Mat. 15 - Tampulma

Chenani Ju Tim Nawaalsa Fun Biksi Ya

¹ Farisi tim ta awa Koosa chiksɛ nibiksɛ ta bɔnɛ, ba naa funɛ li Jɛrusalɛm, ba fun wa lagmi Yesu wati a pɛɛsi un,

² “Yɛrɛ i gantɛl tiŋsi ta vɛ ya nawaalsa nyinbaan a kpa nin doŋa a di?”

³ Yesu fun ŋɔ ba, “Ma tiŋ ma titi chiiniwa aa vɛ tiŋ Koosa chiksɛ ta.

⁴ Ba funɛ sɔbiu a li Koosa sɛm tɔn ti ni saha digi di o ŋɔ, ‘Maa nyɛ ma nyama awa ma numa jirima. Nara maga pini o niina koo o nyana zoma, ba kpu un.’

⁵ Ma waa ka yaa biksi nara ma nawaalsa nyinbaan di nar ŋɔ o nyana awa o niin ni di kin naa o zi kpa a suŋi ba ya Koosa kinnɛ,

⁶ ma wa zi la nɔɔni di o suŋi ba. Ma wa chɔk Koosa chiksɛ a li ma nawaalsa nyinbaan dahaa?

⁷ Ma ya nusun timwa. O funɛ ya wutirɛ chenani Koosa witiina Azaaya fun sɔbi ma wɛ saha digi a du Koosa sɛm tɔn ti ni chen.

⁸ Doonee Koosa fun ŋɔ di, ‘Nara nama jɛɛmi min ba nyina nɛɛ, ka ba tusa wa to min ni.

⁹ Ba kpa nibinsi chiiniwa a biksi nara a ŋɔ di a ya Koosa chiiniwa. Chendaha ba jɛɛmi min yɔrirɛ.’ ”

Kin Naa Nyɛ Nibini Tuha Doŋ

¹⁰ Yesu fun bukoo yir nara tima ba wa o wati. O fun ŋɔ ba, “Ma cheŋi ma diŋsa a nyɛ mu sɛma zu ma bambe ni nɛnɛ.

¹¹ Kin naa la zu ma nɔɔna wara nyɛ ma doŋa, amaa kinkin naa la li ma nɔɔna ni, a warɛ nyɛ ma doŋa.”

¹² O gantɛl tiŋsi ta fun wa ŋɔ un, “Chenani i sɛm chen, i pini Farisi tim ta zomwa.”

¹³ Yesu fun ŋɔ o gantɛl tiŋsi ta ni, “Mu nyana naa nyɛn o tɔhɔn ti ni chi nipari yaa du o kina. Wuzu digi o zi wa ŋɔ o tumtumsi niu ba la kpirki kin naa maga o vɛ duuli a ta.

¹⁴ Ma ta nyɛ chenani Farisi tim ta sɛm muksi ma. Ba chi nyuluma la lɛrgi dɔŋa. Ba ya chen, ba maga zi chel bɔ niu.”

¹⁵ Pita fun ŋɔ un, “Ŋɔ ya jɛɛgi nɔ mun.”

¹⁶ Yesu fun pɛɛsi ba, “Ma gbanko wa kpak nɛhaa?

¹⁷ Ma wa zim di kin naa la zu ma tusa, ma loore o yaa zu ka ma la somi chenn?

¹⁸ Chenani ma nɔɔna sɛm li ma bambe nee. Kin nama nyɛ ma kpak doŋa.

¹⁹ Kinkin naa nyɛn ba tusa ni, nyɛ nibinsa lisi wu tagna a la tum chɔkumsi tuma awa sakaal tuma, a la kpu nara a la ŋmɛ a la suni wɛ a la chɔk nara sɔna.

²⁰ Nan tuma nyɛ nibinsa kpak doŋa, amaa nara vɛ sɛm ba nisa a di diwe, chen wara nyɛ nibinsa kpak doŋa.”

Nihaan Digi Si Funɛ Su Yesu

²¹ Yesu fun si dooni a kaali Taaya awa Saidɔn pulum.

