Mat. 26 - Tampulma

Chenani Ju Tim Funɛ Daŋni Ba Kpak Yesu

¹ Yesu funɛ biksi o gantɛl tiŋsi ta kina maga a peti, o fun ŋɔ ba,

² “Wuzu zen naa Ju tima yir val la gali ti chen wa tel wuzu bilɛ wuzu. A wuzu ti wa tel, ba zi wa kpa n waa nibine beu a du ba naa la zi kpaasi min a mari daakakli ti ni mu sou nisa niu.”

³ Chen saha tirɛ Koosa dam kɔkɔɔrsi ta awa Ju tim nihɛɛti ta fun lagmi dɔŋ ni a li Kaifas naa ya ba koora dam zen ti ni,

⁴ a dɛu nyinbaan ba duŋduŋ chenani ba zi ya a kpak Yesu a kpu un.

⁵ Amaa ba fun ŋɔ dɔŋ ni, “Ya kpak un ba naa lagmi di ba di wuzu zen ti tuhu ni, ba zi damu.”

Haan Digi Fun Yoli Tulale A Du Yesu Ni

⁶ Wuzu digirɛ Yesu fun nyɛn Bɛtani ni Simɔn naa funɛ ya zagum a peti chen dam ni a kani a di diwe.

⁷ Haan digi fun wa o wati a kpak tulale naa malɛ funɛ kpok a weli du o nyuhu ni.

⁸ O gantɛl tiŋsi ta funɛ na chenani o ya, ba fun na paan. Ba fun lisi ba tusa ni, “Yɛrɛ haan nɔ zer tulale nɔ a chɔk ta nan ni?

⁹ O fu kpa tulale nɔ a yogli malɛ damata a fu kpa a a nyɛ fara tim ni, chen fu wa bɔɔ?”

¹⁰ Yesu funɛ zim chenani ba lisiu a ŋɔ ba, “Ma gil un. Yɛrɛ ma muksi un chen? O ya wu werire a nyɛ min.

¹¹ Saha maga fara tim ta yaa nyɛn ma watɛɛ, amaa mu wa zi nyɛn ma wati aa la.

¹² Haan ti funɛ kpaŋiu kinkan. O funɛ te kɔɔri mu barau di ba wa sogli min.

¹³ Mu ŋɔ ma wutirɛ, doonani maga ba zi wa biksi Koosa laaboor weri ti, ba zi wa sɛm nihaan nɔ wɛu awa chenani o fun a tum nyɛ minu. O sɔn zi wa chɔu aa la.”

Judas Fun La Nɔɔni Di O Li Yesu Gantɛl

¹⁴ Yesu gantɛl tiŋsi ta nibɛgim naa ba funɛ yir Judas Iskariɔt, o fun si kaali Koosa dam kɔkɔɔrsi ta wati,

¹⁵ a ŋɔ ba, “N kpa Yesu a du ma nisa ni, baŋnɛ ma kaa nyɛ min?” Ba fun kpa malɛ aniita fumtora a nyɛ un.

¹⁶ Chen saha ti a kpa la, Judas fun piili a dɛu nyinbaan di o li Yesu gantɛl.

Yesu Wa O Gantɛl Tiŋsa Fun Di Val La Gali Diwe

¹⁷ Wuzu zen wuzu naa Ju tima funɛ yir val la gali ti chen wa tel. A wuzu ti ba yaa fun piili a se boroboro naa ba vɛ du luri chen. Yesu gantɛl tiŋsi ta fun wa o wati a wa pɛɛsi un, “Leene i daŋni ya la a la saksi val la gali ti diwe ta i wa di?”

¹⁸ O fun ŋɔ ba, “Ma la baal digi wati a li tɔhɔn ti ni a la ŋɔ un, ya nibiksi tum ya di ya wa ŋɔ hin di o siwi saha duglɛu. O wa ya daŋni ya wa di val la gali diwe ta i dam nɛɛ.”

¹⁹ O gantɛl tiŋsi ta fun tum chenani o ŋɔ ba a fun a ya diwe ta dooni.

²⁰ Nha funɛ wa chel, Yesu wa o gantɛl tiŋsi ta fun lagmi a kani di ba di diwe ta.

