Mat. 20 - Tampulma

Tumtumsa Ba Naa Nyɛn Ŋmaha Ni

¹ “Koosa koor ti chi ŋmaha tiinne. Chɔɔsa fun pisi, o li a gba di o dɛu tumtumsa ba la par o ŋmaha.

² O funɛ lagmi ba, o fun ŋɔ ba di o zi bɔ a wuzu ti malɛu. Ba la nɔɔni ka o nyɛ ba kaali o ŋmaha ti.

³ Nha ha funɛ vɛ wa num kinkan, o fun kaali yawa a la na nara bɔnɛ ka ba chiŋi.

⁴ O fun ŋɔ ba, ‘Ma la mu ŋmaha a la par. N zi bɔ ma chenani deŋliu.’ Ba fun kaali.

⁵ Nha sal baan nyuha awa zazɔɔn saha, o funɛ nyɛ niparɛ bɔnɛwa a kaali.

⁶ Nha funɛ wa dugli cheli, o fun bu kaali yawa a la na nara ka ba chiŋi. O pɛɛsi ba, ‘Baŋnɛ ma chiŋi bar nɔ a ya zinan maga?’

⁷ Ba fun ŋɔ un, ‘Nandigi wa kpa ya a la o ŋmaha.’ O fun bukoo ŋɔ ba, ‘Ma gban kila n ŋmaha a la par.’

⁸ “Nha funɛ wa chel, ŋmaha ti tiin ti fun ŋɔ tumtumsi ta nihɛɛ ni, ‘Yir niparɛ ta di ba wa. Ba wɛɛ, i bɔ ba ba malɛ. Te a piili a bɔ ba naa tiŋ gantɛl a wa chen, a bɔ a la peti ba naa te wa chen ni.’

⁹ Doone nihɛɛ ti fun bɔ ba naa funɛ wa ka nha dugli cheli chen ba wuzu ti malɛ.

¹⁰ Nihɛɛ ti funɛ wa bɔ ba naa funɛ te wa chɔɔsa chen, ba funɛ lisi di ba malɛ zi kaali ba naa tiŋ gantɛl wa chen malɛu. Amaa nihɛɛ ti gbanko funɛ bɔ ba ba wuzu ti malɛ.

¹¹ O funɛ bɔ ba ba malɛ, ba fun a piili zulimi a du ŋmaha tiin ni.

¹² Ba nidigi fun wa ŋɔ un, ‘Ba naa i nyɛ ba tiŋ gantɛl a kaali i ŋmaha ti di ba la par chen, ba wa fun tum vusi. Ya ka tum nha birigi magwa ka i bɔ ba nha birigi malɛ a chi chenani i la nɔɔni di i bɔ ya chen.’

¹³ Ŋmaha ti tiina fun ŋɔ baal ti ni, ‘N chɛna, kinu n wati. Mu wa di ma, domi ma wa min la nɔɔni di ma zi la wuzu bɛgim malɛu.

¹⁴ Adaha ma zer ma malɛ a la dama. N zi nyɛ ba naa tiŋ gantɛl a wa chen gbanko wuzu birigi malɛu.

¹⁵ N wa kpak nyinbaan naa n zi tum chenani mu daŋnii? I di handɔtarɛ domi mu bɔ nara namau a kaali chenani mu fu zi bɔ ba.’ ”

¹⁶ Yesu funɛ sɛm jɛɛgi ti peti, o fun ŋɔ o gantɛl tiŋsi ta ni, “Ba naa te suwachak, ba zi wa bur gantɛlu. Ba naa ka tiŋ gantɛl wa te suwachak.”

Yesu Fun Bukoo Sɛm O Sou Ti Wɛ

¹⁷ Yesu awa o gantɛl tiŋsi ta funɛ nyɛn nyinbaan ni aa la Jɛrusalɛm, o fun ŋɔ ba ba duŋduŋ.

