Maak 2 - Tampulma

Yesu Fun Tiibi Naa Naŋgere Awa O Nisa Funɛ Sou

¹ Yesu fun nyɛn doon wuzu bilɛ a bur wa Kapɛrnaum. Tɔhɔn ti tima fun nu di waa nyɛn o dam zuuli ni.

² Nara kinkan fun lagmi dooni. Gbampulim wa fun to dɛ ti ni hali dɛ ti zɔɔnɔ ni. Yesu fun ŋɔ ba Koosa laaboor weri ti wɛ.

³ Saha naa Yesu funɛ ŋɔ ba Koosa wɛ chen, nara bɔnɛ fun chuŋi baal naa nisa awa o naŋgere funɛ sou. Ba funɛ ya nara banaasiwa a kpa un a sak amaŋka ni a daŋni ba kpa un a wa Yesu wati.

⁴ Ba wa fun koti a kpa un tel doonani Yesu chiŋi chen, domi zɛmɛ funɛ iiu kinkan. Adaha ba fun zini pɛŋ ti daha a hur bɔ, a kpa ŋmɛnsa a vɔti amaŋka ti luksa naasi a kpa un a tu Yesu suwachak ni a li dɛ ti bambaan ni.

⁵ Yesu funɛ zim chenani ba se su un kinkan chen, o fun ŋɔ baal naa nisa awa o naŋgere funɛ sou chen, “Mu be, n waa nibine be funɛ gil i tum tagnau a nyɛ hin.”

⁶ Koosa chiksɛ nibiksɛ bɔnɛ funɛ kani dooni a lisi ba tusa ni,

⁷ “Baal nɔ, baŋ sɛmwa o sɛm chen? Anti la zi koti a gil nara wu tagna a nyɛ ba? See Koosa duŋduŋ la zi koti chen. O sɛm sɛma nan ni, o wara tiŋ Koosa nɔ. O kpa o titi a maksi Koosa.”

⁸ Yesu funɛ piin zimu o tuhu ni chenani ba lisiu a pɛɛsi ba di, “Baŋnɛ ma lisi ma tusa ni nan ni?

⁹ Baal naa naŋgere awa o nisa funɛ sou chen, n ŋɔ un di Koosa gil o wu tagna a nyɛ un koo n ŋɔ un di o si a val, o leema bɔm?

¹⁰ N daŋni ma zimu di n waa nibine be kpak kpok a li tɛɛnɛ nɔ maga ni, chen ni mu zi koti a gil nara wu tagna a nyɛ ba.” O fun ŋɔ wichɔɔr ti ni,

¹¹ “Mu sɛm hinu, si chiŋi a zer i kichɔɔli ti a la dama.”

¹² Baal ti fun vaan si chiŋi a zer o kichɔɔli ti a li lalaga. Ba naa funɛ chiŋi a nyini un, o fun ya ba alaazibu kinkan. Ba fun a pɛgi Koosa a ŋɔ, “Ya ha wa na nan see zinan wuzu nɔ.”

Yesu Fun Yir Livai

¹³ Yesu fun bu si a li dooni a kaali Galili bɛɛŋ ti nɔ. Zɛmɛ fun wa o wati, ka o fun piili a biksi ba Koosa wɛ.

¹⁴ O funɛ biksi ba a peti, o fun bukoo si a la na baal naa ba funɛ yir Livai, Alfius be. O funɛ kani lampo bar laali nɛɛ aa la lampo ti. Yesu fun ŋɔ un, “Si a tiŋ min aa wa.” O fun gil o tuma a si tiŋ un a kaali.

¹⁵ Yesu awa o gantɛl tiŋsa fun kaali Livai dama di ba la di diwe. Lampo nilalɛ awa wu tagna tima kinkan funɛ tiŋ Yesu ka ba bɔnɛ la gbaari un ni awa o gantɛl tiŋsi ta ni. Ba maga fun kani a di diwe.