²¹ Ba funɛ di chene, Yesu fun ŋɔ ba, “Mu ŋɔ ma wutirɛ, ma nidigi la daŋni o li mu gantɛl.”

²² O gantɛl tiŋsi ta tusa fun chɔk. Ba pɛɛsi un nibɛgim bɛgima, “Mu kunyana, i bi minɛɛ?”

²³ Yesu fun ŋɔ ba, “Nar wa min kpa boroboro a suk disa a li hɛn bɛgim ni nan, waa kaa wa li mu gantɛl.

²⁴ N waa nibine be zi wa sou a chi chenani ba fun sɔbi a li Koosa sɛm tɔn ti ni chen. Yɛrɛ o kaa wa du naa kaa wa li mu gantɛl. Ba fu vɛ lul chen tiina, o fu bɔu.”

²⁵ Judas naa funɛ daŋni o li Yesu gantɛl chen fun pɛɛsi un, “Mu kunyana, i bi minɛɛ?” Yesu fun ŋɔ un, “Hinnɛ.”

Yesu Fun Sumi Koosa A Du Kidiili Ta Ni

²⁶ Ba funɛ di chene, Yesu fun zer boroboro a sumi Koosa a du a chɔksi a bɔni o gantɛl tiŋsi ta, a ŋɔ ba, “Mu bara nɛɛnɛ. Ma zer a di.”

²⁷ O fun bu zer gbakme awa kinyɔɔli a sumi Koosa a du a kpa nyɛ ba. O fun ŋɔ ba, “Mu chɛl nɛɛnɛ. Ma kpa a purigi a nyɛ dɔŋ ni.

²⁸ N zi kpa unu a nyɛ nidamata ni, chen ni Koosa zi gil ba tum tagnau a nyɛ ba. Mu ya chen, chen la zi biksi di o wa nara ya nɔ bɛgimnɛ.

²⁹ Mu sɛm ma wutirɛ, kinyɔɔli naa mu nyɔ nan, n wa zi bu nyɔ un hali mu wa ma wa lagmi a nyɔ kinyɔɔli fali a li Koosa koor ti ni.”

³⁰ Ba funɛ di diwe ta peti, ba fun lɔ bool a nyɛ Koosa ni a si a li kaali Ɔlif bi ti nyuha.

Yesu Fun Ŋɔ Pita Ni Chenani O Zi Vɛ Un

³¹ Yesu fun ŋɔ ba, “Ba funɛ sɔbiu a li Koosa sɛm tɔn ti ni, ‘Koosa zi wa kpu piisi nigbaŋiu ka o piisisi ta maga pisi dɔŋ ni.’ Dusum nɔ ma maga kaa wa pisiu a gil min.

³² Amaa mu wa si n sou ni, n zi wa te ma suwachaku a la Galili.”

³³ Doone Pita fun ŋɔ un, “Hali nara maga wa vɛ hin a ta, n waa wa zi gil hin.”

³⁴ Yesu fun ŋɔ, “Nyɛ n ŋɔ hin. Dusum nɔ i zi te tɔ butorau di i wa min wa zim dɔŋa, ka zimal zi yeli.”

³⁵ Pita fun ŋɔ kpok ni, “Aai, mu wa zi kut ŋɔ di n wa zim hin. Hali n wa hin zi sou, n wa zi ŋɔ chen.” O gantɛl tiŋsi ta maga fun ŋɔ chen.

Yesu Fun Sumi Koosa A Li Getsamanɛ

³⁶ Ba fun wa tel doonani ba yir Getsamanɛ. Yesu fun ŋɔ o gantɛl tiŋsi ta ni, “Ma kani bar nɔ ka mu la sumi Koosa a wa.”

³⁷ O funɛ la chene, o fun nyɛ Pita, Jems awa Jɔn, Zɛbɛdi bisa, fun tiŋ un. O fun piili a na namsi kinkan a chi o kaa sou. O tuha fun chɔk kinkan.

³⁸ O fun ŋɔ ba, “Tu chɔk naa nyɛn mu tuhu ni nan zenu. Ma kani bar nɔ a il min.”

³⁹ O fun la suwachak tama a la pimi tɛɛnɛ ni a sumi Koosa a ŋɔ, “Mu kunyana, mu sumi hinu di o ya i tutɔrɛ i lisi namsi nɔ a li min ni. Nyɛ i tutɔ ti ya a kaali mu tutɔ.”

