Maak 4 - Tampulma

Yesu Fun Ŋɔ Ba Nipari Naa Zaasi Kiduha Wɛ

¹ Yesu fun bu wa bɛɛŋ ti a biksi nara Koosa wɛ. Zɛmɛ kinkan fun wa o wati a wa go un. Domi ba funɛ iiu kinkan, o fun a nyini arŋ bar nyɛni a la zu, amaa zɛmɛ ta wa funɛ chiŋi jibaŋ nɛɛ.

² O fun jɛɛgi jɛɛgɛ a biksi kidamata a nyɛ ba a ŋɔ,

³ “Baal digi funɛ nyɛn doon a fun si a kaali o ŋmaha di o la zaasi kiduha.

⁴ O funɛ zaasi chene, kiduhu ti bɔnɛ fun chesi nyinbaan ni. Zimebisa fun wa pini a naa chesi nyinbaan ni chen maga a di.

⁵ Bɔnɛ ka fun chesi buŋkul tuhu ni. Hɛɛra wa fun to dooni kinkan. Chendaha a fun nyu lalaga.

⁶ Saha naa nha fun wa num a kpak a, a fun fiimi a siti. A wa fun koti a ta luta nɛnɛ.

⁷ Kiduhu ti bɔnɛ ka fun chesi sɔta bar nyɛni ni a nyu a zini. Sɔti ta gbanko fun nyu a zini a tɔ a. Chendaha a wa fun koti a lul.

⁸ Bɔnɛ ka fun chesi tɛɛn weri ni a nyu a zini a lulsi nɛnɛ. Bɔnɛ fumtotora, fumnɔnɔra, kɔkkɔkwa.”

⁹ Yesu fun ŋɔ ba, “Ma naa kpak diŋsa aa nu, maa nu nɛnɛ.”

Chenani Yesu Fun Jɛɛgi Jɛɛgɛ A Nyɛ Nara Ni

¹⁰ O funɛ wa ka o duŋduŋ, ba naa funɛ tiŋ un awa o gantɛl tiŋsa fidalɛ ta, ba fun wa a wa pɛɛsi un o jɛɛge ta mun.

¹¹ O fun ŋɔ ba, “Ma warɛ Koosa nyɛ ma zim o koor ti kina, amaa ba naa vɛ nyɛn Koosa koor ti ni chen, jɛɛgɛwa n yaa jɛɛgi a nyɛ ba chen,

¹² ‘Chen ni ba zi nuu aa kidaŋni ba zim a muna amaa ba wa kizim. Ba zim a muna, ba bambe zi chɛrgiu, chen ni Koosa zi gil ba tum tagna a nyɛ ba.’ ”

Yesu Fun Ŋɔ Ba Nipari Naa Zaasi Kiduha Chen Mun

¹³ O fun pɛɛsi ba, “Ma wa zim jɛɛgi nɔ munn? Ma vɛ zim jɛɛgi nɔ mun, yɛrɛ ma kaa ya a zim a nawara kɛɛ muna?

¹⁴ Baal naa funɛ zaasi kiduhu ti chen, Koosa laaboor weri tirɛ o fun a zaasi chen.

¹⁵ Kiduhu naa funɛ chesi nyinbaan ni chen chi ba naa nu, amaa sintana funɛ siu lalaga a wa yisi laaboor ti a li ba bambe ni.

¹⁶ Kiduhu naa ka funɛ chesi buŋkula tuhu ni chen chi ba naa nu laaboor weri ti ka ba tusa sɔɔni,

¹⁷ amaa laaboor weri ti wa fun ta lur ta ba ni. Ba funɛ tiŋ tamnɛ, amaa saha naa namsi wa kpak ba chen laaboor weri ti daha, ba vɛ un a bu vɛ tiŋi.

¹⁸ Kiduhu naa ka funɛ chesi sɔta bar nyɛni ni chen chi ba naa nu laaboor weri ti,

¹⁹ amaa ba tɛɛnɛ nɔ wi yaalɛ awa ba malɛ daŋni kinkan awa ba wi lise maga wa zu ba bambe ni a chɔk laaboor weri ti, chen ni o wa kikoti a lul ba tusa ni.

²⁰ Kiduhu naa ka funɛ chesi tɛɛn were ni chen chi ba naa nu laaboor weri ti ka ba bambe kpak un nɛnɛ a wa lulsi fumtotora, fumnɔnɔra, awa kɔkkɔkwa.”

