Maak 1 - Tampulma

Jɔn Fun Mɔɔli Nyabaan Ni

¹ Koosa laaboor weri piili nɛɛnɛ. O ya o be Yesu Kristo wɛwa.

² Koosa witiina, Azaaya, funɛ sɔbi a li Koosa sɛm tɔn ti ni chen a ŋɔ di Koosa ŋɔ, “N zi tum n nitumi o zi te i suwachak a la saksi a nyɛ hin i wa.

³ O zi wa nyɛn nyabaan niu a mɔɔli. Ba zi nu o tau ka o ŋɔ, ya kunyana wau. Maa saksi ka o zi wa. Ma kɔɔri o nyinbaan o weri.” Chene Azaaya fun sɔbi a li Koosa sɛm tɔn ti ni chen, chen funɛ ya.

⁴ Baal digi fun si a wa nyabaan ti. O sɔn funɛ ya Jɔn. O fun biksi narau Koosa wɛ a la chaksi ba wa ni ni. O fun ŋɔ ba, “Ma maga gil ma tum tagna a burgi a tiŋ Koosa nyinbaan. Ma ya chen, n zi chaksi ma wa ni niu ka Koosa zi gil ma tum tagni ta a nyɛ ma.”

⁵ Nidamata fun li Judia pulum awa Jɛrusalɛm a kaali o wati. Ba funɛ nu o biksi ti, ba fun la nɔɔni di ba tum tum tagnau ka o fun kpa ni a chaksi ba a li Jɔɔdan mɔɔga ni.

⁶ Jɔn kilaarɛ funɛ ya lakom tɔnnɛ, ka o kpa ganɛ a vɔu o chɛra. O funɛ di hɔɔna awa toonne.

⁷ O funɛ wi aa la ŋɔ, “Nandigi nyɛn n gantɛl ni aa wa. Waa ya nihɛɛ a kaali min. N kpurɛu wa n gbiri o suwachak niu a ur o natausa a nyɛ un.

⁸ N kpa nire aa chaksi ma bara, amaa naa la wa chen, o ka wa kpa Koosa siim weri a du ma ni.”

Jɔn Fun Chaksi Yesu Wa Ni Ni

⁹ Chen saha ti Yesu fun li tɔhɔn naa ba yir Nazarɛt a li Galili pulum ni. O fun wa Jɔn wati di o kpa ni a chaksi un.

¹⁰ Saha naa Jɔn fun chaksi un chen ka Yesu fun li mɔɔga ti tuha a wa li chen, o fun vaan na buudaha ka o puk ka o na Koosa siim weri ti. O funɛ chi komne a tu wa a zɔŋ o nyuhu ni.

¹¹ Ba fun nu ta a li buudaha ni ka o ŋɔ, “Mu be daŋni nɛɛnɛ. Mu si su nara chen.”

¹² Doone Koosa siim weri ti fun kpa Yesu kaali kɔha doonani sela fun nyɛn.

¹³ O fun nyɛn doon wuzu fumnaasi. Saha naa o fun nyɛn dooni chen, sintana fun wa o wati di o wa mur un o tum tum tagna, amaa Koosa fun tum o malaikasau di ba wa suŋi un.

Yesu Fun Yir Nyinkpaksa Nara Banaasi

¹⁴ A gantɛl nɛɛ koor Hɛrɔd fun nyɛ ba kpak Jɔn a tɔ un dɛ, Yesu fun si dooni a kaali Galili pulum a wa mɔɔli Koosa laaboor weri ti a nyɛ nara ni,

¹⁵ a fun ŋɔ ba, “Saha teliu wa Koosa koora dugli. Ma gil ma tum tagna a nyɛ ma se su o laaboor weri ti, chen ni o zi dɔ mau.”

¹⁶ Yesu funɛ val Galili bɛɛŋ nɔ ni, o fun na nara balɛ, Simɔn awa o niinbe Andiru, ka ba yo cham bɛɛŋ ti ni.

¹⁷ Yesu fun yir ba a ŋɔ, “Ma si a wa tiŋ min. Ma tum ya nyinsa kpaksirɛ hali wa zinan, amaa lalaknɔ mu kpa tum fali a nyɛ ma di ma nyɛ nara wa tiŋ min.”

¹⁸ O fun vaan sɛm chen, ba fun gil ba chamna a si tiŋ un.

¹⁹ O funɛ bu kaali suwachak tama, o fun na niinbisa ba nara balɛ, Jems awa Jɔn, Zɛbɛdi bisa. Ba funɛ nyɛn ba arŋ tuhu ni a kɔɔri ba chamna.

²⁰ O fun a yir ba. Ba fun a gil ba nyana awa o tumtumsa arŋ ti ni ka ba tiŋ Yesu.

Yesu Fun Duŋni Alizin Tagin A Li Baal Digi Ni

²¹ Ba fun wa tɔhɔn naa ba yir Kapɛrnaum. Ba hiisi wuzu ti funɛ wa tel, Yesu kaali a la zu ba bar lagmi dɛ a fun biksi ba Koosa wɛ.

