Mat. 18 - Tampulma

Anti Ya Nihɛɛ A Li Ma Tuhu Ni?

¹ Chen saha ti Yesu gantɛl tiŋsi ta fun wa o wati a pɛɛsi un, “Ba naa maga Koosa dɔ, anti ya ba nihɛɛ?”

² Yesu fun zer be a nyɛ o chiŋi ba bambaan ni,

³ a ŋɔ ba, “Ma nyɛ mu ŋɔ ma, di Koosa wa kiwa dɔ ma, see ma kpa ma titi a burgi chi bichɛla.

⁴ Nar la nyini Koosa se ni a chi chenani o nyini o nyan se ni, waa ya ba naa maga Koosa dɔ nihɛɛ.

⁵ Nar la be nɔ a du di o tiŋ min daha, minnɛ o la du chen.”

Ma Ta Bur A Li Yesu Tiŋi Ni

⁶ “Nar wa na bichɛla naa si su min a la mur un di o tiŋ wu tagna nyinbaannɛ, ba kpa ŋmɛn a vɔu nam a zer laari o baŋna a kpa la yo du mɔɔga ni, chen fu zi bɔ o nyɛniu.

⁷ Nibin bɔnɛ yaa daŋniu di ba mur nara ba tiŋ wu tagna nyinbaan.

⁸ “Nibine kpa o nin koo o naŋgeri a tum tum tagna, o teŋ o nin ti koo o naŋgeri ti a yo ta. Nibine naa kpak nin bɛgim koo naŋgeri bɛgim a kpak Koosa miisa, waa bɔɛɛ wa o kpak nisa lɛ koo naŋgere lɛ a la zu din dam ti.

⁹ Nibine ka kpa o si a tum tum tagna, o yisi o si ti a yo ta. Nibine naa kpak si bɛgim a kpak Koosa miisa, waa bɔɛɛ wa o kpak se lɛ a la zu din dam ti.”

Yesu Fun Ŋɔ Ba Piisi Nyuksi Wɛ

¹⁰ “Ma doso ma ta wa ŋɔ di bisa nama ya yɔrirɛ. Ma nyɛ mu ŋɔ ma di ba malaikasa nyɛn mu kunyan Koosa naa nyɛn o tɔha ti ni suwachak ni. ((

¹¹ Mu waa nibine be funɛ wa dɛu a na ba naa nyuksɛɛ chen.))

¹² “Nar kpak o piisisi kɔkwa ka a kibɛgim nyuksi, yɛrɛ ma lisi di o zi yau? O zi gil o dɔŋtimau kuŋkule nyuuna ni a la dɛu un.

¹³ N ŋɔ mau, o la na un chen, o tuha sɔɔnɛ kinkan o daha a kaali piisisi naa vɛ nyuksi chen.

¹⁴ Chen vɛɛna, i nyan Koosa naa nyɛn o tɔha ni, o wara daŋni bichɛsi ta nidigi nyuksi.”

I Dɔŋtiina Tum Tum Tagin A Nyɛ Hin

¹⁵ “I dɔŋtiina tum tum tagin a nyɛ hin, kila o titi wati a la ŋɔ un di o tum galimsau. O la nɔɔni, o wa hin bu ya nɔ bɛgim.

¹⁶ O vɛ nu i nɔ, i kpa chɛn bɛgim koo nara balɛ, chen ni ba waa la zi ya i sɛhɛra tima a li chenani i wa i dɔŋtiina ŋɔ dɔŋ ni.

¹⁷ O gbanko vɛ nu ba nɔ, la ŋɔ ba naa ya Koosa nitiŋɛ ni o wɛ ta maga. O vɛ nu ba nɔ, ma ta kpak wu digi wa un ni a chi chenani ma vɛ kpak wu digi wa lampo nilalɛ awa hɔɔra ni chen.”

Chenani Ma Zi Lagmi Dɔŋ Ni A Sumi Koosa

¹⁸ “Wutirɛ mu ŋɔ ma, kin nawara ma kpa chiŋsi tɛɛnɛ nɔ maga ni di nara tiŋ, a zi chiŋi Koosa tɔha gbanko niu. Kin nawara ma vɛ kpa chiŋsi tɛɛnɛ nɔ maga ni, a wa zi chiŋi dooni.

