Mat. 12 - Tampulma

Chenani Yesu Fun Tum Ju Tim Hiisi Wuzu

¹ Hiisi wuzu digi Yesu awa a gantɛl tiŋsi ta fun la zu kiparɛ tuha aa la. Ba funɛ la chene, lɔsa fun kpak o gantɛl tiŋsi ta ba pini kiparɛ ta a se.

² Farisi tim ta bɔnɛ funɛ na chenani ba tum, ba fun ŋɔ Yesu ni, “Yɛrɛ i gantɛl tiŋsi ta chɔk ya chiili wuzu hiisi ti?”

³ Yesu fun burgi a pɛɛsi ba, “Ma yaa karimi koor Devid wɛ a li Koosa sɛm tɔn ti ni chen, ma wa zim o munn?

⁴ Wuzu digi lɔsa funɛ kpak Devid awa o dɔŋtima, o fun kaali a la zu Koosa bar jɛɛmi dam ti a la zer boroboro, a chɔk a se a kpa nyɛ o dɔŋtim ni ba gbanko fun se. Nan boroboro nɔ funɛ chi wa sɛɛliu, see Koosa dam kɔkɔɔrsi ta duŋduŋ funɛ se.

⁵ Ma ha wa karimi chenani Mosis fun sɔbi a li Koosa sɛm tɔn ti ni di Koosa dam kɔkɔɔrsi ta tum o bar jɛɛmi dam ti ni hiisi wuzuu? Ba waa yaa chɔk ya chiili wuzu hiise ta, amaa nandigi wa na ba galimsa.

⁶ Ma nyɛ mu ŋɔ ma di n waa nibine be awa n biksi kaali Koosa bar jɛɛmi dam ti.

⁷ Ba funɛ sɔbi a li Koosa sɛm tɔn ti ni di o ŋɔ, ‘Chenani ma kpak dɔŋa wa siki ya min lɛmlɛmu a kaali chenani ma kɔɔrigi kina a nyɛ min papaha nan.’ Ma zim sɛm na mun, ma wa zi di ba naa vɛ tum galimsa sɛria a ŋɔ di ba chelu.

⁸ Mu waa nibine be dɔ hiisi wuzu ti gbanko.”

Yesu Fun Tiibi Baal Naa Nin Siwɛɛ

⁹ Yesu funɛ li dooni a la zu ba bar lagmi dɛ digi.

¹⁰ Baal digi funɛ nyɛn doon. O nin fun sou. Ba naa funɛ nyɛn dooni nyini di ba na Yesu galimsa a koti a fiksi un. Ba fun wa pɛɛsi un, “I tiibi nar ya hiisi wuzu, i chɔk ya chi tiuu?”

¹¹ Yesu fun ŋɔ ba, “Ma nidigi kpak piisi ka o chel bugil ni hiisi wuzu, ma wa zi la lisi unuu?

¹² Nibine kaali piisi kinkan. Chendaha nar suŋɛ o dɔŋtiina hiisi wuzu, o wa chɔk ma chi ti.”

¹³ O fun ŋɔ baal naa nin sou chen di o tuuni o nin ti. O fun tuuni un. O nin ti fun vaan peti.

¹⁴ Farisi tim ta fun li kaali aa daŋni nyinbaan chenani ba zi ya a kpu Yesu.

Yesu Funɛ Ya Koosa Tumtumna

¹⁵ Yesu funɛ nu nan wɛ, o funɛ li dooni a kaali. Nidamata fun tiŋ un. O fun tiibi ba wichɔɔrsa maga,

¹⁶ a fun ŋɔ ba di ba fiɛŋ ba ŋɔ o wɛ nandigi ni.

¹⁷ O fun sɛm nan, chen ni sɛm naa Koosa witiina Azaaya fun sɔbi saha digi chen zi ya wutiu.

¹⁸ O funɛ sɔbiu di Koosa ŋɔ, “Mu tumtumna nɛɛnɛ, naa mu fun lisi a nyɛ mu titi ni. Mu daŋni unu. Waa la ya min lɛmlɛm kinkan. N zi kpa mu siim weri tiu a du un ni, chen ni o zi biksi ba naa vɛ ya Ju tima chenani Koosa daŋni o nyɛ ba nyinbaan deŋli o suwachak ni.

