Mat. 27 - Tampulma

Ba Fun Kpa Yesu A La Nyɛ Pailɔt Ni

¹ Chɔɔsa funɛ wa pisi, Koosa dam kɔkɔɔrsi ta awa Ju tima nihɛɛti ta maga fun lagmi a na dɔŋa di ba kpu Yesu.

² Ba funɛ sɛm peti, ba fun vɔu o nisa a kpa un a la nyɛ gɔbnati nyuhu tiina naa ba yir Pailɔt ni chen.

Chenani Judas Fun Sou

³ Judas, naa funɛ li Yesu gantɛl, o funɛ na ka ba di Yesu sou sɛria, o tuha fun chɔk. O fun bur kaali Koosa dam kɔkɔɔrsi ta awa nihɛɛti ta wati di o la nyɛ ba malɛ aniita fumtora naa ba bɔ un chen,

⁴ a ŋɔ ba, “Koosa na mu galimsa. N funɛ li naa nin vɛ nyɛn ni gantɛl niu. Ma di o sou sɛria lalaknɔ.” Ba fun ŋɔ un, “Baŋnɛ chen ya ya? I tum chen.”

⁵ Judas funɛ nu ba sɛma, o fun zer malɛ ta a yo ta Koosa bar jɛɛmi dam ti bambaan ni. O fun kaali a la tɛ o titi wa ŋmɛn a sou.

⁶ Judas funɛ li, Koosa dam kɔkɔɔrsi ta fun wa a wa pini malɛ ta a ŋɔ dɔŋ ni, “Malɛ na funɛ yau baal ti sou. Ya chiksɛ ta wa la nɔɔni di ya kpa a a gbaari Koosa bar jɛɛmi dam malɛ ta ni.”

⁷ Ba funɛ wa na dɔŋ peti, ba fun kpa malɛ ta a yau tɛɛnɛ naa ba funɛ yir tempilsa bar kɔɔri. Ba funɛ daŋni ba kpa dooni a burgi hɔɔra bar hugsiwa.

⁸ Chendaha ba yir doon tɛɛnɛ ti chɛl bar nyɛni hali wa zinan.

⁹ Koosa witiina Jɛrɛmaya funɛ sɔbi nannɛ saha digi a ŋɔ di, “Ju tim ta funɛ la nɔɔniu di ba zi bɔ malɛ aniita fumtorau a yau tempilsa bar kɔɔri tɛɛnɛ ti.

¹⁰ Adaha ba fun kpa malɛ ta a yau dooni a chi chenani Koosa fun ŋɔ min chen.” Chenani Koosa dam kɔkɔɔrsi ta fun tum nyɛ Jɛrɛmaya sɛm ya wuti.

Pailɔt Fun Pɛɛsi Yesu Awa Sɛma

¹¹ Yesu fun chiŋi Pailɔt suwachak ni. Pailɔt fun pɛɛsi un, “Hin ya Ju tim koor chenn?” O fun ŋɔ, “Chenani i kut ŋɔ chen.”

¹² Koosa dam kɔkɔɔrsi ta awa Ju tim nihɛɛti ta funɛ fiksi unu, o moori.

¹³ Pailɔt fun bukoo pɛɛsi un, “Wu damata naa ba sɛm a du hin ni nan, i wara nu aa? I wa kpak wu digi a la zi sɛmm?”

¹⁴ Yesu fun moori a vɛ sɛm wu digi. O fun ya Pailɔt alaazibu kinkan.

Ju Tima Fun Di Yesu Siwi Sɛria

¹⁵ Ba wuzu zen wuzu Pailɔt yaa fun puk dɛ naa ba yaa tɔ nara chen zɔɔnɔ a nyɛ nibɛgim li.

¹⁶ Ba naa maga funɛ lagmi Jɛrusalɛm ni funɛ zim ba naa ba tɔ dɛ ni chen digiu. Ba funɛ yir un Barabas.

¹⁷ Zɛmɛ ta fun wa lagmi Pailɔt dam til ni. O fun pɛɛsi ba, “Ma daŋni mu yisi Barabasrɛ a nyɛ ma koo mu yisi Yesu naa ba yir Kristo chen a nyɛ maa?”

¹⁸ Pailɔt funɛ zimu di Koosa dam kɔkɔɔrsi tima handɔta daha ba fun kpak Yesu a wa o wati.

¹⁹ Pailɔt funɛ kani sɛria bar diili dɛ ti ni, o haan fun holi a ŋɔ un, “Dusum ti mu dɛ namsu kinkannɛ baal nɔ daha a li mu deesi ni. O nin wa to. Adaha i yisi un a ta.”

²⁰ Koosa dam kɔkɔɔrsi ta awa tɔhɔn nihɛɛti ta fun ŋɔ zɛmɛ ta ni di ba sumi Pailɔt o yisi Barabas a kpu Yesu.