¹⁹ “Ma nyɛ mu sɛm ma gbaari ma nara balɛ lagmi a sumi kundɔŋ Koosa wati ka ma la nɔɔni chenani ma sumi chen, ma kunyan Koosa naa nyɛn o tɔha ti ni, zi kpa nyɛ mau.

²⁰ Nara balɛ akoo nara batora wa lagmi dɔŋ ni mu sɔn daha, n wa ba zi lagmi nyɛnu.”

Yesu Fun Ŋɔ Ba Koor Digi Tumtumna Wɛ

²¹ Doone Pita fun wa Yesu wati a wa pɛɛsi un, “Mu kunyana, bu ŋmɛnwa mu dɔŋtiina zi koti tum tum tagna a du mu ni ka mu gil a nyɛ un? Gil a nyɛ un bu nɔpɛɛ?”

²² Yesu fun ŋɔ un, “Ta gil nyɛ un bu nɔpɛ duŋduŋ. Gil a nyɛ un aa la.

²³ Ma nyɛ mu ŋɔ ma chenani o du. Koosa koor ti chi koor digirɛ. Wuzu digirɛ o fun yir o tumtumsa di o pɛɛsi ba chenani ba tum.

²⁴ Ba wa koor ti funɛ lagmi, ba fun yisi o tumtumsi ta digi a chiŋsi o suwachak ni. O funɛ pɛŋ o malɛ kinkan. O chim wa fun kpak bɔ.

²⁵ O wa fun koti a bɔ o chim ti. Adaha o kunyan ti fun ŋɔ ba di ba kpa o kina maga a yogli a kpa o wa o haan awa o bisa maga a yogli ba burgi yosa, chen ni o zi na o malɛu.

²⁶ O tumtum ti funɛ nu koor ti sɛm ta chen, o fun la gbiri o suwachak ni a sumi un, ‘Mu kunyana, ya min kanyita. N zi bɔ hin i malɛ ta magau.’

²⁷ Koor ti fun kpak un siki kinkan a ŋɔ un, ‘Gil chim ti. Ta bu bɔ malɛ ta. Ma nyɛ o la.’

²⁸ “O tumtum ti fun li a la chem baal naa la tum koor ti wati. Baal ti funɛ pɛŋ tumtum ti malɛ tamnɛ. Tumtum ti fun la kpak baal ti baŋna a hɛmsi a ŋɔ un, ‘Bɔ min n malɛ naa i fun pɛŋ chen.’

²⁹ Baal ti fun gbiri o suwachak ni a sumi un, ‘Ya min kanyita. N zi bɔ un i malɛ ta magau,’

³⁰ amaa tumtum ti funɛ vɛu di o wa zi kpak un kanyita. O fun kpa un a la tɔ dɛ hali o fun wa koti a bɔ un o malɛ ta maga.

³¹ Koor ti tumtumsi ta bɔnɛ fun na chenani yɛɛ, o fun muksi ba kinkan. Ba fun kaali ba kunyan ti wati a fun la ŋɔ un chenani ba na.

³² Adaha koor ti fun yir o tumtum ti di o wa o wati. O fun wa, koor ti ŋɔ un, ‘I ya tumtum yɔrirɛ. I funɛ sumi min chene, n fun gil malɛ naa maga i fun pɛŋ n wati a nyɛ hin.

³³ Mu funɛ kpak hin sikiu. I gbanko fu zi kpak baal naa pɛŋ i malɛ chen wa sikiu.’

³⁴ Koor ti fun na paan kinkan ka o fun kpak un a la tɔ dɛ di ba lɛrgi o diŋna hali o wa bɔ o chim ti maga.”

³⁵ Yesu funɛ sɛm a la mak o bɔ, o fun ŋɔ ba naa la nu chen, “Chen vɛɛna, ma vɛ gil nyɛ ma dɔŋtim ni ma bambe ni, mu kunyan Koosa naa nyɛn o tɔha ni gbanko wa zi gil nyɛ ma.”