Maak 15 - Tampulma

Ba Fun Kpa Yesu A La Nyɛ Pailɔt Ni

¹ Chɔɔsa funɛ wa pisi, Koosa dam kɔkɔɔrsi ta, tɔhɔn nihɛɛti ta, Koosa chiksɛ nibiksɛ ta awa sɛria nidiile, ba fun lagmi a na dɔŋa Yesu daha. Ba funɛ sɛm peti, ba fun vɔu o nisa a kpa un a la nyɛ gɔbnati nyuhu tiina naa ba yir Pailɔt ni chen.

² Pailɔt fun pɛɛsi un, “Hin ya Ju tim koor chenn?” O fun ŋɔ, “Chenani i kut ŋɔ chen.”

³ Koosa dam kɔkɔɔrsi ta fun a suni Yesu nɔ ni a fiksi un.

⁴ Pailɔt fun bukoo pɛɛsi un, “Wu damata naa ba sɛm a du hin ni nan, i wara nu aa? I wa kpak wu digi a la zi sɛmm?”

⁵ Yesu fun moori a vɛ sɛm wu digi. O fun ya Pailɔt alaazibu kinkan.

Ju Tima Fun Di Yesu Siwi Sɛria

⁶ Ba wuzu zen wuzu Pailɔt yaa fun puk dɛ naa ba yaa tɔ nara chen zɔɔnɔ a nyɛ nibɛgim li.

⁷ Ba funɛ kpa nara bɔnɛ a tɔ dɛ ba naa funɛ dam a kpu nara dooni. Ba nidigi sɔn funɛ ya Barabas.

⁸ Nidamata fun wa Pailɔt wati a wa sumi un di o tum chenani o yaa tum ba wuzu zen wuzu a nyɛ ba chen.

⁹ Pailɔt fun pɛɛsi ba, “Maa daŋni n lisi Ju tim koor ti a nyɛ maa?”

¹⁰ Pailɔt funɛ zimu di Koosa dam kɔkɔɔrsi tima handɔta daha ba fun kpak Yesu a wa o wati. Chendaha o fun pɛɛsi nara tima.

¹¹ Koosa dam kɔkɔɔrsi ta fun ŋɔ nara tima ni di ba sumi Barabas a ka Yesu. Ba maga fun tiŋ ba nɔ a ŋɔ Pailɔt ni di baa daŋni o lisi Barabasrɛ a ka Yesu.

¹² Pailɔt fun bu pɛɛsi ba, “Baal naa maa yir Ju tim koora nan, yɛrɛ n kaa ya un?”

¹³ Ba fun tɛsi kinkan a ŋɔ, “Nyɛ ba kpaasi un a mari daakakli daha ni o sowu.”

¹⁴ Pailɔt fun bu pɛɛsi ba, “Yɛrɛ? Tum tagna baŋnɛ o tumm?” Ba fun tɛsi kinkan a kaali chenani ba fun te tɛsi chen a ŋɔ, “Nyɛ ba kpaasi un a mari daakakli ti daha ni o sou.”

¹⁵ Zɛmɛ ta nɔ sɛma daha, Pailɔt fun nyɛ Barabas li, amaa o funɛ kpa Yesu a nyɛ nara tima bɔnɛ ni di ba tuk un wa vurmsi ni. Ba funɛ tuk un peti, o fun ŋɔ di ba kpa un a la kpaasi mari daakakli ti o sou.

Lanjimasa Funɛ Mɔmsi A La Zɔ Yesu

¹⁶ O lanjimasa fun kpa un a la zu dɛ zen naa ba yir Pirtɔrium, a fun yir ba dɔŋtima ba wa.

¹⁷ Ba fun zer ba gar sɛm digi a wa laari un a kpa sɔta a wa sɔ a chi koora nichiga a kpa chik o nyuha,

¹⁸ a zaami un a ŋɔ, “Ju tim koora, ya zaami hinu.”

¹⁹ Ba fun zer da a mo o nyuha, a tɔɔsi nantɔsa a du un ni, a gbiri o suwachak ni a nyɛ un jirima.

²⁰ Ba funɛ zɔ un a mɔmsi un peti, ba fun kpa gar sɛm ti a ur a zer o titi kilaarɛ a laari un, a kpa un li di ba la kpaasi un a mari daakakli ti ni o sou.

Ba Fun Kpak Yesu A Kpaasi A Mari Daakakli Ni

²¹ Ba funɛ nyɛn nyinbaan ni a la chene, ba fun la chem baal naa ba yir Simɔn a li Sairini pulum ni. Waa funɛ ya Alɛzanda awa Rufus nyana, a li kɔha bar boli ni a wa. Ba fun lɛrgi un a nyɛ o zer Yesu daakakli ti a baasi a tiŋ ba kaali.

²² Ba funɛ kpa Yesu a wa tel doonani ba yir Gɔlgɔta. Chen mun ya, ‘nyukɔkri bar’.

²³ Doone ba fun kpa luri a wa nyɛ Yesu ni a daŋni o nyɔ. O fun vɛ di o wa zi nyɔ.

^24-25 Nha ha funɛ vɛ wa tel sal baan nyuha, ba fun kpak un a kpaasi a mari daakakli ti ni. Ba fun kpa o gata a dau di ba yo walɛ di ba na anti kaa di a.