⁴⁰ O fun a bur kaali o gantɛl tiŋsi nara bator ta wati a la na ka ba chɔ do. O fun ŋɔ Pita ni, “Yɛrɛ ma vɛ koti a kani a il tama aa la chɔ do?

⁴¹ Ma si a il a kisumi Koosa, chen ni sintana wa zi wa mur ma ma tiŋ o nɔ. Ma tusa daŋni ma ya chenani mu sɛm chenu, amaa ma bara vɛ kpoki.”

⁴² O fun bukoo a la sumi Koosa a ŋɔ, “Mu kunyana, i daŋni mu na namsi nɔ, nyɛ i tutɔ ti ya.”

⁴³ O fun bur a wa. O wa fun ya o gantɛl tiŋsi ta tutɔrɛ ba chɔ do chen. Do bar funɛ kpak ba kinkan.

⁴⁴ Yesu fun vɛɛn a la sumi Koosa a chi chenani o fun te la sumi chen.

⁴⁵ O fun bur wa ba wati a pɛɛsi ba, “Ma ha vɛɛn a hiisiu a la chɔ doo? Kina maga petiu. Saha telu wa ba kpa mu waa nibine be a du ba naa la tum tum tagna nisi ni.

⁴⁶ Ma si. Yaa la. Maa na, baal naa li mu gantɛl la wa chen.”

Chenani Ba Fun Kpak Yesu

⁴⁷ O ha funɛ vɛɛn a sɛm chene, Judas naa ya o gantɛl tiŋsi ta digi chen, wa zɛmɛ kinkan fun wa. Koosa dam kɔkɔɔrsi ta awa Ju tim nihɛɛti ta fun a tum ba. Ba fun kpak chise zene awa daasa a wa kpak un.

⁴⁸ Nar funɛ li Yesu gantɛl chen fun te ŋɔ ba, “Ya wa pu ba, mu zi zaami nandigiu a mɔksi un. Tiina chen. Ma kpak un kpok.”

⁴⁹ Ba funɛ wa tel ba wati, Judas fun vaan kaali Yesu wati a la zaami un a ŋɔ, “Mu kunyana,” a mɔksi un a chi chɛnsa yaa mɔksi dɔŋ chen.

⁵⁰ Yesu fun ŋɔ un, “Mu chɛna, kitum chenani i daŋni i tum.” Ba naa funɛ tiŋ Judas chen, fun wa kpak un kpok ni.

⁵¹ Yesu gantɛl tiŋsi ta nidigi fun foŋ a chise zen a kpa ŋmɛn Koosa dam kɔkɔɔrsi ta nihɛɛ yom digi diŋna.

⁵² Yesu fun ŋɔ un, “Kpa i chise zen ti a du o lɔk ni. Nar zer chise zen a la laal ni, o vɛ doso, chise zenne ba zi kpa a kpu un.

⁵³ Ma wa zim di n zi koti a yir mu kunyana o nyɛ o malaikasa a naa i kinkan a wa suŋi min?

⁵⁴ Mu ya chen, kin nawara ba fun a sɔbi n wɛ a li Koosa sɛm tɔn ti ni chen, wa zi wa ya wuti.”

⁵⁵ Yesu fun burgi a ŋɔ zɛmɛ ta ni, “Mu ya ŋmɛɛrrɛ ma kpa chise zene awa daasa di ma wa kpak minn? N yaa fun kaniu a biksi ma a li Koosa bar jɛɛmi dam ti ni ka ma vɛ wa kpak min.

⁵⁶ Chenani Koosa witinsi ta fun sɔbi saha digi a li o sɛm tɔn ti ni, chen la ya zinan.” Doone o gantɛl tiŋsi ta maga fun si chɔ kaali a ka un.

Ba Fun Kpa Yesu A La Nihɛɛta Bar Lagmi

⁵⁷ Ba fun kpa Yesu a kaali Koosa dam kɔkɔɔrsi ta nihɛɛ naa ba funɛ yir Kaifas, dama. Ba funɛ la tel dooni, Koosa chiksɛ nibiksɛ ta awa Ju tim nihɛɛti ta fun lagmi dɔŋ ni.

