ un, “N zi wau a wa tiibi un.”

⁸ Lanjima nihɛɛ ti fun ŋɔ un, “Mu kunyana, aai. Mu wa ya nibin weri naa i zi zu mu dam ti. Doonani ya nyɛn nan i waa sɛm sɛma, mu tumtumna zi na alaafɛu.

⁹ N kpak nihɛɛ zeneu ba naa la zi ŋɔ min chenani mu tumu. N gbanko kpak lanjimasa ba naa n zi ŋɔ di ba tum tumau. N yaa ŋɔ digi ni di o la. O kaali. N yaa ŋɔ digi ni, kuwa. O wa. N yaa ŋɔ n yom ni, tum nan. O tum chen.”

¹⁰ O sɛm ta fun jɛri Yesu kinkan. O fun burgi a ŋɔ zɛmɛ naa funɛ tiŋ un chen, “Wutirɛ n ŋɔ ma, n funɛ pu Ju tim nidamata ba naa se su min. Baal naa vɛ ya Ju nan, si suuli kaali ba.

¹¹ Maa nu mu sɛm na. Wuzu digi nidamata zi wa li bawu maga niu a wa lagmi Abraham, Aizik awa Jakɔb wati a li Koosa koor ti ni a di diwe.

¹² Ma Ju tima, ma waa fu zi zu dooni. Amaa ma vɛ zuuli chen. Chendaha Koosa zi wa kpa mau a yo du birsi ni. Dooni ma zi wa wi kinkan.”

¹³ Doone Yesu fun burgi a ŋɔ lanjima nihɛɛ ti ni, “Kila dama. Chenani i si suuli du zi tum nyɛ hinu.” O tumtum ti fun vaan na alaafɛ.

Yesu Fun Tiibi Nidamata

¹⁴ Yesu fun si dooni a kaali Pita dama a la na ka o hila wi. Kabilima funɛ kpak un, ka o chɔ o dam ti ni.

¹⁵ Yesu fun zu o dɛ a la gbaŋsi o nin. Yesu funɛ ya chen, o kabilima ti peti. O fun si a piili a ya diwe di o nyɛ ba.

¹⁶ Nha funɛ wa chel, tɔhɔn tima kpa ba wichoorsa awa ba naa alizin tagna nyɛn ba ni a wa Yesu wati. O fun ŋɔ alizin tagni ta ni a duŋni a a ta a tiibi wichɔɔrsi ta maga.

¹⁷ O funɛ ya chene di chenani Koosa witiina Azaaya fun sɔbi a li Koosa sɛm tɔn ti ni saha digi, chen ya wuti. O fun ŋɔ, “O titi la zi tiibi ya wichɔɔrsi ta maga.”

Ba Zi Ya Yesu Gantɛl Tiŋsau

¹⁸ Yesu funɛ na ka zɛmɛ ta go un, o fun ŋɔ o gantɛl tiŋsi ta ni di ba la ji bɛɛŋ ti jibaŋ kinkin ti.

¹⁹ Ba funɛ saksi di ba la ji, Koosa chiksɛ nibiksɛ ta digi fun wa ŋɔ un, “Mu kunyana, n saksɛu di n tiŋ hin a la doonani ii la.”

²⁰ Yesu fun ŋɔ un, “Helsa nyɛn bɔ ni ka zimebisa ka nyɛn zaŋ ni, amaa n waa nibine be, n wa kpak doonani n zi chɔ a chɔ do.”

²¹ O gantɛl tiŋsi ta digi fun wa ŋɔ un, “Mu kunyana, n gbanko daŋni n tiŋ hinu, amaa nyɛ mu te a la sogli mu nyana.”

²² Yesu fun ŋɔ un, “Tiŋ min lalaknɔ, ka nyɛ ba naa vɛ tiŋ min sogli un.”

Yesu Fun Jiŋ Peha

²³ Yesu wa o gantɛl tiŋsi ta fun zu arŋa a kaali.

²⁴ Ba funɛ la chene, pe kpok fun wa si aa viigi. O fun a mo arŋ ti kinkan, a teŋ ni a du arŋ ti tuhu ni o daŋni o lim. Amaa Yesu funɛ chɔ dore.

²⁵ O gantɛl tiŋsi ta fun a laasi un a ŋɔ, “Ya kunyana, yaa daŋni ya sou, la ya a ta.”

²⁶ Yesu fun si o do ti ni a pɛɛsi ba, “Yɛrɛ ma ɔm chen ni? Ma se wa su minn?” O fun burgi a ŋɔ pehe ti ni di o chiŋi a ŋɔ ni ti ni di o du balimm. Pehe ti fun chiŋi. Ni ti gbanko fun a du balimm, hali o wa fun a dam tama.

²⁷ O fun ya ba alaazibu kinkan. Ba funɛ pɛɛsi dɔŋa, “Baal ŋɔ, baŋ nibine ya un? Hali o koti a sɛm sɛma peha awa ni wati a nu o nɔ.”

Yesu Fun Tiibi Alizin Tagna a Li Nara Balɛ Ni

²⁸ Ba funɛ la ji bɛɛŋ ti jibaŋ kinkin ti, ba fun wa tel Gɛrasin tima pulum. Nara balɛ fun nyɛn dooni a kpak alizin tagna ba nyuuni ni. Nandigi wa fun kpak kpok a kaali ba. Chendaha nandigi wa fun koti a gba dooni. Yesu funɛ wa li arŋ ti ni, nara balɛ ta fun wa li doonani nara yaa sogli ba nawaalsa di ba wa chem un.

²⁹ Ba nidigi fun tɛsi a pɛɛsi un, “I waa Koosa be, baŋnɛ ii daŋni ya wati? A wuzu naa Koosa zi wa di tɛɛnɛ nɔ maga nara sɛria ha wa tel. I te wau di i wa namsi ya ka saha ti zi wa tell?”

³⁰ Kurchusa funɛ nyɛn kuŋkule nyuhu ni a di diwe.

³¹ Alizin tagni ta fun a sumi Yesu a ŋɔ, “I duŋni ya a ta, nyɛ ya la zu kurchusi ta ni.”

³² Yesu fun ŋɔ ba, “Ma la dooni.” Ba fun li a la zu kurchusi ta ni. Kurchusi ta fun si a chɔ a la wilsi a chesi bɛɛŋ ni ti ni. Ni ti fun di a maga.

³³ Ba naa funɛ nyini kurchusi ta chen, ba fun chɔ kaali ba tɔha a la ŋɔ ba naa nyɛn dooni chenani ya ba naa alizin tagni ta fun nyɛn chen.

³⁴ Tɔhɔn ti tima maga fun li a wa Yesu wati a sumi un di o li ba pulum ni.