¹⁹ O biksi ba nan, o wa ba wa zi di amɔrɛ akoo tɛsi ba yau ni.

²⁰ O zi wa suŋi fara tima ba naa chi kɔ borke chenu. O zi wa kpa o kpok a nyɛ jɛɛgɛ tima ba naa chi fitin nyiksi ni. O wa zi wa gil nan yaali hali o biksi ti wa di.

²¹ Nara maga zi kpa ba bambi bɛgimu a du un ni.”

Chenani Yesu Fun Duŋni Alizin Tagna A Li Nara Ni

²² Doone nara bɔnɛ fun kpa baal digi a wa Yesu wati. O funɛ ya nyulumnɛ awa wom, domi alizin tagin funɛ nyɛn un ni. Yesu fun tiibi un, chen ni o fun bur a na a la sɛm.

²³ Alaazibu fun kpak zɛmɛ ta. Ba funɛ pɛɛsi dɔŋa, “Baal nɔ, waa ya Devid bi luli naa Koosa ŋɔ di o zi tumu chenn?”

²⁴ Farisi tim ta funɛ nu chenani ba sɛm dɔŋ ni, ba fun ŋɔ ba, “Biɛlzɛbub, naa ya alizin tagna maga koora, nyɛn un ni a la nyɛ un kpok saha maga, chen ni o zi koti a duŋni alizin tagnau a li nara ni.”

²⁵ Yesu funɛ zim chenani ba lisiu a ŋɔ Farisi tim ta ni, “Tɔhɔn tima vɛ kpak nɔ bɛgim, ba dɔma wa zi wa a chɔk ba tɔhɔn tii? Dam bɛgim nara burgi a yo dɔŋa, chen dam ti zi pisiu a chel.

²⁶ Sintana wa o nitumɛ yo dɔŋa, o wa zi chɔk o koor tii? O gbanko wa zi chiŋ vusi.

²⁷ Ma wa ŋɔ zɛmɛ ta ni di Biɛlzɛbub yaa kpa o kpok a nyɛ min, chen ni mu zi kotiu aa duŋni alizin tagna a li nara ni. Ma gantɛl tiŋsa gbanko koti a duŋni a a li nara ni. Anti nyɛ ba chen kpok ti? Ba waa biksi di chenani ma sɛm mu wɛ wa ya wuti.

²⁸ Koosa siim weri ti ka nyɛ min kpok mu yaa duŋni alizin tagna a li nara ni. Nan biksi ma di saha ti telu di Koosa wa dɔ ma.

²⁹ “Nara vɛ te kpak nikpok a vɔwi, yɛrɛ ba kaa ya a zu o dama a fuksi o kina?

³⁰ “Nar kaa vɛ di o wa chiŋi mu gantɛl ni, waa la chɔk chenani mu tum. Nar kaa vɛ gbaari min ni a gbaŋ mu piisisa, o pisi au.

³¹ Wutirɛ mu ŋɔ ma, Koosa koti a gil nara tum tagna maga awa chenani ba pini un. Nara pini Koosa siim weri ti, Koosa ka wa zi gil chen a nyɛ ba.

³² Nara pini n waa nibine be, Koosa zi koti a gil chen a nyɛ bau. Nara ka pini Koosa siim weri ti, Koosa wa zi gil chen a nyɛ ba, hali saha naa vɛ kpak bɔ.”

Bugil Weri La Nɔn Nɔn Weri

³³ Yesu fun bu ŋɔ Farisi tim ta ni, “Bugil weri la nɔn nɔn were, amaa bugil tagin ka la nɔn nɔn tagna. Nara zi zim bugil weri awa bugil tagin a li a nɔn nɛɛ.

³⁴ Ma chi dumwa. Maa tum tum tagniwa, yɛrɛ ma kaa ya a sɛm sɛm were? Ma sɛm chenani nyɛn ma bambe nee.

³⁵ Nibine bambi chi o kina bar chiŋsirɛ. Kiwere nyɛn doon, o zi kpa a a li sɛmu. Kitagna ka nyɛn doon, o zi kpa a a li sɛmu.