⁵⁸ Pita fun sogli a tiŋ gantɛl a wa zu Koosa dam kɔkɔɔrsi ta nihɛɛ ti sal a la kani Koosa dam bisa wati di o na chenani kaa ya.

⁵⁹ Koosa dam kɔkɔɔrsi ta awa sɛria nidiile ta maga funɛ nyɛn dooni a nyini di ba na nandigi o wa ba suwachak a wa ŋɔ ba di o na Yesu ka o tum tum tagna, chen ni ba zi na nyinbaanu a kpu un.

⁶⁰ Ba funɛ nyiniu hali a wa ku. Nidamata fun li ba suwachak a sɛm sɛma a du Yesu ni, amaa ba sɛm ta wa fun ya wuti. Doone nara balɛ fun wa li ba suwachak,

⁶¹ a ŋɔ, “Ya funɛ nu chenani Yesu sɛm di o zi chɔk Koosa bar jɛɛmi dam tiu a burgi a sa un wuzu butora wuzu.”

⁶² Koosa dam kɔkɔɔrsi ta nihɛɛ ti fun si a chiŋi ba bambaan ni a pɛɛsi Yesu, “Sɛm naa maga nara nama sɛm a du hin ni nan ka i moori. I wa kpak wu digi a la zi sɛm?”

⁶³ Yesu fun moori. O fun ŋɔ un, “Mu daŋni i hɛɛsi Koosa naa nyɛn nan daharɛ a sɛm min wuti. I laata ya Koosa be, Kristo tii?”

⁶⁴ Yesu fun ŋɔ, “Min ya un. Nyɛ mu ŋɔ hin di wuzu digi i zi wa na mu waa nibine beu ka mu kani Koosa nihɛɛ bar kani ni, a bukoo na min n wa bur wa dobaala tuhu ni.”

⁶⁵ O funɛ ŋɔ chen, Koosa dam kɔkɔɔrsi ta nihɛɛ ti fun chɛsi chɛsi o gar a ŋɔ, “Yɛrɛ ya bukoo kaa ya a dɛu sɛhɛra tima? Ma maga fun a nu chenani o kpa o titi a maksi Koosa.

⁶⁶ O chelu akoo o wa chell?” Ba maga fun ŋɔ di o chelu. Waa dɛu o sou.

⁶⁷ Ba bɔnɛ fun si a tɔɔsi nantɔsa a du un ni a la tuk un,

⁶⁸ a ŋɔ, “Hin ŋɔɛɛ di i ya Kristore. Ŋɔ ya ba naa la tuksi hin nan.”

Pita Fun Vɛ Di O Wa Zim Yesu

⁶⁹ Ba funɛ ya chen maga, Pita ha funɛ vɛɛn nyɛn sal nɛɛ. Nihabichɛl digi funɛ nyɛn doon a ya Koosa dam kɔkɔɔrsi ta nihɛɛ ti dam be. Waa funɛ na un a ŋɔ, “I gbanko wa tiŋ Yesu naa li Galili pulum nɛɛ?”

⁷⁰ O fun tɔ ba naa maga funɛ chiŋi doon chen suwachak ni a pɛɛsi un, “Yɛrɛ i sɛm chen? N wa zim chenani i sɛm chen,”

⁷¹ a fun si a la chiŋi bulzɔɔnɔ ni. Dam ti nihabichɛl digi fun bukoo na un a ŋɔ ba naa funɛ chiŋi dooni chen, “Baal nɔ ya Yesu Nazarɛt gantɛl tiŋsi ta digirɛ.”

⁷² O fun bukoo tɔ a ŋɔ, “Mu hɛɛsɛu mu wa zim baal ti.”

⁷³ O fun ya tama ba naa funɛ chiŋi dooni chen, ŋɔ un, “I sɛmu a chi Galili tim baal. Chendaha i ya ba nidigirɛ.”

⁷⁴ Doone Pita fun hɛɛsi Koosa a nyɛ o titi ni a ŋɔ, “Baal naa ma sɛm nan, n wa zim un.” Zimal fun vaan yeli.

⁷⁵ Pita vaan lisi chenani Yesu fun ŋɔ un chen di o zi wa tɔ butorau di o wa un wa zim dɔŋa, ka zimal yeli. Chenani maga o fun lisi zu o nyuha. O fun kaali a la wi kinkan.