Mat. 14 - Tampulma

Chenani Koor Hɛrɔd Fun Kpu Jɔn

¹ Chen saha ti Galili tim koora naa ba funɛ yir Hɛrɔd chen, fun nu Yesu wɛ.

² O fun ŋɔ o nihɛɛta ni, “Jɔn naa funɛ chaksi nara wa ni ni chen, si o sou ni a bu kpak miisa. Chendaha o koti a tum tum zene.”

³ Hɛrɔd fun a kpa o titi niinbe Filip haan. O haan ti sɔn funɛ ya Hɛrɔdias.

⁴ Jɔn fun ŋɔ un, “Chenani i ya chen, o wa wer.” O funɛ ŋɔ chene, Hɛrɔdias fun nyɛ Hɛrɔd tum nara ba la kpak Jɔn a tɔ un dɛ.

⁵ Hɛrɔd funɛ daŋni o kpu un, amaa Ju tim tawa o funɛ ɔm. Ba funɛ lisi di o ya Koosa witinsi ta digirɛ.

⁶ Hɛrɔd bun luli wuzu funɛ wa tel, o fun a yir nidamata di ba wa di o luli wuzu diwe. Ba funɛ wa di chene. Hɛrɔdias nihabichɛla fun wa zu dɛ naa ba di diwe ta chen a gɔ a du ba. O gɔɔli ti fun ya Hɛrɔd lɛmlɛm.

⁷ O fun hɛɛsi a ŋɔ un, “Kin naa maga ii daŋni, ŋɔ min, n zi nyɛ hinu.”

⁸ Nihabichɛl ti fun kaali o niin wati a la pɛɛsi un kin naa o zi sumi. O funɛ pɛɛsi chen, o fun bur kaali koor ti wati a la ŋɔ un, “Mu sumi Jɔn nyuhurɛ di ba kpa du pɛŋ ni a wa nyɛ min.”

⁹ O sɛm ta fun chɔk Hɛrɔd tuha kinkan. O funɛ hɛɛsi o walɛ ta suwachak ni di o zi nyɛ un kundɔŋu, chen fun ya un hiisa. O wa fun bu koti a vɛ, a tum lanjimasa di ba tum chenani o fun ŋɔ.

¹⁰ Ba fun kaali doonani ba fun tɔ Jɔn dɛ chen a la tɛŋ o nyuha,

¹¹ a kpa sak pɛŋ ni a wa nyɛ nihabichɛl ti ni. O fun kpa la nyɛ o niin ti ni.

¹² Jɔn gantɛl tiŋsi ta funɛ nu chen wɛ, ba fun la zer un a sogli a la ŋɔ Yesu ni.

Yesu Fun Kpa Diwe A Dɛɛsi Nara Tusugsa Nyuu

¹³ Yesu funɛ nu laaboor ti, o fun zu arŋa a la ji a kaali nyabaan o duŋduŋ. O funɛ la chene, nidamata fun a na un a li ba tɔsi ni a kpa ba naŋgere a chɔ a te o suwachak a la tel doon ka o zi wa.

¹⁴ Yesu funɛ wa li arŋ ti ni, o fun na zɛmɛ kinkan ka ba chiŋi dooni. Ba wɛ fun ya un siki ka o tiibi ba wichɔɔrsa.

¹⁵ O wa o gantɛl tiŋsi ta funɛ nyɛn dooni a vusi, ba fun wa ŋɔ un, “Nha daŋni o chelu. Bar nɔ ya nyabaannɛ. Nyɛ zɛmɛ ta kila tɔ wisa a naa go bar nɔ a la yau diwe a di.”

¹⁶ Yesu fun ŋɔ ba, “N wa zi tum ba. Ma titi nyɛ ba diwe ba di.”

¹⁷ Ba fun ŋɔ un, “Ya kpak boroborosa nyuu awa nyinsa lɛwa bar nɔ. A wa zi kut tel ba.”

¹⁸ O fun ŋɔ ba, “Ma kpa a a wa nyɛ min.”

¹⁹ O fun a nyɛ nara tima maga kani kɔ tota daha ni, ka o zer boroborosa nyuun ta awa nyinsa lɛ ta a nyini buudaha ni a sumi Koosa a du a ni. O fun zer diwe ta a chɔksi a nyɛ o gantɛl tiŋsi ta ni di ba kpa bɔni nara tima.

²⁰ Ba maga fun se puŋ. Ba funɛ se peti chen, Yesu gantɛl tiŋsi ta fun pa ba kidikaalɛ tima a su chenchisa fidalɛ.

²¹ Ba naa funɛ se boroborosa awa nyinsi ta chen, ba nibaala duŋduŋ funɛ ya tusugsa nyuunwa.

Yesu Fun Val Ni Daha

²² A saha ti Yesu fun ŋɔ o gantɛl tiŋsi ta ni di ba la a la zu arŋa a la ji bɛɛŋ ti jibaŋ kinkin ti ka o ta nara tima nyinbaan ni aa wa.

²³ O fun ta nara tima nyinbaan ti ni a kaali kuŋkule nyuuna bar nyini di o la sumi Koosa. Dusum funɛ wa biri, Yesu duŋduŋ funɛ nyɛn jibaŋ ti ni.

²⁴ O gantɛl tiŋsi ta ka fun a nyɛn arŋ ti ni a li bɛɛŋ ti bambaan ni. O fun na ba ka peha mo ba a li ni ti ni arŋ ti yeegi.

²⁵ O funɛ wa ya zimal hɛɛta yeligi saha, Yesu fun si a val ni daha ni a la ba wati.

²⁶ Ba maga funɛ na unu ka o val ni daha ni, hansura fun kpak ba kinkan. Ba fun kpa un a yir lɛlɛ. Chendaha ba funɛ huusi kinkannɛ.

²⁷ Yesu fun vaan ŋɔ ba, “Ma kpak ma bambe. Minnɛ. Ma ta ɔmi.”

²⁸ Pita fun ŋɔ un, “Mu kunyana, o ya hin nan, ŋɔ min mu li arŋ nɔ ni a wa gbaari hin ni ni ti ni.”

²⁹ Yesu fun ŋɔ un, “Li wa.” Pita fun li arŋ ti ni a la Yesu wati.

³⁰ O funɛ la chene, o fun na ka pehe ti kpok kinkan. Hansura fun kpak un o daŋni o lim ni ti ni. O fun tɛsi a ŋɔ, “Mu kunyana, yisi min.”

³¹ Yesu fun vaan tuuni o nin a kpak un a ŋɔ, “I si wa su minn? Yɛrɛ i beeli?”

³² Yesu wa Pita fun la zu arŋ ti. Pehe ti fun gil.

³³ O gantɛl tiŋsa ba naa funɛ kpalimi arŋ ti tuhu ni, funɛ jɛɛmi Yesu a ŋɔ, “Wutirɛ i ya Koosa bere.”

Yesu Fun Tiibi Wichɔɔrsa

³⁴ Ba fun la ji jibaŋ kinkin ti a fun la tel tɔhɔn naa ba yir Gɛnɛsarɛt a kpa arŋ ti a vɔu dooni.

³⁵ Ba naa funɛ nyɛn dooni chen fun na Yesu a zim un. Ba fun la zu tɔsi naa go dooni a kpa ba wichɔɔrsa a wa o wati.

³⁶ Ba fun sumi un di o nyɛ wichɔɔrsi ta gbaŋsi o takta nɔ, chen ni ba zi na alaafɛu. Ba naa maga funɛ gbaŋsi o takta ti nɔ, ba fun a na alaafɛ.