Maak 14 - Tampulma

Chenani Ju Tima Funɛ Daŋni Ba Kpak Yesu

¹ O funɛ ka wuzu bilɛwa ka Ju tima wuzu zen naa ba yir val la gali ti tel. Chen wuzu ba yaa fun piili a se boroboro naa ba yaa vɛ du luri chen. Koosa dam kɔkɔɔrsi ta awa Koosa chiksɛ nibiksɛ ta fun a daŋni ba kpak Yesu a kpu,

² amaa ba funɛ ŋɔ dɔŋ ni, “Ya kpak un lalaknɔ a li, ba naa lagmi di ba di wuzu zen diwe chen tuhu ni, o zi damu.” Doone ba fun a na dɔŋa a sɛm chenani ba zi ya a sogli a kpak un.

Haan Digi Fun Weli Tulale A Du Yesu Ni

³ Yesu funɛ nyɛn Bɛtani ni Simɔn naa funɛ ya zagum a peti chen, dam ni. O funɛ nyɛn dooni a di diwe, haan digi fun wa o wati a kpak tulale naa malɛ funɛ kpok ka o nyɛn kɔlba we birigi ni. O fun zer a chɛɛgi a kpa tulale ti a buti a du Yesu nyuhu ni.

⁴ Ba naa funɛ kani dooni bɔnɛ fun na chenani o tum chen a na paan a du un ni. Ba fun lisi ba tuhu ni, “Yɛrɛ haan nɔ zer tulale nɔ a chɔk ta nan ni?

⁵ O fu kpa tulale nɔ a yogli malɛ damata a fu kpa a a nyɛ fara tim ni, chen fu wa bɔɔ?” Ba fun a pini o zoma.

⁶ Yesu fun ŋɔ ba, “Ma gil un. Yɛrɛ ma muksi un chen? O ya wu werire a nyɛ min.

⁷ Saha maga fara tim ta yaa nyɛn ma watɛɛ. Chenani maa daŋni ma suŋi ba, ma yaa koti a suŋi ba. Amaa mu wa zi nyɛn ma wati aa la.

⁸ Haan ti funɛ kpaŋiu kinkan. O funɛ te kɔɔri mu barau di ba wa sogli min.

⁹ N ŋɔ ma wutirɛ, doonani maga ba zi wa biksi Koosa laaboor weri ti, ba zi wa sɛm nihaan nɔ wɛu awa chenani o fun a tum nyɛ min. O sɔn zi wa chɔu aa la.”

Judas Fun La Nɔɔni Di O Li Yesu Gantɛl

¹⁰ Yesu gantɛl tiŋsi ta nibɛgim naa ba funɛ yir Judas Iskariɔt, o fun si kaali Koosa dam kɔkɔɔrsi ta wati a ŋɔ ba di o zi kotiu a suŋi ba ba kpak Yesu.

¹¹ Ba funɛ wa nu o sɛm ta chen, ba tusa sɔɔni. Ba fun ŋɔ un di o koti tum chen, ba zi bɔ unu. Judas fun wa li a piili a dɛu nyinbaan di o li Yesu gantɛl.

Yesu Wa O Gantɛl Tiŋsa Fun Di Val La Gali Diwe

¹² Wuzu zen naa ba funɛ te di ba kpu val la gali piisisi chen, Yesu gantɛl tiŋsi ta fun pɛɛsi un, “Leene i daŋni ya la a la saksi val la gali ti diwe ta i wa di?”

¹³ O fun tum o gantɛl tiŋsa nara balɛ a ŋɔ ba, “Ma wa la zu tɔha, ma zi chem nandigiu ka o chuŋi ni.

¹⁴ Ma tiŋ un a la zu dam naa o kaa zu, a ŋɔ dam ti tiin ni, ‘Ya kunyana tum ya di ya wa pɛɛsi hin di, leene dɛ nyɛn o wa o gantɛl tiŋsi ta kaa wa di val la gali ti diwe ta?’

¹⁵ O zi biksi mau dɛ zenzen bɛgim naa ba kɔɔri weru. Ba funɛ sa un a zɔŋ dɛ digi nyuhu nɛɛ. Ma la zu dɛ ti a saksi ya wa.”