Nar Suk Fitina, Leene O Kpa Un A Chiŋsi?

²¹ Yesu fun pɛɛsi ba, “Nar suk fitina, o zi bu kpa tempile a chik un niu koo o zi kpa un a chiŋsi o bar chiŋi niu o chaani kinkann?

²² Kina maga soglee, a maga zi wa li gbampulimu, chen ni ma zi na au.

²³ Ma naa kpak diŋsa a la nu, ma nyɛ a nu nɛnɛ.

²⁴ “Maa nu chenani n kaa ŋɔ ma nan. Ma doso a nu mu sɛma a gbaari, Koosa zi suŋi mau ma zim a gbaari.

²⁵ Nar la nu nɛnɛ, Koosa zi suŋi unu o zim a gbaari. Nar ka vɛ nu nɛnɛ, tam naa o zim chen, Koosa zi yisi au o wati.”

Yesu Fun Ŋɔ Ba Chenani Kiduha Nyu A Zini Wɛ

²⁶ Yesu fun ŋɔ di, “Koosa koor ti chi nipari naa funɛ si a la o ŋmaha di o la zaasi o kina chene.

²⁷ O funɛ zaasi kin ta a peti, o fun la chɔ a hiisi. Wuzu kama o yaa siu a la tum a wa hiisi. O funɛ ya chene, o ka wa zim chenani kiduhu ti ya a nyu aa zini.

²⁸ Tɛɛnɛ ti titi yaa chɛrgi kiduhu ti a nyu a zini. A waa zini a peti chen, a zi kpaksi loona a lulsi.

²⁹ A wa bi a mak kumi chen, ba kpa chisa a kaali ŋmaha ti a la kum a.”

Yesu Fun Ŋɔ Ba Kidusi Maga Kiwewe Wɛ

³⁰ Yesu fun bu pɛɛsi ba, “Baŋ kinnɛ ya zi koti a kpa lagmi Koosa koor ti ni a nyini a kpa maksi a koor ti?

³¹ O chi kiduha naa ba yir ‘mastad’ ba yaa kpa aa du chene. Waa ya kidusi maga kiwewe.

³² A gantɛl ni a si a zen a kaali bugil pum maga kɔha ni. Zimebisa yaa wa du a zaŋa a hulsi ni, domi a funɛ zenu a kpak basɔn were.”

³³ Yesu fun a jɛɛgi jɛɛgɛ kinkan a nyɛ ba a biksi ba Koosa wɛ a chi chen, hali ba zima wa peti.

³⁴ O waa ya biksi ba wu digi a gbaari, see jɛɛgɛ duŋduŋ. O wa o gantɛl tiŋsi ta funɛ nyɛn ba duŋduŋ, o fun a biksi ba a maga muna.

Yesu Fun Jiŋ Peha

³⁵ A wuzu ti nha funɛ wa chel, o fun ŋɔ o gantɛl tiŋsi ta ni, “Ma nyɛ ya la ji bɛɛŋ ti jibaŋ kinkin ti.”

³⁶ O gantɛl tiŋsi ta fun gil zɛmɛ ta a zu pu Yesu arŋ tuhu ni ba kaali. Bɔnɛ gbanko fun zu arŋ bɔnɛ a tiŋ un.

³⁷ Ba funɛ la chene, pe zen digi fun wa si a viigi. O fun a mo arŋ ti kinkan, a teŋ ni ti a du arŋ ti tuhu ni o daŋni o lim.

³⁸ Yesu fun chɔ arŋ gantɛl ni a sul nyusula a chɔ do. O gantɛl tiŋsi ta fun laasi un a pɛɛsi, “Ya kunyana, ya daŋni ya sou. I bak wa to ya nii?”

³⁹ O fun si o do ti ni a ŋɔ pehe ti ni di o chiŋi a ŋɔ ni ti ni di o du balimm. Pehe ti fun chiŋi. Ni ti gbanko fun a du balimm, hali o wa fun a dam tama.

⁴⁰ Yesu fun pɛɛsi o gantɛl tiŋsi ta, “Yɛrɛ maa ɔm chen ni? Ma se wa su minn?”

⁴¹ O fun a ya ba alaazibu kinkan. Ba funɛ pɛɛsi dɔŋa, “Baal nɔ, baŋ nibine ya un? Hali o koti a sɛm sɛma peha awa ni wati a nu o nɔ.”