²² Ba fun lul haan digi dooni. O fun wa sumi Yesu, “Mu kunyan koor Devid bi luli, kpak min siki. Alizin tagin kanɛ mu nihabichɛl nyuhu ni a vɛ weri.”

²³ Yesu wa fun sɛm un wu digi. O gantɛl tiŋsi ta fun wa sumi un, “Duŋni nihaan nɔ ta. O tiŋ yau a chɛɛmi.”

²⁴ Yesu fun ŋɔ ba, “Koosa funɛ tum min di mu wa la Ju tim duŋduŋ. Ba waa chi piisi nyuksɛ.”

²⁵ Nihaan ti funɛ nu o sɛma, o fun wa gbiri o suwachak ni a ŋɔ, “Mu kunyana, mu sumi hinu di i suŋi min.”

²⁶ Yesu fun ŋɔ un, “O wa deŋli wa ba kpa bichɛsi diwe a nyɛ vasi ni a di.”

²⁷ Nihaan ti fun ŋɔ, “Mu kunyana, o ya wutirɛ, amaa vasi ta ka yaa di diwe naa bichɛsi ta yaa di ka a chesi chene.”

²⁸ Yesu fun ŋɔ un, “I si su min kinkanu. Mu zi tum chenani i daŋniu a nyɛ hin.” O funɛ sɛm chene, o be ti vaan na alaafɛ.

Yesu Fun Tiibi Nidamata

²⁹ Yesu fun li dooni a fun la gba Galili bɛɛŋ nɔ. O funɛ la li bar digi, o fun la zini kuŋkule nyuha a kani.

³⁰ O funɛ kani dooni chen, zɛmɛ kinkan ba naa funɛ tiŋ un, wa o wati. Ba fun kpa ba wichɔɔrsa ba naa la chel chɛrsa awa nyuluma awa gbarɛgɛ awa womna a kansi o suwachak ni. O fun a tiibi ba maga.

³¹ Zɛmɛ ta maga funɛ nu womni ta sɛm sɛma a na gbarɛgsi ta val awa chɛrchelsi ta ka ba deŋli a val awa nyuluma ka ba na, alaazibu kinkan fun kpak ba. Ba funɛ pɛgi Ju tima Koosa a la nyɛ un jirima kin nama daha.

Yesu Fun Kpa Diwe A Dɛɛsi Nara Tusugsa Naasi

³² Yesu fun yir o gantɛl tiŋsi ta a ŋɔ ba, “Nara nama wɛ kpak min sikirɛ, domi wuzu butoranɛ ba nyɛn mu wati a vɛ kpak diwe a diili. N ta ba nyinbaan di ba la ba damsa awa lɔsa ni, ba zi la gbarigi nyinbaan niu.”

³³ O gantɛl tiŋsi ta fun ŋɔ, “Ei, bar nɔ ya nyabaannɛ. Yɛrɛ ya kaa ya na boroboro a nyɛ nara nama ni ba se?”

³⁴ O fun burgi a pɛɛsi ba, “Boroborosa ŋmɛnwa ma kpak ma wati?” Ba fun ŋɔ, “Boroborosa nɔpɛ awa nyinsi tamnɛ ya kpak ya wati.”

³⁵ O fun a nyɛ zɛmɛ ta maga kani tɛɛnɛ ni.

³⁶ O fun kpa boroborosa nɔpɛ awa nyinsi ta a sumi Koosa a du a ni, a chɔksi a a nyɛ o gantɛl tiŋsi ta ni di ba kpa a bɔni zɛmɛ ta. Ba fun kpa a bɔni ba.

³⁷ Ba fun se puŋ a ka. Ba funɛ se peti chen, Yesu gantɛl tiŋsi ta fun pa ba kidikaalɛ a su chenchisa nɔpɛ.

³⁸ Ba naa funɛ se boroborosi ta awa nyinsi ta chen, ba nibaala duŋduŋ funɛ ya tusugsa naasiwa.

³⁹ Yesu fun ta nara tima nyinbaan ni, ka o wa o gantɛl tiŋsi ta fun la zu arŋa a la tel pulum naa ba yir Magdala.