²¹ Pailɔt fun bu pɛɛsi ba, “Nara balɛ na, antirɛ ma daŋni mu lisi?” Ba fun ŋɔ, “Ya daŋni Barabasrɛ.”

²² Pailɔt fun bu pɛɛsi ba, “Baal naa ba yir Kristo nan, yɛrɛ n kaa ya un?” Ba fun ŋɔ, “Nyɛ ba kpaasi un a mari daakakli daha ni o sou.”

²³ Pailɔt fun bu pɛɛsi ba “Yɛrɛ? Tum tagna baŋnɛ o tumm?” Ba fun tɛsi kinkan a ŋɔ, “Nyɛ ba kpaasi un a mari daakakli ti daha ni o sou.”

²⁴ Pailɔt funɛ zimu di o wa zɛmɛ ta sɛm ta wa kpak mun ka ba daŋni ba dam, o fun zɔk ni a sɛm o nisa zɛmɛ ta maga suwachak ni a ŋɔ, “Mu nisa wa to baal nɔ sou ni. Ma waa dɔ un.”

²⁵ Zɛmɛ ta maga fun ŋɔ un, “Koosa la zi na ya wa ya nilulɛ galimsa a lɛrgi ya diŋsa o sou daha.”

²⁶ Doone Pailɔt fun yisi Barabas a nyɛ ba, a nyɛ ba ka tuk Yesu wa vurmsi ni. Ba funɛ tuk un peti, o fun ŋɔ di ba kpa un a la kpaasi mari daakakli ti o sou.

Lanjimasa Funɛ Mɔmsi A La Zɔ Yesu

²⁷ O lanjimasa fun kpa un a la zu Pailɔt dɛ zen, a fun yir ba dɔŋtima ba wa.

²⁸ Ba fun ur Yesu kilaarɛ a zer ba gar sɛm digi a wa laari un.

²⁹ Ba fun kpa sɔta a wa sɔ a chi koora nichiga a kpa chik o nyuha a kpa da a baŋ o nindil ni. Ba fun wa gbiri o suwachak ni a mɔm un a ŋɔ, “Ju tim koora, ya zaami hinu.”

³⁰ Ba fun tɔɔsi nantɔsa a du un ni a kpiti da ti a mo o nyuha.

³¹ Ba fun mɔmsi un peti a kpa gar sɛm ti a ur a zer o titi kilaarɛ a laari un, a kpa un li di ba la kpaasi un a mari daakakli ti ni o sou.

Ba Fun Kpak Yesu A Kpaasi A Mari Daakakli Ni

³² Ba funɛ nyɛn nyinbaan ni a la chene, ba fun la chem baal naa ba yir Simɔn a li Sairini pulum ni. Ba fun lɛrgi un a nyɛ o zer Yesu daakakli ti a baasi a tiŋ ba kaali.

³³ Ba fun la tel doonani ba yir Gɔlgɔta. Chen mun ya, ‘nyukɔkri bar’.

³⁴ Doone ba fun kpa luri a wa nyɛ Yesu ni a daŋni o nyɔ. O fun lɛmsi un a vɛ nyɔɔli.

³⁵ Ba fun kpak un a kpaasi a mari daakakli ti ni a kpa o gata a dau di ba yo walɛ di ba na anti kaa di a.

³⁶ Ba funɛ peti a maga, ba fun kani a hiisi a la nyini un.

³⁷ Ba fun wa sɔbi o yaali a ŋɔ, “Yesu nɛɛnɛ. Waa ya Ju tim koora.” Ba fun kpa chenani ba sɔbi chen a mari o nyuha a li daakakli ti ni.

³⁸ Ba fun kpaasi ŋmɛɛrsa nara balɛ gbanko a gbaari Yesu ni, digi o nindil ni, digi o ningal ni.

³⁹ Ba naa funɛ nyɛn dooni chen, fun val la gali a la gumsi ba nyuuna a pini o zoma a ŋɔ,

⁴⁰ “Hin funɛ ŋɔ di i zi chɔk Koosa bar jɛɛmi dam ti a bur sa un wuzu butora chen niuu? I sir ya Koosa bere, yisi i titi a tu wa daakakli ti ni ya na.”

⁴¹ Koosa dam kɔkɔɔrsi ta awa Koosa chiksɛ nibiksɛ ta awa tɔhɔn nihɛɛti ta, ba gbanko funɛ mɔmsi un a la ŋɔ dɔŋ ni,

⁴² “Maa na. O laata fun yisi nara chen a vɛ koti a yisi o titii? O funɛ ŋɔ di o ya Ju tim koorrɛ. Ma nyɛ ya na o zi yisi o titi daakakli ti ni a tu wa tɛɛnɛ, chen ni ya se zi su unu.

⁴³ O ŋɔ di o ya Koosa bere ka o si su un. Ma nyɛ ya na Koosa baga nyɛn di o wa yisi un lalagau.”

⁴⁴ Ŋmɛɛrsi naa ba fun kpaasi a gbaari un ni chen, gbanko funɛ pini unu.

