Maak 5 - Tampulma

Yesu Fun Tiibi Alizin Tagna A Li Nar Ni

¹ Ba funɛ la ji bɛɛŋ jibaŋ kinkin ti, ba fun wa tel Gadaria tima pulum.

² Baal digi funɛ nyɛn dooni a kpak alizin tagna o nyuhu ni.

³ Nandigi wa fun koti a vɔu un. Ba yaa fun kpa zɔglɛ zenewa a vɔu un. O yaa fun a kasi a.

⁴ Ba yaa fun kpa zɔglɛ a vɔti o naŋgere awa o nisa hali ba wa ku, amaa o yaa fun kasi a magau. Nandigi wa fun kpak kpok a kaali un.

⁵ O fun chɔ kaali di o la nyɛn doonani ba yaa sogli ba nawaalsa chen awa kuŋkule nyuuna bar nyɛni ni saha maga, a la huusi a zer buŋkula aa teŋsi o titi.

⁶ Yesu funɛ wa li arŋ ti ni, baal ti fun la chiŋi doonani ba sogli ba nawaalsa chen a li bar boli ni. O funɛ na un, o fun chɔ a wa gbiri o suwachak ni a zaami un.

^7-8 Yesu fun ŋɔ alizin tagin ti ni di o li baal ti ni. O fun tɛsi kinkan a pɛɛsi un, “I waa Yesu, Koosa zen be, baŋnɛ i daŋni n wati? Kinyini Koosa a gil mu muksi.”

⁹ Yesu fun burgi a pɛɛsi un, “I sɔn ya baŋa?” O fun ŋɔ, “Mu sɔn ya ‘zɛmɛ’, domi ya iiu.”

¹⁰ O funɛ sumi Yesu kinkan di o ta duŋni a a li ba pulum ni.

¹¹ Kurchusa funɛ nyɛn kuŋkule nyuhu ni a di diwe. A funɛ tel tusugsa lɛu.

¹² Alizin tagni ta fun a sumi Yesu di o nyɛ a la zu kurchusi ta ni.

¹³ Yesu fun nyɛ a nyinbaan. A fun li a la zu kurchusi ta ni. Kurchusi ta fun si a chɔ a la wilsi a chesi bɛɛŋ ni ti ni. Ni ti fun di a maga.

¹⁴ Ba naa funɛ nyini kurchusi ta chen, ba fun chɔ kaali dama a la ŋɔ ba naa nyɛn dooni awa ba naa ba pu kɔha ti ni. Tɔhɔn ti tima fun li a wa Yesu wati di ba la na kin naa yɛɛ.

¹⁵ Ba fun wa na baal naa alizin tagna kinkan fun kani un ni chen laari gar a kani Yesu wati. O wa fun bu a zu galɛŋa. Hansura fun kpak ba.

¹⁶ Ba naa funɛ nyɛn dooni a na chenani funɛ ya alizin tagni ta awa kurchusi ta, ba fun ŋɔ ba naa wa chen.

¹⁷ Ba funɛ nu ba sɛm chen, ba wa Yesu wati a wa sumi un di o li ba pulum ni.

¹⁸ Saha naa o fun si a la zu arŋ ti chen, baal naa funɛ kpak alizin tagna chen, fun wa sumi Yesu di o nyɛ o tiŋ un ba la.

¹⁹ Yesu fun ŋɔ un, “Aai. Kila i dam walɛ wati a la ŋɔ ba chenani i kunyana suŋi hin a ɔm hin siki.”

²⁰ O fun kaali a la ŋɔ ba naa nyɛn Dɛkapɔlis pulum wati chenani Yesu fun ya nyɛ un. O ya ba maga alaazibu.

Yesu Fun Tiibi Ju Tim Nihɛɛ Nihabichɛla

²¹ Yesu fun zu arŋa a la ji bɛɛŋ ti jibaŋ kinkin ti. O funɛ la tel dooni, zɛmɛ kinkan fun wa a wa go un bɛɛŋ ti nɔ ni.