¹⁶ O gantɛl tiŋsi ta fun kaali a la zu tɔhɔn ti tuha a fun na chenani Yesu fun ŋɔ ba chen. Ba fun la saksi val la gali ti diwe ta dooni.

¹⁷ Saha funɛ wa tel wa ba di, Yesu wa o gantɛl tiŋsi ta fun wa kani aa di.

¹⁸ Ba funɛ di chene, Yesu fun ŋɔ ba, “N ŋɔ ma wutirɛ. Nar wa min la di diwe nan, o zi wa li mu gantɛlu.”

¹⁹ O gantɛl tiŋsi ta tusa fun chɔk. Ba pɛɛsi un nibɛgim bɛgima, “I bi minɛɛ?”

²⁰ Yesu fun ŋɔ, “Nar wa min kpa boroboro a suk disa a li hɛn bɛgim ni nan, waa kaa wa li mu gantɛl.

²¹ N waa min nibine be zi wa sou a chi chenani ba fun sɔbi a li Koosa sɛm tɔn ti ni chen. Yɛrɛ o kaa wa du naa kaa wa li n waa nibine be gantɛl. Ba fu vɛ lul chen tiina, o fu bɔu.”

Yesu Fun Sumi Koosa A Du Kidiili Ta Ni

²² Ba funɛ di chene, Yesu fun zer boroboro a sumi Koosa a du a chɔksi a bɔni o gantɛl tiŋsi ta a ŋɔ ba, “Ma zer a a di, domi o ya mu barawa.”

²³ O fun bu zer gbakme awa kinyɔɔli a sumi Koosa a du a kpa nyɛ ba. Ba fun kpa kinyɔɔli ti a nyɔ.

²⁴ Yesu fun ŋɔ ba, “Mu chɛl nɛɛnɛ. N zi kpa unu a nyɛ nidamata ni. Mu ya chen, chen la zi biksi di Koosa wa nara ya nɔ bɛgimnɛ.

²⁵ Mu sɛm ma wutirɛ, kinyɔɔli naa mu nyɔ nan, n wa zi bu nyɔ un hali mu wa nyɔ kinyɔɔli fali a li Koosa koor ti ni.”

²⁶ Ba funɛ a di diwe ta peti, ba fun lɔ bool a nyɛ Koosa ni a si a li kaali Ɔlif bi ti nyuha.

Yesu Fun Ŋɔ Pita Ni Chenani O Zi Vɛ Un

²⁷ Yesu fun ŋɔ ba, “Ba funɛ sɔbiu a li Koosa sɛm tɔn ti ni, ‘Koosa zi wa kpu piisi nigbaŋiu ka o piisisi ta pisi dɔŋ ni.’ Dusum nɔ ma maga kaa wa pisiu a gil min.

²⁸ Amaa mu wa si n sou ni, n zi wa te ma suwachaku a la Galili.”

²⁹ Doone Pita fun ŋɔ un, “Hali nara maga wa vɛ hin a ta, n waa wa zi gil hin.”

³⁰ Yesu fun ŋɔ, “Nyɛ n ŋɔ hin. Dusum nɔ i zi te tɔ butorau di i wa min wa zim dɔŋa, ka zimal zi yeli bilɛ.”

³¹ Pita fun ŋɔ kpok ni, “Aai, mu wa zi kut ŋɔ di n wa zim hin. Hali n wa hin zi sou, n wa zi ŋɔ chen.” O gantɛl tiŋsi ta maga fun ŋɔ chen.

Yesu Fun Sumi Koosa A Li Gɛtsamanɛ Ni

³² Ba fun wa tel doonani ba yir Gɛtsamanɛ. Yesu fun ŋɔ o gantɛl tiŋsi ta ni, “Ma kani bar nɔ ka mu la sumi Koosa a wa.”

³³ O funɛ la chene, o fun nyɛ Pita, Jems awa Jɔn fun tiŋ un. O fun piili a na namsi kinkan a chi o kaa sou. O tuha fun chɔk kinkan.

³⁴ O fun ŋɔ ba, “Tu chɔk naa nyɛn mu tuhu ni nan zenu. Ma kani bar nɔ a il min.”

