Mat. 22 - Tampulma

Yesu Fun Ŋɔ Ba Haan Kpaali Wɛ

¹ Yesu funɛ bukoo a sɛm jɛɛgɛu a nyɛ zɛmɛ ta ni.

² O fun ŋɔ ba, “Koosa koor ti chi koora naa saksɛ a yir nara di ba wa o dama a wa di diwe domi o be funɛ kpa haan.

³ O funɛ tum o tumtumsiwa di ba la yir ba, ba ka wa funɛ daŋni ba wa.

⁴ O fun bukoo yir nibɔnɛ a ŋɔ ba, ‘Ma la ŋɔ nara tima ni, ya kunyana diwe zene ta ya siriu. O lisɛ o nuhɛ awa o piisi daŋnɛwa a kɔɔrigi di o nyɛ ma. Adaha ma kpaŋi ma titi a wa.’ O funɛ sɛm peti chene, o fun tum ba ba wati,

⁵ amaa nara tima ba naa ba kunyan ti fun yir chen, ba baga wa fun nyɛn. Ba nidigi funɛ kaali o ŋmaharɛ, digi ka fun kaali yawa o la yogli kina.

⁶ Ba naa funɛ ka chen, fun kpaksi koor ti tumtumsi ta kpok ni a tuksi ba hali ba wa siti.

⁷ Koor ti funɛ nu chenani ba ya o tumtumsi ta, o fun na paan kinkan. O fun a tum o lanjimasa di ba la ba tɔha. Ba funɛ la tel dooni, ba fun kpu ba naa funɛ kpu o tumtumsi ta chen, a chɔk tɔhɔn ti maga wa din ni.

⁸ O lanjimasi ta funɛ nyɛn nyinbaan na aa la, koor ti funɛ bukoo yir tumtumsi nifalɛwa ba wa o wati. O ŋɔ ba, ‘Diwe zene naa n zɔŋ chen ya siriu, amaa ba naa n yir chen tusa wa tɔɔri di ba wa.

⁹ Adaha ma la nyinbaan chaksa a la yir ba naa maga ma na dooni di ba wa mu dam ti a wa di diwe.’

¹⁰ O tumtumsi ta fun kaali nyinbaan chaksisi ta a la yir ba naa maga ma na dooni. Nibin were awa nibin tagna funɛ wa lagmi a su koor ti dam ti.

¹¹ “Ba maga funɛ wa lagmi chen, koor ti fun la zu doonani ba nyɛn a zaami ba a na baal digi ka o laari takta zɛrki.

¹² Koor ti fun ŋɔ un, ‘N chɛna, yɛrɛ i ya zu bar nɔ a vɛ laari i takta weri?’ Baal ti wa fun sɛm un wu digi.

¹³ Doone koor ti fun burgi a ŋɔ o tumtumsi ta ni, ‘Ma kpak baal nɔ a kpa o naŋgere awa o nisa a lagmi dɔŋ ni a vɔu. Ma kpa un a la yo ta birsi ni bar boli ni. Dooni o zi wi kinkan a se o nyina.’ ”

¹⁴ Yesu funɛ sɛm la mak o bɔ, o fun ŋɔ zɛmɛ ta ni, “Koosa yir nidamata di ba wa o wati, amaa o funɛ lisi nara tamnɛ.”

Lampo Bɔɔli Wɛ

¹⁵ Koosa dam kɔkɔɔrsi ta awa Farisi tim ta fun gil un a la daŋni ba mo o lo a na chenani o zi sɛm ka ba na nyinbaan a kpu un.

¹⁶ Ba fun tum ba nitiŋɛ bɔnɛ awa Hɛrɔd nitiŋɛ Yesu wati a wa ŋɔ un, “Ya kunyana, ya zimu di i ya wuti tiinne. I bak wa to chenani nibinsa sɛm i wɛ. I wara ɔm nibin zene se wa wuti ti sɛmi.

¹⁷ Ya yaa bɔ ya lampo a nyɛ koorsi ta nyuhu tiina Siiza ni, chen weru koo o wa wer? Ya yaa kibɔ koo ya ta bɔɔlii?”

¹⁸ Yesu fun zim di ba daŋni ba mo o lore a ŋɔ ba, “Ma ya nusun timwa. Yɛrɛ murirɛ ma mur min nan?

¹⁹ Ma kpa malɛ naa ma kpa bɔ lampo chen a wa mu na.” Ba fun kpa a a wa o wati.

²⁰ O fun pɛɛsi ba, “Anti nyuha awa o sɔn sak un ni nan?”

²¹ Ba fun ŋɔ di, “Koor Siiza nyuhu tiina awa o sɔnnɛ.” O fun ŋɔ ba, “Tɔ, ma kpa koor Siiza nyuhu tiina kina a nyɛ un a ka kpa Koosa kina a nyɛ un.”

²² Ba funɛ nu chen, o fun ya ba alaazibu kinkan. Ba fun gil un a kaali.

