Maak 12 - Tampulma

Yesu Fun Ŋɔ Ba Tumtumsa Ba Naa Il Ŋmaha Wɛ

¹ Yesu fun bukoo jɛɛgi jɛɛgɛ a nyɛ ba, “Baal digi funɛ nyɛn doon a par o ŋma we. O fun baŋsi daasa a go un a du chɛɛnsa a baŋsi zaŋa a dɛu tumtumsa di ba wa il o ŋma we ti. O funɛ wa ya chen maga peti, o fun bu kaali tɔ bar boli.

² Chɛɛnsa pini saha fun wa tel, o fun tum o dam be o tumtumsi ta wati di o la la chɛɛnsi ta bɔnɛ a wa. O fun kaali ba wati.

³ Ba fun kpak un a tuk a vɔm un chɛɛnsi ta a duŋni un a ta. O fun bur a kaali.

⁴ Ŋma we ti tiina fun bukoo a tum o dam be digi ba wati. Ba fun bukoo kpak un a tuk a fur o nyuha a du un hiisa.

⁵ O fun bukoo tum nara bator tiina. Ba fun kpu un. Ba funɛ ya chene saha maga a tuk bɔnɛ aa kpu bɔnɛ.

⁶ O sɛmbiri be daŋni duŋduŋ funɛ wa ka, ŋmaha ti tiina fun ŋɔ o titi ni, ‘N zi tum n titi beu. O la doon, ba zi nyɛ un jirimau.’ O fun tum un. O kaali ba wati.

⁷ O tumtumsi ta funɛ na o be ti, ba fun ŋɔ dɔŋ ni, ‘Be nɔ nyana wa sou, o zi la o kina magau. Adaha ma nyɛ ya kpu un, chen ni ka o nyan ti wa sou, o kin ta zi burgi ya kinau.’

⁸ Ba fun la kpak un a kpu a lɛrgi un a li ŋma we ti ni.

⁹ “Ma zim chenani ŋma we ti tiina zi wa ya bau? O zi wa kpak bau a kpu a kpa o ŋmaha ti a bu nyɛ nara bɔnɛ ni.”

¹⁰ Yesu fun pɛɛsi ba, “Ma ha wa karimi Koosa sɛm tɔn ti aa zim o mun doonani o ŋɔ di, ‘Buŋkul naa tɛsaalsa fun vɛ chen, waa ya buŋkul kpok aa ya kibirigii? Koosa zi kpa unu a baŋ dɛ ti zɛchik ni.

¹¹ Koosa tuma funɛ chi chene. O fun ya ya alaazibu kinkan.’ ”

¹² Yesu funɛ wa sɛm a nama maga a peti, o dɔma fun zim di ba warɛ o kpa lagmi dɔŋ ni a nyini a la jɛɛgi jɛɛgɛ. Ba fun a daŋni ba kpak un, amaa zɛmɛ ta daha hansura fun kpak ba. Ba gil un a kaali.

Lampo Bɔɔli Wɛ

¹³ Ba fun burgi a nyini Farisi tim ta bɔnɛ awa Hɛrɔd nitiŋɛ bɔnɛ di ba la mo o lo a na chenani o zi sɛm ka ba na nyinbaan a kpu un.

¹⁴ Ba fun wa ŋɔ un, “Ya kunyana, ya zimu di i ya wuti tiinnɛ. I bak wa to chenani nibinsa sɛm i wɛ. I wara ɔm nibin zene se wa wuti ti sɛmi. Ya yaa bɔ ya lampo a nyɛ koorsi ta nyuhu tiina Siiza ni, chen weru koo o wa wer? Ya yaa kibɔ koo ya ta bɔɔlii?”

¹⁵ Yesu fun zim di ba daŋni ba mo o lore. O fun pɛɛsi ba, “Yɛrɛ murirɛ ma mur min nan? Ma kpa malɛ ta a wa n na.”

