Mat. 5 - Tampulma

Yesu Funɛ Biksi Nara Kuŋkule Nyuhu Ni

¹ Wuzu digi Yesu fun na zɛmɛ ta a fun zini a kani kuŋkule nyuhu ni. O gantɛl tiŋsi ta fun lagmi a go un.

² O fun piili a biksi ba.

A Li Wuti Bambi Sɔɔni

³ O fun ŋɔ, “Ba naa zimɛɛ di ba daŋni Koosa suŋi ba, o zi wa dɔ bau a nyɛ ba tu sɔɔna.

⁴ Ba naa tusa chɔkɛɛ ba tum tagna daha, Koosa zi belimi bau a nyɛ ba tu sɔɔna.

⁵ Ba naa ya jɛrgɛ, ba zi na kin nawara Koosa fun vɔu di o nyɛ bau, a nyɛ ba tu sɔɔna.

⁶ Ba naa yaa kpak un ba bambe ni di ba tum chenani Koosa daŋni di ba tum, o zi suŋi bau a nyɛ ba tu sɔɔna.

⁷ Ba naa yaa ɔm nara wa siki, Koosa zi kpak ba sikiu a nyɛ ba tu sɔɔna.

⁸ Ba naa kpak tu chaan Koosa wati, o zi nyɛ ba na unu a nyɛ ba tu sɔɔna.

⁹ Ba naa kpa bar sɔɔna a wa nara wati, Koosa zi yir ba o bisau a nyɛ ba tu sɔɔna.

¹⁰ Ba naa nara muksi kinkan domi baa tum chenani Koosa daŋni ba tumnɛ, o zi wa dɔ bau a nyɛ ba tu sɔɔna.

¹¹ “Nara pini ma zoma a la muksi ma a suni wɛ aa nyɛ ma domi maa tiŋ mu nyinbaan, ma tusa zi sooniu.

¹² Chene nibinsa funɛ muksi Koosa witinsa ba naa funɛ nyɛn saha digi chen kinkan. Koosa funɛ kpa o papaha zenu a chiŋsi o tɔha ni di o nyɛ ma. Chendaha ma nyɛ ma tusa sɔɔni kinkan.”

Yisa Awa Nha

¹³ “Nara yaa kpa yisa a du ba kina ni di a ta chɔki. Ma chi chen yisawa. Ma lɛmlɛm liee, ma wa kpak nyinbaan naa ma zi bukoo lɛm. Ma ya yɔrirɛ. Ba zi kpa mau a yo ta aa val ma daha ni.

¹⁴ “Ma chi nharɛ a chaani tɛɛne maga ni. Ma wa kisogli tɔhɔn naa ba fun sa kuŋkule nyuhu ni.

¹⁵ Nandigi wa zi suk fitina a kpa gbaŋa a chik un ni. O ka suk un a chiŋsi fitin bar chiŋi nɛɛ. Doone o zi chaani nara maga ni a li dɛ ti ni.

¹⁶ Chen vɛɛna, maa chaani nara wati, chen ni ba zi na ma tum were naa ma tum chenu a pɛgi ya kunyana Koosa naa nyɛn o tɔha ni.”

Yesu Fun Biksi Ba Ju Tim Ta Chiksɛ Wɛ

¹⁷ “Ma ta lisi di n funɛ wau di mu biksi chiŋi Ju tim chiksɛ awa Koosa witinsa biksi bar chiŋi nɛɛ. N wa fun wa di mu wa ya chene, amaa n wa di n wa biksi nara a wuti munwa.

¹⁸ Ma nu nan. Hali kina maga wa si peti, nandigi wa zi koti a nyɛ Koosa chiksɛ ta kiwewe wa si peti.

¹⁹ Nar wa vɛ Ju tim chiksɛ ta kiwewe a la biksi nara di ba gbanko vɛ, waa la zi ya gantɛl a li Koosa koor ti ni. Nar ka tiŋ Ju tim chiksɛ ta a la biksi nara di ba gbanko tiŋ, waa la zi te suwachak a li Koosa koor ti ni.

²⁰ Koosa chiksɛ nibiksɛ ta awa Farisi tim ta yaa ŋɔ nara ni di ba tiŋ Koosa nyinbaan. Ma daŋni ma zu Koosa koor ti, o lawa ma tiŋi iiu a kaali ba kinkan.”

Yesu Fun Biksi Ba Paan Wɛ

²¹ “Ma funɛ nuu di nibinsa funɛ biksi ma nawaalsa saha digi a ŋɔ ba di ba ta kpu nara. Ba kpu nibine, ba zi kpa bau a wa sɛria bar diili dɛ,

²² amaa n ŋɔ mau saha nɔ, nar na paan a du a o dɔŋtiin ni, ba zi kpa un a wa sɛria tiin wati. Nar sɛm yɔri yɔri a nyɛ o dɔŋtiin ni, ba zi kpa unu a wa sɛria nidiile tima wati. Nar yir o dɔŋtiina nibin wom, o zi kpak hansura wa Koosa kpa un a du din dam ni.

²³ Adaha ma daŋni ma kpa papaha a nyɛ Koosa ni o bar jɛɛmi dam ti ni, ma zi lisi di ma niinbe funɛ kpak wu digirɛ a li ma wati,

²⁴ ma wa gil ma papaha ti a dau Koosa bar jɛɛmi dam ti ni. Ma la ma niinbe wati lalaga ma la kɔɔri a ya nɔ bɛgim. Ma wa un ya nɔ bɛgim, ma bur kuwa a wa kpa ma papaha ti a nyɛ Koosa ni.

