Luk 9 - Tampulma

Yesu Fun Tum O Gantɛl Tiŋsa Baa Tiibi Nara

¹ Wuzu digirɛ Yesu fun yir o gantɛl tiŋsa fidalɛ ta ba wa o wati. Waa funɛ nyɛ ba kpok di ba duŋni alizin tagna a li nara ni a kitiibi ba wichɔɔrsa.

² O funɛ daŋni o tum bau ba la biksi nara di Koosa daŋni o dɔ bau.

³ O fun ŋɔ ba, “Ma wa kaa la ma fiɛŋ ma zer buna a chi kapursa, diwe, malɛ, koo taktasa lɛ.

⁴ Ma wa la tel tɔha, ma nyɛn dam bɛgim naa ba nyɛ ma di ma chɔ chen, hali a wuzu naa ma wa li tɔhɔn ti ni.

⁵ Amaa ma wa zu tɔ digi ka tɔhɔn ti nara vɛ la ma duuli, ma li dooni a piisi ma naasa hɛɛra a ta, chen ni ba zi zim di a li ba nɛɛ. O wa li ma ni.”

⁶ O funɛ sɛm chen peti, o gantɛl tiŋsi ta fun gba kaali tɔsi ta maga a la biksi nara Koosa laaboor weri ti wɛ a la tiibi nidamata.

Chenani Yesu Fun Tum Muksi Hɛrɔd Kinkan

⁷ Hɛrɔd naa funɛ ya Galili tim koor chen, funɛ nu chenani Yesu gantɛl tiŋsi ta fun tum chen, o fun a muksi un kinkan. O fun nu ka nara bɔnɛ sɛm di Jɔn naa la chaksi nara wa ni ni chen si o sou niu.

⁸ Bɔnɛ fun ŋɔ di Koosa witiina Ɛlaija funɛ bur wa. Bɔnɛ ka ŋɔ di Koosa witinsi ta digi si o sou ni.

⁹ Hɛrɔd fun ŋɔ o titi ni, “Min funɛ teŋ Jɔn nyuha. Anti ya baal nɔ mu nu o wɛ nan?” Chen saha ti o funɛ kpaŋiu di o na Yesu.

Yesu Fun Kpa Diwe A Dɛɛsi Nara Tusugsa Nyuu

¹⁰ Yesu nitumɛ fidalɛ ba naa o fun tum chen, bur wa o wati a ŋɔ un kin naa maga ba tum. Ba funɛ sɛm peti, o wa ba fun kaali tɔhɔn naa ba yir Bɛtseida chen ba duŋduŋ.

¹¹ Zɛmɛ ta funɛ nu di ba kaalu, ba fun tiŋ ba kaali. Yesu fun la ba du a biksi ba Koosa koor ti wɛ a tiibi ba wichɔɔrsa.

¹² Nha funɛ wa dugli cheli, o gantɛl tiŋsa fidalɛ ta fun wa ŋɔ un, “Bar nɔ ya nyabaannɛ. Nyɛ zɛmɛ ta kila ŋmaana awa tɔ wisa a naa go bar nɔ a la yau diwe a di a dɛu bar hiisi.”

¹³ Yesu fun ŋɔ ba, “Ma titi nyɛ ba diwe ba di.” Ba fun pɛɛsi un, “Ei, yɛrɛ ya kaa ya na diwe a nyɛ nara nama ni ba di? Ya kpak boroborosa nyuu awa nyinsa lɛwa ya wati bar nɔ.”

¹⁴ Nara tusugsa nyuu funɛ nyɛn doon a daŋni ba di diwe. Yesu fun ŋɔ o gantɛl tiŋsi ta ni di ba nyɛ nara tima maga kani pukpuka a la tel fumnyuu.

¹⁵ Ba fun tiŋ chenani o sɛm chen a nyɛ ba maga kani.

¹⁶ Doone Yesu fun zer boroborosa nyuun ta awa nyinsa lɛ ta a nyini buudaha ni a sumi Koosa a du a ni a chɔksi a nyɛ o gantɛl tiŋsi ta ni di ba kpa a bɔni nara tima.

¹⁷ Ba maga fun se puŋ. Ba funɛ se peti chen, Yesu gantɛl tiŋsi ta fun pa ba kidikaalɛ tima a su chenchisa fidalɛ.

Chenani Pita Fun Sɛm Yesu Wɛ

¹⁸ Wuzu digi Yesu funɛ sumi Koosa o duŋduŋ, o gantɛl tiŋsi ta fun wa o wati. O fun burgi a pɛɛsi ba, “Yɛrɛ nibinsa yaa yir min?”

¹⁹ Ba fun ŋɔ, “Bɔnɛ yaa yir hin Jɔn naa la chaksi nara wa ni ni chene. Bɔnɛ yir hin Ɛlaija. Bɔnɛ ka ŋɔ di Koosa witinsi tima digi bur wa.”

