Maak 7 - Tampulma

Chenani Ju Tim Nawaalsa Fun Biksi Ya

¹ Farisi tim ta awa Koosa chiksɛ nibiksɛ ta bɔnɛ ba naa funɛ li Jɛrusalɛm a wa lagmi Yesu wati.

² Ba funɛ nyɛn o wati, ba fun wa na di o gantɛl tiŋsi ta funɛ chɔk ba chi ti kibɛgimnɛ, domi ba wa fun a sɛm ba nisa a kpa nin doŋa a di diwe.

³ Farisi tim ta awa Ju tim maga ba wa kaa di diwe, see ba te sɛm ba nisawa. Ba funɛ ya chen a tiŋ ba nawaalsa nyinbaannɛ.

⁴ Ba wara yau diwe a li yau ni, see ba te chaksi a a zi di. Ba gbanko funɛ tiŋ ba nawaalsa nyinbaan naa la biksi ba kisisi ba gbaŋsa, tempilsa awa lugɛ tempilsa a zi di.

⁵ Farisi tim ta awa Koosa chiksɛ nibiksɛ ta fun a pɛɛsi un, “Yɛrɛ i gantɛl tiŋsi ta waa vɛ ya nawaalsi ta nyinbaan ti a kpa nin doŋa a di?”

⁶ Yesu fun ŋɔ ba, “Ma ya nusun timwa. O funɛ ya wutirɛ chenani Koosa witiina Azaaya fun sɔbi ma wɛ saha digi a du Koosa sɛm tɔn ti ni. O funɛ ŋɔ, ‘Nara nama jɛɛmi min ba nyina nɛɛ, amaa ba tusa wa to min ni.

⁷ Ba kpa nibinsa chire a biksi nara a ŋɔ di a ya Koosa chire. Chendaha ba jɛɛmi min yɔrirɛ.’

⁸ “Maa tiŋ chenani Azaaya fun sɔbi saha digi chen. Ma wa gil Koosa chiksi ti a ta a la tiŋ ma nawaalsa nyinbaan.

⁹ “Ma kpa ma titi zima a tiŋ ma titi chiksi aa vɛ tiŋ Koosa chiksɛ ta.

¹⁰ Mosis funɛ sɔbiu a li Koosa sɛm tɔn ti ni saha digi, ‘Ma nyɛ ma nyama awa ma numa jirima. Nara maga pini o nyana koo o niina zoma, ba kpu un.’

¹¹ Ma waa ka yaa biksi nara bun kam yaali di nar ŋɔ o nyana awa o niin ni di kina o zi kpa a suŋi ba ya ‘kɔban’ kinnɛ, chen mun ya, ‘Koosa kinnɛ’,

¹² ma wa zi la nɔɔni di o suŋi ba.

¹³ Ma wa chɔk Koosa chiksɛ ta a li ma bun kam yaali dahaa? Ma funɛ kpa bun ka yaali damatau a dau a la biksi ma bisa di ba tiŋ a.”

Kin Naa Nyɛ Nibine Tuha Doŋ

¹⁴ Yesu fun bukoo yir nara tima ba wa o wati. O fun ŋɔ ba, “Ma cheŋi ma diŋsa a nyɛ mu sɛm zu ma bambe ni nɛnɛ.

¹⁵ Kin naa la zu ma tuha, o wara nyɛ ma doŋa, amaa kinkin naa la li ma nɔ ni, warɛ nyɛ ma doŋa. ((

¹⁶ Ma naa kpak diŋsa aa nu, ma nyɛ a nu nɛnɛ.”))

¹⁷ O funɛ gil zɛmɛ ta a kaali dama, o gantɛl tiŋsi ta fun wa pɛɛsi un o jɛɛgi ti mun.

¹⁸ Yesu fun a pɛɛsi ba, “Ma gbanko wa kpak nɛhaa? Ma wa zim di kin naa la zu ma tuha, a waa kikoti nyɛ ma doŋaa?

