Mat. 3 - Tampulma

Jɔn Fun Mɔɔli Nyabaan Ni

¹ Chen saha ti baal naa ba funɛ yir Jɔn fun si a wa nyabaan naa nyɛn Judia pulum ni. O funɛ biksi narau Koosa wɛ a la chaksi ba wa ni ni.

² O funɛ ŋɔ ba, “Koosa duglɛu a la daŋni o dɔ ma. Chendaha ma gil ma tum tagna a burgi a tiŋ o nyinbaan.”

³ Koosa witiina naa ba fun yir Azaaya funɛ sɔbi Jɔn wɛ a li Koosa sɛm tɔn ti ni saha digi. O fun ŋɔ, “Nandigi la mɔɔli nyabaan ni a ŋɔ, ya kunyana wau. Maa saksi ka o zi wa. Ma kɔɔri o nyinbaan o wer.”

⁴ Jɔn kilaarɛ funɛ ya lakom tɔnnɛ, ka o kpa ganɛ a vɔu o chɛra. O funɛ di hɔɔna awa toon.

⁵ Nidamata fun li Jɛrusalɛm awa Judia pulum awa tosi naa go Jɔɔdan mɔɔga ni.

⁶ Ba funɛ nu o biksi ti, ba fun la nɔɔni di ba tum tum tagnau ka o fun kpa ni a chaksi ba a li Jɔɔdan mɔɔga ti ni.

⁷ Jɔn funɛ na Ju tima ba naa funɛ yir ba titi Farisi tima awa ba naa funɛ yir ba titi Sajusi tim nidamata la wa o wati di o chaksi ba, o fun ŋɔ ba, “Ma naa chi duma. Anti ŋɔ ma di Koosa zi na paanu a du ma ni a lɛrgi ma diŋsa ka ma chɔ?

⁸ Ma gil ma tum tagnau a la tum tum were a biksi nara chenani ma bambe burgi.

⁹ Ma ta lisi di chenani ma ya Abraham bi lulɛ, chen zi chiŋi ma tum were bar chiŋi niu. Ma nyɛ mu ŋɔ ma di Koosa koti a kpa buŋkul na a burgi Abraham bi lulɛ.

¹⁰ Ma chi bugila naa vɛ nɔnirɛ. Koosa saksɛ o saan zenu di o teŋsi ma a du din ni.

¹¹ N kpa nire a chaksi ma bara a biksi nara di ma gil ma tum tagna. Naa nyɛn n gantɛl ni aa wa, o ka zi wa kpa Koosa siim weri a du ma ni a chaasi ma a chi din zaamsɛ salma. Waa ya nihɛɛ a kaali min. N kpurɛu di mu fiisi o natausa a nyɛ un.

¹² O zi kpak o tundau di o tuk o mɛ a kpa a a du o zuŋkɔr ni, a kpa munzɔta a du din naa nara vɛ koti a dusi ni.”

Jɔn Fun Chaksi Yesu Wa Ni Ni

¹³ Chen saha ti Yesu fun li Galili ni a kaali Jɔɔdan mɔɔga di Jɔn chaksi un wa ni ni.

¹⁴ Jɔn funɛ na un, o fun vɛ la nɔɔni di o chaksi Yesu a ŋɔ un, “I fu wa zi wa mu wati di mu chaksi hin. Hin fu la zi chaksi min.”

¹⁵ Yesu fun ŋɔ un, “O deŋlu wa i chaksi min. O ya Koosa tutɔrɛ.” Jɔn funɛ nu o sɛm ta, o fun la nɔɔni a chaksi un.

¹⁶ Yesu funɛ li mɔɔga ti tuha ni, o fun vaan na buudaha ka o puk o na Koosa siim weri ti. O funɛ chi komne a tu wa a zɔŋ o nyuhu ni.

¹⁷ Ba fun nu ta a li buudaha ni ka o ŋɔ, “Mu be daŋni nɛɛnɛ. Mu sii su nara chen.”