²⁰ O fun pɛɛsi ba, “Yɛrɛ ma ka yir min?” Pita fun ŋɔ, “Hin ya Kristo naa Koosa fun ŋɔ di o zi wa tumu wuzu digi chen.”

Yesu Fun Sɛm Di O Zi Namsiu A Sou

²¹ Yesu fun ŋɔ ba, “Ma doso ma ta ŋɔ nandigi ni chen wɛ.

²² Ba zi wa ya n waa nibine be n namsi kinkan. Tɔhɔn nihɛɛta, Koosa dam kɔkɔɔrsi ta awa Koosa chiksɛ nibiksɛ ta zi wa vɛu a kpu min, amaa wuzu butora wuzu n zi si a li mu sou niu.”

²³ Doone o fun burgi a ŋɔ zɛmɛ ta ni, “Nar la daŋni o tiŋ min, o vɛ o tutɔ a zer o daakakli a baasi aa tiŋ min.

²⁴ Nar la daŋni o si sɛrɛ wa o titi nyɛni, o zi wa chelu. Nar kpa min a te o tutɔ nyɛni, o zi wa na Koosa mi fali tiu.

²⁵ Nar koti a na tɛɛnɛ nɔ maga lɛmlɛm, baŋ nyɔɔra o wa di? O wa zi wa na Koosa mi fali ti.

²⁶ Nar kpa hiisa a du mu biksi nɔ ni lalaknɔ, saha naa n waa nibine be wa bur wa awa Koosa jirima awa o malaikasi ta, n gbanko zi wa kpa hiisa a du un niu.

²⁷ Maa nu mu wati. Ma bɔnɛ nyɛn bar nɔ, ma wa zi sou hali Koosa zi wa dɔ nara awa kpok ni.”

Chenani Yesu Se Fun Chaani A Chi Nha

²⁸ A wuzu bunɔra gantɛl ni Yesu funɛ daŋni o la sumi Koosa. O fun yir Pita, Jems awa Jɔn ba la zini bi digi nyuha.

²⁹ Yesu funɛ sumi Koosa chene, o si nyine fun a chɛrgi ba suwachak ni. O kilaarɛ gbanko fun chɛrgi a pilimi kinkan aa chaani.

³⁰ Ɛlaija awa Mosis fun vaan yɛli a wa li Yesu wati a sɛm sɛma.

³¹ Ba bara awa ba kilaarɛ gbanko funɛ chaaniu. Yesu wa ba fun sɛm di o wa zi vusi ka o tiŋ Koosa tutɔ a la sou Jɛrusalɛm ni.

³² Pita awa o dɔŋtima funɛ chɔ dore. Ba fun yɛrsi a na Yesu wa nara balɛ ta ka ba chaani.

³³ Nara balɛ ta fun saksi di ba la, Pita fun ŋɔ Yesu ni, “Mu kunyana, o ya wu werire ya nyɛn bar nɔ nan. Nyɛ ya du lɛuwa atora a nyɛ ma, chen ni i kpak kibɛgim, Mosis kpak kibɛgim, Ɛlaija gbanko kpak kibɛgim.” O wa zim chenani o sɛm.

³⁴ O funɛ sɛm chene, dobaal fun wa tɔ ba, zuuuu. Dobaal ti yaali fun nyɛ hansura kpak Yesu gantɛl tiŋsa nara batora ta.

³⁵ Ba fun nu ta dobaal ti ni ka o ŋɔ, “Mu be nɛɛnɛ mu fun yisi a nyɛ mu titi ni. Maa nu o sɛma.”

³⁶ Ba funɛ nu peti, ba wa fun bukoo na nandigi amaa Yesu duŋduŋ funɛ nyɛn ba wati dooni. Ba wa Yesu funɛ li bi ti nyuha a tu wa, ba wa fun ŋɔ nandigi ni chenani ba na.

Yesu Fun Duŋni Alizin Tagin A Li Be Digi Ni

³⁷ Chɔɔsa funɛ wa pisi, zɛmɛ kinkan fun wa Yesu wati.

³⁸ Zɛmɛ ta nidigi fun ŋɔ un, “Mu kunyana, nyini mu be bɛgim nɔ bar nɔ.

³⁹ Alizin tagin nyɛn un ni a yaa nyɛ o huusi. O bara maga yaa gigmi o chel tɛɛnɛ ni ka nantɔ fukla li o nɔ ni. O nyɛ o namsi kinkan a vɛ li un ni.

⁴⁰ N sumi i gantɛl tiŋsi ta di ba duŋni alizin tagin ti a li mu be ti ni. Ba wa fun koti a duŋni un.”

⁴¹ Yesu fun burgi a ŋɔ zɛmɛ ta ni, “Ma zinan nara tum tum tagniwa ka ma se vɛ su min. Saha yɛrɛ mu kaa nyɛn ma wati hali ma wa zim min? Saha yɛrɛ n zi ya ma kanyita?” O fun ŋɔ be ti nyan ni, “Kpa i be ti kuwa mu wati.”