³⁶ “Wutirɛ n ŋɔ ma nan, a wuzu naa Koosa zi wa di tɛɛnɛ nɔ tim maga sɛria, o zi wa pɛɛsi nara magau ba sɛm yɔrisa naa ba fun sɛm wɛ.

³⁷ Koosa zi di ma sɛriau a li ma sɛm ni. Chenani o nu ma sɛma, o zi ŋɔ mau di ma tum galimsau akoo ma nisa wa to.”

Ju Tima Funɛ Daŋni Ba Na Alaazibu Tum

³⁸ A saha ti Koosa chiksɛ nibiksɛ ta awa Farisi tim ta bɔnɛ fun wa ŋɔ un, “Ya kunyana, tum alaazibu tum a nyɛ ya.”

³⁹ Yesu fun ŋɔ ba, “Ma zinan nibinsa vɛ Koosirɛ kinkan a la tum tum tagna. Mu wa la nɔɔni di mu tum alaazibu tum a nyɛ ma lalaknɔ. Alaazibu tum naa ma zi wa na wuzu digi kaa wa chi chenani Koosa fun tum nyɛ o witiina Joona ni saha digi chene.

⁴⁰ Koosa fun tum nyin zen di o lil Joona. O nyɛn o tuha ni wuzu butora a li. Chen vɛɛna ba wa kpu n waa nibine be, ba zi wa te sogli minu wuzu butora wuzu ka mu wa si mu sou ni.

⁴¹ Koosa wa wa di o wa di tɛɛnɛ nɔ tim maga sɛria, ba naa nyɛn doonani ba yir Ninivi chen, zi wa siu a fiksi ma. Joona funɛ biksi ba Koosa wɛ saha digi, ba fun gil ba tum tagna a tiŋ un. Mu waa naa nyɛn ma wati bar nɔ nan, min kaali Joona kinkan.

⁴² Koosa wa wa di o wa di tɛɛnɛ nɔ tim maga sɛria, koor nihaan naa nyɛn doonani ba yir Siba chen, zi wa siu a fiksi ma. O funɛ li bar bolire a wa koor Solomon wati di o wa nu o zima sɛma. Mu waa naa nyɛn ma wati bar nɔ nan, min kaali Solomon kinkan.”

Alizin Tagin Awa O Chɛnsa Nɔpɛ

⁴³ O fun bu ŋɔ ba, “Alizin tagin li nar nyuhu ni, o ya gbau a kaali nyabaan a la nyini doonani o zi nyɛn. O vɛ koti a na bar digi doonani o zi nyɛn,

⁴⁴ o zi ŋɔ o titi niu, ‘N zi bur la zu baal naa nyuha mu fun li chenu.’ Adaha o bur kaali a la zu dooni a na un ka o chiŋi a wer.

⁴⁵ O bukoo li a gba a dɛu o dɔŋtima alizin tagna kina nɔpɛ a kpa a a bur wa zu dooni. Alizin tagna nɔpɛ ta tum tagna kaali o tuma. Saha naa alizin tagin ti fun tum o tuma peti, chenani baal ti du fun bukoo tagini a kaali o piili ti ni. Nannɛ o zi wa du zinan nara ba naa la tum tum tagna ni.”

Yesu Nitiŋɛ Ya O Wuti Walɛ

⁴⁶ Yesu funɛ sɛm chene, o niina awa o niinbisa fun wa tel a wa chiŋi dam ti dentil ni a tum nara di ba zu a yir un.

⁴⁷ Ba fun wa zu o wati a ŋɔ un di o niina awa o niinbisa nyɛn dentil ni a pɛɛsi o wɛ.

⁴⁸ Zɛmɛ ba naa funɛ kani a go un, o fun pɛɛsi ba, “Anti ya mu niin wuti awa mu niinbisa?”

⁴⁹ O fun a nyini nibinsa ba naa kanɛ a go un chen, a ŋɔ, “Ma na mu numa awa mu niinbisa nɛɛnɛ.

⁵⁰ Ba naa maga la tum chenani mu kunyana Koosa naa nyɛn o tɔhɔn ti ni daŋni ba tum, ba waa ya mu numa awa mu niinbisa.”