Mat. 25 - Tampulma

Yesu Fun Ŋɔ Ba Nihabichɛsa Fi Wɛ

¹ “Mu bur wa, Koosa koor ti zi wa chi nihabichɛsa fi, ba naa funɛ siu a zer ba fitinsa a kaali di ba la chem haan fali baal.

² Ba nara banyuu funɛ ya womna. Ba nara banyuu ka fun ya ninɛɛgɛ.

³ Womni ta fun zer ba fitinsi ta a vɛ zer a nu a gbaari,

⁴ amaa ninɛɛgɛ ta wa ka funɛ zer nurɛ a gbaari ba fitinsi ta ni.

⁵ Haan fali baal ti funɛ vusiu ka nihabichɛsa ta fun chɔ do.

⁶ “O funɛ wa ya tɔhɛɛsirɛ, baal digi fun tɛsi a ŋɔ, ‘Haan fali baal ti wau. Ma wa chem un.’

⁷ Nihabichɛsa nara fi ti fun yɛrsi a si a dusi ba fitinsi ta,

⁸ amaa womni ta fitinsi ta nu funɛ petiu. Ba ŋɔ ninɛɛgɛ ta ni di ba yoli ba nu ti a nyɛ ba.

⁹ Ninɛɛgɛ ta fun ŋɔ ba, ‘Ya nu ti wa kimak ya maga. Ma la niyogle wati a la yau.’

¹⁰ Nihabichɛl womni ta fun li a kaali a la yau. Ba funɛ kaali chen, haan fali baal ti fun wa. Nihabichɛl nɛɛgɛ ba naa funɛ saksi awa ba nu ti ni, ba wa un fun la zu o dama di ba la di diwe. Ba funɛ la zu, ba tɔ bulzɔɔnɔ.

¹¹ “A funɛ wa ya tamnɛ, nihabichɛl womni ta ka bur wa a na di bulzɔɔnɔ ti faru. Ba fun wa mo un a yir di ba wa puk.

¹² Haan fali baal ti funɛ nu ba ta a ŋɔ ba, ‘Ma gil ma chɛɛm ti. N wa zim ma.’ ”

¹³ Yesu funɛ sɛm peti, o fun ŋɔ o gantɛl tiŋsi ta ni, “Maa saksi. Ma wa zim saha naa mu kaa bur wa.”

Yesu Fun Ŋɔ Ba Tumtumsa Nara Batora Wɛ

¹⁴ “Mu bur wa, Koosa koor ti zi wa chi baal naa la saksi di o li o dam ni a gbau. O fun yir o tumtumsa a fun a kpa o kina maga a du ba nisa ni.

¹⁵ O funɛ bɔni o kin timau a nyɛ ba a li chenani ba tum nɛɛ. Nibɛgim fun la sidi tusugsa nyuu, digi fun la sidi tusugsa lɛ, digi ka la sidi tusuga. O fun bɔni chen peti a kaali.

¹⁶ Tumtum naa funɛ la sidi tusugsa nyuu chen, funɛ kpa au a la yausi kina aa piŋi a na nyɔɔra sidi tusugsa nyuu.

¹⁷ Tumtum naa funɛ la sidi tusugsa lɛ chen, funɛ kpa au a na nyɔɔra sidi tusugsa lɛ.

¹⁸ Amaa tumtum naa funɛ la sidi tusuga chen, fun la hur bɔ a kpa o kunyan malɛ ta a sogli dooni.

¹⁹ “O funɛ vusiu ka tumtumsi ta kunyan bur wa a fun yir ba ba lagmi o wati. O fun pɛɛsi ba chenani ba kpa o malɛ ta a tum.

²⁰ Tumtum naa funɛ la sidi tusugsa nyuu chen, o fun wa o suwachak a ŋɔ un, ‘Mu kunyana, i funɛ kpa sidi tusuga nyuunwa a nyɛ min. Mu ka gbaari sidi tusugsa nyuu.’

²¹ O kunyan ti fun ŋɔ un, ‘I kpaŋi i titiu. I ya nibin werire a la tum tum were. Mu funɛ kpa malɛ tamnɛ a du i nin ni ka i ya wuti tiina. Lalaknɔ mu zi kpa malɛ damatau a du i nin ni. I wa min zi kpak tu sɔɔnau.’

²² Tumtum naa funɛ la sidi tusugsa lɛ chen, o fun wa o suwachak a ŋɔ un, ‘Mu kunyana, i funɛ kpa sidi tusugsa lɛwa a nyɛ min. Mu ka gbaari sidi tusugsa lɛ.’

²³ O kunyan ti fun ŋɔ un, ‘I kpaŋi i titiu. I gbanko ya nibin werire a la tum tum were. Mu funɛ kpa malɛ tamnɛ a du i nin ni. I wa min zi kpak tu sɔɔnau.’

²⁴ Tumtum naa funɛ la sidi tusuga chen, o fun wa o suwachak a ŋɔ un, ‘Mu kunyana, n zim di i kpak tu haasau. I kum kina doonani i vɛ duuli a pa be naa i vɛ tugi.

²⁵ I funɛ kpa i malɛ ta a nyɛ min chen, hansura fun kpak min. N fun kaali a la hur bɔ a kpa a a sogli dooni. Kina, i malɛ ta nɛɛnɛ mu wati bar nɔ.’