³⁵ O fun la suwachak tama a la pimi tɛɛnɛ ni a sumi Koosa a ŋɔ, “Mu sumi hinu di o ya i tutɔrɛ, i lisi namsi nɔ a li min ni.”

³⁶ O fun bu sumi, “Mu kunyana, hin koti a ya kina maga. Chendaha muu sumi hin di i lisi namsi nɔ a li min ni. Nyɛ i tutɔ ti ya a kaali mu tutɔ.”

³⁷ O fun a bur kaali o gantɛl tiŋsa nara bator ta wati a la na ka ba chɔ do. O fun ŋɔ Pita ni, “Simɔn, yɛrɛ ma vɛ koti a kani a il tama aa la chɔ do?

³⁸ Ma si a il a kisumi Koosa, chen ni sintana wa zi wa mur ma ma tiŋ o nɔ. Ma tusa daŋni ma ya chenani mu sɛm chenu, amaa ma bara vɛ kpoki.”

³⁹ Yesu fun vɛɛn a la sumi Koosa a chi chenani o fun te la sumi chen.

⁴⁰ O fun bur a wa. O wa fun ya o gantɛl tiŋsi ta tutɔrɛ ba chɔ do chen. Do bar funɛ kpak ba kinkan. Ba wa fun zim chenani ba zi ŋɔ un.

⁴¹ O fun a wa ba wati naaval butora a pɛɛsi ba, “Ma ha vɛɛn a hiisiu a la chɔ doo? Kina maga petiu. Saha telu wa ba kpa mu waa min nibine be a du ba naa la tum tum tagna nisi ni.

⁴² Ma si a na baal naa li mu gantɛl chen.”

Chenani Ba Fun Kpak Yesu

⁴³ O ha funɛ vɛɛn a sɛm chene, Judas naa ya o gantɛl tiŋsi ta digi chen, wa zɛmɛ kinkan fun wa. Koosa dam kɔkɔɔrsi ta, Koosa chiksɛ nibiksɛ ta awa tɔhɔn nihɛɛti ta fun tum ba. Ba fun kpak chise zene awa daasa a wa kpak un.

⁴⁴ Nar funɛ li Yesu gantɛl chen fun te ŋɔ ba, “Ya wa pu ba, mu zi zaami nandigiu a mɔksi un. Tiina chen. Ma kpak un kpok, chen ni o wa kichɔ a li.”

⁴⁵ Ba funɛ wa tel ba wati, Judas fun vaan kaali Yesu wati a la zaami un a ŋɔ, “Mu kunyana,” a mɔksi un a chi chɛnsa yaa mɔksi dɔŋ chen.

⁴⁶ Ba naa funɛ tiŋ Judas chen, fun wa kpak un kpok ni.

⁴⁷ Yesu gantɛl tiŋsi ta nidigi fun foŋ o chise zen a kpa ŋmɛn Koosa dam kɔkɔɔrsi ta nihɛɛ yom digi diŋna.

⁴⁸ Yesu fun burgi a ŋɔ zɛmɛ ta ni, “Mu ya ŋmɛɛrrɛ ma kpa chise zene awa daasa di ma wa kpak minn?

⁴⁹ N yaa fun kaniu a biksi ma a li Koosa bar jɛɛmi dam ti ni ka ma vɛ wa kpak min. Chenani ba fun sɔbi saha digi a li Koosa sɛm tɔn ti ni la ya zinan chen.”

⁵⁰ Doone o gantɛl tiŋsi ta maga fun si chɔ kaali a ka un.

⁵¹ Ba nidigi funɛ niŋi gar duŋduŋnɛ. Ba fun kaa kpak un,

⁵² o ur o gar ti a ta a chɔ wa bara kpeli ni a kaali.

Ba Fun Kpa Yesu A La Nihɛɛta Bar Lagmi

⁵³ Ba fun kpa Yesu a kaali Koosa dam kɔkɔɔrsi ta nihɛɛ ti dama. Ba funɛ la tel dooni, Koosa dam kɔkɔɔrsi ta, tɔhɔn nihɛɛti ta, awa Koosa chiksɛ nibiksɛ ta fun lagmi dɔŋ ni.