²⁵ “Nar kpa ma la sɛria bar diili dɛ, ma nyɛ ma wa un ya chɛnsa a la nyinbaan ni. Ma vɛ ya chen, ka ma la tel, o zi kpa mau a du sɛria nidiile tima digi nin ni. Nidiili ti ka kpa ma a nyɛ lanjima ni o tɔ ma dɛ.

²⁶ N ŋɔ mau, ma zi nyɛn dooniu hali ma wa bɔ ma chim maga.”

Yesu Fun Biksi Ba Chɔkumsa Tuma Wɛ

²⁷ “Ma funɛ nuu di nibinsa funɛ biksi ma nawaalsa saha digi di ba ta tum chɔkumsa tuma,

²⁸ amaa n ŋɔ mau saha nɔ, nibine naa nyini nihaan a la daŋni o wa un chɔ, o tum chɔkumsau a li o tuhu ni.

²⁹ Adaha ma nindil si nyɛ ma tum tum tagin, yisi un a yo ta. Ma ya chen, waa bɔɛɛ wa ba kpa ma bara a yo du din dam ti ni.

³⁰ Ma nindil nisa nyɛ ma tum tum tagin, ma teŋsi a a yo ta. Ma ya chen, waa bɔɛɛ wa ba kpa ma bara a yo du din dam ti ni.”

Yesu Fun Biksi Ba Haan Vɛɛli Wɛ

³¹ “Nibinsa gbanko funɛ biksi bau saha digi di nar vɛ o haan, o sɔbi tɔn a biksi di o vɛ unu,

³² amaa n ŋɔ mau saha nɔ, o haan si su un ka o baal vɛ un ka o yu baal digi, waa nyɛ o haan ti tum chɔkumsa tuma. Baal naa o yu chen gbanko tum chɔkumsa tumau.”

Yesu Fun Biksi Ba Nɔ Ŋɔɔli Wɛ

³³ “Ma funɛ nuu di nibinsa funɛ biksi ma nawaalsa saha digi di ba ta chɔk ba vɔwi naa ba fun nyɛ Koosa ni chen.

³⁴ Amaa n ŋɔ mau saha nɔ, ma vɔu vɔwɛ, ma ta bu hɛɛsi. Ma ta hɛɛse Koosa tɔha ti, domi o nyɛn doonee.

³⁵ Ma ta hɛɛse tɛɛnɛ nɔ maga domi o ya o naŋgere bar hiisire. Ma ta hɛɛse Jɛrusalɛm, domi o ya doon koor zenne.

³⁶ Ma ta hɛɛsɛ ma nyuuna, domi ma wa koti a chɛrgi nyuk bilim o burgi kipilim koo a chɛrgi kipilim o burgi kibilim.

³⁷ Ma la nɔɔni koo aai. Ma sɛmɛɛ a kaali nan ni, ma sɛm ta maga li sintana watɛɛ.”

Yesu Fun Biksi Ba Lɛusi Wɛ

³⁸ “Ma funɛ nuu di nibinsa funɛ biksi ba saha digi, nandigi yisɛ ma se, ma gbanko yisɛ o si. Nandigi yisɛ ma nyina, ma gbanko yisi o nyin,

³⁹ amaa n ŋɔ mau saha nɔ, nandigi ya wu tagin a nyɛ ma, ma ta bur ya wu tagin ti a nyɛ un. Nandigi mo ma nindil lɛha, nyɛ o mo ma ningal lɛha gbanko.

⁴⁰ Nandigi kpa ma la sɛria bar diili dɛ ma takta wewe daha, ma nyɛ un ma takta zenzen a gbaari.

⁴¹ Nandigi muksi ma di ma chuŋi o buna a val maal bɛgim, ma val maalisa lɛ a gbaari.

⁴² Nandigi sumi ma kundɔŋ, ma kpa nyɛ un. Nandigi daŋni o pɛŋ kundɔŋ, ma kpa pɛŋ un.”

Chenani Ya Zi Daŋni Ya Dɔma

⁴³ “Ma funɛ nuu di nibinsa funɛ biksi ma nawaalsa saha digi di ba daŋni ba dɔŋtima a ha ba dɔma,

⁴⁴ amaa n ŋɔ mau saha nɔ, maa daŋni ma dɔma a kitum tum were a nyɛ ba. Maa sumi Koosa o suŋi ba naa la pini ma zoma a la muksi ma kinkan.

⁴⁵ Ma ya chen, Koosa naa nyɛn o tɔha ni zi nyɛ ma burgi o bisau. Waa funɛ naami nha di o chaani nibin tagna awa nibin were ni, a nyɛ doon mi ba naa la tum tum tagna awa ba naa la tum tum were daha.

⁴⁶ Ma daŋni ba naa la daŋni ma duŋduŋ, yɛrɛ ma kaa ya a na Koosa papaha? Hali lampo nilalɛ gbanko daŋni nara chene.

⁴⁷ Ma zaami ma chɛnsa duŋduŋ, yɛrɛ ma tum a kaali nara? Hali ba naa funɛ vɛ ya Ju tima, ba ya chene.

⁴⁸ Ma nyɛ ma tusa kichaani a chi chenani ma nyana Koosa naa nyɛn o tɔha ni tuha chaani chen.”