²⁶ Ba fun wa sɔbi o yaali a mari daakakli ti ni a ŋɔ, “Ju tim koor ti nɛɛnɛ.”

²⁷ Ba fun kpaasi ŋmɛɛrsa nara balɛ gbanko a gbaari Yesu ni, digi o nindil ni, digi o ningal ni.

²⁸ Chenani ba fun sɔbi saha digi a li Koosa sɛm tɔn ti ni fun wa ya wuti di ba zi wa nyini Yesu a chi o gbanko ya tum tagna tiinne.

²⁹ Ba naa funɛ nyɛn dooni chen, fun val la gali a la gumsi ba nyuuna a pini o zoma a ŋɔ, “Kina, hin funɛ ŋɔ di i zi chɔk Koosa bar jɛɛmi dam ti a bur sa un wuzu butora chen niuu?

³⁰ Yisi i titi a tu wa daakakli ti ni ya na.”

³¹ Koosa dam kɔkɔɔrsi ta awa Koosa chiksɛ nibiksɛ ta gbanko funɛ mɔmsi un a la ŋɔ dɔŋ ni, “Maa na. O laata fun yisi nara chen a vɛ koti a yisi o titii?

³² O funɛ ŋɔ di o ya Ju tim Kristo koorre. Ma nyɛ ya na o zi lisi o titi daakakli ti ni a tu wa tɛɛnɛ, chen ni ya se zi su unu.” Ŋmɛɛrsi naa ba fun kpaasi a gbaari un ni chen, gbanko funɛ pini unu.

Chenani Yesu Fun Sou

³³ Nha funɛ wa tel sal baan nyuha, doon fun wa biri a vusi hali saha naa niparɛ yaa par a si chen.

³⁴ Chen saha tirɛ Yesu fun tɛsi kinkan a ŋɔ a li o titi sɛm ni, “Ɛloi, ɛloi, lama sabagtani.” Chen mun ya, “Koosa, Koosa, yɛrɛ i gil min?”

³⁵ Nara bɔnɛ fun chiŋi dooni a nu chenani o sɛm chen a ŋɔ dɔŋ ni, “O yir Koosa witiina Ɛlaijarɛ.”

³⁶ Ba nidigi fun chɔ a la zer kizɛrgi a tau kinyɔɔli haasi ni a kpa sak da ni a tɛ un a ŋɔ ba, “Ma nyɛ ya pɔ a na Ɛlaija zi wa kpa un a li daakakli ti ni a tu wau.”

³⁷ Yesu fun bukoo tɛsi kinkan a sou.

³⁸ O funɛ wa sou, gar zen naa ba fun kpa purigi Koosa bar jɛɛmi dam ti chen, o fun chɛɛsi a li buudaha ni hali a wa peti tɛɛnɛ ni.

³⁹ Lanjimasa kɔkwa nihɛɛ funɛ chiŋi daakakli ti mun ni a il Yesu. O funɛ na chenani o sou, o fun ŋɔ o titi ni, “Wuti baal nɔ sir ya Koosa bere.”

^40-41 Nihaana ba naa funɛ tiŋ un a la suŋi un Galili pulum ni chen, gbanko bɔnɛ funɛ chiŋi bar boli ni a nyini chenani la ya. Ba bɔnɛ sɔna funɛ ya Salome, Mɛri Magdala, awa Mɛri, Jems awa Josɛs niina. Nihaan damata funɛ tiŋ un a la Jɛrusalɛm. Ba gbanko funɛ nyɛn dooni.

Ba Fun Kpa Yesu A La Sogli Un

⁴² Baal digi funɛ nyɛn doon. Ba yir un Josɛf a li Arimatia ni.

⁴³ O funɛ ya sɛria nidiili ta nidigirɛ. Nara fun a nyɛ un jirima. O funɛ nyini di o wa na saha naa Koosa zi wa dɔ nara. Dusum funɛ wa biri, o fun si a kpak o bambi a kaali Pailɔt wati a la sumi di ba yisi Yesu a li daakakli ti ni a nyɛ un o la sogli. O funɛ ya a wuzu naa ba saksi a pɔ hiisi wuzurɛ. Chendaha o la sumi un chen ni.

⁴⁴ O funɛ wa ŋɔ Pailɔt ni chen, o fun ya Pailɔt alaazibu kinkan di Yesu sou lalagau. O fun yir lanjimasa kɔkwa nihɛɛ ti o wa o wati. O pɛɛsi un, “Wutirɛ ba ŋɔ di Yesu sou chenn?” O fun ŋɔ, “O ya wutirɛ o sou.”

⁴⁵ Doone Pailɔt fun a nyɛ Josɛf nyinbaan di o la yisi un a li o daakakli ti ni a la sogli.

⁴⁶ Josɛf fun li a la yau gar pilim a la yisi un daakakli ti ni a kpa mɛɛsi un a kpa un a la du gbɛntɛl bɔ fali naa ba yaa sogli ba nara chen a bilimsi gbɛntɛl zen a tɔ bɔ ti zɔɔnɔ.

⁴⁷ Mɛri Magdala awa Mɛri, Josɛs niina, ba naa funɛ tiŋ Josɛf chen, fun la na doonani ba sogli un.