⁵⁴ Pita fun sogli a tiŋ gantɛl a wa zu Koosa dam kɔkɔɔrsi ta nihɛɛ ti sal a la kani Koosa dam bisa wati a weeri din.

⁵⁵ Koosa dam kɔkɔɔrsi ta awa sɛria nidiile ta maga funɛ nyɛn dooni a nyini di ba na nandigi o ŋɔ ba di o na Yesu ka o tum tum tagna, chen ni ba zi na nyinbaanu a kpu un. Ba funɛ nyiniu hali a wa ku.

⁵⁶ Nidamata fun li ba suwachak a sɛm sɛma nibɛgim bɛgima, amaa ba sɛm ta wa fun ya kibɛgim.

⁵⁷ Ba bɔnɛ fun li a sɛm nusuna a ŋɔ,

⁵⁸ “Ya funɛ nu chenani Yesu sɛm di o zi chɔk Koosa bar jɛɛmi dama naa ba kpa nisa a sa chenu, a burgi a sa un wuzu butora wuzu a ta kpa nisa a sa un.”

⁵⁹ Amaa ba gbanko sɛm ta wa fun ya kibɛgim.

⁶⁰ Koosa dam kɔkɔɔrsi ta nihɛɛ ti fun si a chiŋi ba bambaan ni a pɛɛsi Yesu, “Sɛm naa maga nara nama sɛm a du hin ni nan ka i moori. I wa kpak wu digi a la zi sɛmm?”

⁶¹ Yesu fun moori. O fun bu pɛɛsi un, “I laata ya Koosa be, Kristo tii?”

⁶² Yesu fun ŋɔ, “Min ya un. Wuzu digi i zi wa na n waa min nibine beu ka mu kani Koosa nihɛɛ bar kani ni, a bukoo na min n wa bur wa dobaala tuhu ni.”

⁶³ O funɛ ŋɔ chen, Koosa dam kɔkɔɔrsi ta nihɛɛ ti fun chɛsi chɛsi o gar a ŋɔ, “Yɛrɛ ya bukoo kaa ya a dɛu sɛhɛra tima?

⁶⁴ Ma maga fun a nu chenani o kpa o titi a maksi Koosa. O chelu akoo o wa chell?” Ba maga fun ŋɔ di o chelu. Waa dɛu o sou.

⁶⁵ Ba bɔnɛ fun si a tɔɔsi nantɔsa a du un ni a kpa gar a tɔ o se. Ba bɔnɛ ka fun mo un a pɛɛsi un, “I zim naa mo hin nanuu?” Koosa dam bisi ta gbanko funɛ tuk unu.

Pita Fun Vɛ Di O Wa Zim Yesu

⁶⁶ Ba funɛ ya chen maga, Pita ha funɛ vɛɛn nyɛn sal nɛɛ.

⁶⁷ Nihabichɛl digi funɛ nyɛn doon a ya Koosa dam kɔkɔɔrsi ta nihɛɛ ti dam be. Waa funɛ na un ka o weeri din dooni. O fun a nyini Pita hali a vusi a ŋɔ un, “I gbanko tiŋ Yesu Nazarɛtrɛɛ?”

⁶⁸ O fun tɔ a pɛɛsi un, “Yɛrɛ i sɛm chen? N wa zim chenani i sɛm chen,” a fun si a la chiŋi bulzɔɔnɔ ni.

⁶⁹ Nihabichɛl ti fun vɛɛn na un dooni a ŋɔ ba naa chiŋi dooni chen, “Baal nɔ ya Yesu gantɛl tiŋsi ta digirɛ.”

⁷⁰ O fun bukoo a tɔ. O fun ya tama, ba naa funɛ chiŋi dooni chen, ŋɔ un, “O ya wutirɛ i ya ba nidigirɛ, domi i li Galilirɛ.”

⁷¹ Doone Pita fun hɛɛsi Koosa a nyɛ o titi ni a ŋɔ, “Baal naa ma sɛm nan, n wa zim un.”

⁷² Zimal fun vaan yeli bilɛ. Pita vaan lisi chenani Yesu fun ŋɔ un chen di o zi wa tɔ butorau di o wa un wa zim dɔŋa, ka zimal yeli bilɛ. Chenani maga o fun lisi zu o nyuha. Oo wi.