²⁶ O kunyan ti fun na paan a du un ni a ŋɔ, ‘I waa ya nibin tagin awa zanyɛrka tiinnɛ. I lisi di mu kum kina doonani mu vɛ duuli a kpa be naa mu vɛ tugi.

²⁷ I fu kpa mu malɛ ta a la nyɛ naa fu zi la a wa gbaari min nyɔɔra tama.’

²⁸ Doone o kunyan ti fun burgi a ŋɔ ba naa funɛ chiŋi dooni digi di o la malɛ ta o wati a nyɛ mu tumtum naa kpak sidi tusugsa fi ni.

²⁹ Nar la kpaŋi, waa la zi na a gbaari. Nar ka vɛ kpaŋi, o zi chel a maga niu.

³⁰ Ma lisi tumtum yɔri ti tiina a ta birsi bar nyɛni ni. Dooni o zi wiu kinkan a se o nyina.”

Chenani Mu Zi Bur Wa A Di Tɛɛnɛ Nɔ Tim Sɛria

³¹ “N waa nibine be wa Koosa malaikasi ta zi wa wau, mu zi wa kani mu kor niu a dɔ tɛɛnɛ nɔ maga,

³² a yir nara maga ba lagmi mu wati. Mu zi purigi ba bilɛu a chi piisi gbaŋna yaa waligi piisisa a li buuna ni chen.

³³ Mu zi kpa ba naa chi piisisi ta chenu a chiŋsi mu nindil ni a ka kpa ba naa chi buuni ta chen a chiŋsi mu ningal ni.

³⁴ Mu naa dɔ tɛɛnɛ nɔ maga zi ŋɔ ba naa nyɛn mu nindil ni, ‘Mu kunyana Koosa nyɛ ma nyusum. O funɛ naami tɛɛnɛ nɔ maga chen, o fun saksi kina a chiŋsi ma. Ma wa a wa la a lalaknɔ.

³⁵ Lɔsa funɛ kpak min, i nyɛ min diwe mu di. Nyɔksa gbanko fun kpak min, i nyɛ min ni mu nyɔ. Mu funɛ ya hɔɔrrɛ, ma la min a du ma damsi ni.

³⁶ Mu wa fun kpak kilaarɛ, ma nyɛ min kilaarɛ mu laari. Wichɔɔrta fun kpak min, ma nyini min. Ba fun tɔ min dɛ, ma wa zaami min.’

³⁷ Ba naa funɛ ya tum were nitumɛ a chiŋi mu nindil ni chen, ba nidigi zi wa ŋɔ minu, ‘Mu kunyana, saha leemawa ya fun na hin ka lɔsa kpak hin, ya nyɛ hin diwe i di? Saha leemawa ya fun na hin ka nyɔksa kpak hin, ya nyɛ hin ni i nyɔ?

³⁸ Saha leemawa ya fun na hin ka i ya hɔɔr, ya la hin a du ya damsi ni? Saha leemawa ya fun na hin ka i vɛ kpak kilaarɛ, ya nyɛ hin kilaarɛ i laari?

³⁹ Saha leemawa ya fun na hin ka wichɔɔrta kpak hin akoo ka ba tɔ hin dɛ, ya wa zaami hin?’

⁴⁰ Mu zi ŋɔ bau, ‘Wutirɛ n ŋɔ ma, chen naa maga ma fun ya a nyɛ mu gantɛl tiŋsi ta ni hali ba bichɛl tiin ni, mu nɛɛ ma tum nyɛ chen.’

⁴¹ “Doone mu zi burgi a ŋɔ tum tagna nitumɛ, ba naa nyɛn mu ningal niu, ‘Ma naa Koosa fun ŋɔ nɔ a nyɛ chen, ma la mu wati. Ma la din dama naa Koosa fun kɔɔri a chiŋsi sintana awa o malaikasa.

⁴² Lɔsa funɛ kpak min, ma wa fun nyɛ min diwe mu di. Nyɔksa funɛ kpak min, ma wa fun nyɛ min ni mu nyɔ.

⁴³ N funɛ ya hɔɔr, ma wa fun la min a du ma damsi ni. N funɛ vɛ kpak kilaarɛ, ma wa fun nyɛ min kilaarɛ mu laari. Wichɔɔrta funɛ kpak min ka ba fun tɔ min dɛ, ma wa fun wa nyini min.’

⁴⁴ Ba naa funɛ chiŋi o ningal ni, ba nidigi zi wa ŋɔ minu, ‘Mu kunyana, saha leemawa ya fun na lɔsa kpak hin, akoo nyɔksa kpak hin? Saha leemawa ya fun na hin ka i ya hɔɔr akoo i vɛ kpak kilaarɛ? Saha leemawa ya fun na hin ka wichɔɔrta kpak hin akoo ba tɔ hin dɛ, ka ya vɛ wa suŋi hin?’

⁴⁵ N zi bukoo ŋɔ bau, ‘Wutirɛ n ŋɔ ma, saha naa maga ma wa vɛ suŋi mu gantɛl tiŋsi ta hali ba bichɛl tiina, ma vɛ mu suŋirɛ.’

⁴⁶ Koosa zi kpa ba naa la tum tum tagna chenu a du namsi naa vɛ kpak bɔ bar ni, amaa o ka zi kpa ba naa la tum tum were chenu a nyɛ ba o miisa naa vɛ kpak bɔ.”