Maak 16 - Tampulma

Chenani Yesu Fun Si A Li O Sou Ni

¹ Ba hiisi wuzu ti funɛ wa gali, dusum saha Mɛri Magdala, Mɛri, Josɛs niina, awa Salome, ba fun si a kaali a la yau nu naa sɔɔra weree di ba kpa wa tiksi Yesu.

² O funɛ ya aleedi chɔɔsa pisirɛ, ba fun si a la doonani ba sogli Yesu chen,

³ a la pɛɛsi dɔŋa, “Anti la zi koti a bilimsi buŋkul ti a li hugil ti zɔɔnɔ ni a nyɛ ya?”

⁴ Ba funɛ la tel dooni, ba fun na di buŋkul ti piin bilimsiu a chiŋi. Buŋkul ti funɛ zenu kinkan.

⁵ Ba fun la zu hugil ti tuha a na bunɔɔn digi ka o laari gar pilim a kani ba nindil ni.

⁶ Bunɔɔn ti fun ŋɔ ba, “Ma ta nyɛ o ya ma alaazibu kinkan. N zimu di ma dɛu Yesu Nazarɛtrɛ, naa ba fun kpu daakakli ti ni chen. O wa bu to bar nɔ. O si o sou niu. Ma wa nyini doonani ba fun kpa un dau chen a na.

⁷ Ma la ŋɔ Pita awa Yesu gantɛl tiŋsi ta maga di Yesu piin te ba suwachaku a kaali Galili a chi chenani o fun ŋɔ ba chen. Ba la dooni, ba zi na unu.”

⁸ Ba fun li hugil ti ni a chɔ aa la. Hansura fun kpak ba kinkan. Ba bara jigiri. Domi hansura funɛ kpak ba kinkan chen, ba wa koti a ŋɔ nandigi ni. ((

Mɛri Magdala Fun Bu Na Yesu

⁹ Yesu funɛ si o sou ni aleedi wuzu chɔɔsa chen, Mɛri Magdala, naa Yesu fun duŋni alizin tagna nɔpɛ a li un ni chen, waa funɛ te a na un.

¹⁰ Mɛri fun la Yesu gantɛl tiŋsi ta wati. Ba tusa ha funɛ vɛɛn chɔk ka baa wi.

¹¹ O fun ŋɔ ba di Yesu si o sou niu a bu kpak miisa, ka o na un. Ba se wa fun su di o ya wutiu.

Yesu Gantɛl Tiŋsa Nara Balɛ Fun Bu Na Un

¹² Nara balɛ funɛ li tɔhɔn ti ni a val nyinbaan ni, Yesu fun wa pu ba a kɔr ba ni.

¹³ Ba fun bur kaali o gantɛl tiŋsi ta wati a ŋɔ ba, amaa ba se ha wa fun su di o ya wutiu.

Yesu Gantɛl Tiŋsa Fun Bu Na Un

¹⁴ Doone Yesu gantɛl tiŋsa nara fi di nibɛgim funɛ kani aa di diwe, Yesu fun wa ba wati. O fun zulumi ba, domi ba bambe funɛ kpoku. Ba se wa fun su ba naa ŋɔ ba di o si o sou niu.

¹⁵ O funɛ nyɛn ba wati chene, o fun ŋɔ ba, “Ma si aa la tɔsa naa maga nyɛn tɛɛnɛ nɔ ni a la sɛm Koosa laaboor weri ti a nyɛ nara maga ni.

¹⁶ Ba naa maga se su min, ma nyɛ ba chaksi ba wa ni ni, ka Koosa zi yisi ba a li ba wu tagna ni, amaa ba naa maga se ka vɛ su min, Koosa zi wa lɛti ba diŋsau a ta ba yɔri.

¹⁷ Ba tum nɛɛ ma zi wa zim ba naa se su min. Ba zi koti a kpa mu sɔnu a duŋni alizin tagna a li nara ni a bu sɛm sɛm falɛ,

¹⁸ a kikpaksi duma a kinyɔ sambosa ka o ta ya ba kundɔŋ, aa koti a kpa ba nisa a saksi wichɔɔrsi ni ba na alaafɛ.”

Chenani Yesu Fun Si A Ziŋi Koosa Tɔha

¹⁹ Ba kunyan Yesu funɛ sɛm ba peti, o zini a kaali buudaha a la kani Koosa nihɛɛ bar kani ni.

²⁰ O gantɛl tiŋsi ta ka fun si a kaali bar damata aa la sɛm Koosa laaboor weri ti a nyɛ nara ni. Koosa fun suŋi ba ba koti a tum tum kpoka aa gbaari, chen ni nara zi zimu di ba sɛm ta ya wutirɛ.))