²² Ba bar lagmi dɛ nihɛɛ digi funɛ gbaari zɛmɛ ta ni. O sɔn funɛ ya Jairus. Saha naa o fun wa na Yesu, o fun la gbiri o suwachak ni,

²³ a sumi un kinkan a ŋɔ, “Mu nihabichɛla la wi a daŋni o sou. Mu sumi hinu kinkan, kuwa a wa kpa i nisa a sak un ni, chen ni o zi na alaafɛu.”

²⁴ Yesu fun tiŋ Jairus a kaali. Nara kinkan gbanko funɛ tiŋ un aa zaksi un.

²⁵ Nihaan digi funɛ nyɛn doon a kpak wichɔɔr digi bun fidalɛ. O fun ya nin ka o vɛ peti.

²⁶ Hali luri tima nidamata fun a tiibi un a wa ku. O fun chɔk o malɛ maga ka o nin ti vɛ peti a fun bukoo gbaari.

²⁷ O fun a nu Yesu wɛ a la lisi o tuhu ni,

²⁸ “N fu koti a la gbaŋsi o kilaari nɔ, n fu zi na alaafɛu.”

²⁹ O fun zu zɛmɛ ta ni a la pu Yesu a gbaŋsi o kilaarɛ gantɛl. O funɛ la gbaŋsi o kilaari ti chen, o nin ti fun vaan teŋ. Doone o fun zim di o na alaafɛu.

³⁰ Yesu fun zim di nandigi gbaŋsi unu domi o kpok ti bar digi funɛ liu. O fun burgi o gantɛl a pɛɛsi, “Anti gbaŋsi mu takta nan ni?”

³¹ O gantɛl tiŋsi ta fun burgi a pɛɛsi un, “I waa na zɛmɛ ta la murgi nan ni ka i pɛɛsi ya di, anti gbaŋsi hinu?”

³² Yesu ha fun vɛɛn a nyini a go di o na nar gbaŋsi un chen.

³³ Hansura fun kpak haan ti kinkan. O bara fun a jigiri. O fun zim di Yesu tiibi unu a fun wa gbiri o suwachak ni a sɛm o tuha chaani maga a nyɛ un.

³⁴ Yesu fun ŋɔ un, “N be, i si suuli nyɛ i na alaafɛu. Kila dama awa tu sɔɔn ni. I wichɔɔrti ti petiu. O wa zi bu bur wi.”

³⁵ Yesu ha funɛ vɛɛn a sɛm, nara bɔnɛ fun a li ba bar lagmi dɛ nihɛɛ dama a wa nihɛɛ ti wati a ŋɔ un, “I be nihabichɛl ti sowu. Ta bu muksi nibiksi ti di o waali.”

³⁶ Yesu fun nu chenani ba sɛm chen a ŋɔ nihɛɛ ti, “Ta nyɛ o muksi hin. Nyɛ i si su min.”

³⁷ Yesu wa fun a daŋni nandigi tiŋ un amaa a nyɛ Pita, Jems awa o niinbe Jɔn ba duŋduŋ funɛ tiŋ un kaali.

³⁸ Ba funɛ la tel ba bar lagmi dɛ nihɛɛ ti dama, ba fun a nu ba chɛɛma ka ba wi kinkan.

³⁹ Yesu fun la zu dam ti a pɛɛsi ba, “Yɛrɛ ma chɛɛmi a la wi? Be ti wa sou. O chɔ dore.”

⁴⁰ Ba fun a mɔmsi un. O fun duŋni ba a ta, a kpa be ti nyana awa o niina awa o gantɛl tiŋsa nara batora duŋduŋ a la zu be ti dɛ chɔɔli ti. Be ti funɛ ya bun fidalɛwa.

⁴¹ Yesu fun la kpak be ti nin a ŋɔ un a li o titi sɛm ni, “Talita kumi.” Chen mun ya, “n be nihabichɛla, n ŋɔ hinu, kisi.”

⁴² Nihabichɛl ti fun vaan si chiŋi a val. O ya ba alaazibu kinkan.

⁴³ Yesu fun ŋɔ di ba ya diwe a nyɛ be ti ni o di, a fun ŋɔ ba kpok ni, “Ma ta nyɛ nandigi zim kinkin naa yɛɛ.”