⁴² O funɛ kpa be ti a wa, alizin tagin ti fun si un ni kinkan a zer un a lɔ tɛɛnɛ ti ni. Yesu fun ŋɔ alizin tagin ti ni o li be ti ni ka o tiibi un a nyɛ o bur kaali o nyan ti wati.

Yesu Fun Bu Sɛm O Sou Ti Wɛ

⁴³ O ya zɛmɛ ta alaazibu kinkan di Koosa funɛ nyɛ Yesu o kpok zenu di o tum chen. Kin naa maga Yesu funɛ tum ya ba alaazibu chene, o fun ŋɔ o gantɛl tiŋsi ta ni,

⁴⁴ “Ma ta suglɛ chenani mu ŋɔ ma. Ba zi wa kpa n waa nibine beu a du nara nisa ni.”

⁴⁵ Amaa o sɛm ta mun funɛ sogli ba wati. Chendaha ba wa fun zim a mun a la ɔm di ba pɛɛsi un.

Anti Ya Nihɛɛ A Li Ma Tuhu Ni?

⁴⁶ Wuzu digi Yesu gantɛl tiŋsi ta funɛ di naa kaa ya nihɛɛ amɔrɛ.

⁴⁷ Yesu funɛ zim kinkin naa nyuhu ni ba di amɔrɛu, o fun zer be a chiŋsi o chakpal ni,

⁴⁸ a ŋɔ ba, “Nar la be nɔ a du di oo tiŋ min daha, minnɛ o la du chen. Nar la min, naa tum min chene o la du. Nar kpa o titi a burgi bichɛl tiina a tum a nyɛ o dɔŋtim ni, waa ya suwachak tiina.”

Ba Naa La Tum Yesu Tuma Wɛ

⁴⁹ Jɔn fun ŋɔ un, “Mu kunyana, ya funɛ na baal digirɛ ka o kpa i sɔn aa duŋni alizin tagna a li nara ni. O wa fun ya ya nidigi. Chendaha ya fun ŋɔ un di o gil.”

⁵⁰ Yesu fun ŋɔ o wa o gantɛl tiŋsi ta ni, “Ma bu na un ka o ya chen, ma ta nyɛ o gili. Nar wa ya vɛ yo dɔŋa, ya wa un ya nibɛgimnɛ.”

Chenani Samaria Tima Fun Vɛ Di Ba Wa La Yesu A Du

⁵¹ Saha naa wuzu fun wa dugli di Yesu bur kila Koosa tɔhɔn ti, o fun kpak un o bambi ni di o bur a la Jɛrusalɛm.

⁵² O fun te tum ba naa tiŋ un bɔnɛ o suwachak ni di ba la tel tɔ digi ba saksi a pɔ un. Ba naa ba funɛ yir Samaria tima funɛ nyɛn dooni.

⁵³ Yesu funɛ la tel dooni, ba wa fun la un du. Ba funɛ zimu di o nyɛn nyinbaan nɛɛ a la Jɛrusalɛm.

⁵⁴ O gantɛl tiŋsi ta, Jems awa Jɔn, funɛ nu chenani tɔhɔn ti tima fun sɛm, ba pɛɛsi Yesu ni, “Ya kunyana, i daŋni ya yir Koosarɛ o kpa din a li buudaha a wa chɔk baa?”

⁵⁵ Yesu fun burgi a zulimi ba a ŋɔ di ba si dooni.

⁵⁶ Ba fun kaali tɔ digi.

Ba Zi Ya Yesu Gantɛl Tiŋsau

⁵⁷ Ba funɛ nyɛn nyinbaan ni aa la, baal digi fun wa ŋɔ Yesu ni, “N saksɛu di n tiŋ hin a la doonani ii la.”

⁵⁸ Yesu fun ŋɔ un, “Helsa nyɛn bɔ ni ka zimebisa nyɛn zaŋ ni, amaa n waa nibine be, n wa kpak doonani n zi chɔ a chɔ do.”

⁵⁹ Yesu fun ŋɔ baal digi ni, “Tiŋ min.” Amaa o funɛ ŋɔu, “Mu kunyana, n gbanko daŋni n tiŋ hinu, amaa nyɛ mu te a la sogli mu nyana.”

⁶⁰ Yesu fun ŋɔ un, “Tiŋ min lalaknɔ a la biksi nara di Koosa daŋni o dɔ bau. Nyɛ ba naa vɛ tiŋ min sogli un.”

⁶¹ Baal digi fun wa ŋɔ Yesu ni, “N zi tiŋ hinu, amaa nyɛ mu te la chausi mu dam walɛ.”

⁶² Yesu fun ŋɔ un, “Nar tiŋ min a la nyini gantɛl ni, mu wa kilisi un o biksi nara Koosa koor ti wɛ.”