¹⁹ Ma loore o yaa zu ka ma la somi. O wara zu ma bambe ni.” Yesu fun ŋɔ ba a nama maga, chen ni ba wa zi bu chi diwe maga.

²⁰ O fun ŋɔ, “Kinkin naa la li ma bambe, waa nyɛ ma tum ma titi doŋa.

²¹ Kinkin naa nyɛn ba tuhu ni, nibinsa lisi wu tagna a la tum sakaal tuma a la ŋmɛ a la kpu doŋa,

²² a la tum chɔkumsa a la daŋni ba dɔŋtim kina a la tum dɔŋa wa tum tagna a la mur dɔŋa a la ya dɔŋa wa handɔta a la pin dɔŋ zoma a la daŋni sɔn, aa la tum womsi tima.

²³ Wu tagin naa maga yaa li ba bambe nɛɛ. A waa yaa nyɛ nibinsa kpak doŋa.”

Nihaan Digi Si Funɛ Su Yesu

²⁴ Yesu fun si dooni a kaali Taaya awa Saidɔn pulum. O funɛ la zu o dam chɔɔli dooni, o wa fun a daŋni nandigi zim di o nyɛn dam ti nɛɛ, amaa o sogli ti funɛ a li gbampulimu.

^25-26 Haan digi fun piin nu Yesu wɛ. Haan ti niina awa o nyana funɛ ya Girik timwa. Ba fun a lul un dooni. Alizin tagin fun a nyɛn o nihabichɛla nyuhu ni. O fun wa Yesu wati a wa gbiri o suwachak ni a sumi un di o duŋni alizin tagin ti a ta o be ti ni.

²⁷ Yesu fun ŋɔ haan ti ni, “Nyɛ ba te kpa diwe tima a nyɛ bichɛsi ni ba di puŋ. O wa deŋli wa ba kpa bichɛsi ta diwe a nyɛ vasi ni a di.”

²⁸ Nihaan ti fun ŋɔ, “Mu kunyana, o ya wutirɛ, amaa vasi ta ka yaa di diwe naa bichɛsi ta yaa di ka a chesi chen.”

²⁹ Yesu fun ŋɔ un, “Chenani i sɛm nan, mu nuu. Kila dama. Alizin tagin ti piin gil i be tiu.”

³⁰ O fun kaali dama ka o be chɔ kichɔɔli ni. Alizin tagin ti fun sir gil un.

Yesu Fun Tiibi Baal Naa Ya Diŋgbiti Tiina A Ya Wom

³¹ Yesu fun a li Taaya pulum ni a bur kaali tɔhɔn naa ba yir Saidɔn a la gali un ni, a fun la gali Dɛkapɔlis pulum ni a la li Galili bɛɛŋ ti.

³² O funɛ la tel dooni chen, ba fun kpa baal naa funɛ ya diŋgbiti tiina. O wa fun koti aa sɛm sɛma nɛnɛ. Ba fun a sumi Yesu di o kpa o nisa a gbaŋsi un, chen ni o zi na alaafɛu.

³³ Yesu fun a yir un a li zɛmɛ ta ni a kaali ba duŋduŋ a la kpa o naninsa lɛ a kpa tasi o diŋsi ni a tɔɔsi nantɔ a du o zulum ni.

³⁴ O funɛ ya chene ka o fun a nyini buudaha ni a heeli a ŋɔ baal ti ni a li o titi sɛm ni, “Ɛfata.” Chen mun ya, “nyɛ i diŋsi puk.”

³⁵ O diŋsi ta fun vaan puk. O zulum ti burgi. O fun a koti a sɛm sɛma nɛnɛ.

³⁶ Yesu fun ŋɔ ba kpok ni di ba fiɛŋ ba ŋɔ nandigi ni chenani yɛɛ, amaa ba funɛ vɛu a mɔɔli nidamata ni.

³⁷ Nara tima fun ŋɔ dɔŋ ni, “Kundɔŋ wa to baal nɔ zi vɛ koti a yaali. Hali o koti a tiibi diŋgbiti tima awa womna.” O fun ya ba alaazibu kinkan a vɛ weri.