¹⁸ O funɛ ŋɔ ba, “Maa nu, ya la Jɛrusalɛmnɛ. Ya wa tel dooni, ba zi wa kpak n waa min nibine beu a kpa min a du Koosa dam kɔkɔɔrsi ta awa Koosa chiksɛ nibiksɛ ta nisa niu. Ba zi wa di mu sou sɛriau,

¹⁹ a kpa min du ba naa vɛ ya Ju tim ta nisa ni. Ba zi wa mɔmsi minu a tuk min a zi kpu min. Wuzu butora wuzu Koosa zi lɛli minu a li n sou ni.”

Jems Awa Jɔn Niina Fun Sumi Yesu

²⁰ Doone Jems awa Jɔn, Zɛbɛdi bisa, awa ba niina fun wa Yesu wati. Ba niin ti fun wa gbiri o suwachak ni a sumi un.

²¹ Yesu fun pɛɛsi un, “Baŋnɛ ii daŋni n ya a nyɛ ma?” O fun ŋɔ un, “Saha naa i wa di i koor ti, i vɔu a nyɛ min di mu bisa lɛ kaa wa ya i mun nikanɛ, digi wa kani i nindil ni, digi ka wa kani i ningal ni.”

²² Yesu fun ŋɔ un, “Kin naa i sumi chen, i wa zim chenani o kaa wa du o gantɛl ni. Namsi naa n kaa wa namsi nan, i bisi ta zi wa koti namsi chenuu?” Ba fun ŋɔ di ba zi kotiu.

²³ Yesu fun ŋɔ ba, “Wutirɛ namsi naa mu kaa wa namsi chen, ma gbanko zi wa namsi chenu. Amaa mu mun nindil nikani awa mu mun ningal nikani, Koosa piin yisi ba a chiŋsiu, chen ni ba zi wa kani dooniu. N waa laata dɔ ba lisi.”

²⁴ O gantɛl tiŋsa nara fi funɛ nu chenani Jems awa Jɔn niina fun pɛɛsi Yesu ba daha, ba na paan kinkan.

²⁵ Yesu fun lagmi ba a ŋɔ, “Ma zimu di ba naa vɛ ya Ju tima koorsa, ba wa dɔ ba tɔhɔn ti tima a la biksi ba kpok. Ba nihɛɛta gbanko fun biksi ba kpok,

²⁶ amaa o wa lawa ma ya chen.

²⁷ Nar la daŋni o wa ya ma koora, see o tum a chi yoma a nyɛ ma.

²⁸ N waa min nibine be wa fun wa di n wa dɛu tumtumsa di ba wa tum a nyɛ min. N ka funɛ wau di n wa tum a nyɛ tɛɛnɛ nɔ maga nara nɛɛ a sou a la nibinsa nyuuna a nyɛ ba.”

Yesu Fun Tiibi Nyulum Nara Balɛ

²⁹ Ba funɛ wa tel tɔ digirɛ ba yir Jɛriko. Nidamata fun lagmi Yesu wati.

³⁰ Ba funɛ wa a la li dooni, nyulum nara balɛ fun nyɛn dooni a kani nyinbaan nɔ ni. Ba funɛ nu di Yesu la kaali chen, ba fun a tɛsi a yir un a ŋɔ, “Hin koor Devid bi luli, ɔm ya siki a suŋi ya.”

³¹ Ba naa funɛ nyɛn dooni chen, tɛsi di ba gil chɛɛma, amaa ba fun vɛ a tɛsi kinkan a kaali chenani ba fa te tɛsi chen, a yir un a ŋɔ, “Hin koor Devid bi luli, ɔm ya siki a suŋi ya.”

³² Yesu fun a chiŋi a yir ba ba wa o wati. O pɛɛsi ba, “Baŋnɛ maa daŋni mu ya nyɛ ma?”

³³ Ba fun ŋɔ un, “Yaa daŋni i lɛligi ya sewa a nyɛ ya.”

³⁴ Yesu fun ɔm ba siki a kpa o nin a gbaŋsi ba se ta. Ba se ta fun vaan lɛli. Ba fun tiŋ un a kaali.