Chenani Yesu Fun Sou

⁴⁵ Nha funɛ wa tel sal baan nyuha, doon fun wa biri a vusi hali saha naa niparɛ yaa par a si chen.

⁴⁶ Chen saha tirɛ Yesu fun tɛsi kinkan a ŋɔ a li o titi sɛm ni, “Ɛli, ɛli, lama sabagtani.” Chen mun ya, “Koosa, Koosa, yɛrɛ i gil min?”

⁴⁷ Nara bɔnɛ fun chiŋi dooni a nu chenani o sɛm chen a ŋɔ dɔŋ ni, “O yir Koosa witiina Ɛlaijarɛ.”

⁴⁸ Ba nidigi fun chɔ a la zer kizɛrgi a tau kinyɔɔli haasi ni a kpa sak da ni a tɛ un.

⁴⁹ Ba naa funɛ chiŋi dooni ŋɔ dɔŋ ni, “Ma nyɛ ya pɔ a na Ɛlaija zi wa suŋi unu.”

⁵⁰ Yesu fun bukoo tɛsi kinkan a sou.

⁵¹ O funɛ wa sou, gar zen naa ba fun kpa purigi Koosa bar jɛɛmi dam ti chen, o fun chɛɛsi a li buudaha ni hali a wa peti tɛɛnɛ ni. Tɛɛnɛ fun zigsi ka gbɛntɛla pɛgsi.

⁵² Hugilsa fun puk ka Koosa nara ba naa funɛ siti chen bɔnɛ si ba sou ni.

⁵³ Yesu funɛ si o sou ni wuzu butora wuzu, ba fun kaali a la zu Jɛrusalɛm. Nidamata fun na ba dooni.

⁵⁴ Lanjimasa kɔkwa nihɛɛ awa o lanjimasa ba naa funɛ chiŋi bɔnɛ a il Yesu, ba funɛ na tɛɛnɛ zigsɛɛ awa chenani maga yɛɛ, hansura fun kpak ba kinkan. Ba funɛ sɛm dɔŋ ni, “Wuti baal nɔ sir ya Koosa bere.”

⁵⁵ Nihaana ba naa funɛ tiŋ un a la suŋi un a li Galili ni chen, gbanko fun a chiŋi bar boli ni a nyini chenani funɛ ya.

⁵⁶ Ba bɔnɛ sɔna funɛ ya Mɛri Magdala awa Mɛri, Jems awa Josɛf niina, awa Zɛbɛdi bisa niina.

Ba Fun Kpa Yesu A La Sogli Un

⁵⁷ Dusum funɛ wa biri, malɛ tiin digi fun wa dooni. O sɔn funɛ ya Josɛf. O tɔha funɛ ya Arimatia, ka o tiŋ Yesu.

⁵⁸ O fun kaali Pailɔt wati a la sumi di ba yisi Yesu a li daakakli ti ni a nyɛ un o la sogli. Pailɔt fun la nɔɔni a tum chen.

⁵⁹ Ba funɛ yisi un a dau, Josɛf fun zer gar gali a mɛɛsi un,

⁶⁰ a kpa un a la du gbɛntɛl bɔ fali naa ba fun te kɔɔri a nyɛ Josɛf ni. Ba fun bilimsi gbɛntɛl zen a tɔ bɔ ti zɔɔnɔ a kaali.

⁶¹ Mɛri Magdala awa o tɔguma Mɛri ba naa funɛ tiŋ Josɛf chen, ba fun kpalimi dooni aa nyini hugil ti.

Lanjimasa Funɛ Il Yesu Hugil Ti

⁶² Asibri wuzu fun wa pisi, Koosa dam kɔkɔɔrsi ta awa Farisi tim ta fun lagmi a wa Pailɔt wati.

⁶³ Ba fun ŋɔ un, “Ya kunyana, nusun tiin ti ha funɛ vɛɛn nyɛn, ya funɛ lisi o wɛu di o ŋɔ ya di wuzu butora wuzu Koosa zi wa lɛli unu a li o sou ni.

⁶⁴ Tum i lanjimasi ta ba la il o hugil ti hali wuzu butora wa tel. I ya chen, o gantɛl tiŋsi ta wa zi koti a la ŋmɛ un a ŋɔ nara ta ni di Koosa lɛli un a li o sou ni. Ba la ŋɔ nan, o zi bɔmu a kaali chenani o fa du ya wati.”

⁶⁵ Pailɔt fun la nɔɔni a ŋɔ ba, “N zi nyɛ ma lanjimasi tau ma wa ba la il o hugil ti chenani ma daŋni.”

⁶⁶ Ba wa lanjimasi ta fun kaali a la tel Yesu hugil ti mun. Ba fun pɛɛsi zɔɔnɔ ti buŋkul fari ti, a kpa lanjimasi ta a chiŋsi ba bar chiŋɛ ni.