A Wuzu Naa Nara Maga Zi Wa Si Ba Sou Ni

²³ Doone Sajusi tim ta bɔnɛ fun wa Yesu wati. Ba yaa fun a ŋɔ di nara siwɛɛ, ba wa zi bu koti a si ba sou ni.

²⁴ Ba fun ŋɔ un, “Ya nawaalsa nihɛɛ, Mosis, funɛ biksi ya a li Koosa sɛm tɔn ti ni, nandigi kpa haan ka o wa o haan ti vɛ luli ka o sou, ya nyɛ o niinbe kpa o maan ti haan ti a lul bisa a nyɛ o maan ti ni, chen ni o sɔn wa zi sou.

²⁵ Nibaala nara banɔpɛ funɛ nyɛn dooni, ba naa ya niin bɛgim awa nyan bɛgim bisa. Ba nihɛɛ fun wa si a kpa haan. O wa o haan ti wa fun lul be ka o baal ti sou. O niinbe fun kpa o haan ti. O wa o gbanko wa fun lul be ka o gbanko sou.

²⁶ Chen funɛ ya ba nara banɔpɛ ta maga.

²⁷ Nara banɔpɛ ta maga funɛ sitiu, a gantɛl nɛɛ haan ti gbanko fun wa sou.

²⁸ Tɔ. A wuzu naa nara maga zi wa si ba sou ni, haan nɔ, anti kaa wa dɔ un? Ba nara banɔpɛ ta maga funɛ kpa unu.”

²⁹ Yesu fun ŋɔ ba, “Ma wa zim Koosa sɛm tɔn ti ni nɛnɛ. Chendaha ma nyuksi nyinbaan. Ma wa vɛɛn zim o kpok gbanko.

³⁰ A wuzu naa nara maga zi wa si ba sou ni, nibaal wa zi bu kpa haanasa. Nihaana gbanko wa zi bu yu baalasa. Ba maga zi wa chi Koosa malaikasa, ba naa nyɛn Koosa tɔha ti ni chene.

³¹ Ma waa tɔ di nibinsa wa zi si ba sou niu, ma ha wa karimi a li Koosa sɛm tɔn ti ni a zim chenani o ŋɔ o mun. O fun ŋɔ di,

³² ‘Min ya Koosa naa ma nawaalsa Abraham, Aizik awa Jakɔb yaa jɛɛmi.’ Ba naa sitɛɛ laata la jɛɛmi Koosa, amaa ba naa kpak miisa.”

³³ Zɛmɛ ta funɛ nu chenani o biksi ba, alaazibu fun kpak ba kinkan.

Koosa Chiksi Naa Kpokee

³⁴ Farisi tim ta funɛ nu chenani Sajusi tim ta fun a pɛɛsi Yesu ka o biksi a nyinbaan nɛnɛ a nyɛ ba chen, ba fun lagmi a wa o wati.

³⁵ Ba nidigi funɛ ya Koosa chiksɛ nibiksi a daŋni o mo Yesu lo a pɛɛsi un,

³⁶ “Koosa chiksɛ naa o leema kpok a kaali a maga?”

³⁷ Yesu fun ŋɔ un, “ ‘Maa daŋni Koosa wa ma bambe ni awa ma siima awa ma lise maga ni.’

³⁸ Chiksɛ nɔ kpok kaali a maga.

³⁹ Nara sak un ni chi nan ni, ‘Maa daŋni dɔŋa a chi chenani maa daŋni ma titi.’

⁴⁰ Chiksɛ naa maga Koosa fun ŋɔ ma nawaal Mosis ni chen awa Koosa witinsi ta maga biksi ti nyini chiksɛ lɛ na se nee.”

Naa Koosa Fun Ŋɔ Di O Zi Tumu Chen Wɛ

⁴¹ A gantɛl nɛɛ Farisi tim ta fun bu lagmi a wa Yesu wati, o fun pɛɛsi ba,

⁴² “Anti be lulirɛ ma ya ŋɔ di Kristore?” Ba fun ŋɔ, “O ya koor Devid be lulirɛ.”

⁴³ O fun bu pɛɛsi ba, “O ya di wutirɛ, yɛrɛ Koosa siim weri ti funɛ biksi Devid di o yir Kristo o kunyana. Ba funɛ sɔbiu a li Koosa sɛm tɔn ti ni di Devid ŋɔ,

⁴⁴ ‘Mu kunyana Koosa funɛ ŋɔ mu kunyan ti ni, kani mu nihɛɛti bar kani ni, ka mu nyɛ i dɔma burgi i yosa.’

⁴⁵ Devid titi funɛ yir un o kunyan ti chen ni, yɛrɛ o bu kaa ya a zen a kaali un?”

⁴⁶ Nandigi wa fun bu koti a sɛm sɛma o wati. Saha ti kpa la, nandigi wa fun kpak un o bambi ni di o pɛɛsi un wu digi.