¹⁶ Koosa chiksɛ nibiksɛ ta bɔnɛ, ba naa funɛ ya Farisi tima, ba waa funɛ na ba ka ba di diwe ta. Ba fun a pɛɛsi o gantɛl tiŋsi ta, “Yɛrɛ Yesu wa wu tagna tima awa lampo nilalɛ ta lagmi a di diwe?”

¹⁷ Yesu fun nu chenani ba pɛɛsi a ŋɔ, “Nibinsa ba naa kpak alaafɛ, ba wara la lure tiin wati, amaa ba naa vɛ kpak alaafɛ, ba waa le la lure tiin wati. N wa wa di n wa yir ba naa nara yir ba nibin werewa. Ba naa nara yir ba nibin tagna daharɛ, mu wa.”

Chenani Yesu Gantɛl Tiŋsa Fun Vɛ Vɔu Nɔ

¹⁸ Wuzu digirɛ Jɔn naa funɛ chaksi nara wa ni ni chen, gantɛl tiŋsa awa Farisi tim ta gantɛl tiŋsa fun vɔu nɔ. Doone nara bɔnɛ fun wa Yesu wati a wa pɛɛsi un, “Yɛrɛ Jɔn gantɛl tiŋsi ta awa Farisi gantɛl tiŋsi ta vɔu nɔ, ka i waa gantɛl tiŋsi ta vɛ vɔwi?”

¹⁹ Yesu fun burgi a pɛɛsi ba, “Nar kpa haan ka o chɛnsa bu vɔu nɔɔ? Aai. Ba wa zi ya chen.

²⁰ Saha naa ba zi wa kpak baal ti a kaali, chen wuzu ba zi wa vɔu nɔu.”

²¹ O fun bu ŋɔ ba, “Ba wa kpa gar fali aa lik takta buni bɔ di o vusi. Ba ka kpa gar fali ti a lik takta buni ti, o zi bukoo chɛɛsi kibuni tiu a gbaari.

²² Ba wa kpa sin fali a du sin tɔk buni ni di o vusi. Ba ya chen ni ka o wa bi a pursi, o zi chɔk tɔk tiu ka sin ti pisi. Sin fali ti daŋni tɔk falirɛ.” (O funɛ biksi ba chen ni ba zim di o biksi ti ya biksi falirɛ.)

Chenani Yesu Fun Tum Ju Tim Hiisi Wuzu

²³ Hiisi wuzu digi Yesu awa o gantɛl tiŋsi ta fun la zu kiparɛ tuha aa la. Ba funɛ la chene, o gantɛl tiŋsi ta fun pini kiparɛ ta.

²⁴ Farisi tim ta bɔnɛ fun ŋɔ Yesu ni, “Kina, yɛrɛ i gantɛl tiŋsi ta chɔk ya chiili wuzu hiisi?”

²⁵ Yesu fun burgi a pɛɛsi ba, “Ma yaa karimi Devid wɛ a li Koosa sɛm tɔn ti ni chen, ma wa zim o munn?

²⁶ Saha naa Abayata funɛ ya Koosa dam kɔkɔɔrsa nihɛɛ chen, wuzu digi lɔsa funɛ kpak koor Devid awa o dɔŋtima, o fun kaali a la zu Koosa bar jɛɛmi dama a la zer boroboro a chɔk a se a kpa nyɛ o dɔŋtim ta ni ba gbanko fun se. Nan boroboro nɔ funɛ chi seeliu see Koosa dam kɔkɔɔrsi ta duŋduŋ funɛ se.

²⁷ “Koosa wa fun te lisi hiisi wuzu ti a ŋɔ nara ni di ba tiŋ un. O funɛ te naami narawa a lisi hiisi wuzu ti a nyɛ ba a ŋɔ di ba tiŋ un.

²⁸ Mu waa nibine be dɔ hiisi wuzu ti gbanko.”