Mat. 16 - Tampulma

Ju Tima Funɛ Daŋni Ba Na Alaazibu Tum

¹ Farisi tim ta awa Sajusi tim ta bɔnɛ fun wa Yesu wati a daŋni o tum alaazibu tuma a biksi ba ba zim di o kpok sir li Koosa watɛɛ.

² O fun ŋɔ ba, “Nha wa chel ka buudaha sɛri, ma zim di doon wa zi mi.

³ Nha ka wa yɛli ka buudaha buri, ma zim di doon zi miu. Ma zim di doon zi miu koo o wa zi mi, amaa ma wa koti a zim kin nawara la ya zinan mun.”

⁴ Yesu fun bukoo ŋɔ ba, “Ma zinan nibinsa vɛ Koosirɛ kinkan a la tum tum tagna. Mu wa la nɔɔni di mu tum alaazibu tum a nyɛ ma lalaknɔ. Alaazibu tum naa ma zi wa na wuzu digi zi chi chenani Koosa fun tum nyɛ o witiina Joona ni saha digi chene.” Yesu fun gil ba a kaali.

Farisi Tima Awa Sajusi Tima Biksi

⁵ Ba funɛ la jibaŋ kinkin ti, Yesu gantɛl tiŋsi ta fun sugli ba diwe.

⁶ Yesu fun ŋɔ ba, “Ma kpak ma titi nɛnɛ aa kidoso Farisi tim ta awa Sajusi tim ta lure naa ba yaa kpa a du boroboro ni.”

⁷ O funɛ ŋɔ chene, ba fun a pɛɛsi dɔŋa, “Ya vɛ kpak boroboro daha o sɛm ya nann?”

⁸ Yesu funɛ zimu di ba wa zim di Farisi tim ta biksirɛ o biksi ba chen, o fun a pɛɛsi ba, “Ka yɛrɛ boroboro naa ma sugli chen wɛ muksi ma ka ma pɛɛsi dɔŋa nan? Ma se wa su min nɛnɛ.

⁹ Ma ha wa vɛɛn zimm? Ma wa bur a lisi chenani n fun zer boroborosa nyuun ta a chɔksi bɔni ma awa nara tusugsa nyuun ta chenn?”

¹⁰ O fun bu pɛɛsi ba, “N funɛ bukoo zer boroborosa nɔpɛ ta a chɔksi bɔni ma awa nara tusugsa naasi ta chen, chenchisa ŋmɛnwa kidikaalɛ ta fun su?

¹¹ N funɛ piin te ŋɔ mau di ma doso ma titi ni Farisi tim ta awa Sajusi tim ta lure naa ba kpa a du boroboro ni chen wɛ. N wa funɛ sɛm chenani ma sugli diwe ta a ta chen wɛwa.”

¹² Ba funɛ nu o sɛm ta, ba fun zim di o ŋɔ ba di ba doso Farisi tim ta awa Sajusi tim ta biksi ti ni. O wa funɛ ŋɔ ba di ba doso lure naa ba yaa kpa a du boroboro ni chen.

Chenani Pita Fun Sɛm Yesu Wɛ

¹³ Doone Yesu wa o gantɛl tiŋsi ta fun si a kaali tɔsi naa nyɛn Sɛsarɛa Filipai pulum ni. Ba funɛ la tel dooni, o fun pɛɛsi ba, “Yɛrɛ nibinsa yaa yir min?”

¹⁴ Ba fun ŋɔ, “Bɔnɛ yaa yir hin Jɔn naa la chaksi nara wa ni ni chen. Bɔnɛ ka yir hin Ɛlaija. Bɔnɛ ka ŋɔ di Jɛrɛmaya koo Koosa witinsi tima digi bur wa.”

¹⁵ O fun pɛɛsi ba, “Yɛrɛ ma ka yir min?”

¹⁶ Simɔn Pita fun ŋɔ un, “Hin ya Koosa naa nyɛn chen be. I gbanko ya Kristo naa Koosa fun ŋɔ di o zi wa tumu wuzu digi chene.”

¹⁷ Yesu fun ŋɔ un, “Simɔn, Jɔn be, Koosa zi nyɛ i tuha sɔɔniu kinkan. Nibine wa fun koti a biksi hin wuti sɛm naa i sɛm nan, amaa mu nyana naa nyɛn o tɔhɔn ti ni, waa ka funɛ biksi hin.

¹⁸ Adaha mu gbanko ŋɔ hinu, Pita, ba naa Koosa dɔ chi dam naa n sarɛ. I waa ya o sɛchik. Sintana awa o alizin tagna maga wa zi kut a chɔk un.

¹⁹ N zi kpa Koosa koor ti saafibisa a nyɛ mau. Kin nawara i kpa chiŋsi tɛɛnɛ nɔ maga ni di nara tiŋ, a zi chiŋi Koosa tɔhɔn ti gbanko niu. Kin nawara i vɛ kpa chiŋsi tɛɛnɛ nɔ maga ni, a wa zi chiŋi dooni.”

²⁰ Doone Yesu fun ŋɔ o gantɛl tiŋsi ta ni di ba fiɛŋ ba ŋɔ nandigi ni di waa ya Kristo naa Koosa fun ŋɔ di o zi wa tumu wuzu digi chen.

Yesu Fun Sɛm Di O Zi Namsiu A Sou

²¹ Chen saha ti kpa la, Yesu fun a biksi o gantɛl tiŋsi ta a ŋɔ ba, “O lawa mu la Jɛrusalɛmu. Doonee tɔhɔn nihɛɛta awa Koosa dam kɔkɔɔrsi ta awa Koosa chiksɛ nibiksɛ ta zi wa nyɛ mu namsiu kinkan ka ba kpu min. Amaa wuzu butora wuzu n zi si a li mu sou niu.”

²² Pita fun yir un a li cheŋcheŋa a galimi un a ŋɔ, “Koosa suŋi hin chen ta wa ya hin.”

²³ Yesu fun burgi a ŋɔ Pita ni, “Tur dooni, domi i lisi chi sintannɛ. I tɔ min nyinbaannɛ. Chenani i sɛm chen wa li Koosa wati. A li nibinsa watɛɛ.”

²⁴ Yesu fun ŋɔ o gantɛl tiŋsi ta ni, “Nar la daŋni o tiŋ min, o vɛ o tutɔ a zer o daakakli a baasi aa tiŋ min.

²⁵ Nar la daŋni o si sɛrɛ wa o titi nyɛni, o zi wa chelu. Nar ka kpa min awa Koosa laaboor weri ti a te o tutɔ nyɛni, o zi wa na Koosa mi fali tiu.

²⁶ Nar koti a na tɛɛnɛ nɔ maga lɛmlɛm, baŋ nyɔɔrrɛ o wa di? O wa zi wa na Koosa mi fali ti. Baŋnɛ nibine zi bukoo zer a kpiŋi a na lɛmlɛm titi?

²⁷ N waa nibine be zi wa bur wau awa Koosa kpok ni awa o malaikasa awa o jirima ni. N wa bur wa, n zi pa nara magau a li ba tum ni.

²⁸ Ma nyɛ mu ŋɔ ma nan. Nara nyɛn bar nɔ a la zi vɛ siti hali ba wa na mu waa nibine be ka mu wa a chi koora.”