¹⁶ Ba fun kpa a a wa o wati. O pɛɛsi ba, “Anti nyuha awa o sɔn sak a ni nan?” Ba fun ŋɔ, “Koor Siiza nyuha awa o sɔnnɛ.”

¹⁷ O fun ŋɔ ba, “Tɔ, ma kpa koor Siiza kina a nyɛ un a ka kpa Koosa kina a nyɛ un.” Ba funɛ nu chen, o fun ya ba alaazibu kinkan.

A Wuzu Naa Nara Maga Zi Wa Si Ba Sou Ni

¹⁸ Doone ba naa ba yir Sajusi tim chen bɔnɛ fun wa o wati. Ba yaa fun a ŋɔ di nara siwɛɛ, ba wa zi bu koti a si ba sou ni.

¹⁹ Ba fun ŋɔ Yesu ni, “Ya nawaalsa nihɛɛ, Mosis, funɛ biksi ya a li Koosa sɛm tɔn ti ni, ‘Nandigi kpa haan ka o wa o haan ti vɛ luli ka o sou, ya nyɛ o niinbe kpa o maan ti haan ti a lul bisa a nyɛ o maan ti ni, chen ni o sɔn wa zi sou.’

²⁰ Nibaala nara banɔpɛ funɛ nyɛn dooni, a ya niin bɛgim awa nyan bɛgim bisa. Ba nihɛɛ fun wa si a kpa haan. O wa o haan ti wa fun lul be ka o baal ti sou.

²¹ Doone nara funɛ sak un ni chen ka kpa o haan ti, o wa o gbanko wa fun lul be ka o gbanko sou. Ba tora tiin ti gbanko funɛ ya chene.

²² Ba nara banɔpɛ ta maga fun kpa luhaan ti. Ba nidigi wa un wa fun lul be, ka ba maga siti. Haan ti gbanko fun wa sou.

²³ Tɔ. A wuzu naa nara maga zi wa si ba sou ni, haan nɔ, anti kaa wa dɔ un? Ba nara banɔpɛ ta maga funɛ kpa unu.”

²⁴ Yesu fun ŋɔ ba, “Ma wa zim Koosa sɛm tɔn ti ni nɛnɛ. Chendaha ma nyuksi nyinbaan. Ma wa vɛɛn zim o kpok gbanko.

²⁵ A wuzu naa nara maga zi wa si ba sou ni, nibaala wa zi bu kpa haanasa. Nihaana gbanko wa zi bu yu baalasa. Ba maga zi wa chi Koosa malaikasa, ba naa nyɛn Koosa tɔhɔn ti ni chene.

²⁶ Ma waa tɔ di nibinsa wa zi si ba sou niu, ma ha wa karimi a li Koosa sɛm tɔn ti ni a zim o muna doonani Mosis fun la na ka din di bugil pum chenn? O funɛ na bugil pum ti, Koosa fun ŋɔ un, ‘Min ya Koosa naa ma nawaalsa Abraham, Aizik awa Jakɔb yaa jɛɛmi.’

²⁷ Ba naa sitɛɛ laata la jɛɛmi Koosa, amaa ba naa kpak miisa. Ma sɛm nan di nibinsa wa zi si ba sou ni, ma nyuksɛ nyinbaanu.”

Koosa Chiksi Naa Kpokee

²⁸ Yesu wa Sajusi tim ta funɛ sɛm chene, Koosa chiksɛ nibiksɛ ta digi fun wa chiŋi a nu chenani ba fun a pɛɛsi Yesu ka o biksi a nyinbaanasa nɛnɛ a nyɛ ba chen. O ka fun a pɛɛsi un, “Koosa chiksɛ naa o leema kpok a kaali a maga?”

²⁹ Yesu fun ŋɔ un, “Chiksɛ nɔ kpok kaali a maga. Ba funɛ sɔbi a li Koosa sɛm tɔn ti ni, ‘Ju tima, maa nu. Ya kunyana Koosa ya nibɛgimnɛ.