²² Nibinsa ba naa funɛ nu o biksi chen, o ya ba alaazibu, domi o biksi ti wa fun chi Koosa chiksɛ nibiksɛ biksi. O funɛ kpak kpoku a kaali ba biksi ti.

²³ Doone baal naa alizin tagin fun kani o nyuhu ni fun wa ba bar lagmi dɛ ti a tɛsi kinkan a ŋɔ,

²⁴ “Hee, Yesu Nazarɛt nar, baŋnɛ ii daŋni ya wati? I wa bar nɔ di i wa chɔk yau. Mu zimu di i ya tu chaan tiinne. I ya Koosa bere.”

²⁵ Yesu fun ŋɔ alizin tagin ti ni, “Gil chɛɛma a kili baal ti ni.”

²⁶ Alizin tagin ti nyɛ baal ti bara jigiri kinkan, a huusi a li un ni.

²⁷ Nibinsa ba naa funɛ nyɛn dooni chen, o ya ba alaazibu kinkan. Ba funɛ ŋɔ dɔŋ ni, “Baŋa nɛɛnɛ? Baŋ biksi fali nɛɛnɛ? Ma wa na chenani o kpak kpok kinkan a koti a ŋɔ alizin tagna di a li nara ni a laa?”

²⁸ Lalaknɔ ba naa maga nyɛn Galili pulum ni fun nu chenani o tum.

Yesu Fun Tiibi Nidamata

²⁹ Yesu fun si a li ba bar lagmi dɛ ti ni a la. O wa Jems awa Jɔn fun kaali a la zu Simɔn awa Andiru dama,

³⁰ ka Simɔn hila funɛ wi. Kabilima funɛ kpak un, ka o fun chɔ dam ni. Saha naa Yesu fun la tel dooni chen, ba ŋɔ un haan ti wɛ.

³¹ Yesu fun zu o dɛ ti a la kpak o nin a suŋi un di o si chiŋi. O funɛ ya chen, o kabilima ti fun peti. O piili a ya diwe di o nyɛ ba.

³² Nha funɛ chel chen, tɔhɔn ti tima kpa ba wichɔɔrsa awa ba naa alizin tagna nyɛn ba ni a wa Yesu wati.

³³ Tɔhɔn ti tima fun lagmi Yesu dam nyɛni suwachak ni.

³⁴ Yesu fun tiibi nara kinkan, ba naa kpak wichɔɔr ta a duŋni alizin tagna kinkan a li nara ni. Alizin tagin tima maga funɛ piin zim unu. Adaha Yesu wa fun nyɛ ba sɛm wu digi.

Yesu Fun Biksi Galili Tima Koosa Wɛ

³⁵ Zimal hɛɛta yeligi saha, Yesu funɛ siu a li tɔhɔn ti ni a kaali bar digi o duŋduŋ di o la sumi Koosa dooni.

³⁶ Chɔɔsa funɛ wa pisi, Simɔn awa o chɛnsa fun si dooni a nyini di Yesu wa to a fun si a la dɛu un.

³⁷ Saha naa ba wa na un chen, ba fun ŋɔ un, “Nara maga la daŋni hin.”

³⁸ Yesu fun ŋɔ ba, “Ma nyɛ ya si a la suwachak tɔ wisa, a naa kaɛɛ, chen ni n zi la ŋɔ ba Koosa wɛu ba nu. Chendaha n fun wa.”

³⁹ Ba fun si a gba a go Galili pulum a la ŋɔ nara ni Koosa wɛ ba bar lagmi dɛɛni ni, a la duŋni alizin tagna a li nara ni.

Yesu Fun Tiibi Zagum

⁴⁰ Zagum digi fun si a wa gbiri o suwachak ni a sumi un, “I fu la nɔɔni, i fu tiibi mu wichɔɔr ti nɔu.”

⁴¹ Yesu fun ɔm un siki a kpa o nin a gbaŋsi un a ŋɔ, “N daŋni i na alaafɛu. N tiibi hinu.”

⁴² O funɛ ŋɔ chene, zagumti ti vaan gil un, ka o na alaafɛ.

⁴³ Yesu fun ŋɔ un kpok ni, “Kila.

⁴⁴ I fiɛŋ i sɛm nandigi ni, amaa kila Koosa dam kɔkɔɔrsi ta digi wati, chen ni o zi koti a na hin. O na hin, i nyɛ o kɔɔri kɔɔri ti a nyɛ hin a chi Mosis funɛ biksi ma saha digi chen. Chen la zi biksi nara di i zagumti ti petiu.”

⁴⁵ Zagum ti fun kaali a vɛ tiŋ chenani Yesu ŋɔ un, amaa o funɛ sɛm nara maga niu chenani Yesu ya nyɛ un. Domi o funɛ sɛm chen, Yesu wa fun koti a zu tɔsa see o sogli a wa, ka o fun kaali a la nyɛn nyabaan ni. Lalaknɔ nara fun li bawu maga a wa o wati.