Mat. 19 - Tampulma

Yesu Fun Biksi Ba Haan Vɛɛli Wɛ

¹ Yesu funɛ sɛm peti chen, o fun li Galili ni a bu kaali Judia pulum a la ji Jɔɔdan jibaŋ kinkin ti.

² Zɛmɛ kinkan fun wa lagmi o wati ka o tiibi ba wichɔɔrsa dooni.

³ Farisi tim ta bɔnɛ fun wa di ba wa mo o lo a na o galimsa. Ba fun pɛɛsi un, “Nar duŋni o haan a ta, chen ya chiree?”

⁴ Yesu fun ŋɔ ba, “Ba fun sɔbi a li Koosa sɛm tɔn ti ni di, ‘Saha naa Koosa fun naami tɛɛnɛ nɔ maga a li o piili ni, nibaal awa nihaannɛ o fun naami,’

⁵ a ŋɔ di, ‘Chen weru di nibaal zi gil o nyana awa o niinau a kpa haan, chen ni ba nara balɛ ta zi burgi nibɛgimu.’ Ma funɛ karimi chenuu?

⁶ Ba naa Koosa fun a nyɛ ba burgi nibɛgim chen, o wa deŋli di nibine nyɛ ba nyinbaan di ba waligi dɔŋ ni.”

⁷ Farisi tim ta fun pɛɛsi un, “Chenani i ŋɔ, chen ya wutirɛ, amaa baŋnɛ Mosis funɛ biksi nara saha digi di nar vɛ o haan, o sɔbi tɔn a biksi nara di o vɛ unu?”

⁸ Yesu fun ŋɔ ba, “Ma bambe ya bambi sitɛwa. Chendaha Mosis fun sɔbi chen di maa tiŋ. Amaa Koosa funɛ naami tɛɛnɛ nɔ magau, o ka wa fun du chen.”

⁹ Yesu fun bukoo ŋɔ ba, “Nar haan si vɛ su un ka o vɛ un a bu kpa haan digi, o tum galimsau a du o haan ti ni. O ya chɔkumsa tiinne.”

¹⁰ O gantɛl tiŋsi ta fun ŋɔ un, “O ya di nibaal awa o haan nyɛn nannɛ, nar vɛ kpa haan, chen bɔɛɛ.”

¹¹ O fun ŋɔ ba, “Nara maga wa zi koti a tiŋ ma biksi nɔ. Ba naa Koosa fun lisi duŋduŋ koti a tiŋ chen.

¹² Ba lul nibaal bɔnɛu ba si a vɛ koti a luli. Ba chɛrgi bɔnɛ di ba ya namugilsa. Ba naa Koosa dɔ bɔnɛ ka wa kpa haanasa o koor ti daha. Ba naa koti a tiŋ mu biksi nɔ, ma nyɛ ba tiŋ un.”

Yesu Fun Sumi Koosa A Nyɛ Bichɛsi Ni

¹³ Nara fun a kpa ba bisa a wa Yesu wati di o kpa o nisa a gbaŋsi ba a sumi Koosa a du ba ni. O gantɛl tiŋsi ta fun a nyiigi ba.

¹⁴ Yesu fun ŋɔ o gantɛl tiŋsi ta ni, “Ma nyɛ bichɛsa ta kuwa mu wati. Ma ta duŋni ba. Ma wa zim di ba naa se su min a chi bichɛsa, ba waa nyɛn Koosa koor ti nii?”

¹⁵ O fun kpa o nisa a gbaŋsi ba a kaali.

Bunɔɔn Naa Funɛ Ya Kin Tiina

¹⁶ Yesu funɛ nyɛn nyinbaan ni a la chene, bunɔɔn digi fun wa pɛɛsi un, “Mu kunyana, baŋ tum werire mu kaa tum a wa na Koosa miisa naa vɛ kpak bɔ?”

¹⁷ Yesu fun burgi a pɛɛsi un, “Yɛrɛ i pɛɛsi min kinkin naa were wɛ? Nandigi wa to a koti a ya nibin weri hali o wa peti see Koosa duŋduŋ. I daŋni i na o miisa naa vɛ kpak bɔ, ii tiŋ o chiksɛ.”

¹⁸ Bunɔɔn ti fun pɛɛsi un, “Chiksɛ baŋwa?” Yesu fun ŋɔ, “Koosa chiksɛ ta nɛɛnɛ. ‘Ma ta kpu nibinsa, a gil chɔkumsi tumi a ta ŋmɛɛli a ta suni wɛ a nyɛ dɔŋ ni.

¹⁹ Maa nyɛ ma nyana awa ma niina jirima a kidaŋni dɔŋa a chi ma titi.’ ”

²⁰ Bunɔɔn ti fun ŋɔ un, “Kin naa magawa mu yaa tiŋ. Baŋa ka mu kaa ya?”

²¹ Yesu fun ŋɔ, “Ii daŋni Koosa nyɛ hin o mi fali, kila a la kpa i kina maga a yogli a kpa malɛ ta a nyɛ fara tim ni a wa tiŋ min. I ya chen, i zi wa na kinau a li Koosa wati.”

²² Bunɔɔn ti funɛ ya kin tiinne. O funɛ nu Yesu sɛm ta chen, o tuha fun chɔk kinkan ka o kaali.

²³ Doone Yesu fun ŋɔ o gantɛl tiŋsi ta ni, “Ba naa ya kin tima, o zi bɔmu ba wati hali ba wa koti a zu Koosa koor ti.

²⁴ Ma nyɛ mu bukoo ŋɔ ma, bɔla koti a zu nɛɛsi bɔ, kin tiina gbanko zi koti a wa zu Koosa koor tiu.”

²⁵ O sɛm ta fun ya o gantɛl tiŋsi ta alaazibu kinkan a kaali a maga. Ba fun ŋɔ un, “O chi nan, anti la zi koti a zu Koosa koor ti?”

²⁶ Yesu fun a nyini ba a ŋɔ, “O li nibinsa wati, ba wa kikoti a wa zu dooni. Amaa o li Koosa wati, kundɔŋ wa to o zi ya a vɛ koti.”

²⁷ Doone Pita fun ŋɔ un, “Kina, ya gil ya kina magau aa tiŋ hin. Yɛrɛ o zi du ya ni?”

²⁸ Yesu fun ŋɔ un, “Wutirɛ n kaa ŋɔ ma nan. Mu waa nibine be wa bur wa di mu wa dɔ tɛɛnɛ nɔ maga nara a di ba sɛria, ma gantɛl tiŋsa nara fidalɛ na gbanko zi wa di Ju tim buri fidalɛ sɛriau.

²⁹ Nar gil o dama, o maanasa, o niinbisa, o nyana awa o niina, awa o bisa awa o ŋmaha mu daha, Koosa zi wa kpa a kina kɔkwau a gbaari un a kpa o mi fali naa vɛ kpak bɔ a nyɛ un.

³⁰ Nara kinkan ba naa te suwachak a ya nihɛɛta lalaknɔ, ba zi wa burgiu a tiŋ gantɛl. Ba naa tiŋ gantɛl zi wa burgi nihɛɛtau a te suwachak.”