³⁰ Maa daŋni un wa ma bambe awa ma siima awa ma lise awa ma kpok maga ni.’

³¹ Nara sak un ni chi nan ni. ‘Maa daŋni dɔŋa a chi chenani maa daŋni ma titi.’ Chiksɛ wa to a kpok kaali a nama.”

³² Koosa chiksɛ nibiksi ti fun ŋɔ un, “Mu kunyana, i sɛm ta ya wutirɛ. Koosa bɛgim nyɛnɛɛ. Nandigi wa bu to dooni a gbaari un ni.

³³ Yaa daŋni un wa ya bambe awa ya lise awa ya kpok maga ni aa kidaŋni ya dɔŋtima a chi chenani yaa daŋni ya titi, nan bɔɛɛ wa ya fu kɔɔrigi sela a nyɛ un.”

³⁴ Baal ti funɛ wa ŋɔ chen, Yesu fun zim di o lisi o wɛu nɛnɛ. O fun ŋɔ un, “O ka tamnɛ ka i zi zu Koosa koor ti ni.” Dooni nandigi wa fun kpak bambe a la zi pɛɛsi un wu digi.

Naa Koosa Fun Ŋɔ Di O Zi Tumu Chen Wɛ

³⁵ Yesu funɛ biksi ba a li Koosa bar jɛɛmi dam ti ni, o fun a pɛɛsi ba, “Yɛrɛ Koosa chiksɛ nibiksɛ ta yaa sɛm di Kristo ya koor Devid lullɛ? (Ba lisu di Devid funɛ ya nizen a kaali un. Chendaha ba yaa sɛm chene.)

³⁶ Koosa siim weri ti funɛ biksi Devid saha digi, Devid fun a sɛm Kristo wɛ, ‘Mu kunyana Koosa funɛ ŋɔ mu kunyan ni, kani mu nihɛɛti bar kani ni, ka mu nyɛ i dɔma burgi i yosa.’

³⁷ Devid titi yir un o kunyana chen ni, yɛrɛ o bu kaa ya a zen a kaali un?” Zɛmɛ ta fun nu Yesu sɛma. O ya ba lɛmlɛm.

Yesu Fun Tɛ Ba Nin A Du Ju Tim Nibiksɛ Ta Ni

³⁸ O funɛ biksi ba chene, o fun ŋɔ, “Ma doso ma ta nyɛ Koosa chiksɛ nibiksɛ ta yaa kimur ma. Baa daŋni takta ziŋɛ laarɛ kinkan a la daŋni ba val yau ni, chen ni nara zi nyɛ ba jirimau a kizaami ba.

³⁹ Ba yaa daŋni ba kani kor were ni a li ba bar lagmi dɛɛni ni. Ba wa lagmi a di diwe wuzu zen wuzu, ba yaa daŋni ba di nihɛɛta bar diili nɛɛ.

⁴⁰ Ba yaa zaami Koosa wa ba zaamirɛ a vusi a bu ŋmɛ luhaana kina. Koosa wa di ba sɛria, ba zi wa na namsiu kinkan a kaali ba dɔŋtima.”

Luhaan Fara Tiina Fun Kpa O Kin Maga A Nyɛ Koosa Ni

⁴¹ Yesu fun la kani a dugli doonani ba yaa kpa ba malɛ a dau a nyɛ Koosa ni. O fun kani a il nara tima malɛ bar dawi ti ni. Malɛ tim damata fun wa dooni a wa dau ba malɛ.

⁴² Luhaan fara tiina ka fun wa a wa kpa o kobosa lɛ a dau.

⁴³ Yesu fun yir o gantɛl tiŋsi ta a ŋɔ ba, “Maa nu mu wati nɛnɛ. Luhaan fara tiin nɔ kobosa lɛ kaali kin tim na malɛ.

⁴⁴ Ba lisɛ ba malɛ damata tuhu nɛɛ a wa dau, amaa o waa kpa o malɛ magwa a wa dau.”